9-تاراۋ
ٴماسىح — «قۇدايدىڭ قۇدىرەتى»
1—3. ا) عاليلەيا كولىندە شاكىرتتەر قانداي قورقىنىشتى وقيعانى باستان كەشىردى جانە يسا نە ىستەدى؟ ٵ) نەگە ەلشى پاۋىل ورىندى تۇردە ٴماسىحتى «قۇدايدىڭ قۇدىرەتى» دەپ اتاعان؟
شاكىرتتەردە زارە جوق. اياق استىنان داۋىل كوتەرىلگەندە، ولار عاليلەيا كولىنىڭ ارعى بەتىنە ٴجۇزىپ بارا جاتقان. ولاردىڭ بۇرىن دا داۋىلعا كەزىگىپ جۇرگەنىندە كۇمان جوق، ويتكەنى كەيبىرى تاجىريبەلى بالىقشى بولعان عوي a (ماتاي 4:18، 19). ٴبىراق بۇل جولى كولدى ٵپ-ساتتە الاي-تۇلەي ەتكەن ەرەكشە «سۇراپىل داۋىل» بولدى. جىگىتتەر قايىققا يە بولۋ ٷشىن بار كۇشتەرىن سالدى، ٴبىراق دولى داۋىل بوي بەرمەي جاتتى. «قايىق تولقىن استىندا قالىپ»، سۋعا تولا باستادى. كۇنى بويى قالىڭ جۇرتقا ٴتالىم بەرىپ، ابدەن شارشاعان يسا اينالا استان-كەستەن بولىپ جاتقانىنا قاراماي، قايىقتىڭ ارتقى جاعىندا قاتتى ۇيىقتاپ جاتتى. ومىرلەرى ٷشىن قورىققان شاكىرتتەرى ونى وياتىپ: «مىرزا، قۇتقارا كورىڭىز! قۇريتىن بولدىق!»— دەپ ٶتىندى (مارقا 4:35—38؛ ماتاي 8:23—25).
2 يسا قورىققان جوق. ول بەرىك سەنىممەن جەل مەن كولگە تيىم سالدى: «تىنا قال، باسىل!» سول ساتتە-اق جەل مەن كول باعىنادى دا، داۋىل باسىلىپ، تولقىندار كوزدەن عايىپ بولىپ، «جىم-جىرت تىنىشتىق ورنادى». شاكىرتتەرىنىڭ بويلارىن قاتتى ۇرەي بيلەيدى. ولار ٴبىر-بىرىمەن: «بۇل كىم ٶزى؟»— دەپ كۇبىرلەستى. راسىندا دا، قانداي ادام تەنتەكتىك جاساعان بالانى تۇزەتكەندەي، جەل مەن كولگە تيىم سالا الار ەدى؟ (مارقا 4:39—41؛ ماتاي 8:26، 27)
3 ٴبىراق يسا كادىمگى ادام ەمەس ەدى. ەحوبانىڭ كۇشى يسانىڭ وزىنە قاتىستى دا، يسا ارقىلى دا ەرەكشە پاش ەتىلدى. رۋحتىڭ جەتەلەۋىمەن ەلشى پاۋىل ورىندى تۇردە ٴماسىحتىڭ «قۇدايدىڭ قۇدىرەتى» ەكەنىن ايتقان (قورىنتتىقتارعا 1-حات 1:24). قۇداي يسا ارقىلى كۇشىن قالاي كورسەتكەن؟ يسانىڭ قۇداي بەرگەن كۇشىن قولدانعانى ٴبىزدىڭ ومىرىمىزگە قالاي اسەر ەتەدى؟
قۇدايدىڭ جالعىز ۇلىنىڭ كۇشى
4، 5. ا) ەحوبا جالعىز ۇلىنا قانداي كۇش پەن بيلىك بەردى؟ ٵ) اكەسىنىڭ تاپسىرماسىن ورىنداۋ ٷشىن يساعا نە بەرىلدى؟
4 جەرگە كەلمەس بۇرىن يسانىڭ قانداي كۇش يەسى بولعانىن قاراستىرىپ كورەيىك. ەحوبا كەيىن يسا ٴماسىح رەتىندە بەلگىلى بولعان جالعىز ۇلىن جاراتقاندا، ‹ماڭگىلىك قۇدىرەتىن› كورسەتكەن (ريمدىكتەرگە 1:20؛ قولوستىقتارعا 1:15، سىلتەمەنى قارا). سوسىن، ول ٶزىنىڭ جاراتۋ ىسىنە قاتىستى نيەتىن جۇزەگە اسىرۋدى ۇلىنا تاپسىرىپ، وعان وراسان زور كۇش پەن بيلىك بەرگەن. كيەلى كىتاپتا بىلاي دەلىنەدى: «قۇداي ٴبارىن ٴسوز [جەرگە كەلگەنگە دەيىنگى يسا] ارقىلى جاراتقان، جاراتىلعان ەشتەڭە دە ونسىز پايدا بولماعان» (جوحان 1:3).
