7-تاراۋ
ٶمىردى قۇداي سياقتى باعالايسىز با؟
«ٶمىردىڭ قاينار كوزى سەندە» (ٴزابۇر 36:9).
1، 2. ا) ەحوبانىڭ بىزگە بەرگەن باعالى سيى قانداي؟ ٵ) باقىتتى عۇمىر كەشۋىمىز ٷشىن ەحوبا بىزگە نە بەردى؟
ەحوبا اربىرەۋىمىزگە تاڭعاجايىپ سي بەردى. بۇل — ٴبىزدىڭ ٶمىرىمىز (مۇسانىڭ 1-جازباسى 1:27). باقىتتى عۇمىر كەشكەنىمىزدى قالاعاندىقتان، قۇداي بىزگە دۇرىس شەشىم قابىلداۋعا ۇيرەتەتىن پرينسيپتەر بەردى. «جامان مەن جاقسىنى اجىراتا» ٴبىلۋ ٷشىن وسى پرينسيپتەرگە ٵردايىم جۇگىنىپ وتىرعانىمىز ٴجون (ەۆرەيلەرگە 5:14). پرينسيپتەرگە جۇگىنگەن كەزدە ەحوبا بىزگە دۇرىس ويلانۋدى ۇيرەتەدى. ال قۇدايدىڭ پرينسيپتەرىنە ساي ٶمىر ٴسۇرىپ، ٶمىرىمىزدىڭ جاقسى جاققا وزگەرىپ جاتقانىن كورگەندە، ولاردىڭ باعا جەتپەس قازىنا ەكەنىن جەتە تۇسىنەمىز.
2 دەسە دە ٶمىر اساۋ تولقىنسىز بولمايدى. كەيبىر جاعدايلار تۋىنداعاندا، كيەلى كىتاپتان ناقتى نۇسقاۋ تاپپاي ٴدال بولىپ جاتامىز. سونداي جاعدايلاردىڭ ٴبىرى — قانمەن بايلانىستى ەمدەۋ شارالارى. وندايدا قانداي شەشىمىمىز ەحوباعا ۇنامدى بولادى؟ كيەلى كىتاپتا ەحوبانىڭ ٶمىر مەن قانعا دەگەن كوزقاراسىن تۇسىندىرەتىن پرينسيپتەر بار. ولاردى تۇسىنە بىلسەك، اقىلمەن شەشىم قابىلدايمىز، ٵرى ار-ۇجدانىمىزدى كىر شالدىرمايمىز (ناقىل سوزدەر 2:6—11). ال قازىر سول پرينسيپتەردىڭ كەيبىرىن قاراستىرايىق.
قۇدايدىڭ ٶمىر مەن قانعا دەگەن كوزقاراسى
3، 4. ا) ەحوبا قانعا دەگەن كوزقاراسىن قالاي ٴبىلدىردى؟ ٵ) قان نەنى بەينەلەيدى؟
3 كيەلى كىتاپ قان قاسيەتتى دەپ ۇيرەتەدى، ويتكەنى ول ٶمىردى بەينەلەيدى. ال ٶمىر ەحوبا ٷشىن اسا باعالى. قابىل ٸنىسىن ولتىرگەندە، ەحوبا وعان: «ٸنىڭنىڭ توگىلگەن قانى ماعان جەردەن ٷن قاتىپ تۇر!»— دەدى (مۇسانىڭ 1-جازباسى 4:10). ٵبىلدىڭ قانى ونىڭ ٶمىرىن بەينەلەگەن. ەحوبا ٵبىلدىڭ قانى جايلى ايتقاندا، ونىڭ ومىرىنە نۇسقاعان.
