1, 2. Eshivo la denga mbada lilipi twa shivwa nalo, nepulo lilipi hatu dulu okulipula?

 ESHIVO la denga mbada lilipi wa li wa shivwa? Otashi dulika u diladile komhito yonhumba eshi wa li wa shivwa koshiningwanima she likalekelwa, ngaashi kohango yookaume koye kopofingo. Ile otashi dulika u diladile kwaashi wa li wa ifanwa u ka hovele oilonga yonhumba ya fimana. Ngeenge owa li wa shivwa peemhito da tya ngaho, nopehe na omalimbililo owa li wa hafa neenghono, nowa li u udite nokuli wa fimanekwa. Ndele osho shihokwifa neenghono oshosho kutya ope na eshivo la denga mbada elela olo keshe umwe womufye ta shivwa e li tambule ko. Ngeenge otwe li tambula ko, okukalamwenyo kwetu otaku ka kala ku na eityo lela. Onghee hano, okutambula ko eshivo olo oko etokolo la fimanenena olo hatu dulu okuninga monghalamwenyo.

² Eshivo olo olilipi mbela? Eshivo olo ola dja kuJesus Kristus, Omona ewifa waJehova, Kalunga omunaenghono adishe. Otali hangwa mOmbibeli, muMateus 19:21, omo Jesus a ti: “Ila, u shikule nge.” Paulelalela, Jesus ota shivi keshe umwe womufye. Onghee hano, oshiwa okulipula kutya: ‘Mbela ohandi ka tambula ko ngoo eshivo olo?’ Otashi dulika u diladila kutya, ‘Olyelye ta ka anya okutambula ko eshivo olo la denga mbada?’ Mupya munene, ovanhu vahapu ova anya oku li tambula ko. Omolwashike mbela?

3, 4. (a) Oshike sha li shi twifa olwisho shi na sha nomulumenhu oo a li e uya kuJesus noku mu pula kombinga yomwenyo waalushe? (b) Omulumenhu oshipuna oo omunyasha okwa li e na omaukwatya mawa elipi oo Jesus a li a hokwa muye?

³ Diladila komulumenhu wonhumba oo kwa li a shivwa odikilila kuJesus a ninge omuhongwa waye omido 2 000 lwaapo da  pita. Omulumenhu oo okwa li a tumbala neenghono. Okwa li e na oinima yopatatu oyo ovanhu hava tale ko ya fimana noitwifa olwisho: okwa li omunyasha, okwa li e na oupuna nosho yo eenghonopangelo. Ombibeli oye mu popya e li “omunyasha,” “oshipuna unene” nosho yo “elenga.” (Mateus 19:20; Lukas 18:18, 23) Ndele okwa li a mona omhito ye likalekelwa. Okwa li a uda eshi Omuhongi Munene, Jesus, a li ta hongo, nokwa li a hokwa ehongo laye.

⁴ Ovapangeli vahapu vopefimbo olo ova li va dina Jesus. (Johannes 7:48; 12:42) Ndele omupangeli oo omunyasha okwa li e mu fimaneka. Ombibeli otai ti: “Eshi [Jesus] a dja mo, ta i kondjila, omulumenhu umwe a tondoka e uye kuye, ndee ta tu eengolo koshipala shaye, ndee ta ti kuye: Omuhongi muwa, ondi nokulonga shike ndi mone omwenyo waalushe?” (Markus 10:17) Didilika kutya omulumenhu oo okwa li a halelela okupopya naJesus, molwaashi okwa tondokela kuye moipafi yovanhu, ngaashi ashike eehepele novanhu vongaho va li hava ningi. Kakele kaasho, okwa twa eengolo nefimaneko koshipala shaKristus. Osho otashi ulike kutya okwa li ngoo e na elininipiko nokwa li e shii omhumbwe yaye yopamhepo, na Jesus okwa li a hokwa omaukwatya aye mawa a tya ngaho. (Mateus 5:3; 18:4) Onghee hano, itashi kumwifa eshi ‘Jesus a li e mu tala noku mu hokwa.’ (Markus 10:21) Ndele Jesus okwa li a nyamukula ngahelipi epulo lomulumenhu oo omunyasha?

5. Jesus okwa li a nyamukula ngahelipi omulumenhu omunyasha oshipuna, notu shi shii ngahelipi kutya ka li a hala okutya oshinima “shimwe” osho omunyasha oo a li a pumbwa osho okuninga ohepele? (Tala yo eshangelo lopedu.)

