17زەرتتەۋ ماقالاسى
111-ٵن قۋانۋعا سەبەپ كوپ
رۋحاني جۇماقتا جۇرە بەرىڭىز
«جاراتىپ جاتقاندارىما قاراپ، ماڭگى باقي شاتتانىپ قۋانىڭدار» (يشايا 65:18).
نەگىزگى وي
رۋحاني جۇماقتىڭ راقاتىن كورىپ، وزگەلەرگە دە ارامىزعا قوسىلۋعا كومەكتەسىڭىز.
1. رۋحاني جۇماق دەگەن نە جانە ونداعىلار نە ىستەگىسى كەلمەيدى؟
بۇگىندە جەر بەتىندە ادەمى ٴبىر مەكەن بار. ٶمىر قىز-قىز قايناعان بۇل مەكەندە ميلليونداعان جان مامىراجاي تىنىشتىقتىڭ راقاتىن كورۋدە. بۇل مەكەندە جۇرگەندەر ەشقاشان دا ودان كەتكىسى كەلمەيدى، ٵرى ارالارىنا مەيلىنشە كوپ ادامنىڭ قوسىلعانىن قالايدى. بۇل قانداي مەكەن بولدى ەكەن؟ رۋحاني جۇماق! a
2. رۋحاني جۇماعىمىز نەسىمەن تاڭعالدىرادى؟
2 شايتاننىڭ مىنا دۇنيەسى جەككورۋشىلىك پەن زۇلىمدىققا، قاۋىپ-قاتەرگە تولى. تاڭعالارلىعى، وسىنداي دۇربەلەڭ دۇنيەدە ەحوبا جايما-شۋاق مەكەن جاساپ قويعان! (جوح. 1-ح. 5:19؛ ايان 12:12). ٴسۇيۋشى قۇدايىمىز ەحوبا وسى دۇنيەنىڭ ىقپالى قانشالىقتى جامان ەكەنىن بىلەدى. سوندىقتان ول رۋحاني وركەندەي الۋىمىز ٷشىن جايلى ورتا جاساعان. قۇداي سوزىندە بۇل رۋحاني جۇماق قاۋىپسىز «پاناعا»، «مولىنان سۋارىلاتىن باققا» تەڭەلەدى (يشايا 4:6؛ 58:11). سوڭعى كۇندەر قانشالىقتى قيىن بولسا دا، سول جۇماقتا جۇرگەندەر ەحوبانىڭ جارىلقاۋىمەن بەيقام، باقىتتى ٶمىر كەشۋدە (يشايا 54:14؛ ٴتىم. 2-ح. 3:1).
3. يشايا 65-تاراۋدا ايتىلعان سوزدەر ەجەلدە قالاي ورىندالدى؟
3 ەحوبا يشايا پايعامبار ارقىلى رۋحاني جۇماقتا ادامداردىڭ ٶمىرى قانداي بولاتىنىن سيپاتتاعان. ول جايلى يشايا 65-تاراۋدا ايتىلادى. ونداعى سوزدەر العاش رەت ب. ز.ب. 537-جىلى ورىندالدى. سول جىلى كۇنالارىنا وكىنگەن ياھۋديلەر بابىل تۇتقىندىعىنان بوساپ، اتامەكەندەرىنە ورالدى. ەحوبانىڭ كومەگىمەن ولار قيراپ قالعان يەرۋساليم قالاسىن قايتادان كوركەيتتى ٵرى يسرايلدە تازا عيباداتتىڭ ورتالىعى بولعان عيباداتحانانى دا قايتا سوقتى (يشايا 51:11؛ زاك. 8:3).
