«شىندىق جولىڭدا جۇرەيىن»
«ۋا، ەحوبا، مەنى ٶز جولىڭا باعىتتاشى. شىندىق جولىڭدا جۇرەيىن» (ٴزابۇر 86:11).
اندەر: 31، 72
1—3. ا) كيەلى كىتاپ شىندىقتارىنا قالاي قاراۋىمىز كەرەك؟ مىسال كەلتىرىڭىز. (ماقالانىڭ باسىنداعى سۋرەتتەردى قاراڭىز.) ٵ) بۇل ماقالادا نەنى قاراستىرامىز؟
بۇگىندە ادامدار ٴجيى دۇكەننەن ٴبىر زاتتى ساتىپ الىپ، كەيىن ونى قايتارىپ جاتادى. ينتەرنەت ارقىلى ساتىپ الىنعان زاتتاردىڭ قايتارىلۋى ودان دا ٴجيى كەزدەسەدى. ادامدار العان زاتتارى ويداعىداي شىقپاعاندىقتان نە زاتتىڭ قانداي دا ٴبىر اقاۋى بار بولعاندىقتان قايتاراتىن شىعار. ولار العان زاتتارىن اۋىستىرۋعا، يا بولماسا اقشاسىن قايتارىپ الۋعا تىرىسادى.
2 ٴبىز كيەلى كىتاپتاعى شىندىقپەن ەشقاشان بۇلاي ەتپەيمىز. شىندىقتى «ساتىپ» العاننان كەيىن، ونى ەشقاشان «ساتپاۋىمىز» كەرەك، ياعني شىندىقتى بىلگەننەن كەيىن ونى تاستاماۋىمىز قاجەت (ناقىل سوزدەر 23:23 وقىڭىز؛ تىموتەگە 1-حات 2:4). وتكەن ماقالادا قاراستىرعانىمىزداي، شىندىقتى ٴبىلۋ ٷشىن ٴبىز كوپ ۋاقىت جۇمسادىق. سونداي-اق بايلىققا جەتكىزەتىن ٴمانساپتان باس تارتتىق. كەيبىر جاقىندارىمىزبەن قارىم-قاتىناسىمىزدى وزگەرتۋگە تۋرا كەلگەن شىعار. سونىمەن قاتار ويىمىز بەن ٴجۇرىس-تۇرىسىمىزدى تۇزەتتىك. ەحوباعا ۇنامسىز ادەت-عۇرىپتاردان باس تارتتىق. ٴبىراق شىندىقتى بىلگەننىڭ ارقاسىندا كورەتىن باتالارىمىز ٴبىز باس تارتقان كەز كەلگەن نارسەدەن اسىپ تۇسەتىنىنە سەنىمدىمىز.
3 يسا اسىل مەرۋەرت ىزدەگەن جيھانكەز ساۋداگەر تۋرالى مىسال كەلتىرگەن. بۇل ساۋداگەر وتە قۇندى مەرۋەرتتى تاپقاندا، سونى ساتىپ الۋ ٷشىن دەرەۋ وزىندە باردىڭ ٴبارىن ساتتى. مىسالداعى سول مەرۋەرت قۇداي پاتشالىعى جايلى شىندىقتى بىلدىرەدى. وسىلايشا يسا شىندىقتى ىزدەپ تاپقان ادام ٷشىن ونىڭ قانشالىقتى باعالى بولاتىنىن كورسەتتى (ماتاي 13:45، 46). سول سياقتى، ٴبىز دە قۇداي پاتشالىعى جايلى جانە كيەلى كىتاپتاعى باسقا دا قۇندى شىندىقتاردىڭ ٴبارىن العاش رەت بىلگەندە، ولاردى يەمدەنۋ ٷشىن وزىمىزدەگى باردىڭ بارىنەن باس تارتۋعا دايىن بولدىق. شىندىق ٴبىز ٷشىن باعالى بولىپ قالا بەرسە، ونى ەشقاشان تاستاپ كەتپەيمىز. وكىنىشكە قاراي، قۇدايدىڭ كەيبىر قىزمەتشىلەرى شىندىقتى باعالاماي كەتكەن، ال وزگە بىرەۋلەرى ٴتىپتى شىندىقتان كەتىپ قالعان. ٴبىز ەشقاشان بۇندايعا بارعىمىز كەلمەيدى! ٴبىز «شىندىق جولىندا جۇرە» بەرگىمىز كەلەدى (جوحاننىڭ 3-حاتى 2—4 وقىڭىز). بۇل ٷشىن شىندىقتى ٴبىرىنشى ورىنعا قويىپ، ونى ٴجۇرىس-تۇرىسىمىزبەن كورسەتۋىمىز قاجەت. ٴبىراق ادام نە ٷشىن جانە قالاي شىندىقتى «ساتۋى» مۇمكىن؟ شىندىقتان ەشقاشان كەتىپ قالماۋ ٷشىن نە ىستەۋگە بولادى؟ «شىندىق جولىندا جۇرەمىز» دەگەن شەشىمىمىزدە قالاي بەرىك تۇرا الامىز؟
كەيبىرەۋلەر شىندىقتى نەگە جانە قالاي «ساتادى»؟
4. يسانىڭ كۇندەرىندە كەيبىر ادامدار شىندىق جولىمەن نەگە جۇرمەي قويدى؟
4 يسانىڭ كۇندەرىندە باسىندا شىندىقتى قابىلداعان ادامداردىڭ كەيبىرى كەيىن شىندىقتان كەتىپ قالعان. مىسالى، بىردە يسا جينالعان قالىڭ جۇرتتى كەرەمەت تۇردە تاماقتاندىردى. سوسىن سول ادامدار عاليلەيا تەڭىزىنىڭ ارعى بەتىنە دەيىن يساعا ەرىپ باردى. ٴبىراق يسا ولارعا: «ادام ۇلىنىڭ ٴتانىن جەپ، قانىن ىشپەسەڭدەر، ومىرگە يە بولمايسىڭدار»،— دەدى. بۇل سوزدەردى ەستىگەن حالىقتىڭ توبە شاشى تىك تۇردى. ولار يسادان بۇل سوزدەردىڭ ماعىناسىن سۇراۋدىڭ ورنىنا: «مىناۋ نە دەگەن سۇمدىق! مۇنى كىم تىڭداپ تۇرا الادى؟»— دەستى. ناتيجەسىندە، «شاكىرتتەرىنىڭ كوبى يسانىڭ سوڭىنان ەرمەي، بۇرىنعى ىستەرىنە ورالدى» (جوحان 6:53—66).
5، 6. ا) كەيبىرەۋلەر شىندىقتان نە سەبەپتى كەتىپ جاتادى؟ ٵ) قالايشا ادام شىندىقتان بىرتە-بىرتە اۋىتقۋى مۇمكىن؟
5 وكىنىشكە قاراي، كەيبىرەۋلەر شىندىقتان كەتىپ جاتادى. نەلىكتەن؟ بىرەۋلەرى كيەلى كىتاپتىڭ ٴبىر تارماعىنا قاتىستى جاڭا تۇسىنىككە كەلىسپەگەن نەمەسە كوپكە تانىمال باۋىرلاستىڭ ايتقان سوزىنە نە ىسىنە سۇرىنگەن. يا بولماسا بىرەۋدىڭ كيەلى كىتاپتان بەرگەن كەڭەسىن جاقتىرماعاندىقتان نەمەسە قاۋىمدا بىرەۋمەن قاتتى رەنجىسىپ قالعاندىقتان شىندىقتى تاستاعان. كەيبىرەۋلەر جولدان تايعانداردىڭ نە قارسىلاستاردىڭ ٴبىز تۋرالى ايتقان جالعان سوزدەرىنە ەرىپ كەتكەن. بۇل — كەيبىرەۋلەردىڭ ٶز ەركىمەن ەحوبا مەن قاۋىمنان نەلىكتەن الشاقتايتىنىنىڭ بىرنەشە سەبەبى عانا (ەۆرەيلەرگە 3:12—14). ولاردىڭ ەلشى پەتىر سياقتى يساعا سەنىم ارتقاندارى دۇرىس بولار ەدى. جۇرت يسانىڭ سوزدەرىن ەستىپ جاعاسىن ۇستاعاندا، ول ەلشىلەرىنەن: «سەندەردىڭ دە كەتكىلەرىڭ كەلە مە؟»— دەپ سۇرادى. سوندا پەتىر: «يەم، ٴبىز كىمگە بارماقپىز؟ ماڭگىلىك ومىرگە جەتكىزەتىن سوزدەر ٴسىزدە عوي»،— دەپ جاۋاپ بەردى (جوحان 6:67—69).