⁵ Jesus okwa li a yelifa kutya oiteelelwa yaXe i na sha noku ka mona omwenyo waalushe oya tumbulwa mOmishangwa. Okwa li a tofa omadiladilo onhumba, nomulumenhu oo omunyasha okwa ti kutya okwa kala ta diinine oiteelelwa oyo yOmhango yaMoses. Ndele molwaashi Jesus okwa li e na eendunge dokuyoolola, okwa mona kutya omupangeli oo okwa li e na oupyakadi wonhumba. (Johannes 2:25) Okwa mona kutya okwa li e  na ounghundi wopamhepo wa kwata moiti. Onghee hano, Jesus okwa ti kuye: “Shimwe she ku [pumba.]” Oshike mbela sha li she mu pumba? Jesus okwa weda ko ta ti: “Inda u ka [landife po] oinima yoye aishe ei u na, ove u i yandje keehepele.” (Markus 10:21) Mbela Jesus okwa li a hala okutya omunhu oku na okulandifa po oinima yaye aisheaishe ndele ta kala po hautuka opo a dule okulongela Kalunga? Hasho a li a hala okutya ngaho. * Okwa li ashike a hala okudivilika oshili yonhumba ya fimanenena.

6. Eshivo lilipi Jesus a li a shiva nalo omupangeli omunyasha oshipuna, nonghedi omo oshipuna osho she linyenga otai holola shike kombinga yoikala yomutima washo?

⁶ Opo Jesus a divilike kutya omulumenhu oo okwa li a pumba shike, okwe mu shiva neshivo eli litunhula neenghono a ti: “Ila, u shikule nge.” Diladila ashike omulumenhu oo ta shivwa odikilila kOmona waKalunga Omukombadambada opo e mu shikule. Jesus okwa li nokuli e mu udanekela ondjabi inene kuhe na vali, eshi a ti: “To kala u nemona meulu.” Mbela omulumenhu oo okwa tambula ko eshivo olo la denga mbada? Ombibeli oya ti: “[Okwa dja] po a nyika oluhodi, osheshi ye okwa li e noinima ihapu.” (Markus 10:21, 22) Eendjovo daJesus odo omulumenhu oo a li ina teelela oda li da holola kutya oku na oikala yomutima ya tya ngahelipi. Okwa li e hole unene omaliko aye. Nopehe na omalimbililo, okwa li yo e hole etumba nosho yo eenghonopangelo oyo hai endele pamwe nokukala neliko. Onghenda inene eshi ohole yaye yokuhola oinima yopamaliko ya li i dule ohole yaye yokuhola Kristus. Hano, oshinima “shimwe” osho a li a kambela osho ohole yeliyambomwene yokuhola Jesus naJehova nomutima aushe. Osho oshe mu imba a tambule ko eshivo olo la denga mbada. Eshivo olo ole ku kuma ngahelipi?

7. Omolwashike hatu dulu okutya eshivo laJesus ole tu kwatela mo yo kunena?

 ⁷ Eshivo laJesus kala li ashike la yukilila omulumenhu oo woshipuna ile ovanhu ashike vonhumba vanini. Jesus okwa ti: “Ngenge pe na ou a hala okushikula nge, . . . ye na shikule nge.” (Lukas 9:23) Outumbulilo “ou” otau ulike kutya keshe umwe ota dulu okuninga omushikuli waKristus, ngeenge okwa “hala” shili. Kalunga oha nanene ovanamitimadiwa va tya ngaho kOmona waye. (Johannes 6:44) Ovanhu aveshe ove na omhito okutambula ko eshivo olo, kutya nee oipuna ile eehepele, kutya nee ovomomihoko ile oiwana ilipi ile ovepupi lilipi. Hano, eshivo laJesus kutya ‘ila, u shikule nge,’ ole ku kwatela mo yo pauhandimwe. Omolwashike sha fimana okushikula Kristus, nosha kwatela mo shike?