4. يشايا 65-تاراۋداعى سوزدەر ٴبىزدىڭ كۇنىمىزدە قالاي ورىندالىپ جاتىر؟
4 يشايا پايعامبارلىعىنىڭ ەكىنشى رەت ورىندالۋى ب. ز. 1919-جىلى باستالدى. سول جىلى ەحوبانىڭ بۇگىندەگى قىزمەتشىلەرى ۇلى بابىلدىڭ تۇتقىندىعىنان ازات بولدى. سول كەزدەن باستاپ بۇكىل دۇنيەجۇزىندە رۋحاني جۇماق ورناي باستادى. پاتشالىقتىڭ ىنتالى جاريالاۋشىلارى كوپتەگەن قاۋىمدار قۇردى جانە بويلارىندا كيەلى رۋحتىڭ جەمىسىن دامىتا باستادى. كەزىندە زالىم، حايۋان مىنەزدى بولعان ادامدار «قۇدايدىڭ ەركىنە ساي جاراتىلعان... جاڭا بولمىسقا يە بولدى» (ەفەس. 4:24). ارينە، يشايادا جازىلعان ۋادەلەردىڭ تىكەلەي ورىندالۋىن ٴبىز بولاشاقتا جاڭا دۇنيەدە كورەمىز. ٴبىراق قازىردىڭ وزىندە ٴبىز رۋحاني جۇماقتىڭ مول باتالارىن كورىپ ٴجۇرمىز. قازىر وسى رۋحاني جۇماقتىڭ قانداي يگىلىگىن كورىپ جۇرگەنىمىزدى جانە نەگە ودان ەشقاشان كەتپەۋىمىز كەرەكتىگىن قاراستىرايىق.
رۋحاني جۇماقتا جۇرگەندەردىڭ كۇيى
5. يشايا 65:13 تە ۋادە ەتىلگەندەي، ٴبىزدىڭ رۋحاني جۇماقتىڭ ىشىندە كۇيىمىز قانداي؟
5 توق ٵرى شولدەرى قانعان. رۋحاني جۇماقتىڭ ىشىندەگى ادامدار مەن سىرتىنداعى ادامداردىڭ ايىرماشىلىعى كوك پەن جەردەي ەكەنىن يشايا جاقسى سيپاتتاعان (يشايا 65:13 وقىڭىز). ەحوبا ٶز قىزمەتشىلەرىنىڭ رۋحاني قاجەتتىلىكتەرىن مولىنان قاناعاتتاندىرۋدا. ول بىزگە كيەلى رۋحىن، ٶزىنىڭ ٴسوزىن جانە اعىل-تەگىل رۋحاني اس-سۋىن بەرگەن. سونىڭ ارقاسىندا «توقپىز،.. ٴشولىمىز قانعان،.. قۋانىشقا كەنەلگەنبىز» (ايان 22:17 سالىستىرىڭىز). ال رۋحاني جۇماقتىڭ سىرتىندا جۇرگەندەر، كەرىسىنشە، «اش،.. شولدەپ ٴجۇر،.. ۇياتقا قالعان». ويتكەنى ولاردىڭ رۋحاني قاجەتتىلىگىن قامدايتىن ەشكىمى جوق (اموس 8:11).
6. جوەل 2:21—24 تارماقتاردا ەحوبانىڭ سيلارى قالاي سيپاتتالعان جانە ونىڭ بىزگە پايداسى قانداي؟
6 جوەل ٶز پايعامبارلىعىندا استىق، شاراپ، ٴزايتۇن مايى سياقتى ومىرگە قاجەتتى تاعامداردى كەلتىرگەن. وسىلاي ەحوبا جومارتتىقپەن ٶز حالقىنىڭ قاجەتتىلىگىن قامدايتىنىن كورسەتكەن، بۇعان رۋحاني اس-سۋ دا جاتادى (جوەل 2:21—24). ول بىزگە رۋحاني اس-سۋدى كيەلى كىتاپ، كيەلى كىتاپقا نەگىزدەلگەن ادەبيەتتەر، سايتىمىز، قاۋىم كەزدەسۋلەرى مەن كونگرەستەر ارقىلى بەرەدى. ٴبىز وسى مول داستارقاننان ٵر كۇنى تاماقتانىپ جۇرسەك، رۋحاني ماعىنادا توق ٵرى ٴشولىمىز قانىپ جۇرەدى.
