51-زەرتتەۋ ماقالاسى
ەحوبا ساعى سىنعانداردى قۇتقارادى
«جۇرەگى جارالى جانعا ەحوبا جاقىن تۇرادى، ساعى سىنعانداردى قۇتقارادى» (ٴزاب. 34:18).
30-ٵن ەحوبا، قۇدايىمسىڭ، ادال دوسىم
اڭداتپا *
1، 2. بۇل ماقالادا ٴبىز نە قاراستىرامىز؟
كيەلى كىتاپتا ٶمىرىمىزدىڭ «قىسقا ٵرى ازاپقا تولى» ەكەنى ايتىلعان (ٵيۇپ 14:1). سوندىقتان كەيدە ەڭسەمىزدىڭ نەگە تۇسەتىنى تۇسىنىكتى-اق. ەحوبانىڭ ەجەلدەگى كوپتەگەن قىزمەتشىلەرىنىڭ دە ەڭسەلەرى تۇسكەن. كەيبىرى ٴتىپتى وزدەرىنە ٶلىم تىلەگەن (پات. 1-ج. 19:2—4؛ ٵيۇپ 3:1—3، 11؛ 7:15، 16). الايدا ولاردىڭ سەنىم ارتقان قۇدايى ەحوبا ولاردى ٵردايىم جۇباتىپ، كۇش بەرىپ وتىرعان. ولاردىڭ وقيعالارى بىزگە جۇبانىش بەرىپ، ٴتالىم بولسىن دەپ كيەلى كىتاپقا جازىلعان (ريم. 15:4).
2 بۇل ماقالادا ٴبىز ەحوبانىڭ كەيبىر قىزمەتشىلەرى ەڭسەلەرىن تۇسىرەتىن جاعدايلاردا قالاي تاباندىلىق تانىتقاندارى جايلى قاراستىرامىز. ولار: جاقىپتىڭ ۇلى ٴجۇسىپ، جەسىر قالعان ناعيما مەن ونىڭ كەلىنى رۋت، ٴزابۇردىڭ 73 ٸنشى جىرىن جازعان لەۋىلىك جانە ەلشى پەتىر. ەحوبا ولاردى قالاي نىعايتتى؟ ولاردىڭ وقيعالارىنان ٴبىز نە نارسەگە ۇيرەنە الامىز؟ بۇل سۇراقتاردىڭ جاۋابى «جۇرەگى جارالى جانعا ەحوبا جاقىن تۇراتىنىنا، ساعى سىنعانداردى قۇتقاراتىنىنا» كوزىمىزدى جەتكىزەدى (ٴزاب. 34:18).
ٴجۇسىپ قاتىگەزدىك پەن ادىلەتسىزدىك كوردى
3، 4. ٴجۇسىپ جاس كەزىندە قانداي جاعدايلارعا تاپ بولدى؟
3 ٴجۇسىپ شامامەن 17 جاسىندا ەكى ٴتۇس كوردى. ونىڭ ەكەۋى دە قۇدايدان ەدى. بۇل تۇستەر ٴجۇسىپ كۇندەردىڭ كۇنىندە وتباسىنىڭ قۇرمەتىنە بولەنەتىن دارەجەلى ادامعا اينالاتىنىن ٴبىلدىردى (مۇس. 1-ج. 37:5—10). ٴبىراق ٴتۇس كورگەننەن كەيىن كوپ ۇزاماي ٴجۇسىپتىڭ ٶمىرى كۇرت وزگەرىپ كەتتى. قۇرمەت كورسەتۋ بىلاي تۇرسىن، اعالارى ونى قۇلدىققا ساتىپ جىبەردى (مۇس. 1-ج. 37:21—28). ٴسۇيتىپ، ٴجۇسىپ مىسىردا جالعان قۇدايلارعا تابىناتىن پوتيفار ەسىمدى ساراي قىزمەتكەرىنىڭ ۇيىندە قۇل بولدى. اكەسىنىڭ سۇيىكتى ۇلى بولعان ول ٴبىر ساتتە بەيشارا قۇلعا اينالدى (مۇس. 1-ج. 39:1).
