5-زەرتتەۋ ماقالاسى
27-ٵن قۇداي بالالارىنىڭ پاش ەتىلۋى
«مەن سەنى ەشقاشان تاستامايمىن!»
«قۇداي: «مەن سەنى ەشقاشان قالدىرمايمىن، ەشقاشان تاستامايمىن»،— دەگەن» (ەۆر. 13:5ا).
نەگىزگى وي
مايلانعانداردىڭ بارلىعى تۇگەل كوككە الىنعاندا، ەحوبا ٶزىنىڭ جەردەگى قىزمەتشىلەرىن تاستامايدى.
1. مايلانعان ماسىحشىلەر قاشان تۇگەل كوكتە بولادى؟
كوپ جىل بۇرىن ەحوبانىڭ قىزمەتشىلەرىن «مايلانعان ماسىحشىلەردىڭ سوڭعىلارى قاشان كوككە الىنادى؟» دەگەن سۇراق ويلاندىردى. كەزىندە ٴبىز ارماگەددون شايقاسى اياقتالىپ، جۇماق باستالعاننان كەيىن كەيبىر مايلانعان باۋىرلاستار ٴبىراز ۋاقىت جەردە بولادى دەپ ويلادىق. ٴبىراق 2013 جىل، 15-شىلدەدەگى «كۇزەت مۇناراسىنان» 144000 نىڭ ٴبارى دە ارماگەددون باستالماي تۇرىپ كوككە جينالاتىنىن بىلدىك (مات. 24:31).
2. قانداي سۇراق تۋىنداۋى مۇمكىن جانە بۇل ماقالادا نە تالقىلايمىز؟
2 دەگەنمەن ٴبىر سۇراق تۋىندايدى: «زور الاپاتتا» جەردە ەحوباعا ادال قىزمەت ەتىپ جۇرگەن ٴماسىحتىڭ «باسقا قويلارىمەن» نە بولادى؟ (جوح. 10:16؛ مات. 24:21). بالكىم، كەيبىرەۋلەر سۇيىكتى مايلانعان باۋىرلاستارىمىز ٴبىزدى تاستاپ كوككە كەتىپ قالسا، بىزگە كىم باس-كوز بولادى دەپ ۋايىمدايتىن شىعار. ولاردىڭ وسىلاي ويلاۋىنا كيەلى كىتاپتاعى ەكى وقيعا سەبەپ بولۋى مۇمكىن. الدىمەن، سولاردى تالقىلاپ وتەيىك. ال سوسىن ۋايىمداۋعا ەش سەبەپ جوق ەكەنىنە نەگىزدەر كەلتىرەمىز.
قانداي جاعداي بولمايدى؟
3، 4. كەيبىرەۋلەر نەنى ۋايىمداۋى مۇمكىن جانە نەگە؟
3 كەيبىر باۋىرلاستار بىزگە جول كورسەتىپ وتىراتىن باسقارۋشى كەڭەستەگى مايلانعاندار بولماي قالسا، باسقا قويلار تۋرا جولدان اداسىپ كەتپەس پە ەكەن دەپ ۋايىمداۋى مۇمكىن. ولاردىڭ وسىلاي قورقۋىنا كيەلى كىتاپتاعى كەيبىر وقيعالار اسەر ەتكەن شىعار. قازىر سولاردىڭ ەكەۋىن قاراستىرايىق. ٴبىرىنشىسى — باس ٴدىني قىزمەتكەر ەحودايدىڭ وقيعاسى. ول قۇدايعا ادال، تاماشا كىسى بولعان. ايەلى ەحوشابات ەكەۋى جوعاس ەسىمدى كىشكەنتاي بالاعا قورعان بولىپ، وعان جاقسى ٵرى ادال پاتشا بولۋعا كومەكتەسەدى. ەحودايدىڭ كوزى تىرىسىندە جوعاس ەحوباعا ۇنامدى ارەكەت ەتىپ ٴجۇردى. ال ەحوداي قايتىس بولعان سوڭ، تەز-اق تۋرا جولدان تايىپ كەتتى. زۇلىم بەكزادالاردىڭ ايتقانىن تىڭداپ، ەحوبادان تەرىس اينالدى (شەج. 2-ج. 24:2، 15—19).