5 وعان جۇكتەلگەن تاپسىرمانىڭ قانشالىقتى كولەمدى بولعانىن ٴبىز تولىق تۇسىنە دە المايمىز. ميلليونداعان قۇدىرەتتى پەرىشتەلەردى، ميللياردتاعان گالاكتيكالاردان تۇراتىن الەمدى جانە تىرشىلىكتىڭ سان الۋان تۇرلەرىنە تولى جەردى جاراتۋ ٷشىن قانداي كۇش قاجەت ەكەنىن ويلاپ كورشى. ەحوبا بۇل تاپسىرمانى ورىنداۋ ٷشىن ۇلىنا الەمدەگى ەڭ قۇدىرەتتى كۇشتى، ٶزىنىڭ كيەلى رۋحىن، بەردى. يسا ەحوبانىڭ وزگە نارسەلەردىڭ ٴبارىن جاراتقاندا قولدانعان ‹شەبەر جۇمىسشىسى› بولعانىنا قاتتى قۋانعان (ناقىل سوزدەر 8:22—31، [30، جد]).
6. ولىمنەن قايتا تىرىلگەننەن كەيىن، يساعا قانداي كۇش پەن بيلىك بەرىلدى؟
6 قۇدايدىڭ جالعىز ۇلى بۇدان دا كوپ كۇش پەن بيلىككە يە بولا الار ما ەدى؟ ولىمنەن قايتا تىرىلگەن يسا: «ماعان كوك پەن جەردىڭ بارلىق بيلىگى بەرىلگەن!»— دەدى (ماتاي 28:18). ٴيا، يساعا كەز كەلگەن جەردە كۇشىن قولدانۋىنا بولاتىن مۇمكىندىك پەن قۇقىق بەرىلدى. يسانىڭ «پاتشالاردىڭ پاتشاسى، يەلەردىڭ يەسى» رەتىندە اكەسىنە قارسى تۇرعان «كۇللى بيلىك پەن كۇش اتاۋلىنى»، مەيلى، كوزگە كورىنەتىن نە كورىنبەيتىن بولسىن، جويىپ جىبەرۋگە قۇزىرى بار (ايان 19:16؛ قورىنتتىقتارعا 1-حات 15:24—26). قۇداي «وعان باعىندىرماعان ەش نارسەنى قالدىرعان جوق»، ٴبىراق بۇل، ارينە، ەحوبانىڭ وزىنە قاتىستى ەمەس (ەۆرەيلەرگە 2:8؛ قورىنتتىقتارعا 1-حات 15:27).
7. نەگە ەحوبادان العان كۇشىن يسانىڭ ەشقاشان تەرىس قولدانبايتىنىنا سەنىمدى بولا الامىز؟
7 يسا قولىنداعى كۇشىن تەرىس قولدانادى دەپ قورقۋىمىز كەرەك پە؟ جوق، قورقۋدىڭ مۇلدەم قاجەتى جوق! يسا اكەسىن شىنىمەن سۇيەدى، ٵرى ەشقاشان وعان ۇنامايتىن نارسەنى ىستەمەيدى (جوحان 8:29؛ 14:31). ەحوبا ٶزىنىڭ قۇدىرەتتى كۇشىن ەشقاشان تەرىس قولدانبايتىنىن يسا جاقسى بىلەدى. ول ەحوبانىڭ ‹وزىنە جۇرەگى تولىق بەرىلگەندەردى قولداۋ ٷشىن› ىزدەيتىنىن تالاي رەت كورگەن (شەجىرەلەر 2-جازبا 16:9). يسا دا اكەسى ىسپەتتى ادامزاتتى سۇيەدى، سوندىقتان ٶز كۇشىن ارقاشان ٴبىزدىڭ يگىلىگىمىز ٷشىن قولداناتىنىنا سەنىمدى بولۋىمىزعا بولادى (جوحان 13:1). مۇنى دالەلدەيتىن جايتتار كوپ. جەردە بولعاندا يسانىڭ قانداي كۇشى بولعانىن جانە كۇشىن قولدانۋعا ونى نە تالپىندىرعانىن قاراستىرىپ كورەيىك.