4 كەيىن ٴجۇسىپتىڭ جاعدايى ودان سايىن قيىنداي ٴتۇستى. پوتيفاردىڭ ايەلى «مەنى زورلاماق بولدى» دەپ، جۇسىپكە جالعان ايىپ تاقتى. ال پوتيفار جاعدايدىڭ انىق-قانىعىن بىلمەي جاتىپ، ٴجۇسىپتى تۇرمەگە قاماتىپ، تەمىرمەن بۇعاۋلاتىپ تاستادى (مۇس. 1-ج. 39:14—20؛ ٴزاب. 105:17، 18). جاپ-جاس بولعان ٴجۇسىپتىڭ وسىنداي ايىپتان كەيىن ٶزىن قالاي سەزىنگەنىن ەلەستەتىپ كورىڭىزشى. بۇل جاعدايدى ەستىگەن ادامدار ٴجۇسىپتىڭ قۇدايى ەحوبا جايلى نە ويلاپ قالماق ەدى؟ ٴيا، ٴجۇسىپتىڭ ساعى سىناتىنىنداي-اق بار ەدى.
5. ٴتۇڭىلىپ كەتپەس ٷشىن ٴجۇسىپ نە ىستەدى؟
5 قۇل بولعاندا دا، تۇرمەدە وتىرعاندا دا ٴجۇسىپتىڭ ەركىندىگى مەن مۇمكىندىگى شەكتەۋلى بولدى. وعان وڭ كوزقاراس ساقتاۋعا نە كومەكتەستى؟ ٴجۇسىپ ٶزى وزگەرتە المايتىن نارسەلەردى ويلاي بەرمەي، وزىنە تاپسىرىلعان ٸستى بار ىنتاسىمەن اتقاردى. بارىنەن بۇرىن، ول ۇنەمى ەحوباعا ۇنامدى بولۋدى ويلاپ ٴجۇردى. سوندىقتان ەحوبا ٴجۇسىپتىڭ بارلىق ٸسىن وڭعارىپ وتىردى (مۇس. 1-ج. 39:21—23).
6. ٴجۇسىپ تۇستەرىنەن قالاي جۇبانىش تاپقان بولۋى مۇمكىن؟
6 ٴجۇسىپ ٶزىنىڭ پايعامبارلىق ٴمانى بار ەكى ٴتۇسى جايلى وي جۇگىرتىپ، سودان دا جىگەر العان بولۋى مۇمكىن. وسى كورگەن تۇستەرىنە ساي، ول وتباسىمەن قايتا قاۋىشىپ، جاعدايى وڭالماق ەدى. ٴبارى ٴدال سولاي بولدى. ٴجۇسىپ شامامەن 37 جاسقا كەلگەندە، ونىڭ پايعامبارلىق ٴمانى بار تۇستەرى كەرەمەت جولمەن ورىندالا باستادى (مۇس. 1-ج. 37:7، 9، 10؛ 42:6، 9).
7. پەتىردىڭ 1-حاتى 5:10 عا ساي، بىزگە قيىن شاقتا تاباندى بولۋعا نە كومەكتەسەدى؟
7 ۇيرەنەرىمىز. ٴجۇسىپتىڭ وقيعاسى ٴبىزدىڭ وسى دۇنيەدە قاتىگەزدىك پەن ادىلەتسىزدىك كورەتىنىمىزدى ەسىمىزگە سالادى. ٴبىز ٴتىپتى باۋىرلاستارىمىزدان دا ادىلەتسىزدىك كورۋىمىز مۇمكىن. ٴبىراق ٴبىز ەحوباعا جارتاسىمىز، ياعني پانامىز رەتىندە قارايتىن بولساق، ٴتۇڭىلىپ كەتپەيمىز نەمەسە وعان قىزمەت ەتۋدى دوعارىپ جۇرمەيمىز (ٴزاب. 62:6، 7؛ پەتىردىڭ 1-حاتى 5:10 وقىڭىز). ەحوبا جۇسىپكە ەرەكشە قاراپ، وعان تۇستەر كورسەتكەن كەزدە، ونىڭ جاسى شامامەن 17 دە بولعان بولسا كەرەك. بۇدان كورەتىنىمىز، ەحوبا ٶزىنىڭ جاس قىزمەتشىلەرىنە تولىقتاي سەنىم ارتادى. بۇگىندە كوپتەگەن جاستار ٴجۇسىپ سياقتى، ەحوباعا زور سەنىم تانىتادى. ولاردىڭ كەيبىرى ٴتىپتى ەحوباعا دەگەن ادالدىقتارىنان اتتاپ كەتپەگەندەرى ٷشىن ادىلەتسىز تۇردە تۇرمەگە قامالعان (ٴزاب. 110:3).
