سامۋيلدىڭ 1-جازباسى 15:1—35
15 بىردە سامۋيل ساۋلعا بىلاي دەدى: «ەحوبا سەنى يسرايلدىڭ پاتشاسى ەتىپ مايلاۋ ٷشىن مەنى جىبەرگەن ەدى+. ەندى ەحوبانىڭ سوزىنە قۇلاق سال+.
2 اسكەرباسى ەحوبا مىنانى ايتادى: —مىسىردان شىعىپ كەلە جاتقان يسرايلگە قارسى شىققانى ٷشىن امالەكتىكتەردى جاۋاپقا تارتامىن+.
3 بار دا، بۇكىل مال-مۇلكىمەن قوسا، ولاردى تۇپتامىرىمەن جويىپ جىبەر+، ەش اياما! ەركەكتەرى مەن ايەلدەرىن، بالالارى مەن ەمشەكتەگى سابيلەرىن دە، ٸرىلى-ۇساقتى مالىن، تۇيەلەرى مەن ەسەكتەرىن دە قۇرتىپ جىبەر+!»
4 سودان ساۋل قول جيناپ، ولاردى تەلايمدە ساناپ شىقتى. يسرايلدىڭ باسقا رۋلارىنان 200000 جاياۋ اسكەر، ال ياھۋدادان 10000 ادام جينالىپتى+.
5 ساۋل امالەكتىڭ قالاسىنا دەيىن بارىپ، سونداعى اڭعاردا تورۋىل قۇردى.
6 ال كەندىكتەرگە+ «يسرايلدىكتەر مىسىردان شىعىپ كەلە جاتقاندا، سەندەر ولارعا اينىماس سۇيىسپەنشىلىك تانىتقان ەدىڭدەر+. سوندىقتان امالەكتىكتەرمەن بىرگە سەندەردى دە قىرىپ تاستاماۋىم ٷشىن ولاردان ٴبولىنىپ، شىعىپ كەتىڭدەر» دەگەن حابار جىبەردى+. سوندا كەندىكتەر امالەكتىكتەردەن ٴبولىنىپ، ارالارىنان كەتىپ قالدى.
7 بۇدان كەيىن ساۋل امالەكتىكتەرگە شابۋىل جاساپ، ولاردى حابيلادان+ مىسىردىڭ ماڭىنداعى شۋرعا+ دەيىن قىردى+.
8 ول امالەك پاتشاسى اگاگتى+ تىرىدەي قولعا ٴتۇسىردى، ال حالقىن ٴبىرىن قالدىرماي سەمسەرمەن ٶلتىردى+.
9 ساۋل مەن ساربازدارى اگاگتى جانە ٸرىلى-ۇساقتى مالدىڭ قوڭدىلارىن، قوشقارلار مەن باسقا دا ٸلىپ الار بار جاقسىنى اياپ، جويمادى+. تەك وزدەرىنە ۇناماعان، تۇككە جارامايتىندارىن جويدى.
10 سوندا ەحوبا سامۋيلگە:
11 «ساۋلدى پاتشا ەتىپ تاعايىنداعانىما وكىنەمىن*، سەبەبى ول مەنەن تەرىس اينالىپ، ايتقان ٴسوزىمدى ورىندامادى»+،— دەدى. بۇلاي بولعانى سامۋيلگە قاتتى اۋىر ٴتيىپ، تۇنىمەن جانى كۇيزەلىپ ەحوباعا دۇعا ەتتى+.
12 كەلەسى كۇنى ول ەرتە تۇرىپ، ساۋلمەن كەزدەسۋ ٷشىن جولعا شىققاندا، وعان «ساۋل كارميلگە+ كەلىپ، ٶزىنىڭ قۇرمەتىنە ەسكەرتكىش ورناتتى+، سوسىن كەرى بۇرىلىپ، عىلعالعا قاراي ٴتۇستى» دەگەن حابار جەتتى.
