23-زەرتتەۋ ماقالاسى
ٴسىز جالعىز ەمەسسىز!
«ەحوبا ٶزىن شاقىراتىنداردىڭ ٴبارىنىڭ قاسىندا» (ٴزاب. 145:18).
28-ٵن ەحوبانىڭ دوسى بولايىق
اڭداتپا *
1. كەيبىر باۋىرلاستار وزدەرىن نە سەبەپتى جالعىز سەزىنەدى؟
ٶزىمىزدى جالعىز سەزىنەتىن كەزدەر كوبىمىزدە بولادى. كەيبىرەۋلەر بۇل سەزىمنەن تەز ارىلسا، وزگەلەرىندە ۇزاققا جالعاسادى. ٴتىپتى اينالامىز تولعان ادامدار بولسا دا كەيدە ٶزىمىزدى جالعىز سەزىنەمىز. مىسالى، بىرەۋلەر جاڭا قاۋىمعا ۇيرەنە الماعاندا نەمەسە وتباسىنان الىسقا كەتكەندە جالعىزدىق سەزىنەدى. تاعى بىرەۋلەرى جاقىن ادامىنان ايىرىلعاندا وسىنداي كۇي كەشەدى. ال كەيبىر ماسىحشىلەردەن، اسىرەسە شىندىققا جاڭادان كەلگەندەرىنەن، سەنبەيتىن تۋىستارى مەن بۇرىنعى دوستارى باس تارتقاندا نە قۋعىن كورسەتكەندە، ولار وزدەرىن جالعىز سەزىنەدى.
2. وسى ماقالادا قانداي سۇراقتارعا جاۋاپ الامىز؟
2 ەحوبا ٴبىزدى، سەزىمدەرىمىزدى جاقسى تۇسىنەدى. ول ٴبىزدىڭ قانداي كۇي كەشىپ جاتقانىمىزدى دا بىلەدى جانە جالعىزدىق سەزىمىنەن ارىلۋعا كومەكتەسكىسى كەلەدى. ول مۇنى قالاي ىستەيدى؟ جالعىزدىقتان ارىلۋ ٷشىن نە ىستەۋىمىز قاجەت؟ وزدەرىن جالعىز سەزىنىپ جۇرگەن قاۋىمداعى باۋىرلاستارعا قالاي كومەكتەسە الامىز؟ بۇل ماقالا وسى سۇراقتارعا جاۋاپ بەرەدى.
ەحوبا قامىڭىزدى ويلايدى
ەحوبا پەرىشتەسىن جىبەرىپ، ٸلياستىڭ جالعىز ەمەس ەكەنىن ٴبىلدىردى (3-ابزاستى قاراڭىز)
3. ەحوبا ٸلياستىڭ قامىن ويلايتىنىن قالاي كورسەتتى؟
3 ەحوبا بارلىق قىزمەتشىلەرىنىڭ باقىتتى بولعانىن قالايدى. ول ٵرقايسىسىمىزدىڭ جانىمىزدان تابىلادى. قانداي كۇي كەشىپ جاتقانىمىز دا ونىڭ نازارىنان تىس ەمەس (ٴزاب. 145:18، 19). مىسالى، ٸلياس پايعامباردىڭ وقيعاسىن الايىق. ول يسرايل تاريحىنداعى قيىن كەزەڭدە ٶمىر ٴسۇردى. سول كەزدەرى قارسىلاستار قۇدايدىڭ قىزمەتشىلەرىن اياۋسىز قۋعىندادى. ولار اسىرەسە ٸلياستى ولتىرگىلەرى كەلدى (پات. 1-ج. 19:1، 2). بۇعان قوسا، ٸلياس ەحوباعا قىزمەت ەتەتىن پايعامبارلاردان جالعىز ٶزىم قالدىم دەپ ويلادى. بۇل دا ونىڭ جىگەرىن قاتتى جاسىتتى (پات. 1-ج. 19:10). سول كەزدە ەحوبا دەرەۋ پەرىشتەسىن جىبەرىپ، ٸلياستىڭ جالعىز ەمەس ەكەنىن، ٵلى دە كوپتەگەن ادال قىزمەتشىسى بار ەكەنىن ايتتى (پات. 1-ج. 19:5، 18).
