5-زەرتتەۋ ماقالاسى
«ٴبىزدى تالپىندىرۋشى كۇش — ٴماسىحتىڭ سۇيىسپەنشىلىگى»
«ٴبىزدى تالپىندىرۋشى كۇش — ٴماسىحتىڭ سۇيىسپەنشىلىگى. ونىڭ ٴبارى ٷشىن ولگەندەگى ماقساتى — ٶمىر ٴسۇرىپ جاتقاندار ەندى وزدەرى ٷشىن ەمەس،.. ٴماسىح ٷشىن ٶمىر سۇرۋلەرى» (قور. 2-ح. 5:14، 15).
13-ٵن ٴماسىحتى ۇلگى تۇتايىق
اڭداتپا a
1، 2. ا) يسانىڭ ٶمىرى مەن قىزمەتى جايلى ويلانعاندا، قانداي سەزىمگە بولەنەمىز؟ ٵ) بۇل ماقالادا نە تالقىلايمىز؟
دۇنيەدەن وتكەن سۇيىكتى دە جاقىن ادامىمىزدى قاي-قايسىمىز دا قاتتى ساعىنامىز. ارينە، ول ادامنىڭ قايتىس بولعان كەزىن ويلاساق، اسىرەسە ەگەر قينالىپ ولگەن بولسا، جۇرەگىمىز سىزداپ، قايعىدان قارس ايىرىلادى. ٴبىراق كەيىن، ۋاقىت وتە ٴبىز سول اداممەن وتكىزگەن قۋانىشتى ساتتەردى ەسكە تۇسىرەمىز. ونىڭ بىزگە ايتقان اقىلىن، رۋحىمىزدى كوتەرگەن كەزدەرىن جانە قالاي كۇلدىرگەنىن ويعا العاندا، جۇزىمىزگە كۇلكى ۇيىرىلەدى.
2 سول سياقتى ەسكە الۋ مەزگىلىندە ٴبىز يسانىڭ ٶلىمى، ونىڭ بەرگەن قۇرباندىعىنىڭ ٴمان-ماڭىزى جايىندا تەرەڭ ويلانامىز (قور. 1-ح. 11:24، 25). ارينە، ونىڭ ازاپتالىپ، قينالىپ ولگەنىن وقىعاندا، بۇل جانىمىزعا باتادى. الايدا ونىڭ جەردە ٶمىر سۇرگەن كەزىندە ايتقان سوزدەرى مەن جاساعان ىستەرى جايلى وي جۇگىرتكەندە، تەك جاقسى سەزىمدەرگە بولەنەمىز. ونىڭ قازىر ىستەپ جاتقاندارى دا جانە بولاشاقتا اتقاراتىن ىستەرى دە بىزگە زور قۋانىش سيلايدى. وسىلار جايلى جانە ٴماسىحتىڭ بىزگە دەگەن سۇيىسپەنشىلىگى جايلى ويلانىپ-تولعانعاندا، ٴبىز ريزاشىلىعىمىزدى بىلدىرگىمىز كەلەدى. وسى ماقالادا سونى قانداي ىستەرىمىزبەن كورسەتەتىنىمىزدى تالقىلايمىز.
