44-زەرتتەۋ ماقالاسى
ٷمىتىڭىزدى بەرىك ساقتاڭىز
«ٷمىتىڭدى ەحوباعا ارت» (ٴزاب. 27:14).
144-ٵن زور سيعا نازار تىگەيىك
اڭداتپا a
1. ەحوبا بىزگە قانداي ٷمىت سيلادى؟
ەحوبا بىزگە ماڭگى ٶمىر ٴسۇرۋ ٷمىتىن سيلادى. ارامىزداعى كەيبىرەۋلەر ولمەس رۋحاني دەنەمەن كوكتە ٶمىر سۇرۋگە ۇمىتتەنەدى (قور. 1-ح. 15:50، 53). ال باسىم كوپشىلىگىمىز ون ەكى مۇشەمىز ساۋ بولىپ، جەر بەتىندە ماڭگى باقىتتى ٶمىر سۇرۋگە ۇمىتتەنەمىز (ايان 21:3، 4). كوكتە نە جەردە ٶمىر سۇرۋگە ۇمىتتەنبەيىك، بۇل ٷمىت ٵرقايسىسىمىز ٷشىن اسا باعالى.
2. ٷمىتىمىز نەگە نەگىزدەلگەن جانە نەگە ولاي ايتا الامىز؟
2 كيەلى كىتاپتاعى «ٷمىت» ٴسوزى الدا جاقسىلىق بولاتىنىن كۇتۋدى بىلدىرەدى. ٴبىز بولاشاققا قاتىستى ٷمىتىمىزدىڭ اقتالاتىنىنا سەنىمدىمىز، سەبەبى بۇل ٷمىتتى ەحوبانىڭ ٶزى بەرىپ وتىر (ريم. 15:13). ٴبىز ونىڭ ۋادەلەرىن جاقسى بىلەمىز جانە ول بىردە-ٴبىر ٴسوزىن جەرگە تاستامايدى (مۇس. 4-ج. 23:19). ايتقان ٴسوزىن ورىنداۋعا ونىڭ كۇشى دە، قالاۋى دا جەتكىلىكتى. سوندىقتان ٴبىزدىڭ ٷمىتىمىز ارمان-قيالعا ەمەس، دالەل مەن شىندىققا نەگىزدەلگەن.
3. وسى ماقالادا نە قاراستىرامىز؟ (ٴزابۇر 27:14)
3 كوكتەگى اكەمىز ٴبىزدى جاقسى كورەدى ٵرى وعان ٷمىت ارتقانىمىزدى قالايدى (ٴزابۇر 27:14 وقىڭىز). ٷمىتىمىز بەرىك بولسا، قيىنشىلىقتارعا توتەپ بەرە الامىز جانە الداعى ەشبىر سىناق ٴبىزدى سىندىرا المايدى، قۋانىشىمىزدان دا ايىرا المايدى. وسى ماقالادا ەحوبا بەرەتىن ٷمىت ٴبىزدى قالاي قورعايتىنىن قاراستىرامىز. سونداي-اق ٷمىتتى زاكىرمەن جانە دۋلىعامەن سالىستىرامىز. سوسىن وسى ٷمىتىمىزدى قالاي جالىنداتا الاتىنىمىزدى قاراستىرامىز.
ٷمىتىمىز — زاكىرىمىز
4. ٷمىت قاي جاعىنان زاكىرگە ۇقسايدى؟ (ەۆرەيلەرگە 6:19)
4 ەۆرەيلەرگە جازعان حاتىندا پاۋىل ٷمىتتى زاكىرگە تەڭەگەن (ەۆرەيلەرگە 6:19 وقىڭىز). ول كەمەمەن كوپ ساياحاتتاعاندىقتان، زاكىردىڭ نە ٷشىن قولدانىلاتىنىن جاقسى بىلگەن. ٴبىر ساياحاتىندا تەڭىزدە سۇراپىل داۋىل كوتەرىلەدى. داۋىل كەمەنى ايداپ اپارىپ جارتاسقا سوقپاس ٷشىن، تەڭىزشىلەر زاكىرلەردى سۋعا لاقتىرادى. زاكىر كەمەنى ٴبىر ورىندا ۇستاپ تۇراتىنداي، ٷمىت تە ٶمىردىڭ داۋىلدارىندا ٴبىزدى ەحوبادان الىستاتپاي ۇستاپ تۇرادى (ەل. ٸس. 27:29، 39—41). داۋىلدىڭ ارتىنان جىم-جىرت تىنىشتىق ورنايتىنىنا سەنگەندىكتەن، وسى ٷمىت بىزگە قيىنشىلىقتا سابىر بەرەدى. ەسىمىزدە بولسا، يسا قۋدالاناتىنىمىزدى ايتىپ كەتكەن (جوح. 15:20). بىراق بولاشاقتا الاتىن سيىمىز جايلى وي جۇگىرتەتىن بولساق، ماسىحشىلىك جولدا نىق تۇرامىز.
