46-زەرتتەۋ ماقالاسى
«سەنىمىڭىزدىڭ ۇلكەن قالقانى» جاقسى كۇيدە مە؟
«سەنىمنىڭ ۇلكەن قالقانىن الىڭدار» (ەفەس. 6:16).
119-ٵن سەنىمىمىز بەرىك بولعاي
اڭداتپا *
1، 2. ا) ەفەستىكتەرگە 6:16 عا ساي، نەگە بىزگە «سەنىمنىڭ ۇلكەن قالقانى» قاجەت؟ ٵ) قانداي سۇراقتاردىڭ جاۋابىن بىلەمىز؟
سىزدە «سەنىمنىڭ ۇلكەن قالقانى» بار ما؟ (ەفەستىكتەرگە 6:16 وقىڭىز). بار ەكەنىنە كۇمانىمىز جوق. ۇلكەن قالقان دەنەنىڭ باسىم بولىگىن قورعايتىنى ىسپەتتى، سەنىمىڭىز ٴسىزدى وسى بۇزىلعان دۇنيەدەگى ونەگەسىزدىكتەن، قاتىگەزدىكتەن، قۇدايدىڭ تالاپتارىنا قايشى كەلەتىن كەز كەلگەن نارسەنىڭ ىقپالىنان قورعايدى.
2 الايدا ٴبىز «سوڭعى كۇندەرى» ٶمىر ٴسۇرىپ جاتىرمىز، ٵرى سەنىمىمىز سىنالا بەرمەك (ٴتىم. 2-ح. 3:1). سەنىمىڭىزدىڭ قالقانى مىقتى ەكەنىنە قالاي كوز جەتكىزسەڭىز بولادى؟ ونى ۇنەمى جاقسى كۇيدە ۇستاۋ ٷشىن نە ىستەي الاسىز؟ قازىر وسى سۇراقتاردىڭ جاۋابىن بىلەيىك.
قالقانىڭىزدى مۇقيات تەكسەرىڭىز
شايقاستان كەيىن ساربازدار قالقاندارىن جوندەپ جاتىر (3-ابزاستى قاراڭىز)
3. ساربازدار قالقاندارىنا نە ىستەيتىن بولعان جانە نەگە؟
3 كيەلى كىتاپ جازىلعان زاماندا ساربازداردىڭ قالقاندارى ادەتتە بىلعارىمەن قاپتالاتىن. ولار بىلعارىنى جاقسى كۇيدە ساقتاۋ ٷشىن جانە قالقاننىڭ مەتالدان جاسالعان بولىكتەرىن توت باسىپ كەتپەۋ ٷشىن قالقاندارىن مايلاپ وتىراتىن. سارباز قالقانىنىڭ بۇلىنگەن جەرلەرىن بايقاسا، كەلەسى شايقاسقا دايىن بولۋ ٷشىن ونى بىردەن جوندەۋ كەرەك ەدى. بۇل مىسالدى ٴسىزدىڭ سەنىمىڭىزبەن قالاي بايلانىستىرۋعا بولادى؟
4. سەنىمنىڭ قالقانىن نەگە تەكسەرۋ كەرەك، ونى قالاي ىستەيمىز؟
4 ەجەلگى ساربازدار سياقتى ٵردايىم سوعىسقا دايىن تۇرۋ ٷشىن ٴسىز دە سەنىمىڭىزدىڭ قالقانىن تەكسەرىپ، جاقسى كۇيدە ۇستاپ وتىرۋىڭىز قاجەت. ٴماسىحشى بولعاندىقتان ٴبىز رۋحاني شايقاسقا قاتىسۋدامىز، ال جاۋلارىمىز زۇلىم رۋحتار (ەفەس. 6:10—12). ەشكىم ٴسىز ٷشىن قالقانىڭىزدى جاقسى كۇيدە ساقتاي المايدى. ولاي بولسا، سىناقتارعا دايىن ەكەنىڭىزگە قالاي كوز جەتكىزە الاسىز؟ الدىمەن، قۇدايدان كومەك سۇراڭىز. سوسىن، ٶزىڭىزدى تەكسەرۋ ٷشىن جانە قۇدايدىڭ سىزگە قالاي قارايتىنىن ٴتۇسىنۋ ٷشىن قۇداي ٴسوزىن وقىڭىز (ەۆر. 4:12). كيەلى كىتاپتا: «ەحوباعا بار جۇرەگىڭمەن سەنىم ارت، ٶز اقىلىڭا سۇيەنىپ جۇرمە. بارلىق ىسىڭدە ونى ەسكەر، سوندا ول جولىڭدى تەگىستەر»،— دەلىنگەن (ناق. س. 3:5، 6). وسىنى ەستە ۇستاي وتىرىپ، جاقىندا قابىلداعان شەشىمدەرىڭىزدى تارازىلاپ كورىڭىز. مۇمكىن، قارجىلاي قيىندىققا تاپ بولعان شىعارسىز. سول كەزدە ەۆرەيلەرگە 13:5 تەگى ەحوبانىڭ «مەن سەنى ەشقاشان قالدىرمايمىن، ەشقاشان تاستامايمىن» دەگەن ۋادەسى ەسىڭىزگە ٴتۇستى مە؟ بۇل ۋادە ەحوبانىڭ سىزگە كومەكتەسەتىنىنە سەنىمدىلىك بەردى مە؟ ەگەر سولاي بولسا، بۇل — سەنىمىڭىزدىڭ قالقانىن جاقسى كۇيدە ساقتاپ ٴجۇرسىز دەگەن ٴسوز.
5. سەنىمىڭىزدى تەكسەرگەندە نەنى بايقاۋىڭىز مۇمكىن؟
5 سەنىمىڭىزدى مۇقيات تەكسەرە كەلە كەيبىر نارسەلەرگە تاڭعالارسىز. ويتكەنى وسىعان دەيىن بايقاماعان كەيبىر السىزدىكتەرىڭىزدى اڭعارۋىڭىز مۇمكىن. مىسالى، سارىۋايىم، وتىرىك، ۇنجىرعانىڭ ٴتۇسۋى سەنىمىڭىزدى شايقالتقان شىعار. ەگەر سولاي بولسا، الداعى ۋاقىتتا سەنىمىڭىزدى قالاي قورعاي الاسىز؟
ٶزىڭىزدى سارىۋايىمنان، وتىرىكتەن، ۇنجىرعانىڭ تۇسۋىنەن قورعاڭىز
6. ورىندى ۋايىمعا نە جاتۋى مۇمكىن؟
6 ۋايىمنىڭ كەيبىر تۇرلەرى ورىندى. مىسالى، ٴبىز ەحوبا مەن يسانىڭ ىقىلاسىنا يە بولۋدى ويلاپ ۋايىمدايمىز (قور. 1-ح. 7:32). ەگەر كۇنا جاساپ قويساق، قۇدايمەن دوستىعىمىزدى قالپىنا كەلتىرۋ ٷشىن كۇيىپ-پىسەمىز (ٴزاب. 38:18). سونداي-اق ٴبىز جۇبايىمىزدىڭ كوڭىلىنەن شىعۋدى ويلايمىز جانە وتباسىمىز بەن باۋىرلاستارىمىزدىڭ جاعدايىن ۋايىمدايمىز (قور. 1-ح. 7:33؛ قور. 2-ح. 11:28).
7. ناقىل سوزدەر 29:25 تە ايتىلعانداي، نەگە ادامنان قورىقپاۋىمىز كەرەك؟
7 الايدا سارىۋايىم سەنىمىمىزگە نۇقسان كەلتىرەدى. ماسەلەن، تاماق پەن كيىمدى شەكتەن تىس ۋايىمداپ كەتۋىمىز مۇمكىن (مات. 6:31، 32). سودان ۋايىمدى سەيىلتەمىن دەپ بار ويىمىز دۇنيە-مۇلىككە اۋىپ كەتۋى ىقتيمال. ٴتىپتى اقشانى جاقسى كورىپ كەتۋىمىز دە عاجاپ ەمەس. ەگەر وسىعان جول بەرسەك، ەحوباعا دەگەن سەنىمىمىز السىرەپ، رۋحاني جاعىنان قاتتى زارداپ شەگەمىز (مار. 4:19؛ ٴتىم. 1-ح. 6:10). يا بولماسا «وزگەلەر مەن تۋرالى نە ويلايدى» دەپ قاتتى ۋايىمداۋىمىز مۇمكىن. سودان ەحوباعا ۇنامسىز بولۋدان گورى كەلەكە-مازاق بولۋدان، قۋدالانۋدان كوبىرەك قورقاتىن بولامىز. ادام الدىنداعى قورقىنىشقا بوي الدىرماس ٷشىن ەحوبادان سەنىم مەن باتىلدىق سۇراپ جالبارىنۋىمىز كەرەك (ناقىل سوزدەر 29:25 وقىڭىز، لۇقا 17:5).