4. مارقا 10:29، 30 دان كورىنەتىندەي، تۋىستارى مەن دوستارىنىڭ قولداۋىنسىز قالعان قىزمەتشىلەرىن ەحوبا قالاي قامقورلايدى؟
4 ەحوباعا قىزمەت ەتۋدى شەشكەندە ٴبىز كوپ نارسەدەن باس تارتتىق. ەحوبا بۇل قۇرباندىقتارىمىزدى بىلەدى. مىسالى، كۋاگەر ەمەس تۋىستارىڭىز نەمەسە شىندىققا دەيىنگى دوستارىڭىز سىزگە بۇرىنعىداي كومەكتەسپەيتىن شىعار. بىردە پەتىر يساعا: «مىنە، ٴبىز ٴبارىن تاستاپ، سوڭىڭىزدان ەردىك. بۇل ٷشىن نە الامىز؟»— دەپ ۋايىمىن ٴبىلدىردى (مات. 19:27). سوندا يسا وعان ۇلكەن رۋحاني وتباسىنا يە بولاتىنىن ايتتى (مارقا 10:29، 30 وقىڭىز). سول ۇلكەن وتباسىنىڭ باسى رەتىندە ەحوبا ٵربىر قىزمەتشىسىن مىندەتتى تۇردە قولدايدى (ٴزاب. 9:10). ال قازىر جالعىزدىق سەزىمىنەن ارىلۋعا كومەكتەسەتىن كەيبىر پايدالى كەڭەستەردى قاراستىرايىق.
ٶزىڭىزدى جالعىز سەزىنگەندە
5. ەحوبا بىزگە قالاي كومەكتەسىپ جاتقانى تۋرالى ويلانۋ نە ٷشىن ماڭىزدى؟
5 ەحوبا سىزگە قالاي كومەكتەسىپ جاتقانى تۋرالى ويلاڭىز (ٴزاب. 55:22). بۇل ٴسىزدى ٴتۇڭىلىپ كەتۋدەن ساقتايدى. وتباسىندا جالعىز ٶزى عانا كۋاگەر كەرل * دەگەن قىز باۋىرلاس بىلاي دەيدى: «جالعىزسىراپ كەتسەم، ەحوبا ماعان قيىن كەزدەردە قالاي كومەكتەسكەنىن ەسىمە تۇسىرەمىن. سوندا ەحوبا الداعى ۋاقىتتا دا قاسىمدا بولاتىنىنا سەنىمدىلىگىم ارتادى».
6. جالعىزسىراپ جۇرگەن باۋىرلاستارعا پەتىردىڭ 1-حاتى 5:9، 10 داعى سوزدەر قالاي كۇش بەرەدى؟
6 ەحوبا جالعىزسىراپ جۇرگەن باسقا باۋىرلاستارعا قالاي كومەكتەسىپ جاتقانى تۋرالى ويلاڭىز (پەتىردىڭ 1-حاتى 5:9، 10 وقىڭىز). حيروشي دەگەن ەر باۋىرلاس ۇزاق جىلدان بەرى وتباسىنان ٴبىر ٶزى عانا ەحوباعا قىزمەت ەتىپ كەلەدى. ول بىلاي دەيدى: «قاۋىمداعى باۋىرلاستارعا قاراسام، ەشكىمنىڭ جاعدايى ٴماز ەمەس، ٴبىراق ٴبارى ەحوباعا جان-تاندەرىمەن قىزمەت ەتىپ ٴجۇر. بۇل شىندىقتا جالعىز جۇرگەندەرگە كوپ كۇش بەرەدى».
7. ٴسىز دۇعانىڭ قانداي كومەگىن كورىپ ٴجۇرسىز؟
7 رۋحاني ادەتىڭىزدەن تايماڭىز. بۇعان دۇعا ەتۋ دە كىرەدى. جالعىزسىراپ جۇرگەنىڭىزدى ەحوباعا اشىق ايتىڭىز (پەت. 1-ح. 5:7). ماسسيەل دەگەن جاس قىز باۋىرلاستىڭ وتباسىندا ەشكىم ەحوباعا قىزمەت ەتپەگەندىكتەن، ٶزىن جاپادان جالعىز قالعانداي سەزىنگەن ەكەن. ماسسيەل بىلاي دەيدى: «ەحوباعا بەرىلىپ دۇعا ەتكەنىم ماعان كوپ كومەكتەستى. مەن وعان كۇندە-كۇندە، ٴتىپتى كۇنىنە بىرنەشە رەت دۇعا ەتىپ، مۇڭ-قايعىمنىڭ ٴبارىن اشىق ايتاتىنمىن. ول مەنىڭ تۋعان اكەمدەي بولىپ كەتتى».