5. ولىممەن بەتپە-بەت كەلگەندە ٷمىتى يساعا قالاي كۇش بەردى؟
5 اياۋسىز ولتىرىلەتىنىن بىلسە دە، يسا بەرىك ٷمىتىنىڭ ارقاسىندا نىق تۇرعان. يسانىڭ سابىرلىعى مەن سەنىمدىلىگى جايلى ەلشى پەتىر 33-جىلى ەلۋىنشى كۇن مەيرامىندا ايتقان سوزدەردەن بىلەمىز. ٴزابۇر كىتابىنداعى ٴماسىح تۋرالى پايعامبارلىقتى كەلتىرىپ، ول بىلاي دەدى: «مەن ۇمىتپەن ٶمىر سۇرەمىن. ويتكەنى سەن مەنى كوردە قالدىرمايسىڭ، ادال قىزمەتشىڭنىڭ ٴتانىن شىرىتپەيسىڭ... كوز الدىڭدا مەنى زور قۋانىشقا بولەيسىڭ» (ەل. ٸس. 2:25—28؛ ٴزاب. 16:8—11). يسا ولەتىنىن بىلسە دە، قۇداي ونى ٴتىرىلتىپ الاتىنىنا جانە كوكتە اكەسىمەن قايتا قاۋىشاتىنىنا بەرىك ۇمىتتەندى (ەۆر. 12:2، 3).
6. ٴبىر ەر باۋىرلاس ٷمىتى جايلى نە دەدى؟
6 ٷمىت كوپ باۋىرلاستارعا سىناق كەزىندە سابىرلىق بەرگەن. سولاردىڭ بىرەۋى — انگليادا ٶمىر سۇرگەن لەونارد چين دەگەن ادال باۋىرلاسىمىز. ول ٴبىرىنشى دۇنيەجۇزىلىك سوعىستا اسكەرگە بارماعانى ٷشىن تۇرمەگە جابىلادى. ول ەكى ايعا جالعىز ادامدىق كامەراعا جابىلىپ، كەيىن لاگەردە اۋىر ەڭبەككە جەگىلەدى. لەونارد باۋىرلاس حاتىندا بىلاي دەپ جازدى: «ٶز باسىمنان تۇسىنگەنىم، ٷمىتىمىز بولماسا، سىناققا توزە المايدى ەكەنبىز. باقىتىمىزعا وراي، بىزدە يسانىڭ، ەلشىلەر مەن پايعامبارلاردىڭ ۇلگىلەرى بار جانە كيەلى كىتاپتاعى كەرەمەت ۋادەلەر دە بار. بۇلاردىڭ ٴبارى بولاشاققا زور ٷمىت بەرەدى جانە قيىندىققا توزۋگە كۇش بەرەدى». ٷمىت لەونارد باۋىرلاستى زاكىر ىسپەتتى ۇستاپ تۇردى، ٴدال سولاي ٷمىتىمىز ٴبىزدى دە قيىنشىلىقتاردا ۇستاپ تۇرا الادى.
7. سىناقتار ۇمىتىمىزگە قالاي اسەر ەتەدى؟ (ريمدىكتەرگە 5:3—5؛ جاقىپ 1:12)
7 سىناقتارعا توتەپ بەرىپ، ەحوبانىڭ قولداۋىن سەزىنگەندە جانە ىقىلاسىنا بولەنگەندە، ٷمىتىمىز جالىنداي تۇسەدى (ريمدىكتەرگە 5:3—5؛ جاقىپ 1:12 وقىڭىز). وسىلاي ول شىندىقتى العاش بىلگەن كەزدەگىدەن بەرىك بولا تۇسەدى. شايتان سىناقتاردا باس كوتەرە الماي، ٴتۇڭىلىپ كەتكەنىمىزدى قالايدى. بىراق ەحوبانىڭ كومەگىمەن ٴبىز كەز كەلگەن قيىندىقتى ەڭسەرە الامىز.
