ريمدىكتەرگە 3:1—31
3 ولاي بولسا، ياھۋدي بولۋدىڭ قانداي ارتىقشىلىعى بار؟ سۇندەتتەلۋدىڭ قانداي پايداسى بار؟
2 بارلىق جاعىنان ۇلكەن ارتىقشىلىعى بار. ەڭ باستى ارتىقشىلىعى — ياھۋديلەرگە قۇدايدىڭ قاسيەتتى سوزدەرى سەنىپ تاپسىرىلعان+.
3 سوندا نە، كەيبىرەۋلەر بۇل سوزدەرگە سەنبەسە، سوعان بولا قۇداي سەنىمدى بولۋدان قالا ما؟
4 جوق، مۇلدەم ولاي ەمەس! قايتا، ادامداردىڭ ٴبارى وتىرىكشى بولىپ شىقسا دا+، قۇداي شىنشىل+. كيەلى جازبادا بىلاي دەلىنگەن: «ايتقان سوزدەرىڭنەن ٵدىل ەكەنىڭ كورىنەدى؛ ايىپتالعاندا سەن جەڭىپ شىعاسىڭ»+.
5 الايدا ٴبىزدىڭ ادىلەتسىزدىگىمىز ارقىلى قۇدايدىڭ ادىلدىگى كورىنسە، وندا نە دەمەكپىز؟ بىزگە قاھارىن توككەندە، قۇدايدىڭ ادىلەتسىز بولعانى ما؟ (مۇنى ادامي تۇرعىدان ايتىپ وتىرمىن.)
6 جوق، مۇلدەم ولاي ەمەس! قۇداي ادىلەتسىز بولسا، دۇنيەنى قالاي سوتتاماق+؟
7 ال ەگەر مەنىڭ وتىرىك سويلەگەنىمنەن قۇدايدىڭ شىندىعى ايقىندالا ٴتۇسىپ، ول ماداقتالاتىن بولسا، نەگە مەن كۇناكار رەتىندە ايىپتالۋىم كەرەك؟
8 وندا نەگە «جاماندىق ىستەيىك، سوندا جاقسىلىق بولادى» دەمەسكە؟ كەيبىرەۋلەر بىزگە وسىلاي ايتتى دەپ جالا جاۋىپ ٴجۇر ەكەن عوي. مۇندايلارعا شىعارىلعان ۇكىم ٵدىل+.
9 سونىمەن، ٴبىزدىڭ باسقالاردان ارتىقشىلىعىمىز بار ما؟ ەش ارتىقشىلىعىمىز جوق! جوعارىدا انىقتاپ العانىمىزداي، ياھۋديلەر دە، گرەكتەر دە — ٴبارى كۇنانىڭ بيلىگىندە+.
10 بۇل تۋرالى كيەلى جازبادا بىلاي دەلىنگەن: «بىردە-ٴبىر ٵدىل كىسى جوق+،
11 تۇسىنىگى بار بىردە-ٴبىر ادام جوق. قۇدايدى ىزدەپ جۇرگەن دە ەشكىم جوق.
12 ٴبارى تەرىس جولعا ٴتۇسىپ، ٴبارى دە تۇككە تۇرعىسىز بولىپ كەتتى. جاقسىلىق جاسايتىن ەشكىم جوق، ٴتىپتى بىرەۋى دە جوق+».
13 «كومەيلەرى — اشىق تۇرعان كور، تىلدەرىمەن جالعان سويلەيدى»+. «ايتقان سوزدەرى جىلاننىڭ ۋىنداي»+.
14 «اۋىزدارى قارعىس پەن ىزالى سوزدەرگە تولى»+.
15 «اياقتارى قان توگۋگە اسىعادى»+.
16 «جۇرگەن جەرلەرىن قيراتىپ، قاسىرەتكە باتىرادى،
17 ولار تاتۋلىق جولىن بىلمەيدى+».
18 «كوزدەرىنەن قۇدايدان قورقۋدىڭ نىشانى دا كورىنبەيدى»+.