(8-ابزاستى قاراڭىز) *
8. جالعان اقپاراتقا قالاي قاراۋىمىز كەرەك؟
8 «وتىرىكتىڭ اكەسى» شايتان ٶزىنىڭ قولشوقپارلارىن پايدالانىپ، ەحوبا مەن باۋىرلاستار جايلى وتىرىك تاراتادى (جوح. 8:44). مىسالعا، جولدانتايۋشىلار ۆەب-سايتتار، تەلەديدار، نە باسقا دا بۇقارالىق اقپارات قۇرالدارى ارقىلى ەحوبانىڭ ۇيىمى جايلى جالعان يا بۇرمالانعان مالىمەتتەر تاراتادى. بۇل وتىرىكتەر شايتاننىڭ «وتتى جەبەلەرىنە» جاتادى (ەفەس. 6:16). ەگەر بىرەۋ وسىنداي جالعان مالىمەتتەردى ايتا باستاسا، نە ىستەۋىمىز كەرەك؟ ٴبىز ونداي اڭگىمەنى مۇلدەم تىڭدامايمىز! نەگە؟ سەبەبى ٴبىز ەحوبا مەن باۋىرلاستارىمىزعا سەنەمىز. سوندىقتان جولدانتايۋشىلارمەن ەش بايلانىسپايمىز. ەشكىم دە، ەشتەڭە دە، ٴتىپتى ٶزىمىزدىڭ اۋەسقويلىعىمىز دا ولارمەن داۋلاسۋعا سەبەپ بولماۋ كەرەك.
9. ۇنجىرعانىڭ ٴتۇسۋى ادامعا قالاي اسەر ەتەدى؟
9 ۇنجىرعانىڭ ٴتۇسۋى دە سەنىمىمىزدى السىرەتەدى. ٴبىز قيىندىقتارعا كوز جۇمبايمىز، ارينە. بۇلاي ەتكەنىمىز جاۋاپكەرشىلىكتەن قاشۋ بولار ەدى. دەسە دە قيىندىقتار ەڭسەمىزدى تۇسىرەدى. ٴبىراق ولار وي-سانامىزدى جاۋلاپ الماۋ كەرەك. بۇعان جول بەرسەك، ەحوبا بەرگەن تاماشا ۇمىتتەن كوز جازىپ قالۋىمىز مۇمكىن (ايان 21:3، 4). ٴسۇيتىپ، ۇنجىرعامىز تۇسكەنى سونشا، ٵلىمىز قۇرىپ، ەحوباعا قىزمەت ەتۋدەن قالامىز (ناق. س. 24:10). ٴبىراق بىزبەن ولاي بولماۋ كەرەك.