7. نە سەبەپتى ٴبىزدىڭ «جۇرەگىمىزدى قۋانىش كەرنەيدى»؟ (يشايا 65:14)
7 باقىتتى ٵرى كوڭىلدەرى توق. قۇداي حالقى ريزاشىلىقپەن «ٵن سالادى»، سونداي-اق ولاردىڭ «جۇرەكتەرىن قۋانىش كەرنەيدى» (يشايا 65:14 وقىڭىز). ويتكەنى قۇداي سوزىندەگى شىندىقتار مەن ۋادەلەر ولاردى جىگەرلەندىرىپ، جۇبانىش بەرەدى، ٵرى ولاردىڭ ٴماسىحتىڭ تولەم قۇرباندىعىنا نەگىزدەلگەن ۇمىتتەرى دە بەرىك. باۋىرلاستارىمىزبەن وسى سيلار جونىندە اڭگىمەلەسكەندە، ٶزىمىزدى شىن باقىتتى سەزىنەمىز (ٴزاب. 34:8؛ 133:1—3).
8. رۋحاني جۇماقتىڭ ەڭ باستى ەرەكشەلىگى قانداي؟
8 رۋحاني جۇماقتىڭ ەڭ باستى ەرەكشەلىگى — ەحوبانىڭ حالقىنىڭ اراسىنداعى سۇيىسپەنشىلىك پەن بىرلىك. وسىعان قاراپ، جاڭا دۇنيەدەگى ٶمىردىڭ قانداي بولاتىنىن ەلەستەتە الامىز. ول كەزدە سۇيىسپەنشىلىگىمىز بەن بىرلىگىمىز قازىرگىدەن دە زور بولادى (قول. 3:14). ٴبىر ايەل باۋىرلاس قۇداي حالقىن العاش رەت كورگەندە نە سەزىنگەنىن ايتىپ، بىلاي دەدى: «مەن ومىردە، ٴتىپتى وتباسىندا دا باقىتتى بولۋدىڭ نە ەكەنىن بىلمەپپىن. مەن شىن جاقسى كورۋدىڭ نە ەكەنىن ەحوبا كۋاگەرلەرىنەن كوردىم». وسىدان كورىنەتىندەي، شىن باقىت پەن قاناعاتتىڭ نە ەكەنىن بىلگىسى كەلەتىن ادام رۋحاني جۇماققا كەلىپ كورۋى كەرەك. وسى دۇنيە ەحوبانىڭ قىزمەتشىلەرى جايلى نە دەمەسىن، ٴبىز ەحوبانىڭ الدىندا دا، ونىڭ بۇكىلالەمدىك وتباسىنىڭ الدىندا دا جاقسى اتقا يەمىز. ويتكەنى ەحوبا «ٶز قىزمەتشىلەرىن باسقا ەسىممەن اتايدى» (يشايا 65:15).
9. يشايا 65:16، 17 دە قيىندىقتارىمىزعا قاتىستى قانداي ۋادە بار؟
9 جايباراقات ٵرى جاندارى تىنىش. يشايا 65:14 تە رۋحاني جۇماقتىڭ سىرتىندا ٴجۇرۋدى تاڭداعاندار «جۇرەكتەرى اۋىرىپ، جاندارى كۇيزەلىپ ايعايلايتىنى» ايتىلعان. قۇداي حالقى دا كەيدە جۇرەكتەرى اۋىرىپ، جاندارى كۇيزەلەدى عوي. ولار جايلى نە دەۋگە بولادى؟ بولاشاقتا ولاردىڭ «قيىنشىلىقتارى ۇمىتىلادى»، قۇدايدىڭ «كوز الدىنان جوعالادى» (يشايا 65:16، 17 وقىڭىز). ەحوبا جاقىندا بۇكىل قيىندىق اتاۋلىنى جويادى، جۇرەگىمىزدى سىزداتقان ەستەلىكتەر دە ۋاقىت وتە جادىمىزدان وشەدى.