4 نۇحتىڭ كۇندەرىندە بولعان توپان سۋدان كەيىن قۇداي ادامزاتقا ەت جەۋگە رۇقسات بەردى. الايدا ول: «تەك ولاردىڭ ەتىن ومىرىمەن، ياعني قانىمەن، جەمەڭدەر»،— دەپ ناقتى ەسكەرتتى (مۇسانىڭ 1-جازباسى 9:4، سىلتەمە). نۇحتىڭ كۇللى ۇرپاعىنا بەرىلگەن بۇل ەسكەرتۋدىڭ بىزگە دە قاتىسى بار. ٴيا، ەحوبانىڭ كوز الدىندا قان ٶمىردى بەينەلەيتىنى انىق. ٴبىزدىڭ دە قانعا دەگەن كوزقاراسىمىز ٴدال سونداي بولۋ كەرەك (ٴزابۇر 36:9).
5، 6. ەحوبانىڭ ٶمىر مەن قانعا قاتىستى كوزقاراسى مۇسا زاڭىندا قالاي كورىنىس تاپقان؟
5 ەحوبا مۇساعا بەرگەن زاڭىندا بىلاي دەگەن: «بىرەۋ... قان اتاۋلىنى جەيتىن بولسا، مەن ونداي جانعا قارسى شىعىپ، حالقىنىڭ اراسىنان كوزىن قۇرتامىن. ويتكەنى تىرشىلىك يەلەرىنىڭ ٶمىرى قاندا عوي» (مۇسانىڭ 3-جازباسى 17:10، 11).
6 مۇسا زاڭى بويىنشا، ادام مالدى جەۋ ٷشىن ولتىرسە، ونىڭ قانىن جەرگە اعىزىپ تاستاۋعا ٴتيىس ەدى. وسىلاي ول مالدىڭ ٶمىرى قاسيەتتى ٵرى ەحوباعا تيەسىلى ەكەنىن كورسەتەتىن (مۇسانىڭ 5-جازباسى 12:16؛ ەزەكيەل 18:4). الايدا ەحوبانىڭ تالابى مالدىڭ قانىن سوڭعى تامشىسىنا دەيىن اعىزۋ كەرەك دەگەندى بىلدىرمەيتىن. قاندى تيىسىنشە اعىزىپ بولعان سوڭ، حالىق ەتتى تازا ار-ۇجدانمەن جەي الاتىن. مالدىڭ قانىنا قۇرمەت كورسەتۋلەرىمەن ولار ٶمىر بەرۋشى ەحوبانى قۇرمەتتەيتىندەرىن كورسەتەتىن. سونداي-اق زاڭدا كۇنالارى كەشىرىلۋ ٷشىن يسرايلدىكتەردەن مالدى قۇرباندىققا اكەلۋ تالاپ ەتىلەتىن (19، 20-تۇسىندىرمەنى قاراڭىز).
7. ٴداۋىت قاندى قۇرمەتتەيتىنىن قالاي كورسەتتى؟
7 قاننىڭ قانشالىقتى قۇندى ەكەنىن ٴداۋىتتىڭ فىلىستىرلەرمەن سوعىسقان كەزدەگى ٴبىر وقيعادان بايقاۋعا بولادى. ٴداۋىتتىڭ قاسىنداعى جىگىتتەرى ونىڭ قاتتى شولدەگەنىن كورەدى. ٴسۇيتىپ، وعان سۋ اكەلۋ ٷشىن باستارىن قاتەرگە تىگىپ، جاۋدىڭ جەرىنە اياق باسادى. ٴبىراق سۋدى اكەلىپ بەرگەندە، ٴداۋىت ونى ىشپەي، «ەحوبانىڭ الدىندا جەرگە توگىپ» تاستايدى. ول: «ەحوبا، مىنا سۋدى قالاي ىشپەكپىن؟! بۇل — باستارىن قاتەرگە تىككەن باتىرلاردىڭ قانى عوي!»— دەيدى. ٴداۋىت ٷشىن بۇل سۋ جىگىتتەردىڭ ٶمىرىن بەينەلەگەن. ول ٶمىر مەن قاننىڭ ەحوبا ٷشىن وتە قۇندى ەكەنىن جەتە تۇسىنگەن (سامۋيلدىڭ 2-جازباسى 23:15—17).