ريزاشىلىق يسانىڭ شاكىرتى بولۋعا تالپىندىرادى
3. ٴبىز تولەمگە نە ٷشىن ريزامىز؟
3 يسانىڭ ٶمىرى مەن ٶلىمى تۋرالى ويلانعاندا، جۇرەگىمىزدى ريزاشىلىق كەرنەيدى. جەر بەتىندە قىزمەت ەتكەن شاعىندا ول قۇداي پاتشالىعى اكەلەتىن باتالار جايلى ۋاعىزداعان. تولەمنىڭ ارقاسىندا توگىلەتىن سول باتالاردى ٴبىز قاتتى باعالايمىز. ەحوبامەن جانە يسامەن باعالى دوستىعىمىز دا وسى تولەمنىڭ ارقاسىندا. يساعا سەنەتىندەردىڭ ماڭگى ٶمىر ٴسۇرىپ، قايتا تىرىلگەن سۇيىكتى جاقىندارىمەن قاۋىشۋعا دا ٷمىتى بار (جوح. 5:28، 29؛ ريم. 6:23). ٴبىز بۇل باتالارعا لايىق بولاتىنداي ەشتەڭە ىستەگەن جوقپىز. قۇداي مەن ٴماسىحتىڭ جاقسىلىعىن ەشقاشان وتەي دە المايمىز (ريم. 5:8، 20، 21). الايدا ولارعا قانشالىقتى ريزا ەكەنىمىزدى ٴبارىمىز كورسەتە الامىز. قالاي؟
ماعدالالىق ٴماريامنىڭ ۇلگىسى نەسىمەن ٴسىزدى ەحوبا مەن يساعا ريزاشىلىق بىلدىرۋگە تالپىندىرادى؟ (4، 5-ابزاستاردى قاراڭىز)
4. ماعدالالىق ٴماريام يسانىڭ جاقسىلىعىنا العىسىن قالاي ٴبىلدىردى؟ (سۋرەتتى قاراڭىز.)
4 ماعدالالىق ٴماريام دەگەن ەۆرەي ايەلىنىڭ ۇلگىسىنە كوڭىل بۇرايىقشى. ول بويىنداعى جەتى جىننان قاتتى قينالىپ، وسى ازابىنا ەش داۋا تاپپاعان. بۇل ايەلدىڭ قانداي بەيشارا كۇيدە بولعانىن ەلەستەتىپ كورىڭىزشى! ٴبىراق يسا ونى جىنداردان بوساتىپ، مۇمكىن ەمەس نارسەنى جاساعاندا، العىسىندا شەك بولماسا كەرەك! ريزاشىلىعىن بىلدىرگىسى كەلىپ، ٴماريام يساعا شاكىرت بولىپ ەردى. ول ۋاقىتىن، كۇشىن، قولدا بارىن جۇمساپ، يساعا قىزمەت ەتتى (لۇقا 8:1—3). ٴماريام يسانىڭ وعان جاساعان جاقسىلىعىنا ريزا بولعانىمەن، ونىڭ بولاشاقتا ودان دا اسقان سي بەرەتىنىن بىلمەسە كەرەك. يساعا «سەنگەن اركىم ماڭگىلىك ومىرگە يە بولۋ» ٷشىن، ول بۇكىل ادامزات ٷشىن جانىن قيماق بولاتىن (جوح. 3:16). ٴماريام بۇدان ٵلى بەيحابار بولسا دا، يەسىنە اقىرىنا دەيىن ريزاشىلىق ٴبىلدىرىپ، ادالدىق ساقتادى. مىسالى، يسا باعانادا ٸلۋلى تۇرعاندا، جانىنان تابىلىپ، ونىڭ وزىنە دە، قاسىنداعىلارعا دا دەمەۋ بولدى (جوح. 19:25). ال يسا ولگەننەن كەيىن، وعان ماي جاعۋ ٴراسىمىن جاساۋ ٷشىن ٴماريام تاعى ەكى ايەلمەن بىرگە قابىرگە جۇپار ٴيىستى زاتتار اپاردى (مار. 16:1، 2). ەحوبا ٴماريامنىڭ ادالدىعىن كەرەمەت جولمەن جارىلقادى. ول قايتا تىرىلگەن يسامەن جۇزبە-ٴجۇز سويلەسىپ، شاكىرتتەردىڭ كوبىسىنە بەرىلمەگەن مارتەبەگە يە بولدى (جوح. 20:11—18).
5. ەحوبا مەن يسانىڭ ٴبىز ٷشىن جاساعان بار جاقسىلىعىنا العىسىمىزدى قالاي بىلدىرسەك بولادى؟
5 ٴبىز دە ەحوبا مەن يسانىڭ جاساعان جاقسىلىعىنا ريزاشىلىق ٴبىلدىرۋ ٷشىن ۋاقىتىمىز، كۇشىمىز بەن قاراجاتىمىزدى پاتشالىقتىڭ ٸسىن وركەندەتۋگە جۇمساي الامىز. مىسالى، عيبادات ورىندارىن سوعۋ مەن كۇتىپ ۇستاۋ ىستەرىنە اتسالىسساق بولادى.