10. قۇداي حالقىنىڭ اراسىندا بولۋ نەلىكتەن ٴسىز ٷشىن زور باتا؟ (سۋرەتتى دە قاراڭىز.)
10 قازىردىڭ وزىندە ٴبىز قاۋىم كەزدەسۋلەرىندە جانىمىز جايلانىپ، بۇكىل ۋايىم-قايعىمىزدى ۇمىتىپ، جايباراقات وتىرامىز. قۇداي رۋحىنىڭ جەمىسىنە جاتاتىن سۇيىسپەنشىلىك، قۋانىش، تاتۋلىق، مەيىرىمدىلىك، جۇمساقتىق سياقتى قاسيەتتەردى تانىتساق، باۋىرلاستاردىڭ دا وزدەرىن جايلى سەزىنۋىنە ۇلەس قوسامىز (عال. 5:22، 23). قۇدايدىڭ وسىنداي كەرەمەت ۇيىمىندا ٴجۇرۋ — ٴبىز ٷشىن زور باتا! وسى رۋحاني جۇماقتىڭ ىشىندە جۇرگەندەر جاقىندا قۇدايدىڭ «جاڭا اسپان مەن جاڭا جەرگە» قاتىستى ايتقان ۋادەسىنىڭ تولىقتاي ورىندالعانىن كورەدى.
رۋحاني جۇماقتا قۇداي وتباسىنىڭ ٴبىر بولىگى بولۋ — زور باتا! (10-ابزاستى قاراڭىز) c
11. يشايا 65:18، 19 عا ساي، ەحوبا جاساعان رۋحاني جۇماق بىزدە قانداي سەزىم وياتۋ كەرەك؟
11 ريزا ٵرى قۋانىشتى. يشايانىڭ كەيىنگى سوزدەرىنەن رۋحاني جۇماقتا «شاتتانىپ، قۋانىپ» جۇرۋگە بىزدە بارلىق سەبەپ بار ەكەنىن كورەمىز. بۇل رۋحاني ورتانى ەحوبانىڭ ٶزى جاساعان (يشايا 65:18، 19 وقىڭىز). ول ادامداردى رۋحاني قۋراپ، بەرەكەسى كەتكەن مىنا دۇنيەدەن شىعارىپ، ٶزىنىڭ قۇلپىرعان رۋحاني جۇماعىنا اكەلگىسى كەلەدى. بۇل ٷشىن ەحوبا ٴبىزدى قولدانىپ جاتىر. شىندىقتا ٴبىز كول-كوسىر باتالارعا كەنەلىپ ٴجۇرمىز! سول باتالار جايلى وزگەلەر دە بىلسە ەكەن دەيمىز (ەرم. 31:12).
12. يشايا 65:20—24 تارماقتاردا جازىلعان ۋادەلەر ٴسىزدى قانداي سەزىمگە بولەيدى جانە نەگە؟
12 رۋحاني جۇماقتىڭ ىشىندە جۇرگەن ٴبىز ٷمىتىمىز ٷشىن دە ريزامىز. قۇدايدىڭ جاڭا دۇنيەسىندە ٶمىرىمىز قانداي بولاتىنىن ەلەستەتىپ كورىڭىزشى! كيەلى كىتاپتا مىناداي ۋادەلەر بار: «دۇنيەگە كەلگەن بالا بىرنەشە كۇن عانا ٶمىر سۇرمەيدى، قارت ادام دا عۇمىرىن تولىق سۇرمەي دۇنيەدەن وتپەيدى». ٴبىز «ۇيلەر سالىپ، سولارعا قونىستانامىز، جۇزىمدىكتەر وتىرعىزىپ، جەمىسىن جەيتىن بولامىز». «بەينەتتەرىمىز جەلگە كەتپەيدى»، ويتكەنى ٴبىزدى «ەحوبا جارىلقايدى». ول بىزگە قاۋىپسىز، قاناعات پەن ٴمان-ماعىناعا تولى ٶمىر سيلايدى. ٴبىز «شاقىرماي جاتىپ»، ەحوبا ٴارقايسىسىمىزعا نە كەرەك ەكەنىن بىلەدى جانە ول «بارشا تىرشىلىك يەلەرىنىڭ قاجەتىن بەرەدى» (يشايا 65:20—24؛ ٴزاب. 145:16).