ٷمىتىمىز — دۋلىعامىز
8. ٷمىتىمىزدى نەگە دۋلىعاعا تەڭەۋگە بولادى؟ (سالونيكالىقتارعا 1-حات 5:8)
8 سونداي-اق كيەلى كىتاپ ٷمىتتى دۋلىعاعا تەڭەيدى (سالونيكالىقتارعا 1-حات 5:8 وقىڭىز). شايقاستا دۋلىعا جاۋىنگەردىڭ باسىن جاۋلاردىڭ سوققىسىنان قورعايدى. ٴبىز دە رۋحاني شايقاستا جۇرگەندىكتەن، سانامىزدى شايتاننىڭ سوققىلارىنان قورعاۋىمىز كەرەك. ول وي-سانامىزدى ارامداۋعا باعىتتالعان ازعىرۋلار مەن نەشە ٴتۇرلى ويلاردى وقشا بوراتادى. بىراق ٷمىتىمىز سانامىزدى دۋلىعا سياقتى ساقتاپ تۇرعاندىقتان، ٴبىز ەحوباعا ادال بولىپ قالا الامىز.
9. ٷمىتى جوق ادامدار قانداي بولادى؟
9 ماڭگى ومىرگە دەگەن ٷمىت بىزگە دانالىقپەن، پاراساتتىلىقپەن ارەكەت ەتۋگە كومەكتەسەدى. ال ەگەر ٷمىتىمىز السىرەپ قالسا، ٴتان قالاۋلارى ويىمىزدى شىرماپ الىپ، ماڭگى ٶمىر نازارىمىزدان تايىپ كەتۋى مۇمكىن. ەجەلدەگى قورىنت قالاسىندا تۇرعان كەيبىر ماسىحشىلەرمەن وسىلاي بولعان. ولار قۇدايدىڭ نەگىزگى ۋادەسى — قايتا ٴتىرىلۋ ۇمىتىنە سەنۋدەن قالعان ەدى (قور. 1-ح. 15:12). پاۋىل بولاشاققا ٷمىتى جوق سول ادامداردىڭ بار ويلارى جالعان ٶمىردىڭ راقاتىنا باتۋ ەكەنىن ايتقان (قور. 1-ح. 15:32). بۇگىندە دە قۇدايدىڭ ۋادەلەرىنە سەنبەيتىن ادامدار ٴبىر ساتتىك ٴلاززات-ەرمەك ٷشىن ٶمىر ٴسۇرىپ، جالعاندى جالپاعىنان باسىپ قالعىلارى كەلەدى. ال ٴبىز بولساق قۇداي ۋادە ەتكەن بولاشاققا سەنەمىز. وسى ٷمىت وي-سانامىزدى دۋلىعا سياقتى قورعاپ، قارا باسىمىزدى ويلاپ ٶمىر سۇرۋدەن ساقتايدى. وسىلايشا ٴبىز ەحوبامەن قارىم-قاتىناسىمىزدى قۇرتاتىن ٶمىر سالتىنان اۋلاق جۇرەمىز (قور. 1-ح. 15:33، 34).
