Mo 2024, pokwenye, ovanhu hanga omabiliyona atano otava ka tala omaudano omafiyafanepo o-Olympic, omo oilongo 206 tai ka kufa ombinga. Omupresidende wOkomitiye yo-Olympic mounyuni aushe, Thomas Bach, okwa ti: “Otu li oshitukulwa shoshiningwanima osho hashi hanganifa ounyuni aushe u kale mombili. Natu fimanekeni ediladilo olo tali xumifwa komesho koudano ou, olo kutya ovanhu aveshe va kale mombili nomoukumwe, nonande otwa yoolokafana.”

 Mbela oudano ou otau dulu ngoo okuhanga elalakano olo la fimana? Mbela ope na ngoo eteelelo lashili lombili noukumwe?

 Omaudano oneudo okwa ningifa ovanhu va diladile moule shihe fi ashike kombinga yomaudano. Pomaudano opo opa divilikwa omaupyakadi opanghalafano nosho yo opapolitika oo haa tukula ovanhu. Omaupyakadi oo okwa kwatela mo oufemba womunhu, oukwamuhoko, okatongo oko ke li pokati komalongelokalunga nosho yo oufikepamwe.

 Omaudano omounyuni aushe, ngaashi o-Olympic, ohaa ningifa ovanhu ve lihafife. Ashike oiningwanima oyo ohai holola nghee ovanhu hava diladila nokulihumbata monghedi oyo tai eta etukauko pokati kovanhu; ohai ladipike ovanhu va twikile okudiladila nokulihumbata ngaho, ponhele va diladile monghedi oyo tai va etele oukumwe nombili yashili.

 Ombiibeli oya xunganeka kutya ovanhu otava ka kala ve na omaukwatya oo tae va imbi va kale va hangana. (2 Timoteus 3:1-5) Opo u lihonge shihapu shi na sha nomaxunganeko opaMbiibeli, lesha oshitukulwa “Did the Bible Predict the Way People Think and Act Today?”

 Ombiibeli oya udaneka ombili nosho yo oukumwe mounyuni aushe. Oya udaneka kutya ovanhu aveshe kombada yedu otava ka kala va hangana koshi yepangelo lomeulu, olo hali ifanwa “Ouhamba waKalunga.” — Lukas 4:43; Mateus 6:10.

 Ohamba yOuhamba oo, Jesus Kristus, otai ka eta ombili mounyuni aushe. Ombiibeli oya ti:

•   “Omuyuki ota ka hapa, nombili otai ka hapupala.” — Epsalme 72:7.

•   “Otai ka xupifa ohepele oyo tai lilile ekwafo . . . Otai va amene komafininiko nokelongifo leenghono.” — Epsalme 72:12, 14.

 Nokuli nokunena, omahongo aJesus okwa hanganifa ovanhu omamiliyona moilongo 239. Tu li Ovakriste, Eendombwedi daJehova mounyuni aushe ode lihonga okukala dinambili. Opo u shi mone, lesha Oshungonangelo i na oshipalanyole “Nghee hatu dulu okweefa po outondwe.”