«سوزىمەن... قۇدىرەتتى»
8. كيەلى رۋحپەن مايلانعاننان كەيىن، يسا نە ىستەدى جانە ٶز كۇشىن قالاي قولداندى؟
8 يسا نازارەتتە وتكەن بالالىق شاعىندا ەشقانداي كەرەمەت جاساماعانعا ۇقسايدى. ٴبىراق شامامەن 30 عا كەلىپ، ب. ز. 29-جىلى سۋعا شومىلدىرۋ راسىمىنەن وتكەن سوڭ، جاعداي باسقاشا بولدى (لۇقا 3:21—23). كيەلى كىتاپتا بىلاي دەلىنگەن: «قۇداي كيەلى رۋحى مەن قۇدىرەتىن نازارەتتىك يساعا دارىتتى. ول يگى ىستەر جاساپ، شايتان بۋعانداردى ايىقتىرىپ، ەل ارالاپ ٴجۇردى» (ەلشىلەردىڭ ىستەرى 10:38). «يگى ىستەر جاساپ» دەگەن سوزدەر يسانىڭ ٶز كۇشىن دۇرىس قولدانعانىنا نۇسقايدى ەمەس پە؟ كيەلى رۋحپەن مايلانعاننان كەيىن، ول «سوزىمەن دە، ىسىمەن دە قۇدىرەتتى پايعامبار بولدى» (لۇقا 24:19).
9—11. ا) يسا كوبىسىنشە قانداي جەرلەردە ٴتالىم بەرگەن جانە سول زاماندا قانداي قيىندىق بولعان؟ ٵ) نەگە يسانىڭ ٴتالىم بەرۋ ٴتاسىلى حالىقتى قايران قالدىرعان؟
9 قالايشا يسا سوزىمەن قۇدىرەتتى بولدى؟ ول ٴجيى اشىق اسپان استىندا — كول جاعاسى، قىراتتى جەرلەر، كوشە مەن بازار الاڭدارىندا — ٴتالىم بەرەتىن (مارقا 6:53—56؛ لۇقا 5:1—3؛ 13:26). ەگەر ونىڭ ايتقان سوزدەرى قىزىقتىرماسا، تىڭداۋشىلارىنىڭ كىدىرمەستەن ٶز جوندەرىنە كەتە بەرۋلەرىنە بولار ەدى. سول زاماندا ٵلى كىتاپتار باسىلمايتىن، سوندىقتان يسانىڭ ايتقاندارىن باعالاي بىلەتىن تىڭداۋشىلار ونىڭ سوزدەرىن وي-سانالارى مەن جۇرەكتەرىنە جازىپ الۋلارى كەرەك بولاتىن. سول سەبەپتى يسانىڭ ىلىمدەرى تىڭداۋشىلارىنىڭ نازارىن باۋراپ الاتىن، انىق ٵرى وڭاي ەستە قالارلىقتاي بولۋعا ٴتيىس ەدى. ٴبىراق بۇنىڭ يسا ٷشىن تۇك تە قيىندىعى بولعان جوق. مىسال رەتىندە تاۋداعى ۋاعىزدى قاراستىرىپ كورەيىك.