ەحوبا مەن يسانى سۇيسەك، وزگەلەردى دە سۇيۋگە تالپىنامىز
6. نەگە تولەم جەكە ٴارقايسىسىمىز ٷشىن بەرىلگەن سي دەپ ايتا الامىز؟
6 ەحوبا مەن يسا ٴبىزدى قانشالىقتى جاقسى كورەتىنىن تۇسىنگەندە، ٴبىز دە ولاردى ەرىكسىز جاقسى كورىپ كەتەمىز (جوح. 1-ح. 4:10، 19). ال يسانىڭ جەكە ٴبىز ٷشىن ٶمىرىن قيعانىن جەتە تۇسىنگەندە، ٴبىزدىڭ سۇيىسپەنشىلىگىمىز ودان سايىن كۇشەيە تۇسەدى. وسىنى تۇسىنگەن ەلشى پاۋىل: «قۇداي ۇلى... مەنى سۇيگەندىكتەن، مەن ٷشىن ٶمىرىن بەردى»،— دەپ العىسىن بىلدىرگەن (عال. 2:20). ويلاپ كورىڭىزشى: ەحوبانىڭ ٴسىزدى وزىنە جاقىنداتىپ تارتقانى وسى تولەمنىڭ ارقاسىندا. سونىڭ ناتيجەسىندە ٴسىز ونىمەن دوس بولا الاسىز (جوح. 6:44). ەحوبا ٴدال ٴسىزدىڭ بويىڭىزدان ٴبىر جاقسى نارسەنى كورىپ، ونىمەن دوس بولا الۋىڭىز ٷشىن سونداي قىمبات قۇن تولەگەنى جۇرەگىڭىزدى تەبىرەنتپەي قويماسا انىق. وسىدان كەيىن ەحوبا مەن يسانى ودان دا قاتتى جاقسى كورىپ كەتەتىنىڭىز ٴسوزسىز! ەندەشە، وسىلاردىڭ ٴبارىن تۇيىندەي كەلە: «ەحوبا مەن يسانىڭ وسى سۇيىسپەنشىلىگى مەنى نە ىستەۋگە تالپىندىرادى؟»— دەپ ويلانىپ كورسەك بولادى.
قۇداي مەن ٴماسىحتى سۇيەتىندىكتەن، ٵرتۇرلى ادامدارعا پاتشالىق حابارىن ايتامىز (7-ابزاستى قاراڭىز)
7. سۋرەتتە بەينەلەنگەندەي، ەحوبا مەن يساعا دەگەن سۇيىسپەنشىلىگىمىزدى قالاي كورسەتە الامىز؟ (قورىنتتىقتارعا 2-حات 5:14، 15؛ 6:1، 2)
7 ٴبىزدىڭ قۇدايدى جانە يسانى سۇيگەنىمىز باسقا ادامداردى سۇيۋگە قوزعاۋ سالادى (قورىنتتىقتارعا 2-حات 5:14، 15؛ 6:1، 2 وقىڭىز). ال ادامداردى سۇيەتىنىمىزدىڭ ٴبىر كورسەتكىشى — ىزگى حاباردى قۇلشىنا ۋاعىزداۋ. ٴبىز بۇل حاباردى ەشكىمدى ٴبولىپ-جارماي، باي-كەدەي بولسىن، ۇلتىنا، رۋىنا، ٴبىلىمى بار-جوعىنا قاراماي — بارىنە ايتامىز. وسىلاي ٴبىز ەحوبانىڭ ەركىن ورىندايمىز. ويتكەنى «ول ٵرتۇرلى ادامداردىڭ قۇتقارىلعانىن جانە شىندىق جايلى تۋرا ٴبىلىم العانىن قالايدى» (ٴتىم. 1-ح. 2:4).
