ماتاي 13:1—58
-
پاتشالىق تۋرالى مىسالدار (1—52)
-
ديقان (1—9)
-
يسانىڭ مىسالداردى قولدانۋ سەبەبى (10—17)
-
ديقان تۋرالى مىسالدىڭ ماعىناسى (18—23)
-
بيداي مەن ٵرامشوپ (24—30)
-
قىشا ٴدانى مەن اشىتقى (31—33)
-
مىسالدار قولدانۋ ارقىلى پايعامبارلىقتى ورىنداۋ (34، 35)
-
بيداي مەن ٵرامشوپ تۋرالى مىسالدىڭ ماعىناسى (36—43)
-
جاسىرىلعان قازىنا جانە اسىل مارجان (44—46)
-
اۋ (47—50)
-
جاڭا جانە ەسكى قازىنا (51، 52)
-
-
يسانى ٶز ەلىنىڭ قابىلداماۋى (53—58)
13 سول كۇنى يسا ۇيدەن شىعىپ، تەڭىز جاعاسىنا بارىپ وتىردى.
2 قاسىنا قالىڭ جۇرت جينالعاندىقتان، ول قايىققا ٴمىندى، ال بارشا حالىق جاعادا تۇردى+.
3 سوندا ول مىسالدارمەن كوپ ٴتالىم بەرىپ+، بىلاي دەدى: «ٴبىر ديقان تۇقىم سەبۋگە شىعىپتى+.
4 ول سەۋىپ جۇرگەندە، تۇقىمنىڭ كەيبىرى جول بويىنا تۇسەدى دە، قۇستار كەلىپ، شوقىپ جەپ كەتەدى+.
5 باسقا بىرەۋلەرى توپىراعى از تاستاق جەرگە* تۇسەدى. توپىراق جۇقا بولعاندىقتان، ولار تەز ٶنىپ شىعادى+.
6 ٴبىراق تامىر جايماعاندىقتان، كۇن شىققاندا كۇيىپ، قۋراپ قالادى.
7 تاعى بىرەۋلەرى تىكەن اراسىنا تۇسەدى دە، تىكەن ٶسىپ، ولاردى تۇنشىقتىرىپ تاستايدى+.
8 ال وزگە تۇقىمدار جاقسى توپىراققا ٴتۇسىپ، ٴبىرى ٴجۇز، ٴبىرى الپىس، تاعى ٴبىرى وتىز ەسەدەن ٶنىم بەرە باستايدى+.
9 قۇلاعى بارلار تىڭداپ السىن+!»
10 سوندا شاكىرتتەرى كەلىپ: «نەگە ولارعا مىسالدارمەن سويلەيسىز+؟»— دەپ سۇرادى.
11 يسا بىلاي دەپ جاۋاپ بەردى: «كوك پاتشالىعىنىڭ قاسيەتتى قۇپيالارىن+ ٴتۇسىنۋ ولارعا ەمەس، سەندەرگە بەرىلگەن.
12 ويتكەنى كىمدە بار بولسا، وعان تاعى دا بەرىلىپ، سول ادامدا مولىنان بولادى. ال كىمدە جوق بولسا، وزىندە بارى دا الىنىپ قويىلادى+.
13 مىنە، سوندىقتان مەن ولارعا مىسالدارمەن سويلەيمىن، سەبەبى ولار قاراسا دا، كورمەيدى، ەستىسە دە، تىڭدامايدى، ٵرى ٴمانىن ۇقپايدى+.
14 وسىلايشا يشايا پايعامباردىڭ مىنا سوزدەرى سولارعا قاتىستى ورىندالىپ جاتىر: «ەستيسىڭدەر، ٴبىراق ٴمانىن ۇقپايسىڭدار، قارايسىڭدار، ٴبىراق كورمەيسىڭدەر+:
15 مىنا حالىقتىڭ جۇرەگى سەزىمسىز بولىپ قالعان؛ قۇلاقتارىمەن ەستىسە دە، جاۋاپ بەرمەيدى؛ ولار كوزدەرىن جۇمىپ العان. سەبەبى كوزدەرىمەن كورگىلەرى، قۇلاقتارىمەن ەستىگىلەرى، جۇرەكتەرىمەن ٴمانىن ۇققىلارى جانە تەرىس جولدان قايتقىلارى كەلمەيدى. مەن دە ولاردى ساۋىقتىرمايمىن+».