4 ەكىنشى مىسال — ەكىنشى عاسىرداعى ماسىحشىلەردىڭ جاعدايى. ەلشىلەردەن سوڭعى بولىپ دۇنيەدەن وتكەن جوحان ەدى. ٴتىرى كەزىندە ول كوپتەگەن ماسىحشىلەرگە ەحوباعا ادال قىزمەت ەتە بەرۋگە كومەكتەسكەن (جوح. 3-ح. 4). باسقا ەلشىلەر سياقتى، ول دا قاۋىمدا بەلەڭ الا باستاعان جولدانتايۋشىلىقپەن جان سالا كۇرەسكەن (جوح. 1-ح. 2:18؛ سال. 2-ح. 2:7). ٴبىراق جوحان قايتىس بولا سالا، جولدانتايۋشىلىق ورتتەي ٶرشىپ كەتتى. ٴسۇيتىپ، ودان كەيىنگى جىلدارى قاۋىمدار تۇگەل تۋرا جولدان تايدى.
5. جوعارىداعى ەكى وقيعا نەنى بىلدىرمەيدى؟
5 بۇل ەكى وقيعا مايلانعاندار تۇگەل كوككە الىنعاندا، ٴماسىحتىڭ باسقا قويلارىمەن دە وسىنداي جاعداي بولاتىنىن بىلدىرە مە؟ ولار دا جوعاس سياقتى تۋرا جولدان اۋىتقىپ، ەكىنشى عاسىرداعى ماسىحشىلەر سياقتى جولدان تايىپ كەتە مە؟ ەشقاشان دا ولاي بولمايدى! جەردە ەشقانداي مايلانعان قالماسا دا، ەحوبا ٶز حالقىنىڭ قامىن جاساي بەرەدى ٵرى ولار رۋحاني وركەندەي بەرەدى. بۇعان سەنىمدى بولاتىنداي، بىزدە قانداي نەگىز بار؟
تازا عيبادات تازا بولىپ قالا بەرەدى
6. قانداي ٷش كەزەڭدى شولىپ وتەمىز؟
6 الدا بولاتىن قيىندىقتارعا قاراماستان، تازا عيبادات ەش بۇلىنبەيتىنىنە نەگە سەنىمدىمىز؟ ويتكەنى كيەلى كىتاپتان ٴبىز ٶمىر ٴسۇرىپ جاتقان كەزەڭنىڭ ەجەلگى يسرايلدىكتەر نەمەسە ەكىنشى عاسىرداعى ماسىحشىلەر ٶمىر سۇرگەن كەزەڭنەن مۇلدەم باسقا ەكەنىن بىلەمىز. ەندەشە وسى ٷش كەزەڭدى، ياعني: 1) ەجەلگى ٴيسرايلدىڭ كەزىن، 2) ەلشىلەر قايتىس بولعاننان كەيىنگى ۋاقىتتى جانە 3) «بارلىق نارسەلەر قالپىنا كەلەتىن ۋاقىت» دەپ اتالعان ٴبىزدىڭ كەزەڭدى قاراستىرىپ شىعايىق (ەل. ٸس. 3:21).