8. Oshike osho ovanhu aveshe va pumbwa, nomolwashike ve shi pumbwa?

⁸ Otu na okudimina oshili ei kutya: Otwa pumbwa filufilu ewiliko liwa. Havanhu aveshe va dimina oshinima osho, ndele otu na shili omhumbwe ya tya ngaho. Jehova okwa li a nwefa mo omuprofeti Jeremia a popye oshili ei ya fimanenena kutya: “Omwene, ondi shi shii nokutya, ondjila yomunhu ihai kala mepangelo laye mwene, ile mepangelo lomulumenhu, nhumbi ta ende, nhumbi ta yukifa eenghatu daye.” (Jeremia 10:23) Ovanhu itava dula okulipangela vo vene nokave na oufemba woku shi ninga. Oshi liwetikile lela mondjokonona yovanhu kutya ovanhu inava wanenena itava dulu okupangela ndele tava pondola filufilu. (Omuudifi 8:9) Ovawiliki vopefimbo laJesus ova li hava fininike nokuhepeka ovanhu noku va pukifa. Jesus okwa li a didilika kutya ovanhu vongaho pefimbo olo “ova li va fa eedi di he na omufita.” (Markus 6:34) Nokunena osho shi li ngaho. Onghee hano, ovanhu aveshe ova pumbwa omuwiliki oo tava dulu okulineekela noku mu fimaneka. Mbela Jesus okwa wana okukala omuwiliki a tya ngaho? Natu ka taleni komatomheno onhumba oo taa ufa kutya Jesus okwa wana okukala omuwiliki wetu.

9. Oshike tashi yoolola ko Jesus kovawiliki aveshe vakwao?

 ⁹ Etomheno lotete: Jesus okwa hoololwa kuJehova Kalunga a kale omuwiliki. Ovawiliki vahapu vopanhu ova hoololwa kovanhu vakwao inava wanenena, ovo luhapu hava kala va pukifwa nove na eamo lokudiladila pambabo. Jesus oku li omuwiliki a yooloka ko kovawiliki vakwao. Omadinafimaneko aye “Kristus” nosho yo “Messias” otae shi holola. Omadinafimaneko oo opavali otaa ti “Omuvaekwa,” naasho otashi ti kutya Jesus okwa vaekwa ile a nangekwa po a kale omuwiliki kOmwene Omunamapangelo aeshe. Jehova Kalunga okwa popya shi na sha nOmona waye a ti: “Tala, omunhu wange, nde mu hoolola, omuholike wange, ou omwenyo wange we mu hokwa; Ame ohandi mu tula Omhepo yange.” (Mateus 12:18) Omushiti wetu oye aeke ta dulu okuufa kutya omuwiliki woludi lilipi ta dulu lela oku tu wilika. Molwaashi Jehova oku na ounongo uhe fi okuyelekwa, ohatu dulu okukala nelineekelo kutya okwa hoolola pandunge oo ta dulu shili oku tu wilika. — Omayeletumbulo 3:5, 6.

10. Omolwashike Jesus e li oshihopaenenwa dingi osho ovanhu ve na okushikula?

¹⁰ Etomheno etivali: Jesus okwe tu tulila po oshihopaenenwa sha wanenena nosha denga mbada. Omuwiliki dingi oku na okukala e na omaukwatya oo taa hokwifa ovapangelwa vaye nosho yo oshihopaenenwa shiwa osho tava dulu okuhopaenena. Ohe linyengifa vamwe va ninge omalunduluko nokukala ovanhu va xwepo. Omaukwatya elipi unene wa teelela omuwiliki a kale e na? Ouladi? Ounongo? Olukeno? Ile oukwatya wokukala omudiinini nonande ope na eenghalo didjuu? Eshi to ende to lihongo kombinga yokukalamwenyo kwaJesus kwokombada yedu, oto ke shi mona kutya okwa li e na omaukwatya aeshe oo a tumbulwa metetekelo nosho yo makwao mahapu. Molwaashi Jesus oha hopaenene Xe womeulu monghedi ya wanenena, oha ulike omaukwatya aeshe opakalunga pauyadi. Okwa li omunhu a wanenena filufilu. Onghee hano, ohatu dulu okulihonga shihapu monghedi omo a li ha popi, ha ningi oinima nosho yo nghee a li ha kala e udite. Ombibeli oya ti kutya okwe tu “fiila oshihopaelelwa [tu] shikule oshikoti shaye.” — 1 Petrus 2:21.

11. Jesus okwe shi ulika ngahelipi kutya oku li ‘omufita muwa’?

 ¹¹ Etomheno etitatu: Kristus okwa li ha kala metwokumwe nepopyo laye kutya: “Aame omufita ou muwa.” (Johannes 10:14) Ovanhu vopefimbo lOmbibeli ova li ve udite ko nawa omupopyofaneko oo. Ovafita ova li hava longo noudiinini eshi tava file oshisho eedi davo. ‘Omufita muwa’ okwa li ha pitifa komesho onghalonawa youfita waye, nohe lipula neameno leedi daye. Pashihopaenenwa, David, oo a li xekulululwa yaJesus, okwa li omufita weedi eshi a li omunyasha. Peemhito dimwe okwa li ha tula omwenyo waye moshiponga opo a amene eedi daye koilyani. (1 Samuel 17:34-36) Ndele Jesus okwa li a ninga eliyambo linenenene eshi a yandjela ovashikuli vaye omwenyo waye. (Johannes 10:15) Mbela ovawiliki vangapi ve na omhepo yeliyambo ya tya ngaho?