10. ٴبىر باۋىرلاستىڭ حاتىنان نەگە ۇيرەندىڭىز؟
10 قۇراما شتاتتاردا تۇراتىن ٴبىر ايەل باۋىرلاستىڭ مىسالىن قاراستىرايىق. ول اۋىر دەرتكە شالدىققان كۇيەۋىنە قاراپ ٴجۇرىپ، سەنىمىن قالاي جاقسى كۇيدە ۇستايتىنىن بىلەيىك. باس باسقارماعا جازعان حاتىندا ول بىلاي دەيدى: «كەيدە سترەسكە ۇشىرايمىز، كوڭىلىمىز دە ٴتۇسىپ جاتادى. ٴبىراق ٷمىتىمىز بەرىك. سەنىمىمىزدى نىعايتۋ ٷشىن جانە بويىمىزعا جىگەر قۇيۋ ٷشىن ەحوبانىڭ بەرىپ جاتقان مالىمەتتەرىنە شەكسىز ريزامىن. ونداعى كەڭەستەر مەن جىگەرلى سوزدەر بىزگە اۋاداي قاجەت. بۇل بىزگە شايتاننىڭ سىناقتارىندا ساعىمىزدى سىندىرماي، ەحوباعا قىزمەت ەتە بەرۋگە كومەكتەسەدى». وسى باۋىرلاستىڭ سوزدەرىنەن ۇنجىرعانىڭ ٴتۇسۋىن جەڭۋ مۇمكىن ەكەنىن كوردىك. قيىندىقتارىڭىزدىڭ ارتىندا شايتان تۇرعانىن ۇمىتپاڭىز. جۇبانىشتىڭ قاينار كوزى ەحوبا ەكەنىن ەستە ۇستاڭىز. سونداي-اق ول بەرىپ جاتقان رۋحاني اس-سۋدى باعالاڭىز.
«سەنىمىڭىزدىڭ ۇلكەن قالقانى» جاقسى كۇيدە مە؟ (11-ابزاستى قاراڭىز) *
11. سەنىمىمىزدىڭ كۇيىن تەكسەرۋ ٷشىن قانداي سۇراقتار جايلى ويلانۋىمىز كەرەك؟
11 «قالقانىڭىزدىڭ» جوندەلۋى ٴتيىس جەرلەرىن بايقادىڭىز با؟ سوڭعى بىرنەشە ايدا سارىۋايىمعا سالىنباۋ قولىڭىزدان كەلدى مە؟ جولدانتايۋشىلاردىڭ وتىرىكتەرىن تىڭداۋدان نە ولارمەن داۋلاسۋدان باس تارتتىڭىز با؟ ۇنجىرعانىڭ ٴتۇسۋىن جەڭە الدىڭىز با؟ ەگەر سولاي بولسا، بۇل — سەنىمىڭىزدىڭ كۇيى جاقسى دەگەن ٴسوز. ٴبىراق ساق ٴجۇرىڭىز، ويتكەنى شايتان سىزگە باسقا قارۋلاردى قولدانۋى مۇمكىن. سونىڭ بىرەۋىن تالقىلايىق.
ٶزىڭىزدى دۇنيەقۇمارلىقتان قورعاڭىز
12. دۇنيەقۇمارلىقتىڭ كەسىرى قانداي؟
12 دۇنيەقۇمارلىققا بەرىلسەك، سەنىمىمىز السىرەپ، ەحوباعا بارىنشا قىزمەت ەتە الماي قالامىز. ەلشى پاۋىل: «ەشبىر سارباز ٶزىن اسكەري قىزمەتكە العان كىسىنىڭ ىقىلاسىنا يە بولۋ ٷشىن، ساۋدا-ساتتىقپەن اينالىسپايدى»،— دەگەن (ٴتىم. 2-ح. 2:4). ريم ساربازىنا باسقا ىستەرمەن اينالىسۋعا بولمايتىن. ەگەر سارباز وسى تالاپقا مويىنسۇنباسا، نە بولار ەدى؟
13. سارباز نەگە ساۋدا-ساتتىقپەن اينالىسپاۋى كەرەك بولعان؟