7. ەجەلگى يسرايلدە پاتشالار مەن حالىق زۇلىم بولىپ كەتسە دە، نەگە ادال يسرايلدىكتەردىڭ جىگەرى جاسىمادى؟
7 ەجەلگى ٴيسرايلدىڭ كەزى. دۇنيەدەن وتپەس بۇرىن مۇسا يسرايلدىكتەرگە: «مەن كوز جۇمعان سوڭ، سەندەردىڭ زۇلىم ىستەر جاساپ، نۇسقاعان جولىمنان تايىپ كەتەتىندەرىڭدى جاقسى بىلەمىن»،— دەگەن (مۇس. 5-ج. 31:29). سونداي-اق ولار بۇلىك شىعارا بەرەتىن بولسا، باسقا ەلگە ايدالاتىنىن دا ەسكەرتكەن (مۇس. 5-ج. 28:35، 36). تۇبىندە ٴدال وسىلاي بولىپ شىقتى. عاسىرلار بويى كوپتەگەن پاتشالار ەحوبانىڭ كوز الدىندا زۇلىم ىستەر جاساپ، وزدەرىمەن قوسا حالىقتى دا تۋرا جولدان اداستىردى. اقىرى، ەحوبا ٶزىنىڭ زۇلىم حالقىنان باس تارتىپ، پاتشالار اۋلەتىنەن بيلىكتى الىپ قويدى (ەزەك. 21:25—27). ال ادال يسرايلدىكتەر ەحوبانىڭ ٴسوزى دالمە-ٴدال ورىندالعانىن كورگەندە بويلارىنا باتىلدىق ٴبىتىپ، ٵرى قاراي قىزمەت ەتە بەردى (يشايا 55:10، 11).
8. ەكىنشى عاسىرداعى ماسىحشىلىكتىڭ ٴبۇلىنىپ كەتكەنىنە تاڭعالۋىمىز كەرەك پە؟ ٴتۇسىندىرىڭىز.
8 ەلشىلەر قايتىس بولعاننان كەيىنگى كەزەڭ. ەكىنشى عاسىرداعى ماسىحشىلەردىڭ تۋرا جولدان تايىپ كەتكەندەرى ٴبىزدى ەش تاڭعالدىرمايدى. ويتكەنى يسا جولدانتايۋشىلاردىڭ قاپتاپ كەتەتىنىن الدىن الا ايتقان (مات. 7:21—23؛ 13:24—30، 36—43). ٴبىرىنشى عاسىردىڭ وزىندە ەلشى پاۋىل، پەتىر مەن جوحان يسانىڭ ٴسوزى ورىندالىپ جاتقانىن راستاعان (سال. 2-ح. 2:3، 7؛ پەت. 2-ح. 2:1؛ جوح. 1-ح. 2:18). ال ەكىنشى عاسىردا ماسىحشىلەر قاۋىمى تۇگەلدەي ٴبۇلىنىپ كەتتى. ٴسۇيتىپ، جولدان تايعان ماسىحشىلىك ابدەن كۇشىنە ٴمىنىپ، دۇنيەجۇزىلىك جالعان دىندەر يمپەرياسى — ۇلى بابىلدىڭ تورىنەن ٴبىر-اق ورىن الدى. بۇل جولى دا پايعامبارلىق تۋرا ورىندالدى.
9. ٴبىزدىڭ كەزەڭ ەجەلگى ٴيسرايلدىڭ جانە ەكىنشى عاسىرداعى ماسىحشىلەر قاۋىمىنىڭ كەزەڭىنەن نەسىمەن ەرەكشەلەنەدى؟
9 «بارلىق نارسەلەر قالپىنا كەلەتىن ۋاقىت». ٴبىزدىڭ زامانىمىزداعى ۋاقىت ەجەلگى ٴيسرايلدىڭ كەزىنەن جانە جولدانتايۋشىلىق بەلەڭ العان ەكىنشى عاسىردان قاتتى ەرەكشەلەنەدى. ٴبىزدىڭ ۋاقىت قالاي اتالادى؟ وسى زۇلىم دۇنيەنىڭ “سوڭعى كۇندەرى» دەپ ايتاتىن شىعارمىز (ٴتىم. 2-ح. 3:1). ٴبىراق كيەلى كىتاپتا سول ۋاقىتپەن قاتار ودان دا اۋقىمدى ٵرى ۇزاعىراق ٴداۋىردىڭ باستالعانى ايتىلعان. بۇل ٴداۋىر ٴماسىحتىڭ پاتشالىعى ادامزاتتى قايتادان كەمەلدىلىككە جەتكىزىپ، جەردى قايتادان جۇماققا اينالدىرعانعا دەيىن جالعاسادى. ول «بارلىق نارسەلەر قالپىنا كەلەتىن ۋاقىت» دەپ اتالادى (ەل. ٸس. 3:21). بۇل كەزەڭ 1914-جىلى باستالدى. ول كەزدە نە قالپىنا كەلدى؟ يسا كوكتە پاتشا تاعىنا وتىردى. وسىلاي ەحوبانىڭ وكىلى بولاتىن، ٴداۋىت پاتشانىڭ ۇرپاعىنان شىققان بيلەۋشى قايتا پايدا بولدى. ٴبىراق ەحوبا تەك پاتشانى عانا ەمەس، كوپ ۇزاماي تازا عيباداتتى دا قالپىنا كەلتىرە باستادى! (يشايا 2:2—4؛ ەزەك. 11:17—20). ول ەندى قايتادان بۇلىنە مە؟
10. ا) قازىرگى تازا عيبادات جايىندا كيەلى كىتاپتا قانداي پايعامبارلىق ايتىلعان؟ (يشايا 54:17) ٵ) بۇل پايعامبارلىقتار نەگە بىزگە سەنىمدىلىك ۇيالاتادى؟
10 يشايا 54:17 وقىڭىز. بۇگىندە رۋحتىڭ جەتەلەۋىمەن ايتىلعان مىنا پايعامبارلىق ورىندالىپ جاتىر: «ساعان قارسى جاسالعان ەشبىر قارۋ جەڭىسكە جەتپەيدى». كەلەسى سەنىم ۇيالاتاتىن سوزدەر دە ٴبىزدىڭ ۋاقىتقا قاتىستى: «بالالارىڭنىڭ ٴبارى ەحوبادان ٴتالىم الادى. ولاردىڭ تىنىشتىعى ۇشان-تەڭىز بولادى. سەن ادىلدىكتى بەرىك نەگىز قىلاسىڭ... سەنى ەشتەڭە قورقىتپايدى، شوشىتپايدى دا. مۇنداي نارسە ساعان جولامايدى» (يشايا 54:13، 14). «وسى دۇنيەنىڭ قۇدايى» بولىپ وتىرعان شايتاننىڭ ٶزى ەحوبانىڭ حالقى اتقارىپ جاتقان اعارتۋ ٸسىن توقتاتا المايدى (قور. 2-ح. 4:4). تازا عيبادات قالپىنا كەلدى. ول ەندى ەشقاشان دا بۇلىنبەيدى. ول ماڭگىلىككە قالادى. وعان قارسى جاسالعان ەشبىر قارۋ جەڭىسكە جەتپەيدى!
قانداي جاعداي بولادى؟
11. مايلانعاندار كوككە الىنعاندا ۇلى جاماعات قاراۋسىز قالمايتىنىنا نەگە سەنىمدىمىز؟
11 مايلانعاندار كوككە الىنعان سوڭ، باسقا قويلارمەن نە بولادى؟ ٴبىزدىڭ باعۋشىمىز يسا ەكەنىن ۇمىتپايىق. ول — قاۋىمنىڭ باسى. ونىڭ ٶزى: «كوسەمدەرىڭ بىرەۋ-اق. ول — ٴماسىح»،— دەگەن (مات. 23:10). ٴبىزدىڭ كوكتە بيلىك ەتىپ وتىرعان پاتشامىز ٶز مىندەتىن ارقاشان دا جاۋاپكەرشىلىكپەن اتقارادى. ونىڭ ٶزى باس-كوز بوپ تۇرعاندا، جەردەگى ٸزباسارلارىنا ەشتەڭەدەن قورقۋدىڭ قاجەتى جوق. ٴماسىح قول استىنداعى حالقىن سول كەزدە قالاي باستاپ جۇرەتىنىن بۇگە-شىگەسىنە دەيىن بىلمەيمىز، ارينە. ٴبىراق كيەلى كىتاپتا بىزگە سەنىمدىلىك بەرەتىن كەيبىر مىسالدار بار. سولاردى قاراستىرىپ وتەيىك.
12. ا) مۇسا قايتىس بولعان سوڭ، ەحوبا ٶز حالقىن قالاي قامقورلادى؟ ٵ) ٸلياس باسقا تاپسىرما الىپ كەتكەن سوڭ شە؟ (سۋرەتتى دە قاراڭىز.)
