Kovaudifi vakwetu vOuhamba ovaholike:

KALA nee ngeno wa fa u liwete u li oshilyo shoukwaneumbo waBetel moBrooklyn ongula yEtitano 2 Oktoba 1914. Natu tye nee ou li omutumba poshipundi opo ho kala alushe pefimbo loshuumbululwa, mwa teelela omumwatate C. T. Russell a fike. Opo nee, ou wete eshi omumwatate Russell ta yeulula omuvelo womonhele yokulila omo mu li. Okwa mwena po oule wokafimbo ngaashi ha ningi shito, ndele ta popifa nehafo oukwaneumbo waBetel ta ti: “Mwa lele po amushe!” Ndele ponhele yokukala omutumba poshipundi shaye osho shi li koxulo yoshitaafula, okwa hakela omake ndele ta ningi eshiivifo litunhula tali ti: “Omafimbo ovapaani okwa xula po; eehamba doiwana itadi ka pangela vali.” Eshiivifo olo ola li lihafifa neenghono kwoove molwaashi owa kala nale wa teelela oshinima osho okudja ngoo eshi wa ninginifwa. Mu li oukwaneumbo waBetel, omwa pandula onghundana oyo ye mu shambula, nomwa hakela omake efimbo lile.

 Okudja eshi omumwatate Russell a li a ninga eshiivifo olo litunhula, opa pita paife omido efele lwaapo. Ndele mbela Ouhamba owa pondola shike okudja pefimbo olo? Owa pondola shihapu neenghono. Jehova okwa kala ta yelifa nokudeula oshiwana shaye kanini nakanini okupitila melongekido lOuhamba, osho sha li ashike omayovi manini mo 1914, ndele paife oshi dulife pomamiliyona aheyali netata. Ouwa ulipi wa mona pauhandimwe meenghedi omo Jehova a kala ta deula oshiwana shaye?

Kunena, luhapu ohatu udu ovamwatate tava ti, “Etemba laJehova lomeulu otali pula komesho!” naasho oshi li mondjila. Ashike, oushili oyoo kutya okudja mo 1914, etemba lomeulu, olo tali faneke oshitukulwa shehangano laJehova shomeulu, ola kala tali endelele neenghono, ngaashi to ke shi mona moshishangomwa eshi ngeenge owe shi lesha noukeka. Opo onghundana iwa i dule okuudifwa mounyuni aushe, ovaudifi vOuhamba ova kala tava longifa eenghedi di lili noku lili dokuudifa, ngaashi okuudifa okupitila moifokundaneki, okuudifa taku longifwa omapulakata, eekino, oukalata vokuyandja oundombwedi, eengalamafona, oradio nosho yo ointaneta.

Molwaashi Jehova okwa nangeka noupuna oilonga yetu, paife ohatu nyanyangida oishangomwa yetu oyo ihokwifa momalaka e dulife po 700 nohatu i yandje kukeshe umwe nopehe na okupula ofuto. Ope na yo ovaliyambi ovo hava kwafele mokutunga Omalupale Ouhamba, Omalupale Oyoongalele nosho yo oitaimbelewa, kutya nee omoilongo oyo ya hepuluka ile oyoyo ya hepa. Ngeenge moitukulwa yonhumba mwa holoka oiponga yopaushitwe, ovamwatate novamwameme ovaholike ohava ka kwafela meendelelo ovo ve li moitukulwa oyo, osho tashi ulike kutya ova ‘dalwa shili va kwafe moluhepo’ ngaashi Ombibeli tai ti. — Omayel. 17:17.

Omafimbo amwe, ovawiliki vomalongelokalunga novapataneki vakwao ohava “eta oixuna mokupengifa omhango,” ashike otashi pameke eitavelo okumona kutya peemhito dihapu eenghendabala davo oda ningifa ‘evangeli li tandavele,’ ponhele yoku li ya moshipala ngaashi va li va lalakanena. — Eps. 94:20; Fil. 1:12.

Molwaashi omu li ‘ovapiya’ vakwetu, oshi li oufembanghenda kufye okukala hatu longeleni Kalunga moukumwe. Shilipalekweni kutya otu mu hole neenghono amushe. Ohatu ilikana opo embo eli li mu kwafele mu kale mwa lenga efyuululo leni lopamhepo shi dulife nale. — Mat. 24:45.

Jehova ne mu nangeke noupuna,

Ovamwaxo,

Olutuwiliki lEendombwedi daJehova