لۇقا 4:1—44
4 كيەلى رۋحقا كەنەلگەن يسا يوردان وڭىرىنەن كەتكەن سوڭ، رۋح ونى ٴشول دالاعا جەتەلەپ اپاردى+.
2 ول سول جەردە 40 كۇن بولىپ، سوسىن ونى ٸبىلىس سىنادى+. يسا سول كۇندەرى ٴنار تارتپادى، وسى مەرزىم اياقتالعاندا، قارنى اشتى.
3 سوندا ٸبىلىس وعان: «ەگەر قۇدايدىڭ ۇلى بولساڭ، مىنا تاس نانعا اينالسىن دەپ بۇيىر»،— دەدى.
4 يسا وعان: «كيەلى جازبادا «ادام تەك نانمەن ٶمىر سۇرمەۋ كەرەك» دەلىنگەن عوي»+،— دەپ جاۋاپ بەردى.
5 ٸبىلىس ونى ٴبىر تاۋعا اپاردى دا، ٵپ-ساتتە جەرجۇزىنىڭ بارلىق پاتشالىقتارىن كورسەتىپ+،
6 بىلاي دەدى: «وسىلاردىڭ بۇكىل بيلىگى مەن ٴسان-سالتاناتىن ساعان بەرەمىن، ويتكەنى ول ماعان بەرىلگەن+. ونى كىمگە بەرگىم كەلسە، سوعان بەرەمىن.
7 سوندىقتان ماعان ٴبىر رەت تابىنساڭ، ٴبارى سەنىكى بولادى».
8 يسا وعان: «كيەلى جازبادا «ەحوبا قۇدايىڭا عيبادات ەتىپ، تەك سوعان عانا قىزمەت* ەت!» دەپ جازىلعان عوي»+،— دەپ جاۋاپ بەردى.
9 سوسىن ٸبىلىس ونى يەرۋساليمگە اپاردى دا، عيباداتحانانىڭ توبەسىنە شىعارىپ: «ەگەر قۇدايدىڭ ۇلى بولساڭ، تومەن قاراي سەكىر+،
10 ويتكەنى كيەلى جازبادا «ول پەرىشتەلەرىنە سەنى قورعاۋعا بۇيرىق بەرەدى،
11 اياعىڭدى تاسقا سوعىپ الماۋىڭ ٷشىن، ولار سەنى قولدارىنا الىپ جۇرەدى» دەپ جازىلعان عوي+»،— دەدى.
12 بۇعان يسا: «ەحوبا قۇدايىڭدى سىناۋشى بولما!» دەپ تە ايتىلعان عوي»+،— دەگەن جاۋاپ قايىردى.
13 ٸبىلىس بارلىق سىناعىن بىتىرگەن سوڭ، باسقا ٴبىر قولايلى ۋاقىتتى كۇتپەك بولىپ، ونىڭ قاسىنان كەتىپ قالدى+.
14 كيەلى رۋحتىڭ قۇدىرەتىنە كەنەلگەن يسا عاليلەياعا قايتىپ كەلدى+. ول تۋرالى جاقسى سوزدەر بۇكىل توڭىرەككە تاراپ كەتتى.
15 يسا ٴماجىلىسحانالاردا* ٴتالىم بەرە باستادى، ال بارشا جۇرت ونى ماقتاپ جاتتى.
16 كەيىن ول ٶزى وسكەن نازارەت قالاسىنا كەلىپ+، ادەتىنشە دەمالىس كۇنى* ٴماجىلىسحاناعا باردى+. يسا جازبالاردان وقىپ بەرۋ ٷشىن ورنىنان تۇرعاندا،
17 وعان يشايا پايعامباردىڭ شيىرشىعى بەرىلدى. يسا ونى اشىپ، مىنا جەرىن تاۋىپ، وقي باستادى:
18 «ەحوبا ماعان رۋحىن قوندىردى، ويتكەنى ول مەنى كەدەيلەرگە ىزگى حاباردى جاريالاۋعا تاعايىندادى. ول مەنى تۇتقىندارعا بوستاندىق الاتىنىن، زاعيپتارعا كوزدەرى اشىلاتىنىن جاريا ەتۋگە جىبەردى. سونداي-اق قىسىم كورگەندەردى ازات ەتۋگە+،
19 ەحوبانىڭ ىقىلاسىنا يە بولاتىن ۋاقىت تۋرالى جاريالاۋعا جىبەردى+».
20 سوسىن شيىرشىقتى قايتا وراپ، قىزمەتشىگە قايتارىپ بەردى دە، ورنىنا وتىردى. ٴماجىلىسحاناداعىلاردىڭ ٴبارى وعان كوز الماي قاراپ وتىردى.
21 سوندا ول: «بۇگىن وزدەرىڭىز ەستىگەن وسى سوزدەر ورىندالدى»+،— دەدى.
22 ٴبارى ونى ماقتاپ، اۋزىنان شىققان ۇنامدى سوزدەرىنە+ تاڭعالىپ: «مىناۋ ٴجۇسىپتىڭ بالاسى ەمەس پە؟»— دەستى+.
23 يسا ولارعا بىلاي دەدى: «ارينە، سىزدەر ماعان «دارىگەر بولساڭ، ٶزىڭدى ەمدە» دەگەن ماتەلدى كەلتىرىپ: —قاپارناۋمدا+ ىستەگەندەرىڭ تۋرالى ەستىدىك. مىنا تۋعان جەرىڭدە دە سونى ىستە!— دەرسىزدەر».