12 يسرايل حالقى ۋادە ەتىلگەن جەرگە كىرمەي تۇرىپ، مۇسا قايتىس بولادى. سوندا قۇداي حالقىمەن نە بولدى؟ ولار قاراۋسىز قالدى ما؟ ادالدىق ساقتاعان كەزدەرىنىڭ بارىندە ەحوبا ولاردى ەش تاستامادى. قالاي؟ مۇسا ولمەس بۇرىن ەحوبا وعان حالىققا جەتەكشىلىك ەتۋدى ەشۋاعا تاپسىر دەدى (مۇس. 2-ج. 33:11؛ مۇس. 5-ج. 34:9). ال مۇسا ونى جىلدار بويى وسى ىسكە ۇيرەتكەن ەدى. ودان قالسا، مىڭباسى، ٴجۇزباسى، ەلۋباسى، ٴتىپتى ونباسى بولىپ تاعايىندالعان قابىلەتتى جەتەكشىلەر كوپ ەدى (مۇس. 5-ج. 1:15). وسىلاي ەحوبا ٶز حالقىنىڭ بار قامىن جاسادى. ٸلياس پايعامباردىڭ كەزىندە دە سولاي بولدى. ول ونداعان جىلدار بويى يسرايلدە تازا عيباداتتى العا تارتىپ ٴجۇردى. ٴبىراق كەيىن ەحوبا ونى باسقا قىزمەتكە تاعايىنداپ، سوناۋ ياھۋدانىڭ وڭتۇستىگىنە جىبەردى (پات. 2-ج. 2:1؛ شەج. 2-ج. 21:12). سوندا ٴيسرايلدىڭ ون رۋلى پاتشالىعىنداعى ادال كىسىلەر تاستاندى بولىپ قالدى ما؟ جوق. ولاردا ٴبىراز جىلدان بەرى ٸلياستان ٴتالىم العان ەلىشە پايعامبار بار ەدى. سونداي-اق وندا «پايعامبارلار ۇلدارى» دا بولدى. ولار مەكتەپ سياقتى ۇيىمداستىرىلعان ارنايى جەرلەردە وقىعان كورىنەدى (پات. 2-ج. 2:7). دەمەك، قۇداي حالقىنا جەتەكشىلىك ەتەتىن ادال ەر كىسىلەر كوپ بولعان. ەحوبا ٵرى قاراي دا ٶزىنىڭ ەركىن ورىنداي بەرگەن ٵرى ادال قىزمەتشىلەرىنىڭ قامىن جاساي بەرگەن.
مۇسا دا (سول جاق سۋرەتتە)، ٸلياس تا (وڭ جاق سۋرەتتە) جاقسى ورىنباسار دايىنداپ كەتتى (12-ابزاستى قاراڭىز)
13. ەۆرەيلەرگە 13:5 ٴتىڭ ەكىنشى جارتىسىندا جۇرەككە جىلۋ بەرەتىن قانداي ۋادە بار؟ (سۋرەتتى دە قاراڭىز.)
13 سونىمەن، وسى ەكى جاعدايدى ەسكەرسەك، مايلانعاندار كوككە الىنعاندا نە بولادى ەكەن دەپ ۋايىمداۋعا ەش سەبەپ جوق. سەبەبى كيەلى كىتاپتا انىق ايتىلعانداي، ەحوبا جەردەگى حالقىن ەشقاشان تاستامايدى (ەۆرەيلەرگە 13:5ا وقىڭىز). مۇسا مەن ٸلياس پايعامبارلار ىسپەتتى، قازىرگى تاڭدا جەتەكشىلىكتى قولعا العان شاعىن مايلانعاندار توبى دا وزگەلەردى ۇيرەتۋدىڭ ماڭىزدىلىعىن جاقسى تۇسىنەدى. كوپ جىلدان بەرى باسقارۋشى كەڭەستەگى باۋىرلاستار باسقا قويلاردىڭ قاتارىنداعى ەر كىسىلەرگە جەتەكشىلىكتى قولعا الۋدى ۇيرەتىپ كەلەدى. مىسالى، ولار اقساقالدارعا، ارالاۋشى باقىلاۋشىلارعا، فيليال كوميتەتىنىڭ مۇشەلەرىنە، بەتەلدەگى باقىلاۋشىلارعا ارنالعان ٴتۇرلى مەكتەپتەر ۇيىمداستىردى. سونداي-اق باسقارۋشى كەڭەستىڭ ٵرتۇرلى كوميتەتتەرىندەگى كومەكشىلەرىن دە باسقارۋشى كەڭەستىڭ ٶزى تىكەلەي ۇيرەتەدى. قازىرگى تاڭدا بۇل كومەكشىلەر ۇيىمدا كوپ جاۋاپكەرشىلىكتەردى ادال اتقارىپ ٴجۇر. مايلانعاندار كەتكەن سوڭ، ولار ٴماسىحتىڭ قويلارىنىڭ قامىن جاساۋعا ساقاداي ساي تۇر.