10. ٷمىت ٴبىزدى قانداي جامان ويلاردان ساقتايدى؟
10 ٷمىتىمىز ٴبىزدى ەحوباعا ەشقاشان ۇنامدى بولا المايمىز دەگەن ويلاردان دا ساقتايدى. مىسالى، كەيبىرەۋلەر بىلاي دەپ ويلايتىن شىعار: «كىم-كىم، بىراق مەن ەشقاشان ماڭگى ٶمىر سۇرۋگە لايىق بولا المايمىن. قۇدايدىڭ تالاپتارىنا ەشقاشان ساي بولا المايمىن». ەسىمىزدە بولسا، ٵيۇپتى جۇباتقان-سىماق بولعان ەليفاز دا وسىنداي ويلار ايتقان ەدى. ول: «جۇمىر باستى پەندە تازا بولۋشى ما ەدى؟»— دەدى. سوسىن ەحوبا تۋرالى: «قۇداي ٴتىپتى پەرىشتەلەرىنە دە سەنىم ارتپايدى، ونىڭ كوز الدىندا كوك تە تازا ەمەس»،— دەدى (ٵيۇپ 15:14، 15). بۇل بارىپ تۇرعان وتىرىك ەدى! مۇنداي وي قالىپتىڭ ارتىندا تۇرعان — شايتان. ول وسىنداي ويلار ساناڭىزعا كىرىپ السا، ٷمىتىڭىزدى كەمىرىپ بىتەتىنىن جاقسى بىلەدى. سوندىقتان بۇنداي جالعان ويلاردان بىردەن جالتارىپ، ەحوبانىڭ ۋادەلەرىنە نازار اۋدارىڭىز. ول ٴسىزدىڭ ماڭگى ٶمىر سۇرگەنىڭىزدى قالايدى جانە سوعان جەتۋىڭىز ٷشىن كومەگىن دە ايامايدى. بۇعان ەشقاشان كۇماندانباڭىز (ٴتىم. 1-ح. 2:3، 4).
ٷمىتىڭىز جالىنداي بەرسىن!
11. نەگە ٴبىز ٷمىتىمىزدىڭ اقتالۋىن شىداممەن كۇتۋىمىز كەرەك؟
11 ٷمىتىمىزدى جالىنداعان كۇيى بەرىك ساقتاۋ وڭاي بولا بەرمەيدى. ٴبىز قۇدايدى كۇتە-كۇتە تاعاتىمىز تاۋسىلىپ، تىپىرشي باستاۋىمىز مۇمكىن. الايدا ەحوبا — ماڭگىلىك ەكەنىن، ونىڭ ۋاقىتقا دەگەن كوزقاراسى بىزدىكىندەي ەمەس ەكەنىن ۇمىتپايىق (پەت. 2-ح. 3:8، 9). ەحوبا ٶزىنىڭ نيەتىن ەڭ دۇرىس جولمەن، ەڭ دۇرىس ۋاقىتتا ورىندايدى، ٵرى بۇل ٴبىز كۇتكەن ۋاقىت بولماۋى مۇمكىن. سونداي كەزدە قۇدايدى شىدامدىلىقپەن كۇتىپ، ٷمىتىمىزدى بەرىك ساقتاۋعا نە كومەكتەسەدى؟ (جاق. 5:7، 8).
12. ەۆرەيلەرگە 11:1، 6 عا ساي، ٷمىتتىڭ سەنىممەن قانداي بايلانىسى بار؟
12 ٴبىزدىڭ ٷمىتىمىزدىڭ كەپىلى — ەحوبا. سوندىقتان وعان جاقىن بولىپ قالساق، ٷمىتىمىزدى بەرىك ساقتاي الامىز. كيەلى كىتاپتان ٷمىت پەن سەنىمنىڭ ٴبىر-بىرىمەن تىعىز بايلانىستى ەكەنىن كورەمىز. بىزدە ٷمىت بولۋى ٷشىن، قۇدايدىڭ بار ەكەنىنە جانە ول «ٶزىن شىن جۇرەكتەن ىزدەيتىندەرگە سي بەرەتىنىنە سەنۋىمىز كەرەك» (ەۆرەيلەرگە 11:1، 6 وقىڭىز). ەحوبانى شىنايى، ٴتىرى قۇداي دەپ تانىعان سايىن، ۋادەلەرىنىڭ ٴبارىن ورىندايتىنىنا سەنىمىمىز نىعايا تۇسەدى. قازىر ەحوبامەن دوستىعىمىزدى نىعايتۋدىڭ جانە ٷمىتىمىزدى جالىنداتا ٴتۇسۋدىڭ كەيبىر ٴتيىمدى جولدارىن قاراستىرايىق.