13 مىنا جاعدايدى ەلەستەتىپ كورەيىك. ٴبىر توپ سارباز تاڭەرتەڭ سەمسەرمەن جاتتىعىپ جاتىر، ال ارالارىندا ٴبىر سارباز جوق. ول بازاردا تاماق ساتۋمەن اۋرە. كەشكىسىن ساربازدار ساۋىت-سايماندارىن تەكسەرىپ، سەمسەرلەرىن قايراپ جاتسا، الگى سارباز ەرتەڭگى ساتاتىن تاماعىن دايىنداۋدا. ال ەرتەسىنە جاۋ تاسادان تاپ بەرەدى. سول كەزدە قاي سارباز دۇرىس ارەكەت ەتىپ، كومانديرىنىڭ كوڭىلىنەن شىعادى؟ ال ٴسىز قاي ساربازدىڭ قاسىندا تۇرعىڭىز كەلەر ەدى؟ شايقاسقا دايىندالعان ساربازدىڭ قاسىندا ما، الدە قىزمەتىنەن الاڭداپ كەتكەن ساربازدىڭ با؟
14. ٴماسىحتىڭ ساربازدارى بولعاندىقتان، ٴبىز نەنى باعالايمىز؟
14 جاقسى ساربازدارعا ۇقساپ، ٴبىز دە نەگىزگى ماقساتىمىزدان اۋىتقىماۋىمىز كەرەك. ال نەگىزگى ماقساتىمىز — كومانديرلەرىمىز ەحوبا مەن ماسىحتىڭ ىقىلاسىنا يە بولۋ. ٴبىز بۇنى شايتاننىڭ دۇنيەسى ۇسىناتىن كەز كەلگەن نارسەدەن قۇندى سانايمىز. سوندىقتان ەحوباعا قىزمەت ەتۋگە قاجەتتى ۋاقىتىمىز بەن كۇش-قۋاتىمىز بار ەكەنىنە كوز جەتكىزىپ، سەنىمىمىزدىڭ قالقانى مەن باسقا دا رۋحاني ساۋىت-سايماندارىمىزدى جاقسى كۇيدە ۇستاۋىمىز قاجەت.
15. ەلشى پاۋىل قانداي كەڭەس بەردى جانە نە سەبەپتى؟
15 ٴبىز ەشقاشان بوساڭسىماۋىمىز قاجەت. نەگە؟ ەلشى پاۋىل «بايۋعا بەل بۋعانداردىڭ» «سەنىم جولىنان اداساتىنىن» ەسكەرتكەن (ٴتىم. 1-ح. 6:9، 10). مۇنداعى «اداسۋ» دەگەن ەتىستىك قاجەتسىز زاتتاردى ساتىپ الۋعا ۇمتىلىپ، الاڭداۋدى بىلدىرەدى. وسىلاي ەتسەك، «اقىماق تا زياندى قۇمارلىقتارعا» جۇرەگىمىزدەن ورىن بەرەمىز. الايدا بۇل قۇمارلىقتار شايتاننىڭ سەنىمىمىزدى ٶلتىرۋ ٷشىن پايدالاناتىن قارۋلارى ەكەنىن ۇمىتپايىق.
16. مارقا 10:17—22 تارماقتار نە تۋرالى ويلانۋعا تالپىندىرۋى كەرەك؟
16 بالكىم، كوپ زات ساتىپ الۋعا جەتكىلىكتى اقشامىز بار شىعار. قاتتى قاجەت ەمەس، ٴبىراق قالاپ تۇرعان زاتتى الۋ دۇرىس ەمەس دەگىمىز كەلمەيدى، ارينە. الايدا مىنا سۇراقتار جايلى ويلانىپ كورەيىك: قانداي دا ٴبىر زاتتى الۋعا قالتامىز كوتەرسە دە، ونى كۇتىپ-ۇستاۋعا ۋاقىتىمىز بەن كۇشىمىز جەتە مە؟ سونداي-اق سول زاتتارعا قاتتى باۋىر باسىپ قالمايمىز با؟ دۇنيە-مۇلكىمىزدى جاقسى كورگەندىكتەن، قۇدايعا قىزمەت ەتۋگە قاتىستى يسانىڭ شاقىرۋىنان باس تارتقان جاس جىگىت سياقتى بولىپ كەتپەيمىز بە؟ (مارقا 10:17—22 وقىڭىز). ەندەشە، قاراپايىم تۇرمىس كەشىپ، التىن ۋاقىتىمىز بەن قاجىر-قايراتىمىزدى قۇدايدىڭ ەركىن ورىنداۋعا جۇمسايىق!