قايعىعا باتقان ەكى ايەل
8. ناعيما مەن رۋت قانداي جاعدايدى باستان كەشتى؟
8 ەلدى اشارشىلىق جايلاعان كەزدە، ناعيما مەن ونىڭ وتباسى ياھۋداداعى ۇيلەرىن تاستاپ، مواب ەلىنە كوشىپ باردى. سول جەردە ناعيمانىڭ كۇيەۋى ەليمەلەك قايتىس بولدى. ٴسۇيتىپ، ناعيما ەكى ۇلىمەن جالعىز قالدى. كەيىنىرەك ەكى ۇلى رۋت پەن ورپا ەسىمدى موابتىق قىزدارعا ۇيلەندى. شامامەن 10 جىلدان كەيىن، ارتتارىنان ەشقانداي ۇرپاق قالدىرماي، ناعيمانىڭ ەكى ۇلى دا ومىردەن ٶتتى (رۋت 1:1—5). سوندا وسى ٷش ايەلدىڭ قالاي قايعىعا باتقانىن ەلەستەتىپ كورىڭىزشى. ارينە، رۋت پەن ورپانىڭ قايتادان تۇرمىس قۇرۋعا مۇمكىندىكتەرى بار ەدى. ال جاسى كەلىپ قالعان ناعيمامەن نە بولماق ەدى؟ ونى كىم قامقورلايدى؟ بىردە ناعيمانىڭ ٴتۇڭىلىپ كەتكەنى سونشا — ول: «ەندى مەنى ناعيما ەمەس، مارا دەپ اتاڭدار. ويتكەنى قۇدىرەتى شەكسىز قۇداي ماعان ٶمىردىڭ اشىسىن تاتقىزدى»،— دەگەن. قايعى جامىلعان ناعيما بەتلەحەمگە قايتىپ ورالدى، رۋت تا وعان ەرىپ باردى (رۋت 1:7، 18—20).
قۇداي ٶزىنىڭ قىزمەتشىلەرىنە قيىن شاقتا ەڭسەلەرىن كوتەرۋگە كومەكتەسەدى. ناعيما مەن رۋتتىڭ بۇعان كوزى جەتكەن. ال ٴسىزدىڭ شە؟ (8—13-ابزاستاردى قاراڭىز) *
9. رۋت 1:16، 17، 22 گە ساي، قالايشا رۋت ناعيما ٷشىن جىگەر بولدى؟
9 اينىماس سۇيىسپەنشىلىكتىڭ ارقاسىندا ناعيمانىڭ قايعىسى جەڭىلدەدى. مىسالى، رۋت ناعيمادان ٴبىر ەلى اجىراماي، وعان اينىماس سۇيىسپەنشىلىك تانىتتى (رۋت 1:16، 17، 22 وقىڭىز). بەتلەحەمدە رۋت ٶزى ٷشىن جانە ناعيما ٷشىن ارپا جيناپ، ايانباي ەڭبەك ەتتى. وسىنىڭ ارقاسىندا رۋت ادامداردىڭ اراسىندا جاقساتقا يە بولدى (رۋت 3:11؛ 4:15).
