136-تاراۋ
عاليلەيا تەڭىزىنىڭ جاعاسىندا
-
يسا عاليلەيا تەڭىزىنىڭ جاعاسىندا كورىندى
-
پەتىر مەن باسقا ەلشىلەر «قوزىلاردى باعۋ» كەرەك
يسا ەلشىلەرىمەن بولعان سوڭعى ٴتۇنى: «مەن قايتا تىرىلگەننەن كەيىن، سەندەردەن بۇرىن عاليلەياعا بارامىن»،— دەگەن بولاتىن (ماتاي 26:32؛ 28:7، 10). سودان ٸزباسارلارىنىڭ كوبى جولعا شىعىپ، عاليلەياعا باردى. ٴبىراق ولار مۇندا نە ىستەمەك؟
پەتىر التى ەلشىمەن بىرگە وتىرعاندا: «مەن بالىق اۋلاۋعا بارا جاتىرمىن»،— دەدى. سوندا ولار: «ٴبىز سەنىمەن بارامىز»،— دەدى (جوحان 21:3). ٴسويتىپ، ەلشىلەر تەڭىزگە شىعىپ، ٴتۇنى بويى تۇك ۇستاي المادى. تاڭ اتا جاعا جاقتان يسا كورىندى، ٴبىراق ەلشىلەر ونى تانىمادى. يسا بۇلارعا داۋىستاپ: «بالالار، جەيتىن بىردەڭەلەرىڭ بار ما؟»— دەپ سۇرادى. بۇلار: «جوق!»— دەپ جاۋاپ بەرگەندە، يسا: «اۋدى قايىقتىڭ وڭ جاعىنا سالىڭدار، سوندا ۇستايسىڭدار»،— دەدى (جوحان 21:5، 6). ايتقانىنداي ىستەپ ەدى، اۋعا كوپ بالىق ٴتۇسىپ، ونى تارتىپ شىعارا الماي قالدى.
«بۇل — يەمىز عوي!» — دەدى جوحان پەتىرگە (جوحان 21:7). ايتقانى سول-اق ەكەن، پەتىر سىرت كيىمىن بەلىنە بايلاي سالا، سۋعا سەكىرىپ، 90 مەتردەي قاشىقتىقتاعى جاعاعا ٴجۇزىپ كەتتى. قايىقتا قالعاندار بالىققا تولى اۋدى سۇيرەتىپ، جاعاعا جىلجىدى.
جاعاعا شىققاندا، ولار شوقتىڭ ۇستىندەگى بالىقتى جانە جانىندا جاتقان ناندى كوردى. يسا ولارعا: «قازىر ۇستاعان بالىقتارىڭنان اكەلىڭدەر»،— دەدى. پەتىر اۋدى جاعاعا شىعارىپ ەدى، وندا ۇلكەن-ۇلكەن 153 بالىق بار ەكەن. سوسىن يسا: «كەلىڭدەر، تاڭعى استارىڭدى جەپ الىڭدار»،— دەدى. ەشقايسىسى ودان: «كىمسىڭ؟»— دەپ سۇراۋعا باتا المادى، ويتكەنى ونىڭ يسا ەكەنىن ٴتۇسىندى (جوحان 21:10—12). بۇل يسانىڭ شاكىرتتەرىنە ٷشىنشى رەت كورىنۋى ەدى.
يسا ٵرقايسىسىنا نان مەن بالىق ۇسىندى. سوسىن يسا، جەردە جاتقان بالىقتارعا قاراسا كەرەك، پەتىردەن: «جوحان ۇلى شيمون، مەنى مىنالارعا قاراعاندا كوبىرەك جاقسى كورەسىڭ بە؟»— دەپ سۇرادى. پەتىر بالىق اۋلاۋ كاسىبىن يسا تاپسىرعان ىستەن كوبىرەك جاقسى كورەر مە ەكەن؟ پەتىر: «ٴيا، يەم، ٴسىزدى جاقسى كورەتىنىمدى بىلەسىز عوي»،— دەپ جاۋاپ بەردى. يسا وعان: «وندا توقتى-قوزىلارىما ازىعىن بەر»،— دەدى (جوحان 21:15).
يسا تاعى دا: «جوحان ۇلى شيمون، مەنى جاقسى كورەسىڭ بە؟»— دەپ سۇرادى. پەتىر تۇسىنبەي قالسا كەرەك، يساعا: «ٴيا، يەم، ٴسىزدى جاقسى كورەتىنىمدى بىلەسىز عوي»،— دەپ سەنىمدى تۇردە جاۋاپ بەردى. يسا: «قوزىلارىمدى باق»،— دەپ تاپسىردى (جوحان 21:16).
يسا ٷشىنشى رەت: «جوحان ۇلى شيمون، مەنى جاقسى كورەسىڭ بە؟»— دەپ سۇرادى. يسا ادالدىعىنا كۇماندانىپ تۇر دەپ ويلاسا كەرەك. سوندىقتان پەتىر سالماقتى ۇنمەن وعان: «يەم، ٴسىز ٴبارىن بىلەسىز، ٴسىزدى جاقسى كورەتىنىمدى دە بىلەسىز»،— دەدى. يسا بۇل جولى دا پەتىردىڭ مىندەتىنە باسا نازار اۋدارىپ: «قوزىلارىما ازىعىن بەر»،— دەدى (جوحان 21:17). دەمەك، باسشىلىقتى قولعا العاندار قۇدايدىڭ وتارىنا قىزمەت ەتۋلەرى كەرەك.
يسانى قۇدايدىڭ تاپسىرماسىن ورىنداعانى ٷشىن بايلاپ اكەتىپ، ولىمگە كەسكەن بولاتىن. ەندى، پەتىردى دە وسىنداي ٶلىم كۇتىپ تۇرعانىن بىلگەن يسا بىلاي دەدى: «جاس كەزىڭدە ٶزىڭ كيىنىپ، قالاعان جاعىڭا باردىڭ. ال قارتايعاندا قولىڭدى ٴسوزىپ تۇراسىڭ، سەنى باسقا بىرەۋ كيىندىرىپ، بارعىڭ كەلمەگەن جاققا الىپ كەتەدى». سوسىن: «بۇدان بىلاي دا سوڭىمنان ەرىپ ٴجۇر»،— دەپ، ونى بەرىلمەۋگە شاقىردى (جوحان 21:18، 19).
پەتىر ىلەسىپ كەلە جاتقان ەلشى جوحاندى كورگەندە، يساعا: «يەم، ال مىناۋ شى؟»— دەدى. شىنىندا دا، يسانىڭ ەرەكشە جاقسى كورەتىن ەلشىسىنىڭ بولاشاعى قانداي بولماق؟ يسانىڭ جاۋابى مىناداي بولدى: «مەن كەلگەنشە، ونىڭ وسىندا بولعانىن قالاسام، سولاي بولادى، ونى قايتەسىڭ؟ (جوحان 21:21—23). باسقالار نە ىستەمەسىن، پەتىر يسانىڭ سوڭىنان ەرىپ جۇرە بەرۋى كەرەك. دەگەنمەن، يسا جوعارىداعى سوزىمەن جوحاننىڭ وزگە ەلشىلەردەن ۇزاعىراق ٶمىر ٴسۇرىپ، يسانىڭ پاتشالىق بيلىگىنە كەلۋى جايلى ايان الاتىنىن ٴبىلدىردى.
ارينە، يسا بۇدان باسقا دا كوپ ىستەر جاسادى. ونىڭ ٴبارى جازىلا بەرسە، جازىلعان شيىرشىقتارعا سان جەتپەس ەدى.