13. ادام ەحوباعا قىزمەت ەتە باستاعاندا ٶمىرى قالاي وزگەرەتىنى يشايا 65:25 تە قالاي سيپاتتالعان؟
13 تاتۋ ٵرى قاننەن-قاپەرسىز. ەحوبانىڭ رۋحىنىڭ كومەگىمەن كوپ ادام جىرتقىش اڭدارعا ٴتان مىنەزدەرىنەن ارىلىپ، ومىرلەرىن تۇپكىلىكتى وزگەرتكەن (يشايا 65:25 وقىڭىز). ولار كوپ كۇش سالىپ، جۇگەنسىز مىنەزدەرىن تىزگىندەۋدى ۇيرەنگەن (ريم. 12:2؛ ەفەس. 4:22—24). ارينە، قۇداي حالقى بۇدان كەمەلدى بولىپ كەتكەن جوق، ولار ٵلى دە قاتەلىكتەر جىبەرەدى. الايدا ەحوبا سول «ٵرتۇرلى ادامداردى» بىرىكتىرىپ، ارالارىندا سۇيىسپەنشىلىك پەن تاتۋلىق ورناتقان (تيت. 2:11). بۇل — قۇدىرەتى شەكسىز قۇدايدىڭ عانا قولىنان كەلەتىن كەرەمەت!
14. يشايا 65:25 تەگى سوزدەر ٴبىر ەر باۋىرلاستىڭ ومىرىندە قالاي ورىندالدى؟
14 ادامنىڭ بولمىسى شىنىمەن وزگەرە الا ما؟ ٴبىر جاس جىگىتتىڭ ٶمىرىن قاراستىرايىق. ول نەبارى 20 جاسىنا دەيىن نەبىر ازعىن، قاتىگەز ىستەرمەن اينالىسقان، تۇرمەنىڭ دە تابالدىرىعىن توزدىرىپ ۇلگەرگەن. ول كولىك ۇرلاپ، ۇيلەردى توناپ، باسقا دا اۋىر قىلمىستار جاساعانى ٷشىن تالاي رەت سوتتالعان. ونىڭ كىم كورىنگەنگە ٴتيىسىپ، توبەلەسكىسى كەلىپ تۇراتىن ادەتى دە بولعان. كەيىن ول كيەلى كىتاپتاعى شىندىق جايلى ەستىپ، قاۋىم كەزدەسۋلەرىنە بارا باستادى. سول كەزدە ول ٶمىردىڭ ٴمانىن، ياعني رۋحاني جۇماقتى تاپقانىن ٴتۇسىندى. ول شومىلدىرۋ راسىمىنەن وتكەننەن كەيىن، يشايا 65:25 تەگى سوزدەر ٶز ومىرىندە قالاي ورىندالعانى جايلى ٴجيى ويلانعان ەكەن. ول جۇلىپ جەيتىن قاسقىر مىنەزىن وزگەرتىپ، قوزىداي موماقان ادامعا اينالدى.