10 بىردە، ب. ز. 31-جىلىنىڭ باسىندا، تاڭەرتەڭمەن عاليلەيا كولىنىڭ ماڭىنداعى قىراتتى بەتكەيگە كوپ حالىق جينالدى. ولاردىڭ كەيبىرى 100—110 شاقىرىم قاشىقتىقتا جاتقان ياھۋدەيا مەن يەرۋساليمنەن كەلسە، وزگەلەرى تەرىسكەيدەن، تەڭىز جاعالاۋىنداعى تير مەن سيدون ايماقتارىنان كەلگەن. كوپ ناۋقاس ادام يساعا جاقىنداپ قول تيگىزىپ جاتتى، ول ٴبارىن دە ساۋىقتىردى. ارالارىندا بىردە-ٴبىر اۋرۋ ادام قالماعاندا، يسا حالىققا ٴتالىم بەرە باستادى (لۇقا 6:17—19). كوپ ۇزاماي ول ٴتالىم بەرۋىن اياقتاعاندا، حالىق ەستىگەندەرىنە تاڭ-تاماشا قالدى. نە سەبەپتى؟
11 ٴبىراز جىل وتە، سول ۋاعىزدى تىڭداعان كىسىلەردىڭ ٴبىرى بىلاي دەپ جازدى: «حالىق ونىڭ تالىمىنە قاتتى قايران قالدى. سەبەبى يسا ولارعا... قۇدايدان ەرەكشە بيلىگى بار بىرەۋ رەتىندە تاعىلىم بەردى» (ماتاي 7:28، 29). ولار يسانىڭ بيلىگى بار ادام رەتىندە سويلەيتىنىن سەزدى. ول قۇدايدىڭ اتىنان سويلەگەن جانە ٸلىمىن قۇداي سوزىنە نەگىزدەگەن (جوحان 7:16). يسانىڭ سوزدەرى انىق، اقىل-كەڭەستەرى ارەكەتكە تالپىندىراتىن، ال دالەلدەرى بۇلتارتپايتىن بولعان. ول توقسان اۋىز ٴسوزدىڭ توبىقتاي ٴتۇيىنىن ايتاتىن، ال ايتقاندارى تىڭداۋشىلارىنىڭ جۇرەكتەرىنە جەتەتىن. يسا باقىتتى بولۋدىڭ جولىن كورسەتتى، سونداي-اق دۇعا ەتۋدى، قۇداي پاتشالىعىن ىزدەۋدى جانە قاۋىپسىز بولاشاقتىڭ نەگىزىن قالاۋدى ۇيرەتتى (ماتاي 5:3—7:27). ونىڭ سوزدەرى شىندىق پەن ادىلدىككە سۋساعانداردىڭ جۇرەكتەرىنەن ورىن الدى. مۇنداي ادامدار ‹ٶز ەرىكتەرى بويىنشا ٶمىر سۇرۋلەرىن قويىپ›، ٴبارىن تاستاپ، يساعا ەرۋگە دايار بولدى (ماتاي 16:24؛ لۇقا 5:10، 11). سوزىمەن قۇدىرەتتى بولۋ دەپ وسىنى ايت!
«ىسىمەن... قۇدىرەتتى»
12، 13. قالايشا يسا ‹ىسىمەن قۇدىرەتتى› بولعان جانە قالايشا ونىڭ جاساعان كەرەمەتتەرى سان الۋان ٴتۇرلى بولعان؟
12 يسا «ىسىمەن دە قۇدىرەتتى» بولعان (لۇقا 24:19). ىزگى حابارلاردا ەحوبانىڭ قۇدىرەتىمەن يسانىڭ وتىزدان اسا جەكە-جەكە كەرەمەت جاساعانى ايتىلادى b (لۇقا 5:17). ونىڭ كەرەمەتتەرىنىڭ پايداسىن مىڭداعان ادام كوردى. يسانىڭ ەكى كەرەمەتىنىڭ ٶزىن، 5000 ەر ادامدى، كەيىن 4000 ەر ادامدى تاماقتاندىرعانىن الايىقشى. ايەلدەر مەن بالالاردى قوسقاندا، ول جەردە ودان دا كوپ مىڭ ادام بولعان! (ماتاي 14:13—21؛ 15:32—38).