سەنىم قالقانىن مىقتاپ ۇستاڭىز
17. نەنى ۇمىتپاعانىمىز ٴجون؟
17 ٴبىز سوعىستا جۇرگەنىمىزدى جانە ٵر كۇنى سوعىسقا ساقاداي ساي تۇرۋىمىز كەرەكتىگىن ەستەن شىعارماعانىمىز ابزال (ايان 12:17). باۋىرلاستارىمىز ٴبىز ٷشىن سەنىمىمىزدىڭ قالقانىن كوتەرىپ جۇرە المايدى. سوندىقتان ٵرقايسىسىمىز ٶز «قالقانىمىزدى» مىقتاپ ۇستاۋىمىز كەرەك.
18. ەجەلدە ساربازدار نەلىكتەن قالقاندارىن مىقتاپ ۇستاپ جۇرگەن؟
18 ەجەلدە سارباز شايقاستا قايتپاس قايسارلىق تانىتقاندا، قۇرمەتكە بولەنگەن. ٴبىراق شايقاستان قالقانسىز قايتۋ ۇيات سانالاتىن. ريم تاريحشىسى تاسيت بىلاي دەپ جازعان: «ساربازدىڭ سوعىس الاڭىندا قالقانىن جوعالتىپ العانى ماسقارالىق بولعان». وسى سەبەپتى دە ساربازدار قالقاندارىن مىقتاپ ۇستاپ جۇرگەن.
قىز باۋىرلاس كيەلى كىتاپتى دۇعا ەتە وتىرىپ وقۋ ارقىلى، قاۋىم كەزدەسۋلەرىنەن قالماي، ۋاعىزعا شىعۋ ارقىلى سەنىمنىڭ ۇلكەن قالقانىن مىقتاپ ۇستاپ ٴجۇر (19-ابزاستى قاراڭىز)
19. سەنىمىمىزدىڭ قالقانىن قالاي مىقتاپ ۇستاي الامىز؟
19 قاۋىم كەزدەسۋلەرىنەن قالماساق، ەحوبانىڭ ەسىمى مەن پاتشالىعى جايلى وزگەلەرگە ايتساق، سەنىمىمىزدىڭ قالقانىن مىقتاپ ۇستاپ جۇرەمىز (ەۆر. 10:23—25). بۇعان قوسا، كۇندە قۇداي ٴسوزىن دۇعا ەتە وتىرىپ وقىپ، ونداعى اقىل-كەڭەستەردى ٶمىرىمىزدىڭ بارلىق سالاسىندا قولدانۋىمىز قاجەت (ٴتىم. 2-ح. 3:16، 17). سوندا شايتاننىڭ بىردە-ٴبىر قارۋى بىزگە وڭالماستاي زيان تيگىزبەيدى (يشايا 54:17). ويتكەنى «سەنىمىمىزدىڭ ۇلكەن قالقانى» ٴبىزدى قورعاپ تۇرادى. سوندا باۋىرلاستارىمىزبەن بىرگە باتىل بولىپ، كۇندەلىكتى شايقاستا جەڭىسكە جەتەمىز. ودان دا ماڭىزدىسى، شايتان مەن وعان ەرگەندەردى جەڭىپ شىققاندا، يسانىڭ جاعىندا بولامىز (ايان 17:14؛ 20:10).
118-ٵن «سەنىمىمىزدى نىعايتا كور»
^ 5-ابزاس ساربازدارعا وزدەرىن قورعاۋ ٷشىن قالقان قاجەت. سەنىم دە قالقان ىسپەتتى. ساربازدار قالقاندارىن جاقسى كۇيدە ساقتايتىنىنداي، ٴبىز دە سەنىمىمىزدى جاقسى كۇيدە ساقتاۋىمىز كەرەك. بۇنى قالاي ىستەي الاتىنىمىز وسى ماقالادا ٴسوز ەتىلەدى.
^ 58-ابزاس سۋرەت سيپاتتاماسى: جولدانتايۋشىلار تەلەديداردان ەحوبا كۋاگەرلەرى جايلى جالعان اقپارات تاراتقاندا، كۋاگەرلەر وتباسى بىردەن تەلەديداردى ٴسوندىرىپ تاستادى.
^ 60-ابزاس سۋرەت سيپاتتاماسى: كەيىن وتباسىلىق عيباداتتا وتاعاسى كيەلى كىتاپتى قولدانىپ، وتباسىنىڭ سەنىمىن نىعايتتى.
