جۇبايلار ٷشىن
2. قولداۋ كورسەتۋ
نەنى بىلدىرەدى؟
نەكەدە ٴبىر-بىرىنە قولداۋ كورسەتەتىن ەرلى-زايىپتى دىتتەگەن ماقساتى ٴبىر ۇشقىش پەن ونىڭ كومەكشىسى سياقتى. ٴتۇرلى قيىندىقتار تۋىنداعان كەزدە دە، ولار «مەن» ەمەس، «ٴبىز» دەگەن كوزقاراس ۇستانادى.
كيەلى كىتاپ كەڭەسى: «ەندى ولار ەكەۋ ەمەس، ٴبىرتۇتاس» (ماتاي 19:6).
«نەكەنى باقىتتى ەتۋ ٷشىن ەرى مەن ايەلى جەكە ورىنداۋشىلار سياقتى بولماي، دۋەت بولىپ بىرلەسە ارەكەت ەتۋلەرى كەرەك» (كريستوفەر).
نەگە ماڭىزدى؟
ٴبىر-بىرىنە قولداۋ كورسەتپەيتىن جۇبايلار قانداي دا ٴبىر ماسەلە تۋىنداعاندا، سول قيىندىقپەن ەمەس، ٴبىر-بىرىمەن كۇرەسىپ كەتەدى. سودان تۇيمەدەي ماسەلەلەر تۇيەدەيگە اينالادى.
«ٶزارا قولداۋ كورسەتۋ — نەكەنىڭ التىن قازىعى. كۇيەۋىم ەكەۋمىز ٴبىر ادامداي ارەكەت ەتپەگەندە، ٴبىر ۇيدە تۇرىپ جاتقان بوتەن ادامدارداي بولار ەدىك. ونداي كەزدە ماڭىزدى ماسەلەنى ورتاعا سالىپ شەشۋ قيىنعا سوعار ەدى» (الەكساندرا).
نە ىستەي الاسىز؟
ٶزىڭىزدى تەكسەرىپ كورىڭىز
-
تاپقان اقشامدى «مەنىكى» دەپ ەسەپتەيمىن بە؟
-
جاقسىلاپ تىنىعۋىم ٷشىن، جۇبايىم قاسىمدا بولماۋ كەرەك پە؟
-
جارىم ٷشىن تۋىستارى ىستىق بولسا دا، مەن ولاردان الشاق جۇرەمىن بە؟
بىرگە تالقىلاڭىزدار
-
وتباسىمىزدىڭ قاي سالاسىندا بىرلەسە ارەكەت ەتىپ ٴجۇرمىز؟
-
ال قاي سالادا جاقسارۋىمىز كەرەك؟
-
ٴبىر-ٴبىرىمىزدى قولداۋ ٷشىن نە ىستەي الامىز؟
كادەگە جارار
-
جۇبايىڭىز ەكەۋىڭىز تەننيس الاڭىندا ٴبىر-بىرىڭىزگە قارسى ەمەس، ٴبىر كوماندادا جۇپتاسىپ ويناپ جاتىرمىن دەپ ەلەستەتىڭىز. ٴبىر-بىرىڭىزگە قالاي دەمەۋ بولا الاسىزدار؟
-
«مەن قالاي جەڭسەم بولادى؟» دەپ ەمەس، «ەكەۋمىز قالاي جەڭسەك ەكەن؟» دەپ ويلاڭىز
«كىمدىكى دۇرىس، كىمدىكى بۇرىس دەپ داۋلاسۋدان اۋلاق بولىڭىز. وتباسىنىڭ ىنتىماق-بىرلىگى بۇدان الدەقايدا ارتىق» (ەريك).
كيەلى كىتاپ كەڭەسى: «تەك ٶز مۇددەلەرىڭدى ەمەس، باسقالاردىڭ دا مۇددەسىن ويلاڭدار» (فىلىپىلىكتەرگە 2:3، 4).