8. باۋىرلاستاردى سۇيەتىنىمىز نەدەن كورىنەدى؟
8 ەحوبا مەن يسانى سۇيەتىنىمىزدى دالەلدەۋدىڭ تاعى ٴبىر جولى — باۋىرلاستاردى ٴسۇيۋ (جوح. 1-ح. 4:21). ٴبىز ولاردىڭ قامىن ويلايمىز ٵرى قينالعان ساتتەرىندە تىرەك بولامىز. جاقىندارى قايتىس بولعاندا، جۇباتامىز. اۋىرىپ قالسا، قاستارىنان تابىلامىز. ەڭسەلەرى ٴتۇسىپ جاتسا، بويلارىنا جىگەر قۇيۋعا تىرىسامىز (قور. 2-ح. 1:3—7؛ سال. 1-ح. 5:11، 14). ولار ٷشىن تالماي دۇعا ەتە بەرەمىز، ويتكەنى «ٵدىل ادامنىڭ جالبارىنا ايتقان دۇعاسىنىڭ اسەرى وراسان زور» ەكەنىن بىلەمىز (جاق. 5:16).
9. باۋىرلاستاردى سۇيۋگە تاعى نە جاتادى؟
9 باۋىرلاستاردى ٴسۇيۋدىڭ تاعى ٴبىر جولى — بار كۇشىمىزدى سالىپ، ولارمەن تاتۋلىق ساقتاۋ. ٴبىز ەحوبادان قانشالىقتى كەشىرىمدى بولۋ كەرەكتىگىن ۇيرەنەمىز. ول ٴبىزدىڭ كۇنالارىمىزدى كەشۋ ٷشىن ٶز ۇلىن قۇربان ەتۋگە دايىن بولسا، ٴبىز دە ٴبىر-ٴبىرىمىزدى كەشىرۋگە ىنتالى بولۋىمىز كەرەك ەمەس پە؟! يسانىڭ استارلى اڭگىمەسىندەگى زۇلىم قۇلعا ۇقساپ قالمايىق. قوجايىنى ونىڭ تاۋداي قارىزىن كەشسە دە، ول ٶزى سياقتى ٴبىر قۇلدىڭ تارىداي قارىزىن كەشپەي قويادى (مات. 18:23—35). ەگەر قاۋىمدا بىرەۋمەن رەنجىسىپ قالساڭىز، ەسكە الۋ كەشىنە دەيىن بارىپ، ونىمەن تاتۋلاسا الاسىز با؟ (مات. 5:23، 24). وسىلاي ٴبىرىنشى بولىپ قادام جاساساڭىز، ەحوبا مەن يسانى قاتتى جاقسى كورەتىنىڭىزدى كورسەتەر ەدىڭىز.
10، 11. اقساقالدار ەحوبا مەن يسانى جاقسى كورەتىندەرىن قالاي كورسەتە الادى؟ (پەتىردىڭ 1-حاتى 5:1، 2)
10 ەحوبا مەن يسانى سۇيەتىندەرىن اقساقالدار قالاي كورسەتسە بولادى؟ ونىڭ بىردەن-ٴبىر جولى — يسانىڭ توقتى-قوزىلارىن باعۋ (پەتىردىڭ 1-حاتى 5:1، 2 وقىڭىز). مۇنى يسا مەن ەلشى پەتىردىڭ اڭگىمەسىنەن انىق تۇسىنەمىز. قايتا تىرىلگەننەن كەيىن يسا ودان: «جوحان ۇلى شيمون، مەنى جاقسى كورەسىڭ بە؟»— دەپ سۇرايدى. بۇنىڭ الدىندا پەتىر يەسىنەن ٷش رەت تانعاندىقتان، ەندى ونى جاقسى كورەتىنىن دالەلدەۋ ٷشىن بارلىعىن جاساۋعا دايىن بولعان شىعار. سوندا يسا وعان: «قوزىلارىمدى باق»،— دەپ تاپسىردى (جوح. 21:15—17). سودان ەلشى پەتىر ٶمىرىنىڭ سوڭىنا دەيىن الدىنا جان سالماي، يەسىنىڭ توقتى-قوزىلارىن قامقورلاۋمەن بولدى.