8، 9. ماسىحشىلەر قانعا قالاي قاراۋ كەرەك؟
8 يسانىڭ ولىمىنەن كەيىن مۇسا زاڭى ٶز كۇشىن جوعالتتى. دەسە دە ٴبىرىنشى عاسىرداعى ماسىحشىلەرگە زاڭنىڭ كەيبىر تۇستارىن ٵلى دە ۇستانۋ قاجەت ەدى. ولاردان قۇرباندىققا مال اكەلۋ تالاپ ەتىلمەگەنىمەن، «قاننان اۋلاق بولۋ» تالاپ ەتىلدى. ازعىندىقتان، پۇتقا تابىنۋدان اۋلاق بولۋ قالاي ماڭىزدى بولسا، قاننان اۋلاق بولۋ دا ٴدال سولاي ماڭىزدى ەدى (ەلشىلەردىڭ ىستەرى 15:28، 29).
قان فراكسيالارىنا قاتىستى شەشىمىڭىزدى قالاي تۇسىندىرەر ەدىڭىز؟
9 بۇگىندە دە مۇنىڭ ماڭىزدىلىعى جوعالعان جوق. ٴبىز ٶمىردىڭ قاينار كوزى ەحوبا ەكەنىن جانە ٶمىر اتاۋلىنىڭ ٴبارى وعان تيەسىلى ەكەنىن بىلەمىز. سونداي-اق قاننىڭ قاسيەتتى ٵرى ٶمىردى بەينەلەيتىنىن تۇسىنەمىز. سوندىقتان قانمەن بايلانىستى ەمدەۋ ادىستەرىن تاڭداعاندا، كيەلى كىتاپ پرينسيپتەرىن جاقسىلاپ قاراستىرىپ الامىز.
قاندى مەديسينالىق ماقساتتا پايدالانۋ
10، 11. ا) ەحوبا كۋاگەرلەرى قاندى يا ونىڭ نەگىزگى ٴتورت بولىگىن قۇيدىرۋعا قالاي قارايدى؟ ٵ) ٵربىر ٴماسىحشى نەنى شەشىپ الۋ كەرەك؟
10 ەحوبا كۋاگەرلەرى «قاننان اۋلاق بول» دەگەن تەك ٸشىپ-جەمەۋمەن عانا شەكتەلمەيتىنىن تۇسىنەدى. «قاننان اۋلاق بولۋ» دەگەنگە قان قۇيدىرماۋ، قان وتكىزبەۋ جانە قايتا قۇيۋ ٷشىن ادامنىڭ ٶز قانىن ساقتاماۋ دا كىرەدى. سونىمەن قاتار بۇل قاننىڭ نەگىزگى ٴتورت بولىگىن، ياعني ەريتروسيتتەر، لەيكوسيتتەر، ترومبوسيتتەر مەن پلازمانى قۇيدىرۋدان اۋلاق بولۋدى بىلدىرەدى.
11 قاننىڭ نەگىزگى ٴتورت بولىگى تاعى دا ۇساق بولىكتەرگە بولىنەدى. ولار قان فراكسيالارى دەپ اتالادى. ٵر ٴماسىحشى ولاردى قابىلداي ما، قابىلداماي ما — ٶزى شەشۋى ٴتيىس. ەم-شارا كەزىندە ٶز قانىن پايدالانا ما، جوق پا — مۇنى دا ٴماسىحشى ٶزى شەشەدى. وتا جاساتقاندا، زەرتحاناعا قان تاپسىرعاندا، يا بولماسا قازىر قابىلداپ جاتقان ەمدەۋ ادىستەرىندە ٶز قانىن قالاي پايدالاناتىنىن اركىم ٶزى شەشىپ الۋ كەرەك (21-تۇسىندىرمەنى قاراڭىز).