6 وزگەلەر بولسا شىندىقتان بىرتە-بىرتە الشاقتاي باستايدى. بۇنى وزدەرى دە اڭعارماۋى مۇمكىن. شىندىقتان بىرتە-بىرتە اۋىتقىپ جاتقان ادامدى جاعالاۋدان بىرتىندەپ الىستاپ بارا جاتقان قايىقپەن سالىستىرۋعا بولادى. كيەلى كىتاپ بىزگە شىندىقتان «ەشقاشان اۋىتقىپ كەتپەۋىمىز» كەرەكتىگىن ەسكەرتەدى (ەۆرەيلەرگە 2:1). كوپ جاعدايدا شىندىقتان اۋىتقىپ بارا جاتقان ادام شىندىقتان كەتۋدى كوزدەمەيدى. ٴبىراق ول ەحوبامەن قارىم-قاتىناسىنىڭ السىرەۋىنە جول بەرەدى، ال اقىر سوڭىندا ودان ايىرىلادى. وسىنداي جاعدايعا تاپ بولماس ٷشىن نە ىستەسەك بولادى؟
شىندىقتان ەشقاشان كەتپەۋ ٷشىن نە ىستەۋگە بولادى؟
7. شىندىقتى ەشقاشان «ساتپاۋعا» نە كومەكتەسەدى؟
7 شىندىق جولىندا جۇرە بەرۋ ٷشىن، ەحوبا ايتقان كەز كەلگەن نارسەنى قابىلداپ، وعان مويىنسۇنۋعا ٴتيىسپىز. شىندىق ومىرىمىزدە ەڭ باستى ورىندا تۇرۋ كەرەك جانە ٵر جاعدايدا كيەلى كىتاپ پرينسيپتەرىنە ساي ارەكەت ەتۋىمىز قاجەت. ٴداۋىت پاتشا ەحوباعا: «شىندىق جولىڭدا جۇرەيىن»، — دەپ دۇعا ەتكەن (ٴزابۇر 86:11). ٴداۋىت شىندىق جولىندا جۇرۋگە مىقتاپ بەكىنگەن، ٴبىز دە سولاي ەتۋىمىز كەرەك. ەگەر بۇلاي ەتپەسەك، شىندىق ٷشىن باس تارتقان نارسەلەر جايلى ويلاپ كەتۋىمىز نە ٴتىپتى سولاردىڭ كەيبىرىن اڭساي باستاۋىمىز مۇمكىن. ٴبىراق كيەلى كىتاپ شىندىقتارىنىڭ قايسىسىن قابىلداپ، قايسىسىن قابىلداماۋدى ٶزىمىز شەشە المايمىز. ٴبىز «شىندىقتى تولىق» قابىلداۋىمىز قاجەت (جوحان 16:13). الدىڭعى ماقالادا شىندىقتى ٴبىلىپ، سوعان ساي ٶمىر ٴسۇرۋ ٷشىن قۇربان ەتۋىمىز مۇمكىن بەس جايتتى قاراستىردىق. ال قازىر سول ارتتا قالعان نارسەلەرگە ەشقاشان قايتا ورالماۋ ٷشىن نە ىستەۋگە بولاتىنىن قاراستىرايىق (ماتاي 6:19).
8. ٴماسىحشى شىندىقتان اۋىتقىپ كەتپەس ٷشىن ۋاقىتىن قالاي جۇمساي الادى؟ مىسال كەلتىرىڭىز.