12, 13. (a) Osha hala okutya ngahelipi eshi taku tiwa kutya omufita oha kala e shii eedi daye needi ohadi kala di mu shii? (b) Omolwashike wa hala okuwilikwa kOmufita Muwa?

¹² Jesus okwa li yo ‘omufita muwa’ meityo vali limwe. Okwa ti: “Eedi dange ondi di shii, needi dange odi shii nge.” (Johannes 10:14) Diladila keityo leendjovo odo daJesus. Omunhu wongaho otashi dulika aha diladile kutya odi keshe moufita weedi oi na oukwatya wayo we likalekelwa. Ndele omufita oha kala e shii odi yaye keshe. Oha kala e shii odo difimba nonghee e na oku di kwafela ngeenge da dala, oha kala e shii kutya oudjona velipi va pumbwa okuhumbatwa, tashi dulika molwaashi ovanini natango noitava dulu okweenda oshinano shile, noha kala e shii eedi odo tadi vele ile da yahamekwa kusha. Eedi nado ohadi kala di shii omufita wado. Odi shii ondaka yaye; ihadi i pukifa nondaka yovafita vamwe ve lili. Ngeenge oda udu omufita wado te di londwele, ohadi lotokele kuye meendelelo. Ohadi liufa kewiliko laye. Omufita oha kala e shii kutya openi e na oku di yukifa. Oha kala e shii oko ku na oulifilo muwa, oko ku na omatondokelo omeva mawa nokwa yela, naako eedi tadi dulu okukala di li meameno. Eedi ohadi kala di udite ombili ngeenge di li mepashukilo lomufita wado. — Epsalme 23.

¹³ Mbela ino hala okukala to wilikwa komunhu oo ta yelekwa ngaashi omufita muwa? Omufita Muwa, Jesus Kristus, okwa  shiivika nawa mondjokonona kutya osho a li ha ungaunga ngaho novashikuli vaye. Okwa udaneka yo kutya ote ke tu wilika opo tu kale nonghalamwenyo ihafifa paife noi na eityo, note ke tu wilika fiyo alushe. (Johannes 10:10, 11; Ehololo 7:16, 17) Onghee hano, otwa pumbwa okushiiva kutya okushikula Kristus okwa kwatela mo shike naanaa.

14, 15. Omolwashike inashi wana okutya ou li Omukriste ile okukala ashike u udite kutya ou hole Jesus?

¹⁴ Ovanhu omamiliyona omafele kunena otashi dulika ve udite kutya ova tambula ko eshivo laKristus, nomolwaasho have liti kutya Ovakriste. Otashi dulika ve li mongeleka omo ovadali vavo ve va shashifila. Ile otashi dulika ve udite kutya ove hole Jesus nove mu tambula ko e li Omuxupifi wavo. Ndele mbela osho osho tashi ufa kutya omunhu omushikuli waKristus? Mbela osho osho Jesus a li ta diladila eshi a li ta shivi ovanhu va ninge ovashikuli vaye? Okukala omushikuli waKristus washili osha kwatela mo shihapu.

¹⁵ Diladila koiwana oyo hai liti kutya Oikriste, oyo hai ifanwa Oukwakriste. Mbela oiwana oyo yOukwakriste ohai dulika ngoo komahongo aJesus Kristus ile ovanhu vomoiwana oyo ove tondafane, ohava hepeke vamwe, ohava kufa ombinga mekaulonyanga nosho yo moilongo yokuhenouyuki ngaashi ashike tashi ningwa mounyuni aushe? Omuwiliki umwe Omuhindu a fimana, Mohandas Gandhi, okwa tile: “Kandi shi omunhu umwe oo a ningila ovanhu shihapu ehe fi Jesus. Kape na sha osho sha puka shi na sha nOukriste.” Okwa weda ko a ti: “Ashike oupyakadi ou li ashike kunye Ovakriste. Ihamu shikula omahongo eni.”

16, 17. Oshinima shilipi ovanhu ovo have liti kutya Ovakriste hava kala va kambela, noshike tashi didilikifa mo ovashikuli vashili vaKristus?