12. ا) ار-ۇياتىمىزعا سۇيەنىپ قابىلدايتىن شەشىمدەرىمىز نەگە ەحوبا ٷشىن ماڭىزدى؟ ٵ) مەديسينالىق ەم تۇرىنە قاتىستى شەشىم قابىلداردا نە ىستەۋىمىز كەرەك؟
12 ار-ۇياتىمىزعا سۇيەنىپ قانداي شەشىم قابىلدايتىنىمىز ەحوبا ٷشىن ماڭىزدى ما؟ ارينە، ويتكەنى ونداي شەشىمدەر جۇرەك تۇبىندە نە بارىن ايان ەتەدى. ال ەحوبا ٴبىزدىڭ ويىمىز بەن سەزىمدەرىمىزگە بەيجاي قارامايدى (ناقىل سوزدەر 17:3؛ 24:12 وقىڭىز). سوندىقتان ٴبىز مەديسينالىق ەم تۇرىنە قاتىستى شەشىم قابىلداردا ەحوبادان باعىت-باعدار سۇراپ دۇعا ەتەمىز، سوسىن تاڭداعالى تۇرعان ەم ٴتۇرى جايلى زەرتتەۋ جۇرگىزەمىز. سودان كەيىن كيەلى كىتاپپەن تاربيەلەنگەن ار-ۇجدانىمىزعا سۇيەنىپ شەشىم قابىلدايمىز. باسقالاردان «مەنىڭ ورنىمدا بولساڭ نە ىستەر ەدىڭ؟» دەپ سۇراماعانىمىز ٴجون. باسقالار دا شەشىمىمىزگە ىقپال ەتپەۋ قاجەت. ويتكەنى ٵر ٴماسىحشى «ٶز جۇگىن ٶزى كوتەرەدى» (عالاتتىقتارعا 6:5؛ ريمدىكتەرگە 14:12).
ەحوبانىڭ زاڭدارى — سۇيىسپەنشىلىكتىڭ كورىنىسى
13. ەحوبانىڭ قانعا قاتىستى زاڭدارى مەن پرينسيپتەرىنەن ول جايىندا نە بىلەمىز؟
13 ەحوبا ٶز زاڭ-تالاپتارىن ٴبىزدىڭ يگىلىگىمىز ٷشىن بەرگەن، ٵرى ولار ونىڭ بىزگە دەگەن سۇيىسپەنشىلىگىن پاش ەتەدى (ٴزابۇر 19:7—11). الايدا ٴبىز ەحوباعا زاڭ-تالاپتارىنىڭ پايداسى بار بولعاندىقتان عانا ەمەس، ونى سۇيگەندىكتەن مويىنسۇنامىز. ال سۇيىسپەنشىلىگىمىز ٴبىزدى قان قۇيدىرۋدان اۋلاق بولۋعا تالپىندىرادى (ەلشىلەردىڭ ىستەرى 15:20). بۇل دەنساۋلىعىمىزدى دا ساقتايدى. بۇگىندە كوپتەگەن ادام قان قۇيدىرۋدىڭ قاۋىپتى ەكەنىمەن كەلىسىپ جاتادى. كوپ دارىگەرلەر دە قانسىز جاسالعان وتا ناۋقاستىڭ دەنساۋلىعىنا اناعۇرلىم جاقسى اسەر ەتەتىنىن مويىندايدى. راسىندا دا، ەحوبانىڭ جولدارى دانالىق پەن سۇيىسپەنشىلىككە تولى (يشايا 55:9 وقىڭىز؛ جوحان 14:21، 23).
14، 15. ا) حالقىنىڭ قاۋىپسىزدىگى ٷشىن ەحوبا قانداي زاڭدار بەرگەن؟ ٵ) وسى زاڭداردىڭ استارىندا جاتقان پرينسيپتەردى قالاي ۇستانا الاسىز؟
14 قۇدايدىڭ زاڭدارى قاشاندا حالقىنىڭ پايداسىنا اسىپ وتىرعان. ەحوبا ەجەلدەگى يسرايل حالقىن وقىس جاعدايلاردان قورعاۋ ٷشىن زاڭدار بەرگەن. مىسالى، ٷيدىڭ توبەسىنەن بىرەۋ-مىرەۋ قۇلاپ كەتپەس ٷشىن، ٷي يەسى ونى اينالدىرا الاسا قابىرعامەن قورشاۋ كەرەك بولعان (مۇسانىڭ 5-جازباسى 22:8). سونداي-اق مالعا قاتىستى دا زاڭ بولعان. بىرەۋدىڭ سۇزەگەن بۇقاسى بولسا، ول باسقالاردى ٴسۇزىپ يا ٶلتىرىپ قويماس ٷشىن، يەسىنەن وعان باس-كوز بولۋ تالاپ ەتىلگەن (مۇسانىڭ 2-جازباسى 21:28، 29). الدەبىرەۋدىڭ وسى زاڭدارعا مويىنسۇنباعانىنىڭ كەسىرىنەن كىمدە-كىم ٶلىپ كەتسە، بۇعان يەسى كىنالى بولاتىن.