11 اقساقالدار، يسانىڭ پەتىرگە ايتقان سوزدەرىنە دەن قوياتىندارىڭىزدى ەسكە الۋ مەزگىلىندە قالاي كورسەتە الاسىزدار؟ باقتاشىلىق ساپارلارعا جيىرەك بارۋ ارقىلى جانە قاۋىمعا كەلمەي كەتكەن جاندارعا ەحوباعا ورالۋعا بارىنشا كومەكتەسۋ ارقىلى (ەزەك. 34:11، 12). ال ەسكە الۋ كەشىندە كيەلى كىتاپ زەرتتەۋشىلەرى مەن جاڭادان كەلگەندەردى جىلى قارسى الىپ، كوڭىل بولىڭىزدەر. ولارعا يسانىڭ بولاشاق شاكىرتتەرى دەپ قاراڭىزدار. وسىلاردى ىستەۋ ارقىلى ەحوبا مەن يسانى جاقسى كورەتىندەرىڭىزدى كورسەتەسىزدەر.
يسانى جاقسى كورسەك، باتىل بولۋعا تالپىنامىز
12. يسانىڭ ولەر الدىنداعى ٴتۇنى ايتقان سوزدەرى نەگە بويىمىزعا باتىلدىق دارىتادى؟ (جوحان 16:32، 33)
12 ولەر الدىنداعى ٴتۇنى يسا شاكىرتتەرىنە: «وسى دۇنيەدە قيىنشىلىق كورەسىڭدەر، ٴبىراق باتىل بولىڭدار! مەن وسى دۇنيەنى جەڭىپ شىقتىم!» — دەدى (جوحان 16:32، 33 وقىڭىز). نەنىڭ ارقاسىندا يسا جاۋلارىنىڭ الدىندا قايمىقپاي تۇرىپ، ولە-ولگەنشە ادالدىق ساقتاپ قالدى؟ ويتكەنى ونىڭ ارقا سۇيەر تىرەنىشى ەحوبا ەدى. ٸزباسارلارىن دا الدا وسىنداي سىناقتار كۇتىپ تۇرعانىن بىلگەندىكتەن، ول ەحوبادان «ولاردى قورعاي كور» دەپ سۇرادى (جوح. 17:11). وسى سوزدەر بىزگە قايتپاس قايسارلىق بەرەدى. ويتكەنى ٴبىز بىلەمىز: قانداي جاۋ بولماسىن، ەحوبا ولاردىڭ بارىنەن دە الدەقايدا كۇشتى (جوح. 1-ح. 4:4). ونىڭ قىراعى كوزىنەن ەش نارسە قالت كەتپەيدى. سوندىقتان دا ٴبىز ەحوباعا ارقا سۇيەسەك، قورقىنىشىمىزدى جەڭىپ، باتىل بولاتىنىمىزعا بەك سەنەمىز.
13. اريماتەيالىق ٴجۇسىپ قالاي باتىلدىق تانىتتى؟
13 اريماتەيالىق ٴجۇسىپ دەگەن كىسىنىڭ مىسالىن قاراستىرىپ كورەيىكشى. ول ياھۋديلەر قوعامىندا سيلى كىسى ٵرى جوعارعى كەڭەستىڭ ٴبىر مۇشەسى بولعان. ٴبىراق ٴبىر كەزدەرى وعان باتىلدىق جەتىسپەدى. جوحان ايتقانداي، «ول ياھۋديلەردەن قورىققاندىقتان يسانىڭ شاكىرتى ەكەنىن جاسىرىپ جۇرگەن» (جوح. 19:38). ول پاتشالىق حابارىن تىڭداپ جۇرگەنىن ٵرى يساعا سەنەتىنىن ەشكىمگە بىلدىرگىسى كەلمەگەن. ويتكەنى جۇرت اراسىنداعى ابىرويى مەن دارەجەسىنەن ايىرىلىپ قالامىن دەپ قورىقسا كەرەك. ٴبىراق يسا ولگەن سوڭ، ٴجۇسىپ بار باتىلدىعىن جيناپ، «پيلاتتىڭ الدىنا بارىپ، يسانىڭ دەنەسىن سۇرايدى» (مار. 15:42، 43). وسىلايشا ٴجۇسىپ يسانىڭ شاكىرتى ەكەنى جۇرتقا ٴمالىم بولادى.