كيەلى كىتاپ پەن وزگە ادەبيەتتەرىمىزدىڭ اۋديوجازباسىن تىڭداۋ وزدەرىن جالعىز سەزىنەتىندەرگە جاقسى كومەك بولا الادى (8-ابزاستى قاراڭىز) *
8. قۇداي ٴسوزىن وقىپ، وي جۇگىرتكەنىڭىز سىزگە قالاي كومەكتەسەدى؟
8 كۇندە قۇداي ٴسوزىن وقىڭىز. اسىرەسە ەحوبا ٴسىزدى جاقسى كورەتىنىنە نازار اۋداراتىن تارماقتارعا وي جۇگىرتىڭىز. كۋاگەر ەمەس تۋعاندارىنىڭ اۋىر سوزىنە ٴتوزىپ جۇرگەن بيانكا دەگەن باۋىرلاس بىلاي دەيدى: «مەن كيەلى كىتاپتى جانە جاعدايى مەنىكىندەي باۋىرلاستاردىڭ ٶمىرباياندارىن وقىپ، وي جۇگىرتكەندى ۇناتامىن. بۇل ماعان كوپ جىگەر بەرەدى». وزگە باۋىرلاستار بولسا ٴزابۇر 27:10، يشايا 41:10 سياقتى جانعا جۇبانىش سيلايتىن تارماقتاردى جاتتاپ الادى ەكەن. باسقا باۋىرلاستارعا جالعىزدىق سەزىنبەۋگە اۋديوجازبالاردى تىڭداعانى كومەكتەسەدى ەكەن. ولار كيەلى كىتاپتى وقىعاندا نەمەسە قاۋىمعا دايىندالعاندا اۋديوجازبالاردى تىڭداپ شىعادى.
9. ٴسىز قاۋىم كەزدەسۋلەرىنىڭ قانداي پايداسىن كورىپ ٴجۇرسىز؟
9 قاۋىم كەزدەسۋلەرىنە جۇيەلى تۇردە بارۋعا كۇش سالىڭىز. سوندا باعدارلامادان كوپ كۇش-جىگەر الاسىز جانە باۋىرلاستارىڭىزدى جاقىننان تاني تۇسەسىز (ەۆر. 10:24، 25). الدىندا ايتىلىپ كەتكەن ماسسيەل باۋىرلاس بىلاي دەيدى: «تابيعاتىمنان وتە ۇيالشاق بولسام دا، مەن بىردە-ٴبىر قاۋىم كەزدەسۋىن جىبەرمەيمىن جانە تۇسىنىكتەمە بەرەمىن دەپ بەكىندىم. وسىنىڭ ارقاسىندا مەنىڭ دە قاۋىمدا ورنىم بار ەكەنىن سەزىنەمىن».
10. سەنىمى بەرىك باۋىرلاستارمەن دوس بولعانىمىز نە ٷشىن ماڭىزدى؟
10 سەنىمى بەرىك باۋىرلاستاردىڭ اراسىنان دوستار تابىڭىز. قاۋىمدا تاجىريبەسى مەن دانالىعى مول باۋىرلاستارمەن دوستاسىڭىز. ولاردىڭ جاسى سىزدەن ۇلكەن نە كىشى بولۋى مۇمكىن، مادەنيەتى دە باسقا شىعار. مىسالى، جاسى كىشىلەر دانالىعى مول قاريالاردان، ال قاريالار جاستاردان ۇيرەنە الادى (ٵيۇپ 12:12). مىسالى، ٴداۋىت پەن جوناتاننىڭ جاس ەرەكشەلىگى وتە ۇلكەن بولسا دا، ەكەۋى ارالارىنان قىل وتپەستەي دوس بولعان (سام. 1-ج. 18:1). ولار وتە قيىن شاقتاردا دا ٴبىر-بىرىنە تىرەك بولىپ، ەحوباعا قىزمەت ەتە بەرۋگە كومەكتەسكەن (سام. 1-ج. 23:16—18). ٷي ىشىندە جالعىز ٶزى كۋاگەر يرينا باۋىرلاس بىلاي دەيدى: «قاۋىمداعى باۋىرلاستار تۋعان اتا-انامداي، باۋىرلارىمداي بولىپ كەتتى. ەحوبا سولار ارقىلى وتباسىمنىڭ ورنىن تولتىردى».
