ماتاي 26:1—75
-
ٴدىني قىزمەتكەرلەردىڭ يسانى ٶلتىرۋدىڭ جولىن ىزدەۋى (1—5)
-
يسانىڭ باسىنا ٴيىسماي قۇيۋ (6—13)
-
سوڭعى قۇتقارىلۋ مەيرامى جانە وپاسىزدىق (14—25)
-
يەمىزدىڭ كەشكى اسىن ەنگىزۋ (26—30)
-
پەتىردىڭ يسادان تاناتىنى تۋرالى الدىن الا ايتۋ (31—35)
-
يسانىڭ گەتسيمانيدە دۇعا ەتۋى (36—46)
-
يسانىڭ تۇتقىندالۋى (47—56)
-
يسانىڭ جوعارعى كەڭەس الدىندا سوتتالۋى (57—68)
-
پەتىردىڭ يسادان تانۋى (69—75)
26 يسا وسىنىڭ ٴبارىن ايتىپ بولعان سوڭ، شاكىرتتەرىنە:
2 «ەكى كۇننەن كەيىن قۇتقارىلۋ مەيرامى* بولاتىنىن بىلەسىڭدەر+. سوندا ادام ۇلى باعاناعا ٸلىنىپ ٶلتىرىلۋ ٷشىن ۇستاپ بەرىلەدى+»،— دەدى.
3 سول كەزدە جوعارعى ٴدىني قىزمەتكەرلەر مەن ەل اقساقالدارى قاياپا+ دەگەن باس ٴدىني قىزمەتكەردىڭ ىشكى اۋلاسىنا جينالىپ،
4 كەڭەس قۇردى+. ولار يسانى ايلامەن ۇستاپ الىپ، ٶلتىرۋدىڭ جولىن ىزدەستىردى.
5 الايدا: «مۇنى مەيرامدا ىستەمەيىك، ايتپەسە حالىق كوتەرىلىپ كەتەر»،— دەستى.
6 بەتانيادا بولعانىندا يسا بۇرىن الاپەسپەن اۋىرعان شيموننىڭ ۇيىندە+
7 داستارقان باسىندا جانتايىپ جاتتى. سوندا وتە قىمبات ٴيىسمايعا تولى تاس قۇتى* ۇستاعان ٴبىر ايەل كەلىپ، ونى يسانىڭ باسىنا قۇيا باستادى.
8 بۇنى كورگەن شاكىرتتەرى نارازىلىق ٴبىلدىرىپ: «مۇنداي ىسىراپتىڭ قاجەتى نە؟
9 ونى قىمبات باعاعا ساتىپ، تۇسكەن اقشانى كەدەيلەرگە ۇلەستىرۋگە بولار ەدى عوي!»— دەستى.
10 ولاردىڭ نە جايلى سويلەسىپ جاتقانىن بىلگەن يسا بىلاي دەدى: «بۇل ايەلدى نەگە مازالايسىڭدار؟ ول ماعان جاقسىلىق جاسادى.
11 كەدەيلەر ارقاشان قاستارىڭدا عوي+، ال مەن ارقاشان قاستارىڭدا بولمايمىن+.
12 ٴيىسمايدى دەنەمە قۇيۋىمەن ول مەنى جەرلەۋگە دايىندادى+.
13 سەندەرگە شىندىعىن ايتامىن، ىزگى حابار دۇنيەنىڭ قاي جەرىندە ۋاعىزدالماسىن، بۇل ايەل دە ەسكە الىنىپ، وسى ىستەگەنى جايلى ايتىلاتىن بولادى+».
14 وسىدان كەيىن ياھۋدا يسقاريوت+ ەسىمدى 12 ەلشىنىڭ ٴبىرى جوعارعى ٴدىني قىزمەتكەرلەرگە بارىپ+:
15 «ونى قولدارىڭىزعا تۇسىرسەم، ماعان نە بەرەسىزدەر+؟»— دەپ سۇرادى. ولار 30 كۇمىس اقشا بەرۋدى ۋادە ەتتى+.
16 وسى كەزدەن باستاپ ول يسانى ۇستاپ بەرۋدىڭ قولايلى ٴساتىن ىزدەدى.
17 اشىماعان نان مەيرامىنىڭ*+ ٴبىرىنشى كۇنى شاكىرتتەرى يساعا كەلىپ: «قۇتقارىلۋ مەيرامىنىڭ اسىن قايدا دايىنداعانىمىزدى قالايسىز؟»— دەپ سۇرادى+.
18 ول مىنانى تاپسىردى: «قالاداعى پالەنشەگە بارىپ، بىلاي دەڭدەر: —بەلگىلەنگەن ۋاقىتىم جاقىن. قۇتقارىلۋ مەيرامىن شاكىرتتەرىممەن بىرگە سەنىڭ ۇيىڭدە تويلايمىن دەپ، ۇستازىمىز سالەم ايتتى».
19 شاكىرتتەرى يسا تاپسىرعانداي ىستەپ، مەيرامعا قاجەتتىنىڭ ٴبارىن دايارلادى.