13 يسانىڭ جاساعان كەرەمەتتەرى سان الۋان ٴتۇرلى بولعان. ول جىن-پەرىلەرگە بيلىك ەتە العان جانە ولاردى ادامنىڭ بويىنان وپ-وڭاي قۋىپ شىعارعان (لۇقا 9:37—43). يسانىڭ فيزيكالىق پروسەستەرگە دە بيلىگى جۇرگەن، مىسالى، ول بىردە سۋدى شاراپقا اينالدىرعان (جوحان 2:1—11). يسانىڭ عاليلەيا كولىنىڭ بەتىمەن ٴجۇرىپ كەلە جاتقانىن كورگەندە، شاكىرتتەرى قالاي تاڭعالعانىن ەلەستەتىپ كورىڭىزشى (جوحان 6:18، 19). ول ٴتان كەمىستىگىن، سوزىلمالى، ٴتىپتى ەمدەلمەيتىن اۋرۋلاردى جازا الاتىن (مارقا 3:1—5؛ جوحان 4:46—54). سونداي-اق مۇنداي ناۋقاستاردى ٴتۇرلى جولدارمەن ساۋىقتىرعان. بىرەۋلەردى قول تيگىزىپ ساۋىقتىرعان بولسا، وزگە بىرەۋلەردى قاسىنا بارماي-اق ساۋىقتىرعان (ماتاي 8:2، 3، 5—13). الدەبىرەۋلەر اۋرۋىنان بىردەن، ال باسقالارى جايمەن ايىققان (مارقا 8:22—25؛ لۇقا 8:43، 44).
ولار كول بەتىمەن ٴجۇرىپ كەلە جاتقان يسانى كوردى
14. ولىمگە دە بيلىگى جۇرەتىنىن يسا قانداي جاعدايلاردا كورسەتتى؟
14 ال، ەڭ كەرەمەتى، يسا ولىمگە دە بيلىك ەتكەن. يسا ولىلەردى تىرىلتكەن ٷش جاعداي جونىندە مالىمەت بار: اكە-شەشەسىنە 12 جاسار قىزىن، جەسىر ايەلگە جالعىز بالاسىن جانە سۇيىكتى ٸنىسىن اپكەلەرىنە قايتارعان (لۇقا 7:11—15؛ 8:49—56؛ جوحان 11:38—44). وعان ەش نارسە كەدەرگى بولماعان. ول ون ەكى جاسار قىزدى قايتىس بولعاننان كەيىن كوپ ۇزاماي تىرىلتكەن. جەسىر ايەلدىڭ ۇلىن، ال ونىڭ سول كۇنى ولگەنى ٴسوزسىز، قابىرگە قويار جولدا تىرىلتكەن. ال ەلازاردى ولگەنىنە ٴتورت كۇن بولىپ، قابىردە جاتقان جەرىنەن تۇرعىزىپ العان.
كۇشتى رياسىز، قىراعىلىق جانە قامقورلىق تانىتىپ قولدانۋ
15، 16. يسانىڭ ٶز كۇشىن رياسىز قولدانعانى نەدەن كورىنەدى؟
15 ەگەر قولىندا بيلىگى بار كەمەلسىز ادامدا يسانىكىندەي كۇش بولسا، ونىڭ قانشالىقتى تەرىس قولدانىلۋى مۇمكىن ەكەنىن ەلەستەتە الاسىڭ با؟ ٴبىراق يسا ەش كۇنا جاساماعان (پەتىردىڭ 1-حاتى 2:22). ول كەمەلسىز ادام بالاسىن قولداعى بيلىگىن وزگەلەرگە زيان كەلتىرۋ ٷشىن قولدانۋعا تالپىندىراتىن وزىمشىلدىك، مانساپقورلىق پەن اشكوزدىككە بوي الدىرماعان.
