جۇبايلار ٷشىن
1. ادالدىق
نەنى بىلدىرەدى؟
نەكەگە ادال بولۋدى شەشكەن ەرلى-زايىپتىلار وعان ماڭگىلىك وداق دەپ قارايدى. سوندىقتان دا ولار وزدەرىن بەرىك قورعاننىڭ ارتىندا تۇرعانداي قاۋىپسىز سەزىنەدى. مۇنداي جۇبايلار ٴتىپتى قيىن شاقتاردا دا قوساعى اق نەكەنى ارداقتايتىنىنا سەنىمدى.
كەيبىر جۇبايلار تۋعان-تۋىستارىنىڭ ياكي تانىستارىنىڭ كوڭىلىنە بولا نەكەلەرىن ساقتاۋعا ٴماجبۇر. الايدا بۇعان نەكەلەرىنە دەگەن ادالدىقتارى قوزعاۋ سالسا يگى بولار ەدى. مۇنداي ادالدىق، ارينە، ماحاببات پەن سي-قۇرمەتتەن تۋىندايدى.
كيەلى كىتاپ كەڭەسى: «كۇيەۋ ايەلىنەن كەتپەۋ كەرەك» (قورىنتتىقتارعا 1-حات 7:11).
«نەكەڭىزگە ادال بولۋعا نىق بەكىنسەڭىز، رەنجۋگە اسىقپايسىز. قايتا، كەشىرە سالۋعا دا، كەشىرىم سۇراۋعا دا دايىن بولاسىز. وتباسىندا تۋىنداعان قيىندىقتارعا الىنباس قامال دەپ ەمەس، اينالىپ وتۋگە بولاتىن بوگەت دەپ قارايسىز» (ميحايل a).
نەگە ماڭىزدى؟
نەكەلەرىن ساقتاپ قالۋعا ىشتەي بەكىنبەگەن ەرلى-زايىپتىلار قيىندىقتارعا كەزىككەندە، ادەتتە «مىنەزىمىز جاراسپادى» دەپ پايىمداپ، ايىرىلىسۋدىڭ جولىن ىزدەي باستايدى.
«كوپ ادام «ەشتەڭە شىقپاسا اجىراسا سالامىن» دەگەن ويمەن نەكە قۇرىپ جاتادى. وسىنداي ويمەن ۇيلەنگەندەر العاشقى كۇننەن-اق نەكە ادالدىعىن شايقالتادى» (جاننا).
نە ىستەي الاسىز؟
ٶزىڭىزدى تەكسەرىپ كورىڭىز
ۇرىس-كەرىس ۇستىندە...
-
«وسى ادامعا قايدان عانا جولىقتىم» دەپ وكىنەسىز بە؟
-
باسقا بىرەۋگە كەتىپ قالۋدى ارماندايسىز با؟
-
«سەنەن كەتەم!» نەمەسە «مەنىڭ قادىرىمدى بىلەتىن ادامدى تاۋىپ الامىن» دەگەن سياقتى سوزدەر ايتاسىز با؟
وسى سۇراقتاردىڭ، كەم دەگەندە، بىرەۋىنە «ٴيا» دەپ جاۋاپ بەرسەڭىز، وندا نەكەگە دەگەن ادالدىعىڭىزدىڭ تۇعىرىن بەكىتەتىن كەزى كەلدى.
بىرگە تالقىلاڭىزدار
-
نەكەگە دەگەن ادالدىعىمىز شايقالعان جوق پا؟ ەگەر شايقالسا، بۇعان نە سەبەپ بولدى؟
-
ادالدىعىمىزدى نىعايتۋ ٷشىن نە ىستەسەك بولادى؟
كادەگە جارار
-
جارىڭىزعا ونى سۇيەتىنىڭىزدى جازىپ تۇرىڭىز.
-
جۇمىس ورنىڭىزعا جارىڭىزدىڭ سۋرەتىن قويىپ، نەكەڭىزگە ادال ەكەنىڭىزدى كورسەتىڭىز.
-
جۇمىستا يا باسقا كەزدە بولسىن، جارىڭىزعا كۇندە قوڭىراۋ شالىپ تۇرىڭىز.
كيەلى كىتاپ كەڭەسى: «قۇداي قوسقاندى ادام بالاسى اجىراتپاسىن!» (ماتاي 19:6).
a كەيبىر ەسىمدەر وزگەرتىلگەن.