دۇعا مەن وي جۇگىرتۋ ٷمىتىمىزدى جالىنداتا تۇسەدى (13—15 ابزاستاردى قاراڭىز) b
13. ەحوباعا قالاي جاقىنداي الامىز؟
13 ەحوباعا دۇعا ەتىپ، ونىڭ ٴسوزىن وقىڭىز. ٴبىز ەحوبانى كورە الماساق تا، ونىمەن جاقىن دوس بولا الامىز. وعان دۇعا ايتقاندا، ول ٴبىزدى تىڭدايتىنىنا سەنىمدىمىز (ەرم. 29:11، 12). ال ونىڭ ٴسوزىن وقىپ، ۇستىنەن وي جۇگىرتكەندە، ٴبىز ونى تىڭدايمىز. مىسالى، ەحوبانىڭ ەجەلدە ادال قىزمەتشىلەرىن قالاي قامقورلاعانىن وقىعاندا، ٷمىتىمىز جالىنداي تۇسەدى. قۇدايدىڭ سوزىندە «جازىلعانداردىڭ ٴبارى بىزگە ٴتالىم بولسىن دەپ جازىلعان. وسىلايشا تاباندىلىعىمىز ارقىلى جانە جازبالاردان العان جۇبانىشىمىز ارقىلى ۇمىتكە يە بولا الامىز» (ريم. 15:4).
14. ەحوبا ٶز قىزمەتشىلەرىنىڭ ٷمىتىن اقتاعان جاعدايلار جايلى نەگە وي جۇگىرتۋىمىز كەرەك؟
14 ەحوبا ۋادەسىندە تۇرعان جاعدايلار تۋرالى وي جۇگىرتىڭىز. مىسالى، ىبىرايىم مەن سارانى الايىقشى. ولار بالا سۇيەتىن جاستان ٶتىپ كەتسە دە، قۇداي ولارعا بالالى بولاتىندارىن ايتتى (مۇس. 1-ج. 18:10). ەگدە تارتقان ىبىرايىم قۇدايدىڭ بۇل ۋادەسىن قالاي قابىلدادى؟ كيەلى كىتاپتا: «ول كوپتەگەن حالىقتاردىڭ ٴتۇپ اتاسى بولاتىنىنا ٷمىتىن ۇزبەي سەنە بەردى»،— دەلىنگەن (ريم. 4:18). سىرت كوزگە مۇمكىن ەمەستەي كورىنسە دە، ىبىرايىم ەحوبانىڭ ۋادەسى ورىندالاتىنىنا سەندى. تۇبىندە قۇدايدىڭ وسى ادال قىزمەتشىسىنىڭ ٷمىتى اقتالدى دا (ريم. 4:19—21). ٴبىزدىڭ دە جاعدايىمىز الىنبايتىن قامال، اسا المايتىن اسۋداي كورىنەتىن شىعار، بىراق ىبىرايىمدىكىندەي وقيعالار ەحوباعا ٵردايىم ارقا سۇيەۋگە ۇيرەتەدى. ويتكەنى ول ٵردايىم ۋادەسىندە تۇرادى.
15. قۇدايدىڭ ٴبىز ٷشىن جاساعان ىستەرى جايلى نەگە ويلانۋىمىز كەرەك؟
15 ەحوبا ٴسىز ٷشىن نە ىستەگەنى جايلى ويلانىڭىز. قۇداي سوزىندە جازىلعان ۋادەلەر ٴسىزدىڭ ومىرىڭىزدە ورىندالعانى جايلى ويلانىپ كورىڭىز. مىسالى، يسا كوكتەگى اكەمىز ٴسىزدى قاجەتىڭىزبەن قامدايتىنىن ۋادە ەتكەن (مات. 6:32، 33). سونداي-اق ەحوبا وزىنەن سۇراعاندارعا مىندەتتى تۇردە كيەلى رۋح بەرەتىنىن ايتقان (لۇقا 11:13). ەحوبا وسى ۋادەلەرىنىڭ ٴبارىن ورىنداپ كەلەدى. بالكىم، ٴسىز ونىڭ باسقا دا ۋادەلەرىن ورىنداپ جۇرگەنىنە كۋا شىعارسىز. مىسالى، ول ٴسىزدى كەشىرەمىن، جۇباتامىن، رۋحاني اس-سۋمەن قامدايمىن دەگەن ۋادەسىن ورىنداپ ٴجۇر (مات. 6:14؛ 24:45؛ قور. 2-ح. 1:3). قۇدايدىڭ وسى كەزگە دەيىن ٴسىز ٷشىن جاساعان ىستەرى جايلى ويلانساڭىز، الدا دا ٴسىز ٷشىن ارەكەت ەتەتىنىنە دەگەن ٷمىتىڭىز جالىنداي تۇسەدى.