15 وسى زاڭدارعا قاراپ-اق ەحوبا ٷشىن ٶمىردىڭ قانشالىقتى باعالى ەكەنىن تۇسىنۋگە بولادى. مۇنى بىلگەنىمىز ٴبىزدى نە ىستەۋگە تالپىندىرۋ كەرەك؟ ٶمىردى قۇرمەتتەيتىنىمىز ٷيىمىز بەن كولىگىمىزدىڭ كۇيىنەن، كولىكتى قالاي ايدايتىنىمىزدان، قانداي ويىن-ساۋىق تاڭدايتىنىمىزدان كورىنىپ تۇرۋ كەرەك. كەيبىر ادامدار، اسىرەسە جاستار «نە بولادى دەيسىڭ؟» دەگەن ويمەن باستارىن قاتەرگە تىگىپ، قاۋىپتى ەلەمەي جاتادى. ٴبىراق ەحوبا بۇلاي ەتكەنىمىزدى قالامايدى. قايتا، ٶزىمىزدىڭ دە، وزگەلەردىڭ دە ٶمىرىن قاستەرلەسەك ەكەن دەيدى (ۋاعىزداۋشى 11:9، 10).
16. ەحوبا تۇسىك جاساتۋعا قالاي قارايدى؟
16 ەحوبانىڭ كوز الدىندا ٵربىر ادامنىڭ، ٴتىپتى ىشتە جاتقان بالانىڭ دا ٶمىرى قۇندى. مۇسا زاڭىنا سايكەس، بىرەۋ جۇكتى ايەلدى ابايسىزدا ۇرىپ جىبەرىپ، سونىڭ سالدارىنان ايەلدىڭ ٶزى نە ىشتە جاتقان بالاسى ٶلىپ كەتسە، ەحوبا سول ادامدى كىسى ٶلتىرۋشى دەپ قاراستىرعان. بۇل ابايسىزدا بولعان جاعداي بولسا دا، ولىمگە سەبەپشى بولعان ادام ولىمگە كەسىلۋ كەرەك ەدى (مۇسانىڭ 2-جازباسى 21:22، 23 وقىڭىز). قۇداي ٷشىن قۇرساقتا جاتقان بالا — ٴتىرى جان. ولاي بولسا، ەحوبا تۇسىك جاساتۋعا قالاي قارايدى دەپ ويلايسىز؟ جىل سايىن ميلليونداعان ٴسابيدىڭ تۋىلماي جاتىپ ٶلتىرىلىپ جاتقانىن كورگەندە، ول قانداي كۇي كەشەدى؟
17. ەحوبانىڭ كوزقاراسىن بىلمەي تۇرعاندا تۇسىك جاساتقان ايەلدى نە جۇباتادى؟
17 ال بىرەۋ ەحوبانىڭ كوزقاراسىن ٵلى بىلمەي تۇرعاندا تۇسىك جاساتقان بولسا شە؟ ەحوبا يسانىڭ تولەمىن نەگىزگە الىپ، ونى كەشىرەتىنىنە سەنىمدى بولسىن (لۇقا 5:32؛ ەفەستىكتەرگە 1:7). بۇرىن وسىنداي قاتەلىككە بارعان ايەل شىن وكىنگەن بولسا، ٶزىن جازعىرا بەرمەۋ كەرەك. «ەحوبا مەيىرىمدى دە جاناشىر... شىعىس باتىستان قانشا قاشىق بولسا، ول بىزدەن قىلمىستارىمىزدى سونشا قاشىقتاتتى» (ٴزابۇر 103:8—14).