10. ناعيما مەن رۋت سياقتى مۇقتاج جاندارعا ەحوبا قالاي سۇيىسپەنشىلىك تانىتتى؟
10 ەحوبانىڭ يسرايلدىكتەرگە بەرگەن زاڭىنان ونىڭ ناعيما مەن رۋت سياقتى مۇقتاج جاندارعا جانى اشيتىنى كورىندى. ول ٶز حالقىنا ەگىندىكتى تاناپتىڭ شەتىنە دەيىن تۇگەل ورماي، كەدەي-كەپشىكتەرگە قالدىرۋدى بۇيىرعان (مۇس. 3-ج. 19:9، 10). سونىڭ ارقاسىندا ناعيما مەن رۋت الاقان جايىپ، ەشكىمنەن تاماق سۇراعان جوق. ولار قادىر-قاسيەتىن جوعالتپاستان، تاماقتارىن تاۋىپ جەي الدى.
11، 12. باعوز ناعيما مەن رۋتتى قالاي قۋانىشقا بولەدى؟
11 رۋت ماساق تەرىپ جۇرگەن ەگىندىكتىڭ يەسى باعوز ەسىمدى داۋلەتتى كىسى ەدى. ول رۋتتىڭ ٶز ەنەسىنە دەگەن ادالدىعى مەن سۇيىسپەنشىلىگىنە ٴتانتى بولعانى سونشا — ولاردىڭ وتباسىنىڭ مۇراسىن ساتىپ الىپ، رۋتتى ايەلدىككە الدى (رۋت 4:9—13). ولاردان عابيت ەسىمدى ۇل تۋىلدى. ول ٴداۋىت پاتشانىڭ اتاسى بولدى (رۋت 4:17).
12 كىشكەنتاي عابيتتى قولىنا الىپ، ەحوباعا العىسىن جاۋدىرىپ جاتقان ناعيمانىڭ قۋانىشىن ەلەستەتىپ كورىڭىزشى. ٴبىراق الدا ناعيما مەن رۋتتى بۇدان دا زور قۋانىش كۇتىپ تۇر! ولار قايتا تىرىلگەندە، عابيت ۋادە ەتىلگەن ٴماسىحتىڭ ارعى اتاسى بولعانىن بىلەتىن بولادى.
13. ناعيما مەن رۋتتىڭ وقيعاسىنان قانداي قۇندى ساباق الامىز؟
13 ۇيرەنەرىمىز. ٴبىز سىناقتارعا كەزىككەندە ساعىمىز سىنىپ، ٴتىپتى قايعىعا باتۋىمىز مۇمكىن. كەيدە تىعىرىققا تىرەلگەندەي كۇي كەشەتىن شىعارمىز. سونداي كەزدەرى كوكتەگى اكەمىزگە تولىقتاي سەنىم ارتىپ، باۋىرلاستارىمىزعا جاقىن بولىپ قالۋىمىز كەرەك. ەحوبا ناعيمانىڭ كۇيەۋى مەن بالالارىن قايتا تىرىلتكەن جوق. تۋرا سول سياقتى، ول ٴبىزدىڭ دە سىناقتارىمىزدى الىپ تاستاماۋى مۇمكىن. ٴبىراق ول بىزگە قيىندىقتى ەڭسەرۋگە كومەكتەسەدى. كەيدە ول مۇنى باۋىرلاستاردىڭ اينىماس سۇيىسپەنشىلىكپەن جاساعان ارەكەتتەرى ارقىلى ىستەيدى (ناق. س. 17:17).