19 ٴبىز زاڭدا جازىلعانداردىڭ ٴبارى ونى ۇستاناتىندارعا ارنالعانىن بىلەمىز. بۇل ولاردىڭ اۋزى جابىلىپ، بۇكىل دۇنيە قۇدايدىڭ جازاسىنا ۇشىراۋ ٷشىن ىستەلدى+.
20 سوندىقتان زاڭدى ۇستانۋ ارقىلى ەشكىم دە قۇداي الدىندا ٵدىل دەپ جاريالانبايدى+، سەبەبى ٴبىز زاڭ ارقىلى كۇنانىڭ نە ەكەنىن تولىق تۇسىندىك+.
21 ال ەندى، زاڭ مەن پايعامبارلار جازبالارىنان كورىنەتىندەي+، زاڭنىڭ كومەگىنسىز-اق ادامنىڭ قۇداي الدىندا ٵدىل بولا الاتىنى اشىلدى+.
22 ٴيا، سەنۋشىلەردىڭ ٴبارى يسا ماسىحكە دەگەن سەنىمدەرىنىڭ ارقاسىندا قۇداي الدىندا ٵدىل بولا الادى. ويتكەنى ادامدار اراسىندا ەش ايىرماشىلىق جوق+:
23 بارلىعى دا كۇنا جاسادى جانە قۇدايدىڭ ۇلىلىعىنا يە بولۋ مۇمكىندىگىنەن ايىرىلدى+.
24 ٴبىراق قۇدايدىڭ بەرگەن سيى+ مىناۋ — ونىڭ راقىمىنىڭ ارقاسىندا+ ولار يسا ٴماسىح تولەگەن قۇننىڭ+ نەگىزىندە ازات ەتىلىپ، ٵدىل دەپ جاريالانادى.
25 قۇداي ٴماسىحتى تاتۋلاستىراتىن قۇرباندىق رەتىندە بەردى+. ول مۇنى ٴماسىحتىڭ توگىلگەن قانىنا+ سەنەتىندەردى وزىمەن تاتۋلاستىرۋ ٷشىن ىستەدى. وسىلايشا ٶزىنىڭ ادىلدىگىن پاش ەتتى، سەبەبى ول بۇرىنعى ۋاقىتتاردا جاسالعان كۇنالاردى توزىمدىلىكپەن كەشىرىپ وتىردى.
26 سونداي-اق قۇداي مۇنى ٶز ادىلدىگىن+ قازىرگى ۋاقىتتا دا پاش ەتۋ ٷشىن، ياعني يساعا سەنگەن كىسىنى ٵدىل دەپ جاريالاعاندا دا ٵدىل بولىپ قالا بەرۋ ٷشىن ىستەدى+.
27 ەندەشە ماقتانۋىمىزعا سەبەپ بار ما؟ ەش سەبەپ جوق. ماقتانۋعا سەبەپ قالدىرماعان قانداي زاڭ؟ ىستەردى تالاپ ەتەتىن زاڭ با+؟ جوق، سەنىمدى تالاپ ەتەتىن زاڭ.
28 سونىمەن، ٴبىز ادام زاڭ تالاپتارىن ورىنداۋ ارقىلى ەمەس، سەنىمى ارقىلى ٵدىل دەپ جاريالانادى دەپ ەسەپتەيمىز+.
29 جوق الدە قۇداي تەك ياھۋديلەردىڭ قۇدايى ما+؟ باسقا ۇلتتاردىڭ دا قۇدايى ەمەس پە+؟ ٴيا، ول — باسقا ۇلتتاردىڭ دا قۇدايى+.
30 ولاي بولسا، ٴبىر-اق قۇداي بار+، ٵرى ول سۇندەتتەلگەندەردى دە، سۇندەتتەلمەگەندەردى دە سەنىمدەرى ارقىلى ٵدىل دەپ جاريالايدى+.
31 وندا ٴبىز سەنىمىمىزبەن زاڭدى كۇشىنەن ايىرامىز با؟ جوق، مۇلدەم ولاي ەمەس! قايتا، ونىڭ كۇشىن ارتتىرا تۇسەمىز+.