8 ۋاقىت. شىندىقتان اۋىتقىپ كەتپەس ٷشىن ۋاقىتىمىزدى اقىلمەن جۇمساعانىمىز دۇرىس. اباي بولماساق، كوڭىل كوتەرۋگە، سۇيىكتى ىسىمىزبەن اينالىسۋعا، ينتەرنەتتى شارلاۋعا نە تەلەديدار كورۋگە تىم كوپ ۋاقىت جۇمساپ كەتۋىمىز مۇمكىن. بۇلارمەن اينالىسقاندا تۇرعان ەشتەڭە جوق. دەسە دە بۇل ىستەر كيەلى كىتاپتى زەرتتەۋگە جانە ۋاعىزداۋعا جۇمسايتىن ۋاقىتىمىزدى ۇرلاۋى مۇمكىن. ەممامەن * وسىعان ۇقساس جاعداي ورىن الدى. ول بالا كۇنىنەن اتتاردى جاقسى كورىپ ٶستى. قولى بوساي قالسا، اتقا مىنۋگە اۋەس بولدى. ٴبىراق ول بۇعان تىم كوپ ۋاقىت جۇمساپ جۇرگەنىن بايقاپ، ٶزىن كىنالى سەزىندى. ٴسۇيتىپ، ومىرىندەگى قۇندىلىقتارىن وزگەرتتى. سونداي-اق ەمماعا كەزىندە رودەوعا قاتىسقان كوري ۋەللس باۋىرلاستىڭ ۇلگىسى دە قاتتى اسەر ەتتى *. ەمما قازىر كوپ ۋاقىتىن ەحوباعا قىزمەت ەتۋگە ارناپ ٴجۇر. سونداي-اق ەحوباعا قىزمەت ەتەتىن وتباسى مەن دوستارىنا كوبىرەك ۋاقىت بولەدى. ول ٶزىن ەحوباعا جاقىن سەزىنىپ، ۋاقىتىن اقىلمەن جۇمساپ جۇرگەنىنە قۋانادى.
9. قالايشا دۇنيە-مۇلىك ومىرىمىزدە باستى ورىنعا شىعىپ كەتۋى مۇمكىن؟
9 دۇنيە-مۇلىك. شىندىق جولىندا جۇرە بەرۋ ٷشىن، دۇنيە-مۇلىكتىڭ ومىرىمىزدە باستى ورىنعا شىعىپ كەتۋىنە جول بەرمەۋىمىز كەرەك. شىندىقتى بىلگەن كەزدە ەحوباعا قىزمەت ەتۋ دۇنيە-مۇلىكتەن اناعۇرلىم ماڭىزدى ەكەنىن تۇسىندىك. شىندىق ٷشىن ماتەريالدىق جاعىنان قۇرباندىقتارعا بارۋعا دايىن بولدىق. ٴبىراق ۋاقىت وتە كەلە ٴبىز وزگەلەردىڭ جاڭادان شىققان ەلەكتروندى قۇرىلعىلاردى نەمەسە باسقا دا زاتتاردى ساتىپ الىپ جاتقانىن كورگەن شىعارمىز. سونداي كەزدە ٶزىمىزدى ٴبىر نارسەدەن قۇر قالىپ جاتقانداي سەزىنۋىمىز مۇمكىن. ٴسۇيتىپ، قولىمىزداعى بارعا كوڭىلىمىز تولماي، نازارىمىزدى ەحوباعا قىزمەت ەتۋگە ەمەس، ماتەريالدىق نارسەلەرگە تىگە باستاۋىمىز مۇمكىن. بۇل ديماسپەن بولعان جاعدايدى ەسىمىزگە سالادى. ول «وسى دۇنيەنى جاقسى كورگەنى» سونشا — ەلشى پاۋىلمەن بىرگە اتقارعان قىزمەتىن تاستاپ كەتكەن بولاتىن (تىموتەگە 2-حات 4:10). بالكىم، ديماس قۇدايعا دەگەن قىزمەتىنەن گورى دۇنيە-مۇلىكتى كوبىرەك جاقسى كورگەن بولار. يا بولماسا ول پاۋىلمەن بىرگە قىزمەت ەتۋ ٷشىن بۇرىنداعىداي قۇرباندىقتارعا بارعىسى كەلمەگەن شىعار. ٴبىز بۇدان نە ۇيرەنەمىز؟ مۇمكىن، بۇرىن ٴبىز دە دۇنيە-مۇلىكتى جاقسى كورگەن شىعارمىز. اباي بولماساق، بويىمىزداعى دۇنيە-مۇلىككە دەگەن قالاۋ قايتادان كۇشەيىپ، شىندىققا دەگەن سۇيىسپەنشىلىگىمىزدى تۇنشىقتىرۋى مۇمكىن.