جولدان تايۋعا شاق قالعان لەۋىلىك
ٴبىر لەۋىلىك ەحوبانى ومىردە باستى ورىنعا قويمايتىنداردىڭ الدامشى جەتىستىگىن كورىپ، جولدان تايۋعا شاق قالعان. بۇنداي جاعداي بىزبەن دە بولۋى مۇمكىن (14—16-ابزاستاردى قاراڭىز)
14. نەلىكتەن لەۋىلىكتىڭ قاتتى ەڭسەسى ٴتۇستى؟
14 ٴزابۇردىڭ 73 ٸنشى جىرىن جازعان ادام لەۋىلىك بولاتىن. ول ەحوبانىڭ ۇيىندە قىزمەت ەتۋ مارتەبەسىنە يە ەدى. ٴبىراق ونىڭ دا قاتتى ەڭسەسى تۇسكەن كەزى بولدى. ول زۇلىمدار مەن مەنمەندەرگە قىزعانا قاراي باستادى. ول ولاردىڭ جامان ٸس-ارەكەتتەرىنە ەمەس، وزىنىكىنەن جاقسىراق بولىپ كورىنگەن ومىرلەرىنە قىزىقتى (ٴزاب. 73:2—9، 11—14). ولار بايلىققا كومىلىپ، ەش ۋايىمسىز، شالقىپ ٶمىر ٴسۇرىپ جاتقانداي كورىندى. وسىنى كورىپ، ٴزابۇر جىرشىسىنىڭ كوڭىلى تۇسكەنى سونشا — ول: «مەن جۇرەگىمدى بەكەرگە تازا ساقتاپپىن، كىناراتسىز ەكەنىمدى كورسەتۋ ٷشىن قولىمدى بوسقا جۋىپپىن»،— دەدى. شىنىندا دا، ول ەحوباعا قىزمەت ەتۋدى دوعارۋعا شاق قالدى.
15. ٴزابۇر 73:16—19، 22—25 تارماقتارعا ساي، وسى ٴزابۇر جىرىن جازعان لەۋىلىك ەڭسەسىن قالاي تۇزەدى؟
15 ٴزابۇر 73:16—19، 22—25 وقىڭىز. لەۋىلىك «قۇدايدىڭ ايبىندى عيباداتحاناسىنا كىردى». سول جەردە، ەحوبانىڭ قىزمەتشىلەرىنىڭ اراسىندا بولسا كەرەك، ول دۇعا ەتىپ، ٶز جاعدايىن سابىرلىقپەن، تۇنىق ويمەن سالماقتاپ-سارالاي الدى. ناتيجەسىندە ول ويلارىنىڭ اقىماقتىق بولعانىن جانە ٶزىنىڭ ەحوبادان الشاقتاتاتىن قاۋىپتى جولدا تۇرعانىن ۇقتى. سونداي-اق ول زۇلىمداردىڭ «تايعاق جەردە تۇرعانىن» جانە تۇبىندە «قۇرىپ جوعالاتىنىن» ٴتۇسىندى. جاعدايعا ەحوبانىڭ كوزىمەن قاراعاننان كەيىن، لەۋىلىك قىزعانىشتان ارىلىپ، ەڭسەسىن كوتەردى. ول قايتادان تىنىشتىققا كەنەلىپ، جۇرەگى شاتتىققا تولدى. ول: «جەردە [ەحوبادان] باسقا ەشتەڭەنى قالامايمىن»،— دەدى.
16. ٴبىز لەۋىلىكتەن قانداي ساباق الامىز؟
16 ۇيرەنەرىمىز. وركەندەپ جاتقانداي كورىنگەن زۇلىم ادامدارعا ەشقاشان قىزعانا قارامايىق. ولاردىڭ باقىتتارى الدامشى ٵرى ۋاقىتشا، ولاردىڭ ەشقانداي بولاشاعى جوق (ۋاع. 8:12، 13). ولارعا قىزعانا قاراۋ ۇنجىرعانىڭ تۇسۋىنە جانە رۋحاني كۇيرەۋگە اكەپ سوعادى. ەگەر ٴسىز تابىستى بولىپ كورىنگەن زۇلىمدارعا قىزعانا قاراپ جۇرگەن بولساڭىز، وسى لەۋىلىك سياقتى ارەكەت ەتىڭىز. قۇدايدىڭ سۇيىسپەنشىلىكپەن بەرگەن كەڭەستەرىنە قۇلاق اسىڭىز جانە ونىڭ ەركىن ورىندايتىندارمەن ارالاسىڭىز. ەحوبانى بارلىق نارسەدەن ارتىق ساناپ، جاقسى كورەتىن بولساڭىز، ناعىز باقىتقا كەنەلەسىز. سونداي-اق «شىنايى ومىرگە» جەتەلەيتىن جولدا نىق تۇراسىز (ٴتىم. 1-ح. 6:19).