16 ال سەندەر باقىتتىسىڭدار، سەبەبى كوزدەرىڭ كورىپ، قۇلاقتارىڭ ەستيدى+.
17 سەندەرگە شىندىعىن ايتامىن، كوپتەگەن پايعامبارلار مەن ٵدىل ادامدار سەندەر كورىپ جاتقانداردى كورگىسى كەلگەن، ٴبىراق كورگەن جوق+. سەندەر ەستىپ جاتقانداردى ەستىگىسى كەلگەن، ٴبىراق ەستىگەن جوق.
18 ەندى ديقان تۋرالى مىسالدىڭ ماعىناسىن تىڭداڭدار+:
19 پاتشالىق تۋرالى ٴسوزدى ەستىپ، ٴبىراق ٴمانىن ۇقپاعان اركىمگە زۇلىم*+ كەلىپ، جۇرەگىنە سەبىلگەندى ۇرلاپ اكەتەدى. بۇل — جول بويىنا تۇسكەن تۇقىم+.
20 ال تاستاق جەرگە تۇسكەن تۇقىم — ٴسوزدى ەستىپ، سول زاماتتا قۋانا قابىلداعان ادام+.
21 ٴبىراق تامىر جايماعاندىقتان ۇزاققا بارمايدى. پاتشالىق تۋرالى ٴسوز ٷشىن قيىندىق پەن قۋعىنعا كەزىككەندە، بىردەن وعان سەنۋدەن قالادى.
22 ال تىكەن اراسىنا تۇسكەن تۇقىم مىناداي ادامدى بىلدىرەدى: ول ٴسوزدى ەستيدى، ٴبىراق وسى زاماننىڭ ۋايىم-قايعىسى+ جانە الدامشى بايلىق* بويىنداعى ٴسوزدى تۇنشىقتىرىپ، ٶنىمسىز ەتەدى+.
23 جاقسى توپىراققا تۇسكەن تۇقىم بولسا ٴسوزدى ەستىپ، ٴمانىن ۇعىپ، ٶنىم بەرەتىندەردى بىلدىرەدى. ولاردىڭ ٴبىرى ٴجۇز، كەلەسى ٴبىرى الپىس، تاعى ٴبىرى وتىز ەسەدەن ٶنىم بەرەدى+».
24 ول جۇرتقا تاعى ٴبىر مىسال ايتىپ بەردى: «كوك پاتشالىعى ەگىندىگىنە جاقسى تۇقىم سەپكەن ادامعا ۇقسايدى.
25 جۇرت ۇيىقتاپ جاتقاندا، دۇشپانى كەلىپ، بيداي اراسىنا ٵرامشوپ* سەۋىپ كەتەدى.
26 بيداي ٶسىپ، ٴدان بايلاعاندا، ٵرامشوپ تە كورىنەدى.
27 سوندا ەگىن يەسىنە قۇلدارى كەلىپ: —مىرزا، ەگىندىگىڭىزگە جاقسى تۇقىم سەپكەن ەدىڭىز عوي، ٵرامشوپ قايدان شىقتى؟— دەيدى.
28 ول: —مۇنى دۇشپانىم ىستەدى+،— دەپ جاۋاپ بەرەدى. سوندا ولار: —ەندەشە، بارىپ، وتاپ تاستاعانىمىزدى قالايسىز با؟— دەپ سۇرايدى.
29 ول بىلاي دەيدى: —جوق، ٵرامشوپتى وتايمىز دەپ، بيدايدى دا جۇلىپ تاستارسىڭدار.
