Nicole, omumwameme omunyasha wokoColombia, okwa ti: “Ondi hole Olupale letu lOuhamba. Oli li onhele opo hatu hangana novamwatate novamwameme.” Mbela naave osho u udite ngaho?

 Eendombwedi daJehova ohadi ongalele mOmalupale Ouhamba e fike hanga 63 000 mounyuni aushe. Ohatu longele Kalunga twa manguluka, ngeenge tu li momatungo a tya ngaho. Ndele hasho ashike osho. Omukokolindjila wondjikilile wedina David wokoColombia, okwa ti: “Olupale letu lOuhamba ohali ningifa ehongo letu li kale tali tisha. Ohashi kumwifa ovatalelipo vahapu okumona nghee hatu kaleke etungo la tya ngaho monghalo iwa.” Osho ihashi ningwa ashike omutwe lipuma. Ohatu longo noudiinini tu wapaleke nokukaleka Omalupale etu Ouhamba monghalo iwa. Oilonga oyo ohatu i longo ngahelipi?

 Omaongalo, oo haa longifa Olupale lOuhamba keshe, oku na oshinakuwanifwa shoku li kaleka monghalo iwa. Opo ku ningwe ngaho, ovamwatate novamwameme ohava wapaleke Olupale lavo lOuhamba pandjikilile. Ohava wapekulula yo omapuko manini.

 Oshikondo shomOshitukulwa shOkuduta nOkutunga (LDC) osha nangeke po ovamwatate, va longe ve li ovadeuli vokuwapekulula, opo omaongalo a kwafelwe a dule okukaleka Omalupale Ouhamba monghalo iwa. Omudeuli keshe oha pashukile Omalupale Ouhamba ahamano fiyo omulongo lwaapo. Oha talele po omaongalo nokudeula ovaudifi nghee ve na okufila oshisho olupale lavo. Oha konakona etungo keshe konima yomido nhatu a tale ngeenge oli li monghalo iwa nokwoongalela, ile pamwe ola pumbwa okuwapekululwa.

 Ovamwatate novamwameme ova pandula neenghono edeulo olo ovadeuli va tya ngaho have yandje. Indhumathi, omumwameme wokoIndia, okwa ti: “Edeulo ola li liwa neenghono. Osha li oufembanghenda okulihonga nghee tu na okukaleka olupale letu monghalo iwa.” Evans, omumwatate wokoKenya, okwa ti: “Otwe lihonga nghee tu na okuxupifa oimaliwa mokuwapekulula omapuko manini, ofimbo inaa ninga manene.”

 Oha ku longifwa eedola a omafele nosho yo omayovi opo Olupale lOuhamba li kalekwe po nokuwapekululwa, she likolelela konhele opo lili, omido odo la kala po nosho yo omaongalo oo hae li longifa. Eefuto odo ohadi futwa ngahelipi?

 Olupale lOuhamba ohali wapekululwa taku longifwa omayambidido. Alexander, omumwatate wokoKazakhstan, okwa ti: “Omayambidido amwe ohaa longifwa okufuta ointaneta nosho yo oifutomwa imwe ngaashi omeva nolusheno. Amwe vali ohaa longifwa okulanda oipumbiwa ngaashi eembapila dokulongifa moundjuwo, omanyala, oilongifo yokuwapaleka nopainda.” Oimaliwa ikwao ohai yandjwa i li omayambidido omounyuni aushe i ka kwafele moilonga inene nomokuwapekulula omatungo, oo taa pula oimaliwa ihapu.

 Ngeenge oilonga yokuwapekulula Olupale lOuhamba otai pula oimaliwa ihapu i dulife pwaayo hai longifwa shito meemwedi mbali, ile nhatu, ovakulunhuongalo ove na okukwatafana nomudeuli woko-LDC. Ngeenge o-LDC oya yandje ediminino, luhapu oha ku longifwa omayambidido omounyuni aushe. Momukokomoko womudo woilonga wo 2023, omwa li mwa longwa eeprojeka 8 793, odo da kosha ebiliyona N$1.5. Natu ka tale mbali domeeprojeka odo.

 MoAngola, Olupale lOuhamba olo la kala po oule w omido 15 ola li li na omaupyakadi mahapu. Okakefa kolusheno oka li ka pumbwa okupingenwa po, omakuma okwa li e na omifya novashiinda ova li hava tanguna kutya omeva otaa kungulukile momaumbo avo. O-LDC oya li ya unganeka oprojeka i kandule po omaupyakadi oo. Oprojeka oyo oya li ya kosha N$176 600.00. Ovashiinda ova li va pandula nova li va kuminwa onghedi omo oilonga oyo ya li ya longwa.

 MoPoland, oipeleki yOlupale lOuhamba oya li i na eenhongo, nemate ola li la kulupa neenghono. O-LDC oya li ya yandja ediminino oipeleki i longululwe nomu tulwe emate lipe. Oprojeka oyo oya li ya kosha N$185 578.00. Oshidjemo, ota pa piti omido dihapu Olupale olo lOuhamba ina li longululwa.

 Oilonga yokuwapekulula ihai xupifa ashike omayambidido, ndele ohai fimanekifa yo Jehova. Shaun, omumwatate wokoTonga, okwa ti: “Omolwoilonga yetu yokuwapekulula, ohatu longele Jehova mOlupale lOuhamba la yela, la unganekwa nawa, li li monghalo iwa notali fimanekifa edina laye momudingonoko. Ohatu kala tu udite etumba okushiva ovanhu ve uye va ongale pamwe nafye kOlupale letu lOuhamba.”

 Atusheni ohatu dulu okukwafela mokuwapaleka nokuwapekulula onhele yetu yokwoongalela. Marino, omudeuli wokuwapekulula moAustralia, okwa ti: “Atusheni ohatu dulu okukufa ombinga moshilonga shitunhula shokufila oshisho Omalupale etu Ouhamba. Ngeenge otwa ningi ngaho, ohatu ka xupifa omayambidido a longifwe osho a nuninwa no a ka longifwe oko ku na omhumbwe.”

 Joel, omumwatate wokoIndia, oha hafele okukaleka Olupale lavo lOuhamba monghalo iwa. Okwa ti: “Okulonga pamwe novamwatate ohashi diladilifa nge nghee hatu ka kala mounyuni mupe.” Nicole, oo a popiwa metetekelo, okwa ti: “Mefimbo opo la di ko, onda kwafela mokuwapaleka po omeva, eshi ovamwatate va li tava longo okandjuwo oko kali ka nyonauka. Nonande haame nda li nda pangela, onda li nda kwafela mokukelela paha holoke oshiponga.”

 Ngeenge owa hala okuliyamba u kwafele okuwapekulula Olupale leni lOuhamba, popya novakulunhuongalo vomeongalo leni. Shikwao vali, omayambidido oye ihaa kwafele ashike okuwapekulula Olupale leni lOuhamba, ndele ohaa kwafele yo okuwapekulula Omalupale Ouhamba makwao mounyuni aushe. Omayambidido oo ohaa yandjwa okupitila moukefa vomayambidido ovo ve li molupale leni, ile okupitila ko-donate.dan124.com. Ohatu pandula neenghono omhepo yoye yeliyambo.