NATU tye nee owa didilika kutya mushiinda shoye okwa kala ta konenene oukwaneumbo weni. Fiku limwe eshi wa pita peumbo lavo, nye tamu popifafana, lwopokati opo okwe ku pula kutya, “Omolwashike mwa yooloka ko kovanhu momudingonoko?” Ove owe mu pula kutya, “Twa yooloka ko ngahelipi?” Ye okwa nyamukula ta ti: “Shuude nye Eendombwedi daJehova, hasho? Omwa yooloka filufilu. Elongelokalunga leni ihali ningi ngaashi omalongelokalunga makwao, pashihopaenenwa, ihamu dana omafiku omafudo, ihamu kufa ombinga moinima yopapolotika noihamu i koita. Ihamu nu omakaya. Navali, oukwaneumbo weni otau monika u na eenghedi diwa. Oshike she mu ningifa mu kale mwa yooloka ko ngaho?”

Enyamukulo lepulo olo ole likolelela koshinima eshi: Ohatu dulika komifikamhango dOuhamba waKalunga. Ohamba yOuhamba oo, Jesus, ohai tu kwafele alushe tu kale twa koshoka. Ohai tu kwafele tu shikule oshikoti shayo, nokungaho ohatu kala twa yooloka ko kounyuni ou wa kolokosha. Moshitukulwa eshi, ohatu ka mona nghee Ouhamba wopaMessias wa kwafela oshiwana shaJehova shi kale sha koshoka pamhepo nopaenghedi noshi ninge omalunduluko opahangano, opo shi dule oku mu fimanekifa.