13 اقىرىندا سامۋيل ساۋلعا كەلگەندە، ول: «ٴسىزدى ەحوبا جارىلقاسىن! مەن ەحوبانىڭ ايتقان ٴسوزىن ورىندادىم»،— دەدى.
14 ٴبىراق سامۋيل: «وندا نەگە مەنىڭ قۇلاعىما قويدىڭ ماڭىراعانى مەن سيىردىڭ موڭىرەگەنى ەستىلىپ تۇر؟+»— دەپ سۇرادى.
15 ساۋل بولسا: «جۇرت بۇلاردى امالەكتىكتەردەن الىپ كەلدى. ولار ۇساق مال مەن ٸرى قارانىڭ ەڭ قوڭدىلارىن اياپ، قۇدايىڭىز ەحوباعا قۇرباندىق شالۋ ٷشىن الىپ قالىپتى. ال قالعاندارىن تۇگەل جويىپ جىبەردىك»،— دەپ جاۋاپ بەردى.
16 سوندا سامۋيل: «جەتەر ەندى! بۇگىن تۇندە ەحوبانىڭ ماعان نە دەگەنىن ايتىپ بەرەيىن+،— دەگەندە، ساۋل: —ايتا بەرىڭىز»،— دەدى.
17 سامۋيل وعان مىنانى ايتتى: «ەحوبا سەنى پاتشا ەتىپ مايلاپ، يسرايل رۋلارىنىڭ باسى ەتكەندە+، سەن ٶزىڭدى كىشى ساناعان جوق پا ەدىڭ+؟
18 كەيىنىرەك ەحوبا ساعان: —بار دا، اناۋ كۇناكار امالەكتىكتەردى جويىپ جىبەر+. ولاردى تۇپتامىرىمەن قۇرتىپ جىبەرگەنشە شايقاس+،— دەپ تاپسىردى.
19 نەگە سەن ەحوبانىڭ سوزىنە قۇلاق اسپاي، اشكوزدىكپەن ولجاعا باس سالىپ+، ەحوباعا ۇنامسىز ٸس جاسادىڭ؟»
20 ساۋل بولسا: «مەن ەحوبانىڭ ايتقانىن ىستەدىم عوي. ەحوبا تاپسىرعان ٸستى ورىنداۋعا شىقتىم دا، امالەكتىكتەردىڭ پاتشاسى اگاگتى وسىندا الىپ كەلدىم، ال حالقىن تۇگەل جويىپ جىبەردىم+.
21 ٴبىراق ساربازدار جويىلۋى ٴتيىس ولجادان قوي مەن ٸرى قارانىڭ ەڭ جاقسىلارىن قۇدايىڭىز ەحوباعا قۇرباندىققا شالۋ ٷشىن عىلعالعا الىپ كەلدى+»،— دەدى.
22 ٴسامۋيلدىڭ جاۋابى مىناۋ بولدى: «ەحوبانى قايسىسى كوبىرەك قۋانتادى، قۇرباندىقتار* ما+، الدە وعان مويىنسۇنۋ ما؟ ەحوبا ٷشىن مويىنسۇنۋ قۇرباندىقتان، ال قۇلاق اسۋ قوشقار مايىنان+ ارتىق+.
23 سەبەبى بۇلىك شىعارۋ+ — بال اشۋ سياقتى كۇنا+، ال مەنمەندىك بولسا تىلسىم كۇشتەرگە جۇگىنۋمەن جانە پۇتقا* تابىنۋمەن تەڭ. سەن ەحوبانىڭ ٴسوزىن ورىنداۋدان باس تارتتىڭ+، سوندىقتان پاتشا بولماۋىڭ ٷشىن ول دا سەنەن باس تارتتى+».