11. بىرەۋمەن دوس بولۋ ٷشىن نە ىستەۋىمىز قاجەت؟
11 ەگەر مىنەزىڭىز ۇياڭ بولسا، سىزگە دوس تابۋ قيىن شىعار. راتنا دەگەن ايەل باۋىرلاس قارسىلىقتارعا قاراماستان شىندىققا كەلگەن. ۇيالشاق بولعاندىقتان وعان دوس تابۋ قيىن بولدى. «ماعان رۋحاني وتباسىمنىڭ كومەگى قاجەت ەكەنىن ٴتۇسىندىم»، — دەيدى ول. ارينە، بىرەۋگە ىشكى سەزىمدەرىڭىزدى ايتۋ وڭاي ەمەس شىعار، ٴبىراق دوستىق وسىدان باستالادى. دوستارىڭىز سىزگە قاشاندا كومەكتەسۋگە ٵزىر، ٴبىراق الدىمەن ٴسىز ولارعا قانداي كومەككە مۇقتاج ەكەنىڭىزدى ايتۋىڭىز كەرەك.
12. ۋاعىز قىزمەتى ادال دوستار تابۋعا قالاي كومەكتەسەدى؟
12 دوس تابۋدىڭ جاقسى جولى — باۋىرلاستارمەن بىرگە ۋاعىزعا شىعۋ. جوعارىدا ايتىلىپ كەتكەن كەرل باۋىرلاس بىلاي دەيدى: «مەن وزگە ايەل باۋىرلاستارمەن ۋاعىزعا شىققاننىڭ، نە وزگە دە تەوكراتيالىق ىستەرگە قاتىسقاننىڭ ارقاسىندا كوپ ادال دوس تاپتىم. ەحوبا جىلدار بويى وسى دوستارىم ارقىلى مەنى دەمەپ كەلەدى». ٴسىز دە سەنىمى بەرىك باۋىرلاستاردىڭ اراسىنان دوس تابۋعا كۇش سالا بەرىڭىز. بۇل سوعان تۇرادى. سول دوستارىڭىز ارقىلى ەحوبا سىزگە جالعىزدىق سياقتى جاعىمسىز سەزىمدەرگە بوي الدىرماۋعا كومەكتەسەدى (ناق. س. 17:17).
باۋىرلاستارعا باۋىرمال بولايىق
13. قاۋىمداعى ٵربىر باۋىرلاستا قانداي جاۋاپكەرشىلىك بار؟
13 قاۋىمىمىز ەشكىم ٶزىن جالعىز سەزىنبەيتىن ىستىق ۇياداي بولۋىنا ٴبارىمىز ۇلەس قوسۋىمىز كەرەك. بۇل — ٵرقايسىسىمىزدىڭ مىندەتىمىز (جوح. 13:35). ٴبىز ٴبىر اۋىز سوزىمىزبەن نە جاساعان جاقسىلىعىمىزبەن وزگەلەردى قاتتى قۋانتىپ تاستاي الامىز. «شىندىققا ەندى كەلگەن كەزىمدە قاۋىم مەن ٷشىن وتباسىمداي بولىپ كەتتى. ولاردىڭ كومەگىنسىز مەن ەحوبا كۋاگەرى بولا الماس ەدىم»،— دەيدى ٴبىر قىز باۋىرلاس. وتباسىنان جالعىز ٶزى شىندىقتا جۇرگەن باۋىرلاستار قاۋىمعا كەرەك ەكەنىن سەزىنۋ ٷشىن ٴسىز نە ىستەي الاسىز؟
14. قاۋىمداعى جاڭا ادامدارمەن دوستاسۋ ٷشىن نە ىستەسەڭىز بولادى؟
14 دوس بولۋ ٷشىن ٴبىرىنشى بولىپ قادام جاسايىق. مۇنى قاۋىمعا جاڭادان كەلگەندەردى جىلى قارسى الۋدان باستاساق بولادى (ريم. 15:7). ٴبىراق ٴبىزدىڭ ماقساتىمىز — ولارمەن جاي عانا امانداسۋ ەمەس، باۋىرمالدىق تانىتىپ، جاقىن دوس بولۋ. سوندىقتان ولارعا شىن كوڭىل ٴبولىپ، جاعدايلارىن سۇراساق بولادى. قانداي قيىندىقتاردى باستان كەشىپ جاتقانىن بىلسەك بولادى. ٴبىراق ىڭعايسىز جاعدايعا قالدىراتىن سۇراقتار قويمايمىز. ەگەر ادام ويىن، سەزىمدەرىن ايتۋعا قينالىپ جاتسا، وعان قىسىم جاسامايمىز. قايتا ىلتيپاتپەن سۇراقتار قويىپ، ونى شىداممەن تىڭدايمىز. مىسالى، شىندىققا قالاي كەلگەنىن سۇراساق بولادى.