باسقارۋشى كەڭەس وزدەرىنە كومەكشى باۋىرلاستاردى ۇيرەتۋگە، بۇكىل الەم بويىنشا اقساقالدارعا، اۋداندىق باقىلاۋشىلارعا، فيليال كوميتەتىنىڭ مۇشەلەرىنە، بەتەلدەگى باقىلاۋشىلارعا جانە ميسسيونەرلەرگە ارنالعان مەكتەپتەردى ۇيىمداستىرۋعا كوپ كۇش جۇمسايدى (13-ابزاستى قاراڭىز)
14. وسى تالقىلاۋىمىزدىڭ توقەتەرى نە؟
14 سونىمەن، توقسان اۋىز ٴسوزدىڭ توبىقتاي ٴتۇيىنى: زور الاپاتتىڭ اياعىنا تامان سوڭعى مايلانعاندار كوككە الىنعاندا، جەر بەتىندە تازا عيبادات قاز قالپىندا قالادى. يسا ٴماسىحتىڭ جەتەكشىلىگىمەن قۇداي حالقى ەحوباعا ادال قىزمەت ەتە بەرەدى. ول كەزدە ماگوگ جەرىندەگى گوگ، ياعني وداقتاسقان حالىقتار بىزگە شابۋىلدايتىنى راس (ەزەك. 38:18—20). ٴبىراق قىسقا ۋاقىتقا عانا سوزىلاتىن بۇل شابۋىلدان تۇك تە شىقپايدى. ولار ەحوباعا عيبادات ەتۋىمىزگە ەش بوگەت جاساي المايدى. ەحوبا حالقىن مىندەتتى تۇردە قۇتقارىپ قالادى! ەلشى جوحان اياندا ٴماسىحتىڭ باسقا قويلارىنان قۇرالعان «ۇلى جاماعاتتى» كورگەن. وعان بۇل «ۇلى جاماعاتتىڭ... زور الاپاتتان وتكەنى» ايتىلدى (ايان 7:9، 14). دەمەك، ولار امان قالادى!
15، 16. ايان 17:14 كە ساي، ارماگەددون سوعىسى كەزىندە مايلانعاندار نە ىستەيدى جانە بۇل نەگە بىزگە جىگەر بەرەدى؟
15 مايلانعاندار شە، ولار كوككە بارعان سوڭ نە ىستەيدى؟ كيەلى كىتاپتا بۇل سۇراققا دا انىق جاۋاپ بار. وندا جەر بەتىندەگى ۇكىمەتتەردىڭ «توقتىعا قارسى شايقاسقا شىعاتىنى» ايتىلعان. ٴبىراق توقتى ولاردى البەتتە «جەڭىپ شىعادى». ال توقتىمەن بىرگە كىمدەر شايقاسادى؟ تارماقتا ايتىلعانداي، «شاقىرىلعان»، «تاڭداپ الىنعان»، سونداي-اق «ادال بولعاندار» (ايان 17:14 وقىڭىز). ولار قايتا تىرىلگەن مايلانعاندار! دەمەك، زور الاپات بىتۋگە تاياعاندا، سوڭعى بولىپ كوككە الىنعان مايلانعانداردىڭ العاشقى تاپسىرماسى سوعىسۋ بولادى. بۇل وتە ەرەكشە تاپسىرما بولماق! ەحوبا كۋاگەرى بولماي تۇرىپ، مايلانعانداردىڭ كەيبىرى وزگەلەردى سوققىعا جىققان. ارالارىندا اسكەردە بولعاندارى دا بار. ٴبىراق كەيىن ولار ماسىحشىلىك جولىن ۇستانىپ، تاتۋلىققا ۇيرەنگەن (عال. 5:22؛ سال. 2-ح. 3:16). ٴسۇيتىپ، بۇدان بىلاي سوعىس اتاۋلىنى قولدامايتىن بولدى. الايدا كوككە بارعان سوڭ، ولار ماسىحپەن جانە قاسيەتتى پەرىشتەلەرىمەن بىرگە قۇدايدىڭ جاۋلارىنا قارسى سوڭعى شايقاسقا اتتانادى.