14. ادامداردان قورقاتىن بولساڭىز، نە ىستەگەنىڭىز ٴجون؟
14 ٴجۇسىپتىڭ سەزىمدەرى سىزگە دە تانىس پا؟ جۇمىستا يا مەكتەپتە باسقالاردان سەسكەنىپ، ەحوبا كۋاگەرى ەكەنىڭىزدى اشىق ايتا الماي قالاسىز با؟ «جۇرت نە دەيدى» دەپ ۋايىمداپ، جاريالاۋشى بولۋعا، يا شومىلدىرۋ راسىمىنەن وتۋگە باتىلىڭىز جەتپەي ٴجۇر مە؟ مۇنداي كەرتارتپا وي-سەزىمدەر سىزگە دۇرىس ارەكەت ەتۋگە بوگەت جاساماسىن. ەحوباعا جۇرەگىڭىزدى ايقارا اشىپ دۇعا ايتىڭىز. ونىڭ ەركىن ورىنداۋعا باتىلدىق سۇراڭىز. ەحوبانىڭ سىزگە قالاي جاۋاپ بەرگەنىن كورگەندە، ودان بەتەر قايرالىپ، باتىلدانا تۇسەسىز (يشايا 41:10، 13).
قۋانىش ەحوباعا دوعارماي قىزمەت ەتۋگە تالپىندىرادى
15. يسانى كورىپ، قۋانعان سوڭ، شاكىرتتەرى نە ىستەۋگە تالپىندى؟ (لۇقا 24:52، 53)
15 يسا ولگەن سوڭ، شاكىرتتەرى قانداي كۇي كەشكەنىن كوز الدىمىزعا ەلەستەتىپ كورەيىكشى. ولار ەڭسەلەرى ٴتۇسىپ، تۇنجىراپ ٴجۇردى. ويتكەنى ولار سۇيىكتى دوستارىنان ايىرىلىپ قانا قويماي، ۇمىتتەرىنىڭ كۇلى كوككە ۇشقانداي بولدى (لۇقا 24:17—21). ٴبىراق قايتا تىرىلگەن سوڭ، يسا ولارعا كورىنىپ، ٶزىنىڭ كيەلى كىتاپتاعى پايعامبارلىقتاردى قالاي ورىنداۋ كەرەك بولعانىن اسىقپاي ٴتۇسىندىرىپ بەردى. ولارعا ٴبىر ماڭىزدى ٸستى دە تاپسىردى (لۇقا 24:26، 27، 45—48). ٴسۇيتىپ، يەلەرى قاستارىندا 40 كۇن جۇرگەن ۋاقىتتا ولاردىڭ قۇلازىعان كوڭىلدەرى جادىراپ، قايعىلارىن قۋانىش باستى. يەلەرىنىڭ ٴتىرى ەكەنىنە ٵرى جاڭادان العان تاپسىرمالارىن ورىنداۋعا دا قول ۇشىن بەرەتىنىنە ولار ەرەكشە قۋانىپ كەتتى. وسى شاتتىقتىڭ سەرپىنىمەن ولار ەحوبانى ۇنەمى ماداقتاپ ٴجۇردى (لۇقا 24:52، 53 وقىڭىز؛ ەل. ٸس. 5:42).
