Ombiibeli oya xunganeka kutya “oiwana otai ka lwifafana” nota ku ka kala oiponga yopaushitwe ‘momafiku axuuninwa ounyuni ou.’ (Mateus 24:3, 7) Otwa mona nghee omaxunganeko oo taa wanifwa momudo woilonga wo 2023. a Ashike eshi moilongo i fike hanga 100 mwa kala mu na oita nosho yo oiponga yopaushitwe, Eendombwedi daJehova oda li da hopaenena Jehova mokuulika ohole. Ngahelipi mbela?

 Momukokomoko womudo woilonga wo 2023, Ovamwatate novamwameme ve dulife po 200 ova li va kumwa koiponga yopaushitwe, ile koiponga oyo ya etifwa kovanhu. Eendombwedi daJehova oda longifa oimaliwa i dulife peemiliyona efele nomilongo omuwoi deedola b daNamibia mehangano lopaveta olo hadi longifa ya dja momayambidido omounyuni aushe, opo ku yandjwe oikwafa. Omuvalu oo owa kwatela mo oimaliwa oyo ovamwatate novamwameme vahapu va longifa, opo va kwafelwe ovo ve li momhumbwe moitukulwa yavo. Didilika nghee omayambidido eni a li a longifwa a kwafele ovo va li va ninga oihakanwa moiponga ashike ivali yopaushitwe yo mu ihapu oyo ya li ya kuma ovamwatate.

 Oitukulwa imwe moNigeria ohai hangwa alushe kefundja omudo keshe. Ashike, muOktoba 2022 oshilongo osha li sha hangwa kefundja linene olo ina li holoka mo konima yomido omulongo. Oshitukulwa shounamapya nounaimuna shoule u dulife peekilometa 6760 osha li sha hanaunwa po, novanhu ve dulife pomamiliyona avali ova li va fiya po omaumbo avo. Oshitaimbelewa shaNigeria osha li sha nangeka po meendelelo Eekomitiye dOkuyandja Oikwafa, opo di kwafele ovamwatate novamwameme painiwe nova kale neitavelo la kola.

•   Ovaudifi 7 505, ova li va tembulwa

•   Omaumbo 860 okwa li a nyonaunwa, ile a hanaunwa po

•   Omalupale Ouhamba 90 nosho yo Olupale lOyoongalele okwa li mokati komeva

 Oimaliwa i dulife N$4 755 000.00 oya li ya longifwa mokuyandja oikwafa, oyo ya kwatela mo:

•   Oikulya ngaashi olwishi, omakunde nomakoloni

•   Oipumbiwa yomeumbo ngaashi omatalashe neenete deemwe

•   Okuwapekulula, ile okutungulula omaumbo oo a nyonaunwa

 Ovamwatate ova li va shilipaleka ngahelipi kutya omayambidido, oo a yandjwa, okwa longifwa noukeka? Onghedi imwe, ova li va konakona nawa etungo keshe va mone ngeenge ola pumbwa okuwapekululwa, ile hasho. Ngeenge etungo ola li tali pumbwa okutungululwa, okwa li ku na okulongifwa omudutilo, oo tau longifwa unene moshitukulwa.

 Ovamwatate novamwameme, ovo va kwafelwa, ova pandula neenghono. Omumwameme umwe okwa ti: “Efundja ole tu denga twa lila neenghono, molwaashi omapya nomaumbo etu okwa hanaunwa po. Oshe tu hekeleka neenghono, eshi ovamwatate novamwameme ve uya efiku tuu olo ve tu kwafele noku tu pa eenhele dokukala. Otwa li twa pepelelwa neenghono, eshi oshitaimbelewa sha li she tu tumina oikulwa. Katwa li tu na oitya nomatumbulo, eshi twa mona nghee Johannes 13:34, 35 te tu wanifilwa. . . . Otwa li twa ulikilwa ohole ya shili. Ame noukwaneumbo wetu ohatu mu pandula tashi di komutima ovamwatate, eshi mwa li mwe uya oku tu kwafela pomhito opo twa li twa pumbwa ekwafo neenghono.”