جەككورۋشىلىككە جەتەلەيتىن ويلاردان ساقتانىڭىز
18. نەگە جەككورۋشىلىككە جەتەلەيتىن ويلاردان ارىلۋىمىز كەرەك؟
18 ٶمىر سيىنا دەگەن قۇرمەت جۇرەك تۇبىنەن باستاۋ الادى. بۇعان وزگەلەر تۋرالى وي-سەزىمدەرىمىز كىرەدى. ەلشى جوحان: «باۋىرلاسىن جەك كورەتىن اركىم — كىسى ٶلتىرۋشى»،— دەپ ايتقان (جوحاننىڭ 1-حاتى 3:15). ٶزىمىز اڭعارماستان جاقتىرمايتىن ادامىمىزدى جەك كورىپ كەتۋىمىز مۇمكىن. جەككورۋشىلىك بولسا قۇرمەتسىزدىككە ۇلاسىپ، سول ادامعا جالعان ايىپ تاعۋىمىز، ٴتىپتى ونىڭ ٶلىمىن تىلەۋىمىز مۇمكىن. ەحوباعا وزگەلەر تۋرالى ىشتەي نە ويلايتىنىمىز ايان (مۇسانىڭ 3-جازباسى 19:16؛ مۇسانىڭ 5-جازباسى 19:18—21؛ ماتاي 5:22). الدەكىمگە دەگەن جاعىمسىز ويلارىمىزدىڭ بار ەكەنىن بايقاساق، ولاردان ارىلۋ ٷشىن بارىنشا كۇش سالۋىمىز قاجەت (جاقىپ 1:14، 15؛ 4:1—3).
19. ٶمىردى باعالايتىنىمىزدى كورسەتۋدىڭ تاعى ٴبىر جولى قانداي؟
19 ٶمىردى باعالايتىنىمىزدى كورسەتۋدىڭ تاعى ٴبىر جولى بار. ٴزابۇر 11:5 تە ەحوبا جايلى: «جاۋىزدىقتى سۇيەتىندەردى ول جەك كورەدى»،— دەلىنگەن. قاتىگەز ويىن-ساۋىق ٴتۇرىن تاڭداساق، قاتىگەزدىكتى جاقسى كورەتىنىمىزدى كورسەتپەيمىز بە؟! سانامىزدى قاتىگەز سوزدەرگە، ويلار مەن بەينەلەرگە تولتىرىپ قايتەمىز؟! ودان دا سانامىزدى تازا دا جاعىمدى ويلارعا تولتىرايىق (فىلىپىلىكتەرگە 4:8، 9 وقىڭىز).
ٶمىردى قۇرمەتتەمەيتىندەرگە ەرمەڭىز
20. ەحوبا شايتاننىڭ دۇنيەسىنە قالاي قارايدى؟
20 شايتان بيلەگەن دۇنيەنىڭ ومىرگە دەگەن ٴبىر ٴتۇيىر قۇرمەتى جوق. سوندىقتان ەحوبا بۇل دۇنيەنى قان توگۋشى، ياعني كىسى ٶلتىرۋشى دەپ بىلەدى. عاسىرلار بويى ساياسي ۇكىمەتتەر ميلليونداعان ادامنىڭ ولىمىنە سەبەپشى بولىپ كەلەدى. اراسىندا ەحوبانىڭ كوپتەگەن قىزمەتشىلەرى دە قۇربان بولدى. كيەلى كىتاپتا بۇل ساياسي ۇكىمەتتەر اياۋشىلىق دەگەندى بىلمەيتىن جىرتقىش اڭدارعا تەڭەلەدى (دانيال 8:3، 4، 20—22؛ ايان 13:1، 2، 7، 8). بۇگىنگى كۇندە قارۋ-جاراق ساتۋ ٸرى بيزنەسكە اينالعان. ٶلىم-ٴجىتىم قارۋلارىن ساتىپ، ادامدار كۇرەكتەپ اقشا تابۋدا. ٴيا، «بۇكىل دۇنيە شايتاننىڭ بيلىگىندە» ەكەنىندە داۋ جوق (جوحاننىڭ 1-حاتى 5:19).