16 يسا كۇشىن ٶز پايداسىن كوزدەپ ەمەس، ارقاشان رياسىزدىقپەن قولدانعان. بىردە ول اش بولىپ تۇرسا دا، ٶزى ٷشىن تاستى نانعا اينالدىرۋدان باس تارتقان (ماتاي 4:1—4). يسانىڭ دۇنيە-مۇلكى وتە از بولعان، ال بۇدان ونىڭ ٶز كۇشىن بايۋ ٷشىن قولدانباعانى كورىنەدى (ماتاي 8:20). قۇدىرەتتى ىستەرىن رياسىزدىقپەن اتقارعانىنىڭ تاعى ٴبىر دالەلى بار: يسا كەرەمەتتەر جاساعاندا، وزىنە ازدى-كوپتى زالال كەلىپ وتىرعان. مىسالى، ناۋقاس كىسىلەردى ساۋىقتىرعاندا، بويىنان ٴبىراز كۇش شىعاتىن. ول مۇنى ٴتىپتى ٴبىر عانا ادامدى ساۋىقتىرعاننىڭ وزىندە سەزەتىن (مارقا 5:25—34). سوعان قاراماستان يسا بۇكىل حالىقتىڭ وزىنە قول تيگىزۋىنە رۇقسات ەتەتىن، ال ولار ساۋىعىپ كەتىپ جاتاتىن (لۇقا 6:19). نەتكەن رياسىزدىق!
17. يسا كۇشىن قىراعىلىقپەن قولداناتىنىن قالاي كورسەتكەن؟
17 سونىمەن قاتار يسا ٶز كۇشىن قىراعىلىقپەن قولدانعان. ول ەشقاشان قۇدىرەتتى ىستەرىن تەك جۇرتقا كورىنۋ ٷشىن نەمەسە ساحنالىق قويىلىم ىسپەتتى جاساماعان (ماتاي 4:5—7). يسا ەرىككەن يرودقا ەرمەك بولۋ ٷشىن عانا كەرەمەت جاساعىسى كەلمەگەن (لۇقا 23:8، 9). ول كۇشىن جارناما ەتپەگەن، قايتا، ٶزى ساۋىقتىرعان ادامدارعا ەشكىمگە ٴتىس جارماۋدى ەسكەرتەتىن (مارقا 5:43؛ 7:36). يسا ٶزى جايلى جۇرتتىڭ داۋرىقپا اڭگىمەگە ەلىگىپ تۇجىرىم جاساعانىن قالاماعان (ماتاي 12:15—19).
18—20. ا) يسانىڭ كۇشىن قالاي قولدانعانىنا نە اسەر ەتكەن؟ ٵ) يسانىڭ ٴبىر ساڭىراۋ كىسىنى ەمدەگەنى ساعان قالاي اسەر ەتتى؟
18 كۇشى بار بولا تۇرا وزگەلەردىڭ قاجەتتىلىگىن ەسكەرىپ، قايعىسىنا ورتاقتاسپايتىن بيلەۋشىلەرگە قۇدىرەتتى كىسى يسا مۇلدەم ۇقسامايتىن. ول حالىقتىڭ قامىن ويلايتىن. جاپا شەگىپ جۇرگەندەردىڭ تۇرلەرىن كورگەننىڭ ٶزى يسانىڭ كوڭىلىن تولقىتىپ، بويىندا ولاردىڭ قايعىسىن جەڭىلدەتۋگە دەگەن ىقىلاس وياتاتىن (ماتاي 14:14). يسا ولاردىڭ سەزىمدەرى مەن قاجەتتىلىكتەرىنە مۇقيات بولعان؛ ونىڭ جاناشىر قامقورلىعى كۇشىن قالاي قولداناتىنىنا اسەر ەتەتىن. وسىعان قاتىستى مارقا 7:31—37 دە جۇرەككە جىلى تيەتىن مىسال جازىلعان.
19 ٴبىر كۇنى قالىڭ حالىق يسانى تاۋىپ الىپ، اۋرۋ ادامداردى اكەلەدى دە، ول ٴبارىن ايىقتىرادى (ماتاي 15:29، 30). ٴبىراق يسانىڭ نازارى ٴبىر كىسىگە ەرەكشە اۋادى. ول كىسى ساڭىراۋ، ٴتىلىنىڭ دە مۇكىسى بار ەدى. يسا ونىڭ ەرەكشە قوبالجىپ، قىسىلىپ تۇرعانىن سەزسە كەرەك. يسا ونى قامقورلىقپەن ەلدىڭ كوزىنەن تاسا جەرگە اپارادى دا، ىمداپ نە ىستەيتىنىن كورسەتىپ، ‹ەكى ساۋساعىن ونىڭ قۇلاقتارىنا تىعادى. بۇدان كەيىن تۇكىرىپ تاستاپ، قولىن كەمتاردىڭ تىلىنە تيگىزەدى› c (مارقا 7:33). سوسىن، دۇعا ايتىپ تۇرىپ كۇرسىنەدى. بۇل ارەكەتى سول كىسىگە «مەنىڭ ساعان ىستەيتىنىم قۇدايدان كەلگەن كۇشتىڭ ارقاسىندا» دەگەندى بىلدىرگەنى ەدى. اقىرىندا، يسا: «اشىل!»— دەيدى (مارقا 7:34). سودان الگى كىسىنىڭ قۇلاعى اشىلىپ، ٴتىلى دە كۇرمەلمەي سويلەيتىن بولادى.