10. ٴبىز كىمدەردىڭ اسەرىنە بوي الدىرماۋىمىز كەرەك؟
10 وزگەلەرمەن قارىم-قاتىناسىمىز. شىندىقتا ٵرى قاراي دا جۇرە بەرۋ ٷشىن ەحوباعا قىزمەت ەتپەيتىن ادامداردىڭ بىزگە اسەر ەتۋىنە جول بەرمەۋىمىز كەرەك. شىندىقتى بىلگەن كەزدە ٴبىزدىڭ كۋاگەر ەمەس دوستارىمىزبەن جانە تۋىستارىمىزبەن اراقاتىناسىمىز وزگەردى. بالكىم، سولاردىڭ كەيبىرى نانىمدارىمىزدى قۇرمەتتەسە، وزگەلەرى قارسىلىق بىلدىرگەن شىعار (پەتىردىڭ 1-حاتى 4:4). ارينە، ٴبىز جاقىندارىمىزبەن جاقسى قارىم-قاتىناستا بولۋعا جانە ولارعا مەيىرىمدىلىك تانىتۋعا بارىنشا تىرىسامىز. ٴبىراق ولاردىڭ كوڭىلىنەن شىعۋ ٷشىن ەحوبانىڭ نورمالارىن اتتاپ كەتە المايمىز. قورىنتتىقتارعا 1-حات 15:33 تە ايتىلعانداي، ەحوبانى جاقسى كورەتىن ادامدار عانا ٴبىزدىڭ جاقىن دوستارىمىز بولۋ كەرەك.
11. جامان ويلار مەن ارام ىستەردەن قالاي اۋلاق بولا الامىز؟
11 جامان ويلار مەن ارام ىستەر. شىندىق جولىندا ٴجۇرۋ ٷشىن ٴبىز ەحوبانىڭ كوز الدىندا كيەلى، ياعني تازا بولۋعا ٴتيىسپىز (يشايا 35:8؛ پەتىردىڭ 1-حاتى 1:14—16 وقىڭىز). ٴبىز كيەلى كىتاپتاعى شىندىقتى بىلگەن كەزدە ونداعى تالاپتارعا ساي كەلۋ ٷشىن ومىرىمىزدە وزگەرىستەر جاسادىق. كەيبىرىمىز ۇلكەن وزگەرىستەر جاسادىق. ٴبىراق يەلەنگەن تازا ٶمىرىمىزدى ازعىن ومىرگە ايىرباستاپ كەتۋدەن ٵرقاشان اۋلاق بولۋىمىز قاجەت. ازعىندىققا قارسى تۇرۋعا بىزگە نە كومەكتەسەدى؟ ەحوبا ٴبىزدى كيەلى ەتۋ ٷشىن نە ىستەگەنى تۋرالى ويلاپ كورىڭىزشى. ول ٴبىز ٷشىن ٶز ۇلى يسا ٴماسىحتىڭ وتە باعالى ٶمىرىن قيدى (پەتىردىڭ 1-حاتى 1:18، 19). ەحوبانىڭ كوز الدىندا كيەلى بولىپ قالۋ ٷشىن يسانىڭ تولەم قۇرباندىعىنىڭ قانشالىقتى قۇندى ەكەنىن ۇمىتپاۋىمىز قاجەت.