21، 22. قۇدايدىڭ حالقى «وسى دۇنيەلىك ەمەس» ەكەندىكتەرىن قالاي كورسەتەدى؟
21 ماسىحشىلەر «وسى دۇنيەلىك ەمەس». ەحوبانىڭ حالقى ساياسات پەن سوعىسقا ارالاسپاي، بەيتاراپتىق ساقتايدى. ولار كىسى ولتىرمەيتىندىكتەن، سوعىساتىن يا قارۋ-جاراق شىعاراتىن توپتار مەن ۇيىمداردى ەش قولدامايدى (جوحان 15:19؛ 17:16). قۋعىنعا ۇشىراعاندا ماسىحشىلەر زۇلىمدىققا زۇلىمدىقپەن جاۋاپ قايتارمايدى. ويتكەنى يسا ٴتىپتى جاۋلارىمىزدى دا جاقسى كورۋىمىز كەرەكتىگىن ايتقان (ماتاي 5:44؛ ريمدىكتەرگە 12:17—21).
22 ميلليونداعان ادامنىڭ ٶلىمىنىڭ ارتىندا تاعى ٴدىن تۇر. ۇلى بابىل، ياعني جالعان دىندەر يمپەرياسى تۋرالى كيەلى كىتاپتا بىلاي دەلىنگەن: «پايعامبارلار مەن قاسيەتتىلەردىڭ جانە ولتىرىلگەندەردىڭ بارىنىڭ قانى وسى قالادان تابىلدى». ەحوبانىڭ نە ٷشىن «مەنىڭ حالقىم، ودان شىق» دەپ بۇيىراتىنىن تۇسىنەسىز بە؟ ەحوباعا عيبادات ەتەتىندەر جالعان دىننەن اۋلاق ٴجۇرۋ كەرەك (ايان 17:6؛ 18:2، 4، 24).
23. ۇلى بابىلدان شىعۋ دەگەن نەنى بىلدىرەدى؟
23 ۇلى بابىلدان شىعۋ دەگەن جالعان دىنمەن بايلانىستى تولىق ٷزۋدى بىلدىرەدى. مىسالى، قانداي دا ٴبىر ٴدىني ۇيىمنىڭ مۇشەلىگىنە تىركەلگەن بولساق، ەسىمىمىزدى ٶشىرتىپ تاستاۋ قاجەت بولۋى مۇمكىن. ٴبىراق بۇل جەتكىلىكسىز. ٴبىز جالعان ٴدىننىڭ ىستەرىنەن اۋلاق بولىپ، ولاردى جەك كورۋىمىز كەرەك. جالعان ٴدىن ساياساتقا ارالاسۋعا، جىنىستىق ونەگەسىزدىكپەن اينالىسۋعا، اشكوزدىككە سالىنۋعا تيىم سالمايدى، بۇل ازداي، سولاردى ٶزى ناسيحاتتايدى (ٴزابۇر 97:10 وقىڭىز؛ ايان 18:7، 9، 11—17). سونىڭ سالدارىنان جىلدار بويى ميلليونداعان ادام ومىرلەرىنەن ايىرىلۋدا.
24، 25. نەگە ەحوبانى بىلگەنىمىز جانتىنىشتىق پەن تازا ار-ۇجدان سيلايدى؟
24 ەحوبانى بىلمەي تۇرعاندا ٴبارىمىز دە قانداي دا ٴبىر شامادا شايتاننىڭ دۇنيەسىندەگى جامان ىستەرگە ورتاقتاسىپ جۇردىك. ٴبىراق ٴبىز وزگەردىك. ٴبىز تولەم قۇرباندىعىنا سەنىپ، ٶمىرىمىزدى قۇدايعا باعىشتادىق. ٴبىز ٷشىن «ەحوبانىڭ قايتا نىعايتاتىن ۋاقىتى كەلدى». باسقاشا ايتقاندا، قۇدايعا ۇنامدى ەكەنىمىزدى بىلگەندىكتەن، جانىمىز تىنىش، ار-ۇجدانىمىز تازا (ەلشىلەردىڭ ىستەرى 3:19؛ يشايا 1:18).