16. ٴبىز يسانىڭ شاكىرتتەرىن قالاي ۇلگى ەتسەك بولادى؟
16 ال ٴبىز يسانىڭ شاكىرتتەرىن قالاي ۇلگى ەتسەك بولادى؟ ٴبىز دە ەحوباعا قىزمەت ەتۋدىڭ قۋانىشىنا ەسكە الۋ مەزگىلىندە عانا ەمەس، جىل بويىنا، ۇنەمى كەنەلە الامىز. ٴبىراق بۇل ٷشىن ومىرىمىزدە قۇداي پاتشالىعىن باستى ورىنعا قويۋىمىز قاجەت. مىسالى، كوپ باۋىرلاستار جۇيەلى تۇردە قىزمەتكە شىعىپ، قاۋىم كەزدەسۋلەرىنە بارىپ، وتباسىلىق عيباداتتى وتكىزىپ تۇرۋ ٷشىن جۇمىس كەستەسىن ىڭعايلاستىرعان. ال كەيبىرەۋلەر باسقا ادامدار اسا قاجەت دەپ ەسەپتەسە دە، كەيبىر دۇنيە-مۇلىكتەن باس تارتقان. ويتكەنى سونىڭ ارقاسىندا ولار قاۋىمعا كوبىرەك پايداسىن تيگىزە الادى، يا بولماسا ۋاعىزداۋشىلار جەتىسپەيتىن ايماقتا قىزمەت ەتە الادى. ارينە، ەحوباعا دوعارماي قىزمەت ەتە بەرۋ ٷشىن تاباندىلىق كەرەكتىگى راس. ٴبىراق پاتشالىقتى ٴبىرىنشى ورىنعا قويار بولساق، ول ٴبىزدى مولىنان جارىلقايتىنىن ۋادە ەتىپ وتىر (ناق. س. 10:22؛ مات. 6:32، 33).
ەسكە الۋ مەزگىلىندە ەحوبا مەن يسانىڭ ٴسىز ٷشىن جاساعان جاقسىلىعى جايلى ويلانىڭىز (17-ابزاستى قاراڭىز)
17. بيىلعى ەسكە الۋ مەزگىلىندە نە ىستەۋگە بەكىنىپ وتىرسىز؟ (سۋرەتتى قاراڭىز.)
17 4-ٴساۋىر، سەيسەنبى كۇنى وتەتىن ەسكە الۋ كەشىن اسىعا كۇتەمىز. ٴبىراق قازىردەن باستاپ يسانىڭ ٶمىرى مەن ٶلىمى، ەحوبا ەكەۋىنىڭ بىزگە كورسەتكەن زور سۇيىسپەنشىلىگى جايىندا ويلانىپ جۇرسەڭىز بولادى. ال ەسكە الۋ مەزگىلىندە وسى جايىندا ٴجيى-ٴجيى وي جۇگىرتىڭىز. مىسالى، ارنايى ۋاقىت ٴبولىپ، «جاڭا دۇنيە اۋدارماسىنىڭ» B12 قوسىمشاسىنداعى «يسانىڭ جەردەگى ٶمىرىنىڭ سوڭعى اپتاسى» دەگەن كەستەنى اشىپ، سونداعى وقيعالاردى وقىپ، سانا سۇزگىسىنەن وتكىزىڭىز. سولاردىڭ ىشىنەن بويىڭىزدا ريزاشىلىق، سۇيىسپەنشىلىك، باتىلدىق پەن قۋانىشتى ارتتىراتىن تارماقتاردى تابىڭىز. سوسىن شىن جۇرەكتەن شىققان العىسىڭىزدى ٴبىلدىرۋدىڭ ناقتى جولدارىن ويلاستىرىپ قويىڭىز. وسى ەسكە الۋ مەزگىلىندە يسانى ەستە ۇستاۋعا كۇش سالىپ جۇرگەنىڭىزگە ونىڭ شەكسىز ريزا بولارى انىق (ايان 2:19).
17-ٵن «قالايمىن»
a ەسكە الۋ مەزگىلىندە ٴبىز يسانىڭ ٶمىرى، ٶلىمى جانە اكەسى ەكەۋىنىڭ بىزگە كورسەتكەن سۇيىسپەنشىلىگى جايىندا تەرەڭ ويلانامىز. سوندا تولەمگە دەگەن ريزاشىلىعىمىز ارتىپ، بويىمىزدى ۇلى مەن اكەسىنە دەگەن سۇيىسپەنشىلىك كەرنەپ، ٸس-ارەكەتكە تالپىنامىز. بۇعان ناقتى قانداي ارەكەتتەر جاتاتىنىن وسى ماقالادا تالقىلاماقپىز. سونداي-اق ەحوبا مەن يساعا دەگەن سۇيىسپەنشىلىك باۋىرلاستاردى جاقسى كورۋگە، باتىل بولۋعا جانە قىزمەتىمىزدەن قۋانىش تابۋعا قالاي تالپىندىراتىنىن دا كورەمىز.