30 وراق سالعانشا بىرگە وسە بەرسىن. ال وراق كەزىندە ەگىن جيناۋشىلارعا: «الدىمەن، ٵرامشوپتى جيناپ، ورتەۋ ٷشىن باۋلاڭدار، سودان كەيىن بيدايدى جيناپ، قامباعا قۇيىڭدار+»،— دەيمىن».
31 يسا تاعى ٴبىر مىسال كەلتىرىپ، بىلاي دەدى: «كوك پاتشالىعى ٴبىر كىسى ەگىندىگىنە ەككەن قىشا دانىنە ۇقسايدى+.
32 ول تۇقىم اتاۋلىنىڭ ەڭ كىشكەنتايى بولسا دا، وسكەندە، باسقا داقىلداردىڭ بارىنەن ۇلكەن بولىپ، اعاش ىسپەتتى بولادى. سوندا اسپان قۇستارى كەلىپ، بۇتالارىن پانالايدى».
33 يسا تاعى دا مىسال كەلتىرىپ: «كوك پاتشالىعى اشىتقىعا ۇقسايدى. ايەل اشىتقىنى ٷش تەگەش* ۇنعا قوسىپ ارالاستىرعاندا، ول بۇكىل قامىردى اشىتادى+»،— دەدى.
34 مۇنىڭ ٴبارىن يسا جۇرتقا مىسالمەن ايتتى. ولارعا مىسالسىز ەشتەڭە دە ايتپادى+.
35 وسىلاي كەلەسى پايعامبارلىق ورىندالدى: «مىسالدار كەلتىرە وتىرىپ، اۋزىمدى اشامىن. بايىرعىدان* جاسىرىن بولىپ كەلگەن نارسەلەردى جاريالايمىن»+.
36 حالىقتى تاراتقان سوڭ، ول ۇيگە كىردى. سوندا شاكىرتتەرى قاسىنا كەلىپ: «ەگىندىكتەگى ٵرامشوپ تۋرالى مىسالدى ٴتۇسىندىرىپ بەرىڭىزشى»،— دەدى.
37 يسا مىنانى ايتتى: «جاقسى تۇقىمدى سەپكەن ديقان — ادام ۇلى.
38 ەگىندىك — وسى دۇنيە+، ال جاقسى تۇقىم — پاتشالىقتىڭ ۇلدارى، ٵرامشوپ بولسا زۇلىمنىڭ ۇلدارى+،
39 ونى سەپكەن دۇشپان — ٸبىلىس. ال وراق كەزى — وسى زاماننىڭ* اقىرى، ەگىن جيناۋشىلار بولسا پەرىشتەلەر.
40 ٵرامشوپتى جيناپ، ورتەپ جىبەرەتىنىندەي، وسى زاماننىڭ اقىرىندا دا تاپ سولاي بولادى+.
41 ادام ۇلى ٶز پەرىشتەلەرىن جىبەرەدى. ولار ونىڭ پاتشالىعىنان وزگەلەردىڭ كۇنا جاساۋىنا سەبەپكەر بولاتىنداردىڭ* ٴبارىن، سونداي-اق زاڭسىزدىق جاسايتىنداردى جيناپ الىپ،
42 جانىپ تۇرعان پەشكە تاستايدى+. سول جەردە ولار زار ەڭىرەپ، قينالا تىستەنەتىن بولادى.
43 ال ادىلدەر سول كەزدە اكەلەرىنىڭ پاتشالىعىندا كۇندەي جارقىرايدى+. قۇلاعى بارلار تىڭداپ السىن!
44 كوك پاتشالىعى تاناپتا جاسىرىلعان قازىناعا ۇقسايدى. ونى تاۋىپ العان ادام قازىنانى قايتا جاسىرىپ قويىپ، قۋانعانىنان وزىندە باردىڭ ٴبارىن ساتىپ، سول جەردى ساتىپ الادى+.