15. ٴبىز نەگە رۋحاني جۇماققا وزگەلەردىڭ دە كەلگەنىن قالايمىز جانە ول ٷشىن نە ىستەي الامىز؟
15 ەحوبانىڭ ۋادەلەرى يشايا 65:13 تە «الەمنىڭ ٵمىرشىسى ەحوبا مىنانى ايتادى» دەگەن سوزدەرمەن باستالىپ، 25-تارماقتا «دەيدى ەحوبا» دەگەن سوزدەرمەن اياقتالادى. ال ەحوبا ايتسا، ورىندالماي قالمايدى (يشايا 55:10، 11). رۋحاني جۇماق قازىردىڭ وزىندە بار. ەحوبا جەر بەتىندە ەشبىر جەردە جوق كەرەمەت باۋىرلاستىق جاساپ قويعان. وسى ۇلكەن وتباسىمىزدىڭ ىشىندە ٴبىز تاتۋ-ٴتاتتى، قاننەن-قاپەرسىز ٶمىر كەشىپ ٴجۇرمىز. مىنا زۇلىم دۇنيەدە بۇل ورتا تۋرا ٴبىر تىنىش ايلاقتاي (ٴزاب. 72:7). ٴبىز وسى جىلى ۇياعا مەيلىنشە كوپ ادامنىڭ كەلگەنىن قالايمىز. سوندىقتان شاكىرت دايىنداۋ ىسىنە بارىنشا اتسالىسقىمىز كەلەدى (مات. 28:19، 20).
رۋحاني جۇماققا وزگەلەر دە تارتىلۋ ٷشىن نە ىستەي الامىز؟
16. ادامداردىڭ رۋحاني جۇماعىمىزعا تارتىلۋىنا نە اسەر ەتەدى؟
16 ادامداردىڭ رۋحاني جۇماعىمىزعا تارتىلۋىنا ٴارقايسىمىز ۇلەس قوسا الامىز. ول ٷشىن ەحوباعا ەلىكتەگەنىمىز ماڭىزدى. ەحوبا ەشكىمدى ٶز ۇيىمىنا سۇيرەپ، كۇشتەپ كىرگىزبەيدى. قايتا، جۇمساقتىقپەن ادامداردى وزىنە «جاقىنداتىپ تارتادى» (جوح. 6:44؛ ەرم. 31:3). اقجۇرەك ادامدار ەحوبانىڭ سۇيىسپەنشىلىگى مەن كوركەم قاسيەتتەرى جايلى بىلگەندە، وزدەرى-اق وعان تارتىلادى. ٴبىز دە جاقسى قاسيەتتەرىمىزبەن جانە ۇلگىلى ٴجۇرىس-تۇرىسىمىزبەن وزگەلەردى رۋحاني جۇماققا تارتا الامىز. قالايشا؟
17. رۋحاني جۇماعىمىزدى وزگەلەرگە تارتىمدى ەتۋ ٷشىن نە ىستەسەك بولادى؟
17 وزگەلەرگە رۋحاني جۇماقتى تارتىمدى ەتۋدىڭ ٴبىر جـولـى — باۋىرلاستارىمىزعا سۇيىسپەنشىلىك پەن مەيىرىم تانىتۋ. ٴبىز قاۋىمعا العاش كەلگەن ادامدار ەجەلگى قورىنتتاعى ادامداردىكىندەي اسەر العانىن قالايمىز. سول ۋاقىتتا سەنبەيتىندەر قاۋىمعا كەلگەندە: «قۇداي شىنىمەن سەندەردىڭ ارالارىڭدا!»— دەسە كەرەك (قور. 1-ح. 14:24، 25؛ زاك. 8:23). ولاي بولسا، «ٶزارا تاتۋ بولىڭدار» دەگەن كەڭەسكە قۇلاق اسا بەرگەنىمىز وتە ماڭىزدى (سال. 1-ح. 5:13).