15. رۋحاني تولىسقان باۋىرلاستار قاۋىمداعىلارعا قاي جاعىنان كومەكتەسە الادى؟
15 قاۋىمدا رۋحاني تولىسقان باۋىرلاستار، اسىرەسە اقساقالدار وزگەلەرگە كوڭىل بولسە، قاۋىمنىڭ سەنىمى نىعايا تۇسەدى. اناسى شىندىقتا وسىرگەن مەليسا باۋىرلاس بىلاي دەيدى: «ماعان جىلدار بويى كوڭىل ٴبولىپ كەلگەن قاۋىمداعى رۋحاني اكەلەرىمە شەكسىز ريزامىن. ولار سويلەسكىم كەلگەن كەزدىڭ بارىندە قاسىمنان تابىلاتىن». ماۋريسيو باۋىرلاسىمىز بولسا كيەلى كىتاپتى زەرتتەۋگە كومەكتەسكەن تالىمگەرى شىندىقتان كەتىپ قالعاندا قاتتى قينالادى. ول بىلاي دەيدى: «سول كەزدەرى اقساقالدار ماعان كوڭىل ٴبولىپ، قامقور بولدى. ولار مەنىڭ جاعدايىمدى سۇراپ تۇراتىن، قىزمەتكە الىپ شىعاتىن، جەكە زەرتتەۋدە تاپقان ويلارىمەن بولىسەتىن، ٴتىپتى ٴتۇرلى ويىندارعا شاقىرىپ تۇراتىن». قازىر مەليسا مەن ماۋريسيو دا بەتەلدە قىزمەت ەتەدى.
قاۋىمىڭىزداعى قاي باۋىرلاسقا كوڭىل بولگىڭىز كەلەر ەدى؟ (16—19-ابزاستاردى قاراڭىز) *
16، 17. وزگەلەرگە جاقسىلىق جاساۋدىڭ قانداي جولدارى بار؟
16 جاقسىلىق جاسايىق (عال. 6:10). وتباسىنان جىراقتا ميسسيونەر بولىپ قىزمەت ەتەتىن لەو باۋىرلاس بىلاي دەيدى: «قاراپايىم ٸس بولسا دا، ادامعا ٴدال قاجەت كەزدە جاسالعان جاقسىلىققا نە جەتسىن! بىردە مەن كولىك اپاتىنا ٴتۇسىپ قالدىم. سول كۇنى ۇيگە ارەڭ جەتتىم. ٶز-وزىمە كەلە الماي جاتقان كەزدە، ٴبىر ەرلى-زايىپتى مەنى قاراپايىم اسقا شاقىردى. سول كەزدە نە جەگەنىم ەسىمدە ەمەس، ٴبىراق ٴبىر ەسىمدە قالعانى — ولار مەنى مۇقيات تىڭدادى. وسىنىڭ ارقاسىندا اجەپتاۋىر جەڭىلدەپ، جاقسى بولىپ قالدىم».