12، 13. ا) مەيرامدارعا نەگە ەحوبانىڭ كوزىمەن قاراۋىمىز كەرەك؟ ٵ) قازىر ٴبىز نە قاراستىرامىز؟
12 قۇدايعا ۇنامسىز ادەت-عۇرىپتار. جاقىندارىمىز، ارىپتەستەرىمىز بەن سىنىپتاستارىمىز وزدەرىنىڭ مەيرامدارىن ٴبىزدىڭ دە تويلاعانىمىزدى قالايتىن شىعار. بىزگە ەحوباعا ۇنامسىز مەيرامدار مەن ادەت-عۇرىپتارعا قاتىسپاۋعا نە كومەكتەسەدى؟ بۇل مەيرامدار نەلىكتەن ەحوباعا ۇنامايتىنىن ۇنەمى ەستە ۇستاۋىمىز قاجەت. ادەبيەتتەرىمىزدىڭ كومەگىمەن زەرتتەۋ جۇرگىزىپ، بۇل مەيرامداردىڭ قايدان باستاۋ العانىن ەسىمىزگە سالىپ وتىرۋىمىز كەرەك. وسى مەيرامداردى نەگە تويلامايتىنىمىز جايلى وي جۇگىرتكەندە، «يەمىزگە ۇنايتىن» جولمەن ٴجۇرىپ جاتقانىمىزعا سەنىمدى بولامىز (ەفەستىكتەرگە 5:10). ەحوبا مەن ونىڭ سوزىنە سەنىم ارتاتىن بولساق، «جۇرت نە ويلايدى؟» دەپ قورىقپايمىز (ناقىل سوزدەر 29:25).
13 ٴبىز شىندىقتا ماڭگى باقي جۇرە بەرگىمىز كەلەدى. شىندىقتا ٵرى قاراي دا بەرىك تۇرۋعا نە كومەكتەسەدى؟ سونىڭ ٷش جولىن قاراستىرايىق.
ٵرى قاراي دا شىندىقتا بەرىك تۇرىڭىز
14. ا) كيەلى كىتاپتى زەرتتەي بەرگەنىمىز قالايشا شىندىقتا بەرىك تۇرۋعا كومەكتەسەدى؟ ٵ) بىزگە نەگە دانالىق، تاربيە مەن تۇسىنىك قاجەت؟
14 بىرىنشىدەن، كيەلى كىتاپتى ٵرى قاراي دا زەرتتەپ، بىلگەندەرىڭىزدى وي ەلەگىنەن وتكىزە بەرىڭىز. وسىلاي ەتۋگە ٵردايىم ۋاقىت ٴبولىڭىز. كيەلى كىتاپتى نەعۇرلىم كوپ زەرتتەسەك، شىندىققا دەگەن سۇيىسپەنشىلىگىمىز دە سوعۇرلىم ارتادى، ٵرى شىندىق جولىندا قالا بەرۋگە دەگەن شەشىمىمىز دە بەرىك بولا تۇسەدى. ناقىل سوزدەر 23:23 «شىندىقتى» جانە «دانالىقتى، تاربيە مەن تۇسىنىكتى» ساتىپ الۋعا شاقىرادى. كيەلى كىتاپتاعى شىندىقتى بىلگەنىمىز جەتكىلىكسىز. ونى ومىرىمىزدە قولدانۋىمىز كەرەك. تۇسىنىككە يە بولۋ دەگەنىمىز جاڭادان ۇيرەنگەن نارسەلەردى بۇرىن بىلگەندەرىمىزبەن بايلانىستىرۋ دەگەندى بىلدىرەدى. ال دانالىق ٴبىزدى بىلگەنىمىزگە ساي ارەكەت ەتۋگە تالپىندىرادى. كەيدە شىندىق وزگەرۋىمىز كەرەك تۇستارىمىزدى كورسەتۋ ارقىلى ٴبىزدى تاربيەلەيدى. مۇنداي تاربيەگە بىردەن قۇلاق اسۋىمىز كەرەك. كيەلى كىتاپتا مۇنداي ٴتالىم-تاربيە كۇمىستەن دە ارتىق دەلىنگەن (ناقىل سوزدەر 8:10).