20 يسانىڭ قۇداي بەرگەن كۇشىن جاپا شەگىپ جۇرگەندەردى ەمدەۋ ٷشىن قولدانعاندا دا، ادامنىڭ سەزىمىن ەسكەرگەنى قالايشا جۇرەككە جىلى تيەدى دەسەڭشى! پاتشالىعىنداعى بيلىكتى ەحوبانىڭ وسىنداي جاناشىر ٵرى قامقور بيلەۋشىگە تاپسىرعانى كوڭىلىمىزگە جۇبانىش بەرەدى ەمەس پە؟
بولاشاقتىڭ نىشانى
21، 22. ا) يسانىڭ كەرەمەتتەرى نەنىڭ نىشانى بولعان؟ ٵ) يسا تابيعي كۇشتەرگە بيلىگىن جۇرگىزە الاتىندىقتان، پاتشا رەتىندە بيلىك ەتكەندە نە بولادى دەپ كۇتە الامىز؟
21 يسانىڭ جەر بەتىندە جاساعان قۇدىرەتتى ىستەرى — بولاشاقتاعى الدەقايدا زور باتالاردىڭ مۇنارتقان ساۋلەسى عانا. قۇدايدىڭ جاڭا دۇنيەسىندە يسا تاعى دا كەرەمەتتەر جاسايتىن بولادى، ٴبىراق ولار وتە كولەمدى بولماق! كوڭىل تولقىتاتىن وسىنداي وزگەرىستەردىڭ كەيبىرىن قاراستىرىپ كورەيىك.
22 يسا جەر ەكولوگياسىن كەرەمەت تەپە-تەڭدىكتە بولاتىنداي ەتىپ قالپىنا كەلتىرەدى. ونىڭ جەلگە تيىم سالىپ، تابيعات كۇشتەرىنە بيلىگىن جۇرگىزە الاتىنىن ەسىڭە ٴتۇسىرشى. ولاي بولسا، يسا پاتشا بولعاندا، ادامزاتتىڭ تايفۋن، جەر سىلكىنىسى، جانارتاۋدىڭ اتقىلاۋى جانە باسقا دا تابيعي اپاتتاردان قورقۋىنا نەگىز بولمايتىنى ٴشۇباسىز. يسا كەزىندە شەبەر جۇمىسشى رەتىندە ەحوبامەن جەر مەن ونداعى تىرشىلىك اتاۋلىنى جاراتۋعا قاتىسقاندىقتان، پلانەتامىزدىڭ قالاي قۇراستىرىلعانىن تولىق تۇسىنەدى. سونداي-اق ونىڭ رەسۋرستارىن قالاي دۇرىس پايدالانۋدى دا بىلەدى. يسا باسشىلىق ەتكەن ۋاقىتتا، بۇكىل جەر بەتى جۇماققا اينالادى (لۇقا 23:43، جد).