17 كونگرەستەر سياقتى تەوكراتيالىق جيىنداردا باس قوسۋدى ٴبارىمىز دە اسىعا كۇتەمىز. ويتكەنى ٴبىز باۋىرلاستارمەن بىرگە ارالاسقاندى، كونگرەستەن العان اسەرىمىزبەن بولىسكەندى ۇناتامىز. ٴبىراق الدىندا ايتىلىپ كەتكەن كەرل باۋىرلاسىمىز بىلاي دەيدى: «ماعان كونگرەستەرگە بارۋ وڭاي ەمەس. اينالامدا جۇزدەگەن، ٴتىپتى مىڭداعان باۋىرلاس بولسا دا، ٶزىمدى جالعىز سەزىنەمىن. ولاردىڭ وتباسىلارىمەن بىرگە ارقا-جارقا بولىپ جاتقانىن كورگەندە، جۇرەگىم سىزداپ كەتەدى». كەيبىر باۋىرلاستارعا جۇبايلارىن جوعالتقاننان كەيىن كونگرەسكە جالعىز بارۋ وتە قيىن. ٴسىز وسىنداي باۋىرلاستى نەمەسە كەرل سياقتى باۋىرلاستى بىلەسىز بە؟ وعان كەلەسى كونگرەسكە وتباسىڭىزبەن بىرگە بارۋدى ۇسىنا الاسىز با؟
18. قورىنتتىقتارعا 2-حات 6:11—13-تارماقتارداعى كەڭەستى قالاي قولدانساق بولادى؟
18 بىرگە ۋاقىت وتكىزەيىك. ٴبىز ٵرتۇرلى باۋىرلاستارمەن، اسىرەسە جالعىزسىراپ جۇرگەندەرمەن ارالاسايىق. ولارعا «جۇرەگىمىزدى ايقارا اشايىق» (قورىنتتىقتارعا 2-حات 6:11—13 وقىڭىز). «باۋىرلاستار ۇيلەرىنە قوناققا شاقىرعاندا، ٴبىر جەرگە قىدىرىپ قايتۋدى ۇسىنعاندا قاتتى قۋانىپ كەتەتىنمىن»،— دەيدى جوعارىدا ايتىلعان مەليسا. ٴسىز دە قاۋىمىڭىزداعى وسىنداي باۋىرلاستارعا قوناقجايلىلىق تانىتا الاسىز با؟
19. اسىرەسە قانداي كەزدەرى باۋىرلاستاردىڭ قاسىندا بولعانىمىز دۇرىس؟
19 اسىرەسە قانداي كەزدەرى باۋىرلاستاردىڭ قاستارىنان تابىلعانىمىز دۇرىس؟ كەيبىر باۋىرلاستارعا مەيرام كۇندەرى سەنبەيتىن وتباسىنىڭ اراسىندا بولۋ قيىن شىعار. ال باسقالارى جاقىن ادامى قايتىس بولعان كۇنى مۇڭعا باتىپ قاتتى قينالادى. اسىرەسە وسىنداي كەزدەرى باۋىرلاستارىمىزبەن بىرگە ۋاقىت وتكىزسەك — ولاردىڭ «شىن كوڭىلدەن قامدارىن ويلاعانىمىز» (ٴفىلىپ. 2:20).
20. جالعىزدىق سەزىنگەندە ماتاي 12:48—50-تارماقتار بىزگە قالاي جىگەر بەرەدى؟
20 كەيدە ٴبىز ٶزىمىزدى ٴتۇرلى سەبەپتەرمەن جالعىز سەزىنەمىز. ٴبىراق ٴبىزدىڭ سەزىمدەرىمىز ەحوبا ٷشىن ٴبارىبىر ەمەس ەكەنىن ۇمىتپايىق. ول بىزگە كومەكتەسۋگە ٵرقاشان دايىن. ول كوبىنەسە بىزگە باۋىرلاستار ارقىلى دەمەۋ بەرەدى (ماتاي 12:48—50 وقىڭىز). بۇل ٷشىن ەحوباعا ريزا ەكەنىمىزدى ٴبىلدىرىپ، رۋحاني وتباسىمىزدى بارىنشا قولداي بەرەيىك. ٶزىمىزدى قانشالىقتى جالعىز سەزىنبەيىك، ەحوبا ٵرقاشان ٴبىزدىڭ قاسىمىزدا!
46-ٵن ەحوبا، راقمەت!
^ 5-ابزاس ٶزىڭىزدى جالعىز سەزىنەتىن كەزدەرىڭىز بولا ما؟ مۇندايدا ەحوبا ٴسىزدىڭ سەزىمدەرىڭىزدى تۇسىنەدى جانە ول سىزگە كومەكتەسكىسى كەلەدى. بۇل ماقالادا ٴبىز جالعىزدىق سەزىمىنەن قالاي ارىلۋعا بولاتىنىن كورەمىز. سونداي-اق وزدەرىن جالعىز سەزىنەتىندەرگە قالاي كومەكتەسە الاتىنىمىزدى دا قاراستىرامىز.
^ 5-ابزاس كەيبىر ەسىمدەر وزگەرتىلگەن.
^ 60-ابزاس سۋرەت سيپاتتاماسى: ايەلى قايتىس بولعان ەر باۋىرلاس كيەلى كىتاپتىڭ جانە وزگە دە ادەبيەتتەردىڭ اۋديوجازباسىن تىڭداپ وتىر.
^ 62-ابزاس سۋرەت سيپاتتاماسى: ەر باۋىرلاس قىزى ەكەۋى قاۋىمداعى ٴبىر قارت باۋىرلاستى كورىپ قايتۋعا باردى.