15. شىندىق ٴبىزدى قالايشا بەلدىك ىسپەتتى قورعاي الادى؟
15 ەكىنشىدەن، كۇندە شىندىققا ساي ٶمىر ٴسۇرىڭىز. كيەلى كىتاپتا شىندىق ساربازدىڭ بەلدىگىنە تەڭەلەدى (ەفەستىكتەرگە 6:14). ەجەلدە بەلدىك ساربازدىڭ دەنەسىن تىك ۇستاۋعا كومەكتەسىپ، قورعاپ تۇرعان. ٴبىراق ول ٷشىن بەلدىك ادامنىڭ بەلىن قىسىپ تۇرۋ كەرەك بولعان. ەگەر ول بوس تۇرسا، ونىڭ ەش پايداسى بولماس ەدى. قالاي شىندىق ٴبىزدى بەلدىك ىسپەتتى قورعايدى؟ كيەلى كىتاپ شىندىقتارىن ەسىمىزدە ٵردايىم مىقتاپ ۇستاساق، ول ٴبىزدى جامان ويلاردان قورعاپ، دۇرىس شەشىم قابىلداۋعا كومەكتەسەدى. اۋىر قيىندىقتارعا كەزىگىپ جۇرگەندە نەمەسە بۇرىس ىستەر جاساۋعا ازعىرىلعاندا، كيەلى كىتاپ شىندىقتارى بىزگە دۇرىس نارسەنى ىستەۋگە دەگەن شەشىمىمىزدى بەرىك ۇستانۋعا كومەكتەسەدى. سارباز بەلدىكسىز شايقاسقا بارمايتىنى سياقتى، ٴبىز دە شىندىقتى ەشقاشان تاستامايمىز. ٶمىردىڭ ٵر سالاسىندا كيەلى كىتاپ شىندىقتارىنا قۇلاق اسىپ جۇرگەنىمىزگە كوز جەتكىزۋىمىز كەرەك. سارباز بەلدىگىنە سەمسەرىن دە سالىپ قوياتىن. ٴبىز بۇنى قالاي ىستەي الامىز، سونى قاراستىرايىق.
16. شىندىقتى وزگەلەرگە ۇيرەتكەنىمىز قالايشا شىندىق جولىندا جۇرە بەرۋگە كومەكتەسەدى؟
16 ۇشىنشىدەن، كيەلى كىتاپتاعى شىندىقتاردى بارىنشا وزگەلەرگە ۇيرەتىڭىز. كيەلى كىتاپ سەمسەرگە تەڭەلەدى. سارباز سەمسەرىن مىقتاپ ۇستاعانى سياقتى، ٴبىز دە قۇداي ٴسوزىن بەرىك ۇستانۋىمىز قاجەت (ەفەستىكتەرگە 6:17). ٴبارىمىز دە «شىندىق ٴسوزىن دۇرىس ۇيرەتەتىن» تالىمگەر رەتىندە جاقسارا الامىز (تىموتەگە 2-حات 2:15). وزگەلەردى ۇيرەتۋ ٷشىن كيەلى كىتاپتى قولدانعاندا، شىندىقتى ودان سايىن بىلە ٴتۇسىپ، ونى جاقسى كورىپ كەتەمىز. سوندا ٵرى قاراي دا شىندىق جولىندا جۇرۋگە دەگەن شەشىمىمىزدى بەرىك ۇستانامىز.
شىندىق — ەحوبا بەرگەن اسا قۇندى سي
17. شىندىقتى نە ٷشىن باعالايسىز؟
17 شىندىق — ەحوبا بەرگەن اسا قۇندى سي. وسىنىڭ ارقاسىندا كوكتەگى اكەمىزبەن جاقىن قارىم-قاتىناستا بولا الامىز. بۇل — ومىرىمىزدەگى ەڭ باعالى نارسە. ەحوبا ٴبىزدى وسى كۇنگە دەيىن كوپ نارسەگە ۇيرەتتى. ٴبىراق بۇل ٴبىز الاتىن بىلىمنىڭ باستاماسى عانا! ەحوبا بىزگە ماڭگىلىك بويى ٴتالىم بەرۋدى ۋادە ەتەدى. سوندىقتان شىندىقتى اسىل مەرۋەرت ىسپەتتى باعالاڭىز. «شىندىقتى ساتىپ ال، ەشقاشان ساتپا ونى» دەگەن سوزدەرگە ٵرى قاراي دا قۇلاق اسا بەرىڭىز. سوندا ٴداۋىت ىسپەتتى ەحوباعا: «شىندىق جولىڭدا جۇرەيىن»،— دەيتىن بولاسىز (ٴزابۇر 86:11).
^ 8-ابزاس ەسىمى وزگەرتىلگەن.
^ 8-ابزاس JW Broadcasting ارناسىنداعى سۇحباتتار مەن ومىردە بولعان وقيعالار\شىندىق ادامنىڭ ٶمىرىن وزگەرتەدى دەگەن جەردى قاراڭىز.