السىزدىككە بوي الدىرعان پەتىردىڭ ۇنجىرعاسى ٴتۇستى
پەتىر ۇنجىرعاسى تۇسكەندە بار نازارىن ەحوباعا قىزمەت ەتۋگە اۋداردى. وسى جايلى وي جۇگىرتسەك، وزىمىزگە دە، وزگەلەرگە دە كومەكتەسە الامىز (17—19-ابزاستاردى قاراڭىز)
17. پەتىردىڭ ۇنجىرعاسىنىڭ تۇسۋىنە نە سەبەپ بولدى؟
17 ەلشى پەتىر كۇش-قۋاتى تاسىپ تۇرعان ادام بولعان. ٴبىراق ونىڭ قىزبالىققا سالىناتىن، ويىن اشىق بىلدىرۋگە دايىن تۇراتىن كەزدەرى دە بولدى. سونىڭ كەسىرىنەن ول كەيدە ارتىنان وكىنەتىن سوزدەر ايتىپ، ىستەر جاساپ قوياتىن. مىسالى، يسا ەلشىلەرىنە ٶزىنىڭ ازاپ شەگىپ، ولتىرىلەتىنى جايلى ايتقاندا، پەتىر قارسىلىق ٴبىلدىرىپ: «مۇنداي نارسە باسىڭىزعا تۇسە كورمەسىن!»— دەدى (مات. 16:21—23). سول كەزدە يسا پەتىردى تۇزەدى. كەيىن يسانى تۇتقىنداۋعا ٴبىر توپ ادام كەلگەندە، پەتىر ويلانباي ارەكەت ەتىپ، باس ٴدىني قىزمەتكەردىڭ قۇلىنىڭ قۇلاعىن شاۋىپ ٴتۇسىردى (جوح. 18:10، 11). يسا پەتىردى قايتادان تۇزەدى. ونىڭ ۇستىنە، پەتىر يساعا: «ٴبارى تاستاپ كەتسە دە، مەن ٴسىزدى ەشقاشان تاستامايمىن!»— دەپ ماقتانعان ەدى (مات. 26:33). ٴبىراق ادام الدىنداعى قورقىنىشى ٶز-وزىنە دەگەن سەنىمدىلىگىنەن باسىم ٴتۇسىپ، پەتىر يسادان ٷش رەت تاندى. سوندا قاتتى ۇنجىرعاسى تۇسكەن ول «سىرتقا شىعىپ، وكىرىپ جىلادى» (مات. 26:69—75). ول «يسا مەنى كەشىرە الار ما ەكەن؟» دەپ ۋايىمداسا كەرەك.
18. يسا پەتىرگە ەڭسەسىن كوتەرۋگە قالاي كومەكتەستى؟
18 الايدا ۇنجىرعاسى تۇسكەن پەتىر قايعىعا باتىپ كەتكەن جوق. قاتەلىك جاساعاننان كەيىن ول ەڭسەسىن كوتەرىپ، باسقا ەلشىلەرمەن بىرگە ەحوباعا قىزمەت ەتىپ ٴجۇردى (جوح. 21:1—3؛ ەل. ٸس. 1:15، 16). وعان ەڭسەسىن كوتەرۋگە نە كومەكتەستى؟ ول وسىعان دەيىن ايتقان يسانىڭ دۇعاسىن ەستە ۇستادى. يسا پەتىردىڭ سەنىمى السىرەمەسىن دەپ جالبارىنىپ، ونى قايتىپ ورالۋعا جانە باۋىرلاستارىنىڭ سەنىمىن نىعايتۋعا تالپىندىرعان ەدى. ەحوبا يسانىڭ شىن جۇرەكتەن ايتقان دۇعاسىنا جاۋاپ بەردى. كەيىن، جىگەرلەندىرۋ ٷشىن بولسا كەرەك، يسا پەتىردىڭ وزىنە جەكە كورىندى (لۇقا 22:32؛ 24:33، 34؛ قور. 1-ح. 15:5). ال تۇنىمەن بالىق ۇستاي الماعان ەلشىلەرىنە كورىنگەن كۇنى يسا پەتىرگە سۇيىسپەنشىلىگىن بىلدىرۋگە مۇمكىندىك بەردى. يسا اياۋلى دوسىن كەشىرىپ، وعان كوبىرەك ٸس سەنىپ تاپسىردى (جوح. 21:15—17).