ۇمىتتەرىڭە قۋانىڭدار
16. ٷمىت — نەگە باعالى سي؟
16 ماڭگى ومىرگە دەگەن ٷمىتىمىز — قۇدايدىڭ بەرگەن باعالى سيى. ٴبىزدى شاتتىققا تولى كەرەمەت بولاشاق كۇتىپ تۇرعانىنا ٴبىز نىق سەنىمدىمىز. وسى ٷمىت ٴبىزدى سىناق، قۋعىن-سۇرگىن، ٴتىپتى ولىممەن بەتپە-بەت كەزدەسكەن الاي-دۇلەي كەزەڭدە زاكىردەي ۇستاپ تۇرادى. سونداي-اق ول ٴبىزدى جامان ويلاردان دۋلىعا سياقتى قورعاپ، دۇرىس ارەكەت ەتۋگە كومەكتەسەدى. كيەلى كىتاپ بەرەتىن ٷمىت قۇدايدىڭ بىزگە دەگەن سۇيىسپەنشىلىگىنىڭ تەرەڭدىگىن پاش ەتەدى. سونداي-اق ٴبىزدى وعان جاقىنداتا تۇسەدى. شىنىندا دا، ٷمىتىمىزدى جالىنداتىپ، ونى بەرىك ساقتاۋدىڭ پايداسى مول.
17. قالايشا ٷمىتىمىز بىزگە قۋانىش سيلايدى؟
17 ريمدىكتەرگە جازعان حاتىندا ەلشى پاۋىل ٴبىزدى «ۇمىتتەرىڭە قۋانىڭدار» دەپ تالپىندىرادى (ريم. 12:12). پاۋىل ادال بولىپ قالسا، كوكتە ماڭگى ٶمىر سۇرەتىنىنە سەنىمدى بولعان. وسى ٷمىتى وعان قۋانىش سيلاعان. ٴبىز دە ەحوبا ٶز ۋادەلەرىندە تۇراتىنىنا سەنىمدىمىز ٵرى وسى ۇمىتتەن قۋانىش الامىز. ٴزابۇر كىتابىندا ايتىلعانداي، «بار ٷمىتىن قۇدايى ەحوباعا ارتاتىن ادام باقىتتى. ول ادالدىعىنان ەش تايمايدى» (ٴزاب. 146:5، 6).
139-ٵن جۇماقتا جۇرگەنىڭدى ەلەستەت
a ەحوبا بولاشاعىمىزدىڭ جارقىن بولاتىنىن ايتىپ، ٷمىت بەرىپ وتىر. بۇل ٷمىت ٶمىرىمىزدى ٴماندى ەتەدى جانە قيىنشىلىقتاردا ٴتۇڭىلىپ كەتپەۋگە كومەكتەسەدى. سونداي-اق باسىمىزعا قانداي كۇن تۋماسىن، ەحوباعا ادال بولىپ قالۋعا كۇش بەرەدى. بۇعان قوسا وي-سانامىزدى ارامدايتىن نارسەلەردەن ساقتايدى. ٷمىتتىڭ كۇشى وسىنداي بولسا، ونى ٵرى قاراي دا بەرىك ساقتاۋىمىز كەرەك ەمەس پە؟! بۇنى قالاي ىستەۋ كەرەكتىگىن وسى ماقالادا كورەمىز.
b سۋرەت سيپاتتاماسى: دۋلىعا جاۋىنگەردىڭ باسىن قورعايدى، ال زاكىر كەمەنى داۋىلدا ۇستاپ تۇرادى. سول سياقتى ٷمىت تە ويىمىزدى قورعايدى جانە سىناقتا سابىرلىق بەرەدى. ايەل باۋىرلاس ەحوباعا شىن بەرىلە دۇعا ەتىپ وتىر. ەر باۋىرلاس قۇدايدىڭ ىبىرايىمعا بەرگەن ۋادەسىن ورىنداعانى جايلى ويلانىپ تۇر. باسقا ەر باۋىرلاس ەحوبا ونى جارىلقاعان كەزدەرى جايلى ويلاپ وتىر.