¹⁶ Jesus okwa ti kutya ovashikuli vaye vashili otava ka shiivikila unene oilonga yavo ndele hasheshi tave liti kutya ovashikuli vaye. Pashihopaenenwa, okwa ti: “Hakeshe ou ta ti kuame: Omwene, Omwene! ta i mouhamba womeulu, ndelenee oye tuu ou ha longo ehalo laTate womeulu.” (Mateus 7:21)  Omolwashike vahapu ovo va itavela kutya Jesus oku li Omwene wavo hava dopa okulonga ehalo laXe? Dimbuluka omupangeli omunyasha oshipuna oo a popiwa metetekelo. Luhapu, ovanhu ovo have liti kutya Ovakriste navo ohava kala va kambela oshinima “shimwe,” ohole yokuhola Jesus nomutima aushe nosho yo yokuhola Kalunga oo a li a tuma Jesus.

¹⁷ Omolwashike taku tiwa ngaho? Mbela ovanhu omamiliyona ovo have liti kutya Ovakriste ihava ti kutya ove hole Kristus? Osho hava popi ngaho pakanya. Ndele ohole yokuhola Jesus naJehova oya kwatela mo shihapu shihe fi ashike okupopya kutya ou va hole. Jesus okwa ti: “Ngenge ku na ou e hole nge, oye ta diinine eendjovo dange.” (Johannes 14:23) Natango, eshi a li e lipopya e li omufita, okwa tile: “Eedi dange ohadi udu ondaka yange, naame ondi di shii, ndele odo tadi shikula nge.” (Johannes 10:27) Oumbangi kutya otu hole Kristus inau likolelela ashike kokutya kutya otu mu hole ile okupopya kutya otu li Ovakriste, ndele owe likolelela unene tuu koilonga yetu.

18, 19. (a) Okulihonga kombinga yaJesus oku na oku tu kuma ngahelipi? (b) Elalakano lembo eli olashike, nouwa ulipi ovo va kala ve litala ko ve li ovashikuli vaKristus tava ka mona?

¹⁸ Oilonga yetu ohai holola ounhu wetu womeni elela, kutya otu na oikala yomitima ya tya ngahelipi. Onghee hano, otu na okupashukila omitima detu. Jesus okwa ti: “[Omwenyo] waalushe owo tuu ou, vo ve ku shiive, Oove auke Kalunga kashili, naau we mu tuma, Jesus Kristus.” (Johannes 17:3) Ngeenge otwa kala tu na eshiivo lashili li na sha naJesus nokudilonga kulo, otashi ka kuma omitima detu. Osho otashi ke tu linyengifa tu kale tu hole Jesus unene notu kale twa hala oku mu shikula efiku keshe.

¹⁹ Elalakano lembo eli olo oku ku kwafela u kulike ehalo loye lokushikula Jesus. Inali nuninwa oku ku kwafela u shiive okukalamwenyo kwaJesus noiningwanima yomoukalele waye, ndele oli lile po oku ku kwafela u mone nghee to dulu oku mu shikula filufilu. * Ola nuninwa oku tu kwafela tu likonakone hatu longifa  Omishangwa onga oshitengelelo, tu tale ngeenge ohatu shikula ngoo shili Jesus? (Jakob 1:23-25) Otashi dulika we litala ko kutya ou li odi oyo tai wilikwa kOmufita Muwa. Ndele mbela ito dimine kutya ohatu dulu okuxwepopala monghedi yetu yokukalamwenyo eshi hatu shikula Kristus? Ombibeli otai tu ladipike tai ti: “Liyelekeni nye vene, ngenge mu li meitavelo; lipulaapuleni.” (2 Ovakorinto 13:5) Onghee hano, otwa pumbwa filufilu okushilipaleka kutya ohatu wilikwa shili kOmufita Muwa nomunahole, Jesus, oo a nangekwa po kuJehova e li omuwiliki wetu.

20. Oshike hatu ka konakona metukulwa tali landula?

²⁰ Otwe lineekela kutya mokukonakona embo eli, oto ka kulika ohole yoye yokuhola Jesus naJehova. Ngeenge owa efa ohole oyo i ku wilike, oto kala u na ombili inene yokomutima nehafo linene mounyuni ou wa kulupa, noto ka tanga Jehova fiyo alushe eshi e tu pa Omufita Muwa. Ashike eshiivo letu li na sha naKristus oli na okukala le likolelela kekanghameno lashili. Onghee hano, osha yeleka eshi hatu ka konakona kombinga yonghandangala oyo Jesus ta dana mokuwanifwa kwelalakano laJehova metukulwa eti-2.