23. پاتشا رەتىندە يسا ادامزاتتىڭ قاجەتتىلىكتەرىن قالاي قاناعاتتاندىرادى؟
23 ادامزاتتىڭ قاجەتتىلىكتەرى جونىندە نە دەۋگە بولادى؟ يسانىڭ ازعانتاي عانا اسپەن مىڭداعان ادامدى قالاعانىنشا تويدىرا الاتىندىعى اشتىق بولمايتىنىنا سەنىمدىلىك بەرەدى. جەر بەتىندە استىق مول ٵرى ادىلدىكپەن ۇلەستىرىلەتىن بولادى، اشتىق اتاۋلى ٴتۇپ تامىرىمەن قۇريدى (ٴزابۋر 72:16 [71:16]). يسا قۇدىرەتىنىڭ ارقاسىندا اۋرۋ اتاۋلىنى جويىپ، سونداي-اق زاعيپ، ساڭىراۋ، كەمتار، اقساق جانداردى تولىق ٵرى ماڭگىگە ايىقتىرادى (يشايا 33:24؛ 35:5، 6). ال ولىلەردى تىرىلتە الاتىندىعى اكەسى ەسىنە الۋدى اڭسايتىن ادامداردى يسانىڭ كوكتەگى قۇدىرەتتى پاتشا رەتىندە قايتا تىرىلتەتىنىنە كەپىلدىك بەرەدى (جوحان 5:28، 29).
24. يسانىڭ كۇشى تۋرالى وي جۇگىرتكەندە، نەنى جادىمىزدا ۇستاعانىمىز ٴجون جانە نەگە؟
24 يسانىڭ كۇشى جونىندە وي جۇگىرتە وتىرىپ، ۇلى اكەسىنە كەمەلدى تۇردە ەلىكتەيتىنىن جادىمىزدا ۇستايىق (جوحان 14:9). يسانىڭ كۇشىن قالاي قولدانعانىنان اكەسىنىڭ ٶز كۇشىن قالاي قولداناتىنى انىق كورىنەدى. مىسالى، ٴبىر الاپەس كىسىنى يسانىڭ قانداي جاناشىرلىقپەن ساۋىقتىرعانى تۋرالى ويلاشى. جانى اشىپ، ەلجىرەگەن يسا الگى كىسىگە قولىن تيگىزىپ: «قالايمىن»،— دەيدى (مارقا 1:40—42). ەحوبا وسىنداي تارماقتار ارقىلى، بىلايشا ايتقاندا: «مىنە، مەن كۇشىمدى وسىلاي قولدانامىن!»— دەيدى. كۇشىن وسىنداي سۇيىسپەنشىلىكپەن قولداناتىنى ٷشىن قۇدىرەتتى قۇدايىمىزدى ماداقتاپ، ريزاشىلىعىڭدى بىلدىرگىڭ كەلەدى ەمەس پە؟
a عاليلەيا كولىندە اياق استى داۋىلدىڭ بولۋى ۇيرەنشىكتى قۇبىلىس. تەڭىز دەڭگەيىنەن (شامامەن 200 مەتردەي) تومەن ورنالاسقاندىقتان، اينالاداعى باسقا جەرگە قاراعاندا ونداعى اۋا اناعۇرلىم جىلى، وسىنىڭ سالدارىنان اتموسفەراداعى اۋا تەمپەراتۋراسى وزگەرىپ تۇرادى. سونداي-اق عاليلەيا كولىنىڭ تەرىسكەي جاعىندا ورنالاسقان حەرمون تاۋىنان يوردان وزەنىنىڭ اڭعارىمەن قاتتى جەل سوعادى. مۇلگىگەن تىنىشتىق قاس-قاعىم ساتتە سۇراپىل داۋىلعا اينالىپ كەتۋى مۇمكىن.
b كەيدە ىزگى حابارلاردا كوپ كەرەمەتتى جالپىلاپ ٴبىر جاعداي رەتىندە سۋرەتتەي سالادى. مىسالى، بىردە يساعا «كۇللى قالا حالقى» كەلىپ، ول «تالاي» ناۋقاستاردى ساۋىقتىرعان (مارقا 1:32—34).
c ياھۋديلەر ٷشىن دە، باسقا حالىقتار ٷشىن دە تۇكىرۋ ەمدەۋدىڭ بەلگىسى بولاتىن، سونداي-اق راۆۆيندەردىڭ جازبالارىندا دا ەم ٷشىن سىلەكەيدىڭ قولدانىلاتىنى جازىلعان. ٴبىراق يسا ەمدەگەلى جاتقانىن الگى كىسىگە ٴتۇسىندىرۋ ٷشىن عانا تۇكىرسە كەرەك. قالاي بولعان كۇندە دە، يسا سىلەكەيىن تابيعي ەم رەتىندە قولدانباعان.