24 ساۋل: «مەن ەحوبانىڭ بۇيرىعىن ورىنداماي، ٴسىزدىڭ دە سوزىڭىزگە قۇلاق اسپاي، كۇنا جاسادىم. حالىقتان قورقىپ، سولاردىڭ ايتقانىن ىستەدىم.
25 ال ەندى كۇنامدى كەشىرىپ، مەنىمەن بىرگە قايتىڭىزشى، ەحوبانىڭ الدىنا بارىپ، ٴمىناجات ەتەيىن»،— دەدى+.
26 بۇعان سامۋيل: «مەن سەنىمەن قايتپايمىن، سەن ەحوبانىڭ ٴسوزىن ورىنداۋدان باس تارتتىڭ، سوندىقتان يسرايلدىڭ پاتشاسى بولماۋىڭ ٷشىن ەحوبا دا سەنەن باس تارتتى»+،— دەدى.
27 سامۋيل كەتپەك بولىپ بۇرىلا بەرگەندە، ساۋل ونىڭ جەڭسىز كويلەگىنىڭ ەتەگىنەن ۇستاي الىپ ەدى، ٴبىراق ۋىسىنان شىعىپ كەتتى.
28 سوندا سامۋيل وعان: «بۇگىن ەحوبا يسرايلدىڭ پاتشالىق بيلىگىن ۋىسىڭنان تارتىپ الدى. ەندى ونى سەنەن الدەقايدا جاقسى ادامعا بەرەدى+.
29 يسرايلدىڭ ۇلى قۇدايى+ ايتقان سوزىندە تۇرادى+، ويىن وزگەرتپەيدى*. ول — ويىن وزگەرتەتىن پەندە ەمەس+»،— دەدى.
30 ساۋل: «مەن كۇنا جاسادىم. ٴبىراق حالقىمنىڭ اقساقالدارى مەن يسرايلدىڭ الدىندا ابىرويىمدى توگە كورمەڭىز. قۇدايىڭىز ەحوباعا ٴمىناجات ەتۋىم ٷشىن مەنىمەن بىرگە قايتىڭىزشى»،— دەدى+.
31 اقىرىندا سامۋيل وعان ەرىپ باردى دا، ساۋل ەحوباعا ٴمىناجات ەتتى.
32 بۇدان كەيىن سامۋيل: «ماعان امالەكتىكتەردىڭ پاتشاسى اگاگتى اكەلىڭدەر!»— دەپ بۇيىردى. اگاگ وعان زاۋىقسىز* جاقىندادى، ويتكەنى ىشتەي: «ەندى باسىما ٶلىم قاتەرى تونە قويماس»،— دەپ ويلادى.
33 ٴبىراق سامۋيل: «سەنىڭ سەمسەرىڭ تالاي انانى بالاسىنان ايىرعان ەدى، ەندى سەنىڭ اناڭ دا بالاسىنان ايىرىلادى»،— دەپ، اگاگتى عىلعالدا ەحوبانىڭ الدىندا شاۋىپ-شاۋىپ ٶلتىردى+.
34 بۇدان كەيىن سامۋيل راماققا بەت الدى، ال ساۋل گيبەياداعى ۇيىنە قاراي ورلەدى.
35 سامۋيل ومىردەن وتكەنشە ساۋلمەن قايتىپ كەزدەسپەدى، ٴبىراق ونى ويلاپ قايعىرىپ ٴجۇردى+. ەحوبا بولسا ساۋلدى يسرايلدىڭ پاتشاسى ەتكەنىنە وكىندى+.
سىلتەمەلەر
^ نەمەسە «قامىعۋدامىن».
^ نەمەسە «تۇگەل ورتەلەتىن جانە باسقا دا قۇرباندىقتار».
^ سوزبە-ٴسوز «تەرافيم مۇسىندەرى»، ياعني وتباسى تاڭىرلەرى نە پۇتتارى.
^ نەمەسە «وكىنبەيدى».
^ مۇمكىن: «سەنىمدىلىكپەن».