24 بۇدان كەيىن ول بىلاي دەدى: «سىزدەرگە شىندىعىن ايتامىن، ەشبىر پايعامبار ٶز ەلىندە قابىلدانبايدى+.
25 مىسالى، ٸلياس پايعامباردىڭ تۇسىندا ٷش جىل التى اي بويى جاڭبىر جاۋماي، بۇكىل ەلدى اشارشىلىق جايلاعاندا+، يسرايل ەلىندە جەسىر ايەلدەر كوپ ەدى.
26 ٴبىراق قۇداي ٸلياستى ولاردىڭ ەشقايسىسىنا جىبەرمەي، سيدون ەلىندەگى سارەپتا قالاسىنداعى جەسىر ايەلگە جىبەردى+.
27 سونداي-اق ەلىشە پايعامباردىڭ تۇسىندا يسرايل ەلىندە الاپەسپەن اۋىرعاندار كوپ ەدى. ٴبىراق سيريالىق ناعىماننان باسقا ەشكىم دە اۋرۋىنان تازارتىلعان جوق+».
28 مۇنى ەستىگەندە، ٴماجىلىسحاناداعىلاردىڭ ٴبارى اشۋعا بۋلىقتى+.
29 ولار ورىندارىنان تۇرىپ، ونى لەزدە قالادان الىپ شىقتى دا، قالا تۇرعان تاۋدىڭ تىك جارىنا اكەلىپ، قۇلاتىپ جىبەرمەك بولدى.
30 ٴبىراق يسا ارالارىنان سىتىلىپ شىعىپ، كەتىپ قالدى+.
31 سودان ول ىلديلاپ، عاليلەياداعى قاپارناۋم قالاسىنا ٴتۇستى. سول جەردە دەمالىس كۇنى حالىققا ٴتالىم بەردى+.
32 جۇرت ونىڭ قالاي ٴتالىم بەرەتىنىنە قايران قالدى+، ويتكەنى ول بيلىگى بار ادامداي سويلەدى.
33 ٴماجىلىسحانادا بويىن جىن بيلەگەن ٴبىر كىسى بار ەدى. ول قاتتى داۋىستاپ+:
34 «ەي، نازارەتتىك يسا+، بىزدە نەڭ بار؟ ٴبىزدى قۇرتۋعا كەلدىڭ بە؟ مەن سەنىڭ كىم ەكەنىڭدى جاقسى بىلەمىن: سەن قۇدايدىڭ كيەلىسىسىڭ+!»— دەدى.
35 ٴبىراق يسا: «ٷنىڭدى ٶشىر، شىق ونىڭ بويىنان!»— دەپ تىيىپ تاستادى. جىن الگى كىسىنى حالىقتىڭ كوز الدىندا قۇلاتىپ تاستادى دا، ەش زاقىم كەلتىرمەي ودان شىعىپ كەتتى.
36 بۇعان بارلىعى تاڭىرقاپ، ٶزارا: «بۇل نە دەگەن سوزدەر؟! ول جىندارعا بيلىكپەن جانە قۇدىرەتپەن بۇيىرىپ، ال ولار شىعىپ كەتىپ جاتىر!»— دەستى.
37 يسا تۋرالى حابار سول توڭىرەكتىڭ بارىنە تاراپ جاتتى.
38 ٴماجىلىسحانادان شىققان سوڭ، ول شيموننىڭ ۇيىنە باردى. شيموننىڭ قايىن ەنەسى ىستىعى قاتتى كوتەرىلىپ، اۋىرىپ جاتىر ەكەن. سوندىقتان ولار يسادان كومەكتەسۋىن سۇرادى+.
39 يسا ايەلدىڭ جانىنا كەلدى دە، ونىڭ ىستىعىن باسىپ، ساۋىقتىرىپ جىبەردى. سول زاماتتا ايەل ورنىنان تۇرىپ، ولارعا اس ازىرلەي باستادى.
40 كۇن باتا جۇرت ٵرتۇرلى دەرتكە شالدىققان ادامدارىن اكەلدى. يسا ولاردىڭ ٴارقايسىسىنىڭ ۇستىنە قولىن قويىپ، ساۋىقتىردى+.
41 سونداي-اق كوپ ادامنىڭ بويىنان جىندار: «سەن قۇدايدىڭ ۇلىسىڭ!»— دەپ ايعايلاپ شىعىپ جاتتى+. ٴبىراق يسا ولارعا سويلەۋگە تيىم سالدى+، ويتكەنى جىندار ونىڭ ٴماسىح ەكەنىن بىلەتىن+.
42 تاڭ اتقاندا يسا ول جەردەن شىعىپ، وڭاشا ٴبىر جەرگە باردى+. ٴبىراق حالىق ونى ىزدەي باستادى، تاۋىپ العان سوڭ، وزدەرىن تاستاپ كەتپەۋىن ٶتىندى.
43 ال يسا ولارعا: «قۇداي پاتشالىعى تۋرالى ىزگى حاباردى باسقا قالالاردا دا جاريالاۋىم كەرەك. ويتكەنى مەن سول ٷشىن جىبەرىلدىم»،— دەدى+.
44 سودان ول ياھۋدەيانىڭ ٴماجىلىسحانالارىندا ۋاعىز ايتىپ ٴجۇردى.
سىلتەمەلەر
^ سوزبە-ٴسوز «قاسيەتتى قىزمەت».
^ تۇسىندىرمەنى قاراڭىز.
^ تۇسىندىرمەنى قاراڭىز.