45 سونداي-اق كوك پاتشالىعى اسىل مەرۋەرت ىزدەپ جۇرگەن جيھانكەز ساۋداگەرگە ۇقسايدى.
46 اسا قۇندى بىرەۋىن تاپقاندا، ول دەرەۋ وزىندە باردىڭ ٴبارىن ساتىپ، سول مەرۋەرتتى ساتىپ الادى+.
47 كوك پاتشالىعى تەڭىزگە تاستالعان اۋعا دا ۇقسايدى. وعان ٵرتۇرلى بالىق تۇسەدى.
48 اۋ تولعاندا، بالىقشىلار ونى جاعاعا شىعارادى دا، وتىرا قالىپ، جاقسى بالىقتى+ ىدىسقا جيناپ، ال جارامسىزدارىن+ لاقتىرىپ تاستايدى.
49 وسى زاماننىڭ اقىرىندا دا تاپ سولاي بولادى: پەرىشتەلەر كەلىپ، زۇلىمداردى ادىلدەردەن اجىراتادى دا،
50 زۇلىمداردى جانىپ تۇرعان پەشكە تاستايدى. سول جەردە ولار زار ەڭىرەپ، قينالا تىستەنەتىن بولادى».
51 سوسىن ول: «وسىنىڭ ٴبارىنىڭ ٴمانىن تۇسىندىڭدەر مە؟»— دەپ سۇراعاندا، ولار: «ٴيا»،— دەپ جاۋاپ بەردى.
52 يسا: «ولاي بولسا، كوك پاتشالىعى تۋرالى ٴبىلىم الىپ، سول جايلى ۇيرەتەتىن ٵربىر تالىمگەر قازىناسىنان جاڭا جانە ەسكى نارسەلەردى الىپ شىعاتىن ٷي يەسىنە ۇقسايدى»،— دەدى.
53 وسى مىسالداردى ايتىپ بولعان سوڭ، يسا سول جەردەن كەتىپ قالدى.
54 ول وسكەن جەرىنە كەلىپ+، ٴماجىلىسحانادا ٴتالىم بەرە باستادى. سوندا ولار تاڭدانىپ، بىلاي دەستى: «وعان بۇنداي دانالىق پەن قۇدىرەتتى ىستەر جاسايتىن قابىلەت قايدان بىتكەن+؟
55 ول اعاش ۇستاسىنىڭ ۇلى ەمەس پە+؟ اناسىنىڭ اتى ٴماريام، ال باۋىرلارى جاقىپ، ٴجۇسىپ، شيمون مەن ياھۋدا عوي+؟
56 قارىنداستارى دا ارامىزدا تۇرادى ەمەس پە؟ وندا مۇنىڭ ٴبارى وعان قايدان بىتكەن+؟»
57 وسىلايشا وعان سەنگىسى كەلمەدى+. ٴبىراق يسا ولارعا: «پايعامباردى وزگە جەردە قادىرلەسە دە، ٶز ەل-جۇرتى مەن ٷي ٸشى قادىرلەمەس»+،— دەدى.
58 ولاردىڭ سەنىمى جوق بولعاندىقتان سول جەردە كوپ قۇدىرەتتى ىستەر جاسامادى.
سىلتەمەلەر
^ مۇندا سول ولكەدە كەزدەسەتىن بەتىندە جۇقا توپىراعى بار جالپاق جارتاس جونىندە ايتىلىپ تۇر.
^ ياعني شايتان.
^ سوزبە-ٴسوز: «بايلىقتىڭ ارباۋشى كۇشى».
^ بۇل جەردە بيدايعا ۇقساس ۋلى وسىمدىكتىڭ ٴبىر ٴتۇرى ايتىلىپ تۇر.
^ شامامەن 10 كيلوگرام.
^ مۇمكىن: «دۇنيەنىڭ نەگىزى قالانعاننان».
^ تۇسىندىرمەنى قاراڭىز.
^ سوزبە-ٴسوز «سۇرىندىرەتىن نارسەلەردىڭ».