16 ويلاپ قاراساق، قازىر جەردەگى كەيبىر مايلانعان باۋىرلاستار قارتايىپ قالعان، بويلارىنان كۇش-قۋاتى كەتكەن. ٴبىراق كوككە قايتا تىرىلگەندە ولار قۇدىرەتتى، ولمەس رۋحاني جاراتىلىسقا اينالىپ، جاۋىنگەر پاتشا ماسىحپەن بىرگە شايقاسۋعا تاعايىندالادى. ارماگەددون سوعىسى وتكەن سوڭ، ولار ادامزاتقا كەمەلدىلىككە جەتۋگە كومەكتەسەدى. جەردە كەمەلسىز پەندە بولعان كەزدەرىنە قاراعاندا، كوكتە ولار وزدەرىنىڭ اياۋلى باۋىرلاستارى ٷشىن الدەقايدا كوپ نارسە ىستەي الادى! بۇل قانداي كەرەمەت دەسەڭىزشى!
17. ارماگەددون سوعىسى كەزىندە قۇدايدىڭ بارلىق قىزمەتشىلەرى قاۋىپسىزدىكتە بولاتىنىن قايدان بىلەمىز؟
17 ٴسىز باسقا قويلاردىڭ قاتارىنداسىز با؟ ەندەشە، شەشۋشى ارماگەددون سوعىسى باستالعاندا سىزگە نە ىستەۋ كەرەك بولادى؟ ەحوباعا سەنىم ارتىپ، نۇسقاۋلارىنا قۇلاق اسىڭىز. بار بولعانى وسى. ول قانداي نۇسقاۋ بولۋى مۇمكىن؟ كيەلى كىتاپتا جانعا جاي بەرەتىن مىناداي سوزدەر جازىلعان: «ىشكى بولمەلەرىڭە كىرىڭدەر دە، ەسىكتەرىڭدى جاۋىپ الىڭدار. قۇدايدىڭ قاھارى باسىلعانشا، ازعانا ۋاقىت جاسىرىنا تۇرىڭدار» (يشايا 26:20). ەحوبانىڭ كوك پەن جەردەگى ادال قىزمەتشىلەرى ول كەزدە قاۋىپسىزدىكتە بولادى. ەلشى پاۋىل سياقتى ٴبىز دە «ۇكىمەت تە، قازىرگى نە بولاشاقتاعى نارسەلەر دە... ٴبىزدى قۇدايدىڭ سۇيىسپەنشىلىگىنەن ايىرا المايتىنىنا» كامىل سەنىمدىمىز! (ريم. 8:38، 39). ەحوبا ٴسىزدى جاقسى كورەدى ٵرى ەشقاشان تاستامايدى! وسىنى ۇمىتپاڭىز.
مايلانعانداردىڭ سوڭعىسى كوككە الىنعاندا...
-
نە بولمايدى؟
-
تازا عيبادات بۇلىنبەيتىنىنە نەگە سەنىمدى بولساق بولادى؟
-
ەحوبا حالقىنىڭ قامىن جاسايتىنىنا نەگە سەنىمدىمىز؟
8-ٵن ەحوبا — ٴبىزدىڭ قورعانىمىز
