3-كەڭەس
قيىندىققا مويىماۋدى ۇيرەتۋ
مويىماۋ دەگەن نە؟
مويىمايتىن ادام قيىنشىلىقتارعا تاپ بولعاندا ٴتۇڭىلىپ كەتپەي، ەسىن تەز جيادى. ارينە، بۇل — ومىرلىك تاجىريبە ارقىلى كەلەتىن قاسيەت. بالا قايتا-قايتا قۇلاپ بارىپ ٴجۇرۋدى ۇيرەنەتىنى سياقتى، ادام دا كوپ قۇلاپ جەتىستىككە جەتۋدى ۇيرەنەدى.
نەلىكتەن مويىماۋ ماڭىزدى؟
كەيبىر بالالار ساتسىزدىككە، قيىندىققا ۇشىراعاندا نەمەسە سىن-ەسكەرتۋلەر ەستىگەندە، كوڭىلدەرى تۇسەدى. وزگەلەرى بولسا ٴبىرجولا ٴتۇڭىلىپ كەتەدى. الايدا ولار مىنا جايتتاردى ٴتۇسىنۋ كەرەك:
-
ومىردە ساتتىلىك پەن ساتسىزدىك قاتار جۇرەدى (جاقىپ 3:2)؛
-
قيىنشىلىقتار ەشكىمدى اينالىپ وتپەيدى (ۋاعىزداۋشى 9:11)؛
-
سىن-ەسكەرتۋلەر ادامدى شيراتادى (ناقىل سوزدەر 9:9).
بالاڭىز قيىنشىلىققا مويىماي، ەسىن تەز جييۋدى ۇيرەنسە، الداعى ٶمىردىڭ سوقپاقتارىن قايىسپاي قارسى الادى.
مويىماستىققا باۋلۋ
بالاڭىز ساتسىزدىككە ۇشىراعاندا
كيەلى كىتاپتىڭ كەڭەسى: «ٵدىل جان جەتى رەت قۇلاسا دا، قايتىپ تۇرار، ال زۇلىم ادام اپات كەزىندە ٴسۇرىنىپ قۇلار» (ناقىل سوزدەر 24:16).
بالاڭىزعا تۋىنداعان قيىنشىلىققا دۇرىس باعا بەرۋگە كومەكتەسىڭىز. مىسالى، بالاڭىز مەكتەپتەگى ەمتيحاننان قۇلاسا، قالاي ارەكەت ەتەدى؟ بالكىم، ول نالىپ: «مەن ٶمىرى قاتەلەسەمىن دە جۇرەمىن»،— دەيتىن شىعار.
بالاڭىزعا مويىماۋدى ۇيرەتۋ ٷشىن كەلەسى جولى جاعدايدى قالاي تۇزەتۋگە بولاتىنىن بىرگە ويلاستىرىپ كورىڭىز. سوندا ول قيىنشىلىعىنىڭ قۇربانى بولىپ قايعىرۋدىڭ ورنىنا، جاعدايدى ٶز قولىنا الىپ، رەتتەۋگە تىرىسادى.
الايدا بالاڭىزدىڭ قيىندىعىن ٶزىڭىز شەشىپ تاستاماڭىز. قايتا، وعان شەشۋدىڭ امالدارىن تابۋعا كومەكتەسىڭىز. ودان بىلاي دەپ سۇراساڭىز بولادى: «وسى ساباقتى جاقسىراق وقۋ ٷشىن نە ىستەسەڭ بولادى؟»
قيىنشىلىقتار تونگەندە
كيەلى كىتاپتىڭ كەڭەسى: «سەندەر ەرتەڭ ومىرلەرىڭدە نە بولاتىنىن بىلمەيسىڭدەر» (جاقىپ 4:14).
ٶمىر بولعان سوڭ ٵرتۇرلى جاعداي بولادى. بۇگىن باي بولعان ادام ەرتەڭ تاقىر كەدەيگە اينالۋى مۇمكىن. ساپ-ساۋ جۇرگەن ادام ەرتەڭ توسەك تارتىپ جاتىپ قالۋى مۇمكىن. كيەلى كىتاپتا «جارىستا جۇيرىك، شايقاستا كۇشتى ٵردايىم جەڭە بەرمەيدى» دەگەن ناقىل بار. نەگە دەيسىز عوي؟ سەبەبى ادام «ۋاقىت پەن كەزدەيسوق جاعدايلارعا تاپ بولىپ جاتادى» (ۋاعىزداۋشى 9:11).