19. ٴزابۇر 103:13، 14 تەگى سوزدەر بىزگە كۇنالارىمىزعا ەحوبانىڭ كوزىمەن قاراۋعا قالاي كومەكتەسەدى؟
19 ۇيرەنەرىمىز. پەتىرگە قالاي قاراعانىنان يسانىڭ دا ەحوبا سياقتى مەيىرىمدى ەكەنىن كورەمىز. سوندىقتان قاتەلىك جاساپ قويعاندا، شاراسىز كۇي كەشىپ، «ەحوبا مەنى ەشقاشان كەشىرمەيدى» دەپ ويلامايىق. شايتاننىڭ كوزدەگەنى دە وسى ەكەنىن ۇمىتپايىق. ول ٴبىزدىڭ وسىنداي ويلارعا بوي الدىرعانىمىزدى قالايدى. وزىمىزگە دە، ٴبىزدى رەنجىتكەن ادامدارعا دا ەحوبانىڭ كوزىمەن قاراۋعا تىرىسايىق. ول ٴبىزدى جاقسى كورەدى جانە شاما-شارقىمىزدى بىلەدى (ٴزابۇر 103:13، 14 وقىڭىز).
20. ٴبىز كەلەسى ماقالادا نە قاراستىرامىز؟
20 ٴجۇسىپتىڭ، ناعيما مەن رۋتتىڭ، لەۋىلىكتىڭ جانە پەتىردىڭ وقيعالارى «جۇرەگى جارالى جانعا ەحوبا جاقىن تۇراتىنىن» دالەلدەيدى (ٴزاب. 34:18). كەيدە ول ٴبىزدىڭ سىناقتارعا كەزىگۋىمىزگە جانە ۇنجىرعامىزدىڭ تۇسۋىنە جول بەرەدى. دەسە دە ونىڭ كومەگىمەن سىناقتارعا توتەپ بەرگەن كەزدە، ٴبىزدىڭ سەنىمىمىز نىعايادى (پەت. 1-ح. 1:6، 7). كەلەسى ماقالادا ٴبىز كەمەلسىزدىكتىڭ كەسىرىنەن نەمەسە قيىن جاعدايلاردىڭ سالدارىنان ۇنجىرعاسى تۇسكەن ادال قىزمەتشىلەرىن ەحوبا قالاي قولدايتىنىن قاراستىرامىز.
7-ٵن ەحوبا — ٴبىزدىڭ پانامىز
^ 5-ابزاس ٴجۇسىپ، ناعيما مەن رۋت، لەۋىلىك جانە ەلشى پەتىر ۇنجىرعالارىن تۇسىرگەن سىناقتارعا كەزىككەن. بۇل ماقالادان ٴبىز ەحوبا ولاردى قالاي جۇباتىپ، قالاي نىعايتقانىن كورەمىز. سونىمەن قاتار ولاردىڭ وقيعالارىنان قانداي ساباق الاتىنىمىزدى جانە ەحوبانىڭ ولارعا سۇيىسپەنشىلىكپەن كومەكتەسكەنىنەن نە ۇيرەنەتىنىمىزدى بىلەمىز.
^ 56-ابزاس سۋرەت سيپاتتاماسى: ناعيما، رۋت جانە ورپا كۇيەۋلەرىنەن ايىرىلىپ، قايعىعا باتتى. كەيىن رۋت پەن ناعيما باعوزبەن بىرگە عابيتتىڭ تۋىلعانىنا قۋاندى.