 Vamwe momudingonoko ova li va didilika ekwafo olo twa li twa yandjwa. Omukulunhu woshitukulwa shaSabagreia, Bayelsa State, okwa popya, a ti: “Mounyuni omu na omahangano, ile eengeleka dihapu, ndele Eendombwedi daJehova odo ashike da ninga oshinima sha tya ngaha. . . . Ehangano [leni] olo ashike la denga mbada mounyuni aushe.”

 Momukokomoko waFebruali 2023, moChile omwa li mwa holoka omundilo lwoikando i dulife po 400, oo wa li wa hanauna neenghono. Oshitukulwa sheekilometa di dulife po 4300, pamwe noitukulwa imwe oyo i na eedjo dopaushitwe moChile, oya li ya hanaunwa po. Ovanhu hanga 8 000 ova li va tembulwa. Diva konima eshi oshiponga shopaushitwe sha hovela, oshitaimbelewa osha li sha hovela okuninga omalongekido okuyandja oikwafa.

•   Ovaudifi 222 ova li ve na okutembulwa

•   Omaumbo 20 okwa li a hanaunwa po

 Oimaliwa i dulife N$3 804 000.00 oya li ya longifwa mokuyandja oikwafa, oyo ya kwatela mo:

•   Oikulya nomeva

•   Omahooli, oilongifo yokuwapaleka nosho yo omiti

•   Okutungulula omaumbo oo a nyonaunwa

 Oukwaneumbo umwe owa li wa kumwa neenghono eshi wa li wa didilika kutya oinima yavo aishe oya hanaunwa po, mwa kwatelwa eumbo nongeshefa yavo. Kungaho, oukwaneumbo owa li wa fiwa pomutenya. Omafiku opehovelo eshi oshiponga sha li opo sha ningwa, oukwaneumbo owa li hau kala wa handuka neenghono okutala onhele opo pa li eumbo lavo i yele sheke. Ashike eshi eumbo lavo la li la hovela okutungululwa, osha she va pa epepelelo. Eshi va mona nghee tava ulikilwa ohole noukwao wananghali kovaliyambi, osha li she va kwafela ve lididimike. Oshimoniwa osho osha li she linyengifa oukwaneumbo u waimine ovaliyambi nokukwafela mokutungulula eumbo lomumwatate umwe.

 Ovamwatate novamwameme vahapu ova li va kuminwa oshilonga osho shokuyandja oikwafa. Omumwatate umwe okwa ti: “Elongekido laJehova li na sha nEekomitiye dOkuyandja Oikwafa ola denga mbada shili. Ova li va fika ponhele opo pa holoka oshiponga shopaushitwe konima ashike yefiku limwe, nokuhovela okuyandja ekwafo olo la li la pumbiwa. Ohashi tu omukumo okulesha kombinga yoikwafa oyo ya yandjwa koitukulwa imwe mounyuni. Ashike oha pa kala eyooloko, ngeenge owa taalele onghalo. Oho pandula ehangano neenghono okumona nghee ovamwatate tava hopaenene omaukwatya aJehova nanghee hava ulike kutya ove na ko nasha nafye moku tu kwafela painiwe, pamhepo nopamaliudo. Ohatu mone nghee Jehova te tu ulikile ohole mokupewa oikwafa.”

 Oiponga yopaushitwe otai ende nokuhapupala, eshi ounyuni ou wa finda pexulilo. (Lukas 21:10, 11) Kakele kaasho, Ohamba yetu inahole, Kristus Jesus, otai longifa eongalo lopaKriste i ulike kutya oi li ‘pamwe nafye alushe fiyo omomafiku axuuninwa ounyuni ou.’ (Mateus 28:20) Omayambidido eni omounyuni aushe ehalo liwa, oo hamu yandje okupitila ko-donate.dan124.com nosho yo meenghedi vali dimwe, mwa kwatelwa efimbo neenghono deni odo hamu yambe po, otai ulike kutya otamu yambidida Ouhamba nOhamba yao inahole. Ohatu mu pandula, eshi tamu twikile okuyandja nehalo liwa.