باۋىر ەتىڭىز بولعاندىقتان، بالاڭىزدى قاناتتىعا قاقتىرماي، تۇمسىقتىعا شوقتىرماي وسىرگىڭىز كەلەتىن شىعار. الايدا ٴسىز بالاڭىزدى ٶمىردىڭ بارلىق قيىندىقتارىنان قورعاشتاپ قالا المايسىز. بۇل — ٶمىردىڭ شىندىعى.
مىسالى، دوسىمەن ۇرىسىپ قالسا نەمەسە جاقىن تۋىسىڭىز قايتىس بولسا، بالاڭىز قايعىرۋى مۇمكىن. سوندايدا وعان ٶز-وزىنە كەلۋگە، سول قيىندىقتى ەڭسەرە بىلۋگە كومەكتەسىڭىز. وسىلايشا ول قيىنشىلىقتاردى شەشۋدى ۇيرەنەدى. ال ەسەيگەندە جۇمىس جوعالتۋ يا اقشادان قىسىلۋ سياقتى قيىندىقتاردى وڭاي شەشەتىن بولادى. a
بالاڭىزعا سىن-ەسكەرتۋلەر ايتىلعاندا
كيەلى كىتاپتىڭ كەڭەسى: «كەڭەستى تىڭدا... سوندا دانا بولارسىڭ الداعى ۋاقىتتا» (ناقىل سوزدەر 19:20).
جوندەلەتىن جاعىنا نۇسقاپ، بالاڭىزعا بىرەۋ سىن-ەسكەرتۋ ايتسا، بىردەن «بالامدى قورقىتۋ ٷشىن نەمەسە كوڭىلىنە تييۋ ٷشىن ايتىپ جاتىر» دەپ ويلاماڭىز. قايتا، ول جاقسى بولسىن دەپ ايتىپ جاتقان ٴتۇرى عوي.
سىن-ەسكەرتۋلەردى دۇرىس قابىلداۋدى ۇيرەتكەنىڭىز وزىڭىزگە دە، بالاڭىزعا دا كوپ پايدا اكەلەدى. ٴبىر اكە بىلاي دەيدى: «ٶز قاتەلىگىن تۇزەتپەيتىن بالا ەش نارسەگە دە ۇيرەنە المايدى. شەشۋدىڭ ورنىنا ٴبىر قيىندىقتان ٴبىر قيىندىققا سەكىرىپ جۇرە بەرەدى. ال ٴسىز ٶمىر باقي ونىڭ ارتىن جاۋىپ جۇرەسىز. ال بۇدان اتا-انا دا، بالا دا باقىت تاپپايدى».
مىنىنە سىن ايتىلعاندا، بالاڭىز بۇنىڭ پايداسىن كورۋ ٷشىن ٴسىز وعان قالاي كومەكتەسە الاسىز؟ كەڭەستى كىم ايتسا دا، «بالام، بۇنىڭ ساعان قاتىسى جوق» دەپ ايتۋدان اۋلاق بولىڭىز. ونىڭ ورنىنا، بىلاي سۇراساڭىز بولادى:
-
بۇل كەڭەستى نە ٷشىن ايتتى دەپ ويلايسىڭ؟
-
قالاي جاقسارا الاسىڭ؟
-
كەلەسىدە تۋرا سونداي جاعدايعا تۇسكەندە، نە ىستەيسىڭ؟
سىن-ەسكەرتۋلەر، كەڭەستەر بالاعا قازىر عانا ەمەس، ەسەيگەندە دە كوپ پايداسىن تيگىزبەك.
a «كۇزەت مۇناراسىنىڭ» 2008-جىلى قازان ايىندا جارىق كورگەن «بالاڭىزعا قايعىمەن كۇرەسۋگە كومەكتەسىڭىز» (حانزۇشا) دەگەن ماقالانى قاراساڭىز بولادى.
قىزىقتى بولار مالىمەتتەر
جاستاردىڭ ساۋالدارى
قايعىمەن قالاي كۇرەسە الامىن؟
جاستار وزدەرىنە قايعىمەن كۇرەسۋگە نە كومەكتەسكەنى تۋرالى اڭگىمەلەيدى.