25 ٴبىر كەزدەرى ومىرگە دەگەن قۇرمەتى جوق ۇيىمدار مەن توپتاردى قولداعان بولساق، ەحوبا تولەمدى نەگىزگە الىپ، ٴبىزدى كەشىرەدى. ٴبىزدىڭ ٶمىر سيى ٷشىن ەحوباعا شەكسىز ريزامىز. باسقالارعا ەحوبا جايلى ايتقاندا، ولارعا شايتاننىڭ دۇنيەسىنەن شىعىپ، قۇدايمەن دوس بولۋعا بارىنشا كومەكتەسكەندە، ومىرگە دەگەن ريزاشىلىعىمىزدى كورسەتەمىز (قورىنتتىقتارعا 2-حات 6:1، 2).
پاتشالىق جايلى ايتىڭىز
26—28. ا) ەحوبا ەزەكيەلگە قانداي ەرەكشە تاپسىرما جۇكتەگەن؟ ٵ) ەحوبا بۇگىندە بىزگە قانداي تاپسىرما بەردى؟
26 ەجەلگى يسرايلدە ەحوبا ەزەكيەل پايعامبارعا يەرۋساليمنىڭ جۋىردا جويىلاتىنىن ەسكەرتىپ، ادامدارعا امان قالۋ ٷشىن نە ىستەۋ كەرەكتىگىن ۇيرەتۋدى تاپسىردى. ەزەكيەل ەسكەرتپەيتىن بولسا، ەحوبا ادامداردىڭ قانىن ونىڭ موينىنا جۇكتەمەك ەدى (ەزەكيەل 33:7—9). ماڭىزدى حاباردى جەتكىزۋ ٷشىن بارىن سالعان ەزەكيەل ادام ٶمىرىن قاستەرلەيتىنىن كورسەتتى.
27 ەحوبا بىزگە دە تاپسىرما بەرگەن. ٴبىز ادامدارعا شايتاننىڭ دۇنيەسى تاياۋدا جويىلاتىنىن ەسكەرتىپ، ولارعا ەحوبانى تانىپ-بىلۋگە جانە امان-ەسەن جاڭا ومىرگە جەتۋلەرىنە كومەكتەسۋىمىز قاجەت (يشايا 61:2؛ ماتاي 24:14). وسى حاباردى باسقالارعا جەتكىزۋ ٷشىن ەش ايانىپ قالعىمىز كەلمەيدى. ٴبىز دە پاۋىل سياقتى: «مەنىڭ موينىمدا ەشكىمنىڭ قانى جوق، ويتكەنى سەندەرگە قۇداي ەركىن تۇگەل ايتۋدان تارتىنبادىم»،— دەگىمىز كەلەر ەدى (ەلشىلەردىڭ ىستەرى 20:26، 27).
28 ارينە، ەحوبانىڭ سۇيىسپەنشىلىگىنە بولەنە بەرۋ ٷشىن ٶمىر مەن قانعا ەحوبا سياقتى قاراۋمەن عانا شەكتەلمەۋىمىز كەرەك. بۇدان بولەك، ٴبىز قۇدايدىڭ الدىندا تازا بولۋىمىز قاجەت. بۇل جايىندا كەلەسى تاراۋدا ٴسوز ەتەمىز.
قىزىقتى بولار مالىمەتتەر
ٴجيى قويىلاتىن سۇراقتار
ەحوبا كۋاگەرلەرى نە سەبەپتى قان قۇيدىرۋدان باس تارتادى؟
ەحوبا كۋاگەرلەرىنە جانە قان قۇيدىرۋعا قاتىستى جاڭساق پىكىرلەر كەڭ تاراعان. وسى جايىنداعى ىلىمىمىزگە قاتىستى جايتتارمەن تانىسىڭىز.