18. ادامداردى ۇيىمىمىزعا نە تارتۋى مۇمكىن؟
18 ٴبىز ٵردايىم باۋىرلاستارىمىزعا ەحوبا سياقتى قاراۋىمىز كەرەك. بۇل دەگەنىمىز باۋىرلاستاردىڭ بولاشاقتا ٴبىرجولا عايىپ بولاتىن كەمشىلىكتەرىنە ەمەس، قايتا، جاقسى قاسيەتتەرىنە نازار اۋدارۋدى بىلدىرەدى. ٴبىر-بىرىمىزگە «مەيىرىمدى دە بارىنشا جاناشىر بولساق،.. كەڭپەيىلمەن كەشىرسەك»، ارامىزداعى كەز كەلگەن تۇسىنىسپەۋشىلىكتى سۇيىسپەنشىلىكپەن جەڭە الامىز (ەفەس. 4:32). سوندا «ماعان دا وسىلاي قاراسا ەكەن» دەگەن ادامدار رۋحاني جۇماققا تارتىلادى b.
رۋحاني جۇماقتان ەشقاشان شىقپاڭىز
19. ا) « رۋحاني جۇماقتان كەتىپ، قايتىپ كەلگەندەر» دەگەن قورشاۋدا باۋىرلاستار قانداي پىكىر بىلدىرۋدە؟ ٵ) ٴبىز نە نارسەگە نىق بەكىنۋىمىز كەرەك؟ (سۋرەتتى دە قاراڭىز.)
19 ٴبىز رۋحاني جۇماق ٷشىن قانشالىقتى ريزامىز دەسەڭىزشى! بۇل جۇماق بارعان سايىن كوركەيۋدە، ىشىندە ەحوبانى ماداقتايتىندار دا بۇرىنعىدان الدەقايدا كوپ. ەحوبانىڭ ٴبىز ٷشىن جاساعان وسى ادەمى رۋحاني مەكەنىن ٵرى قاراي دا باعالاي بەرەيىك. ەگەر ٵردايىم جانىمىز سەرگىپ، الاڭسىز، تىنىشتىقتا ٶمىر سۇرگىمىز كەلسە، رۋحاني جۇماققا كىرىپ، ودان ەشقاشان دا شىقپاۋىمىز كەرەك. ٴبىراق اباي بولىڭىز، شايتان ٴسىزدى الداپ، سول جۇماقتان شىعارىپ العىسى كەلەدى! (پەت. 1-ح. 5:8؛ ايان 12:9). بۇعان ەشقاشان جول بەرمەڭىز. ەندەشە، رۋحاني جۇماعىمىز ادەمى، تازا، جايلى مەكەن بولا بەرۋ ٷشىن بارىمىزدى سالايىق!
رۋحاني جۇماقتا جۇرگەندەر بولاشاقتا تۋرا ماعىنادا جۇماقتىڭ راقاتىن كورەدى (19-ابزاستى قاراڭىز)
قالاي جاۋاپ بەرەر ەدىڭىز؟
-
رۋحاني جۇماق دەگەن نە؟
-
رۋحاني جۇماقتا قانداي باتالارعا كەنەلىپ ٴجۇرمىز؟
-
رۋحاني جۇماققا وزگەلەر دە تارتىلۋ ٷشىن نە ىستەي الامىز؟
144-ٵن زور سيعا نازار تىگەيىك
a ٴسوز ٴمانى: «رۋحاني جۇماق» دەپ رۋحاني ورتانى ايتامىز، وندا ٴبىز ەحوباعا عيبادات ەتەمىز. رۋحاني جۇماقتا ٴبىز ەحوبامەن دە، ٴبىر-بىرىمىزبەن دە تاتۋمىز.
b jw.org تور بەكەتىنەن «ولار قازىر قايدا ەكەن؟ الەنا جيتنيكوۆا: مەنىڭ ارمانىم ورىندالدى» دەگەن ۆيدەونى كورىڭىز، وندا ٴبىر ايەل باۋىرلاس رۋحاني جۇماقتا قانداي باتالارعا كەنەلگەنىن ايتىپ بەرەدى.
c سۋرەت سيپاتتاماسى: قاۋىمدا باۋىرلاستار ارقا-جارقا بولىپ ارالاسىپ جاتىر، ال ٴبىر ەر باۋىرلاس بولەكتەنىپ وتىر.