20 كەش تۇسكەندە+ يسا 12 شاكىرتىمەن داستارقان باسىنا جانتايدى+.
21 تاماقتانىپ جاتقاندا، ول: «سەندەرگە شىندىعىن ايتامىن، ارالارىڭداعى بىرەۋ ماعان وپاسىزدىق جاسايدى+»،— دەدى.
22 بۇعان ولاردىڭ قاتتى ەڭسەلەرى ٴتۇسىپ، بىرىنەن سوڭ ٴبىرى: «يەم، سول ادام مەن ەمەسپىن عوي؟»— دەپ سۇراي باستادى.
23 ول بىلاي دەپ جاۋاپ بەردى: «مەنىمەن بىرگە تاباققا نان باتىرىپ جاتقان بىرەۋىڭ ماعان وپاسىزدىق جاسايسىڭ+.
24 راس، ادام ۇلى ٶزى تۋرالى جازىلعانعا ساي كەتىپ بارا جاتىر. ٴبىراق ادام ۇلىنا وپاسىزدىق جاساعان كىسى قاسىرەتكە+ قالادى+! بۇدان گورى ونىڭ دۇنيەگە كەلمەگەنى جاقسى ەدى+!»
25 سوندا وعان وپاسىزدىق جاساعالى جۇرگەن ياھۋدا: «ۇستاز*، سول ادام مەن ەمەسپىن عوي؟»— دەگەندە، يسا: «مۇنى ٶزىڭ ايتىپ تۇرسىڭ»،— دەدى.
26 ولار تاماقتانىپ جاتقاندا، يسا قولىنا نان الىپ، دۇعا ەتكەن سوڭ، شاكىرتتەرىنە سىندىرىپ بەرىپ جاتىپ+: «الىڭدار، جەڭدەر. بۇل مەنىڭ دەنەمدى بىلدىرەدى»+،— دەدى.
27 سوسىن شاراپ قۇيىلعان توستاعاندى الىپ، قۇدايعا ريزاشىلىق ٴبىلدىردى دە، ولارعا بەرىپ جاتىپ، بىلاي دەدى: «مىنادان ٴبارىڭ دە ىشىڭدەر+.
28 ويتكەنى بۇل كوپتەگەن ادامداردىڭ كۇناسى كەشىرىلۋ ٷشىن+ توگىلەتىن مەنىڭ قانىمدى+ — «كەلىسىم+ قانىن» — بىلدىرەدى+.
29 ٴبىراق سەندەرگە بىلاي دەيمىن: اكەمنىڭ پاتشالىعىندا سەندەرمەن بىرگە جاڭا شاراپ ىشەتىن كۇنگە دەيىن، ەندى قايتىپ شاراپ ىشپەيمىن+».
30 سوڭىندا، ولار قۇدايدى ماداقتاپ اندەر ايتتى دا، ٴزايتۇن تاۋىنا قاراي ٴجۇردى+.
31 سوندا يسا ولارعا بىلاي دەدى: «باسىما تۇسەتىن جاعدايعا بولا وسى ٴتۇنى ٴبارىڭ مەنى تاستاپ كەتەسىڭدەر، ويتكەنى كيەلى جازبالاردا «باعۋشىنى ۇرىپ ولتىرەمىن، سوندا وتارداعى قويلارى بىتىراپ كەتەدى» دەلىنگەن+.
32 ٴبىراق مەن قايتا تىرىلگەننەن كەيىن، سەندەردەن بۇرىن عاليلەياعا بارامىن+».
33 ال پەتىر: «باسىڭىزعا تۇسكەن جاعدايعا بولا ٴبارى تاستاپ كەتسە دە، مەن ٴسىزدى ەشقاشان تاستامايمىن!»— دەدى+.
34 بۇعان يسا: «ساعان شىندىعىن ايتامىن، وسى ٴتۇنى، اتەش شاقىرعانشا، سەن مەنەن ٷش رەت تاناسىڭ»،— دەپ جاۋاپ بەردى+.
35 سوندا پەتىر: «سىزبەن بىرگە ولۋگە تۋرا كەلسە دە، سىزدەن ەش تانبايمىن!»+— دەدى. باسقا شاكىرتتەر دە وسىنى ايتتى.
36 بۇدان كەيىن يسا ولارمەن بىرگە گەتسيماني دەگەن جەرگە كەلدى+. ول شاكىرتتەرىنە: «مەن انا جەرگە بارىپ دۇعا ايتىپ كەلگەنشە، وسىندا وتىرا تۇرىڭدار»،— دەدى+ دە،
37 پەتىر مەن زەبەدەيدىڭ ەكى ۇلىن وزىمەن بىرگە ەرتىپ كەتتى. سوسىن قايعىعا باتىپ، قاتتى كۇيزەلە باستادى+.
38 يسا ولارعا: «جانىم ولەردەي قايعىرىپ تۇر. سەندەر وسىندا قالىپ، مەنىمەن بىرگە سەرگەك بولىڭدار»،— دەدى+.
39 ٴسويتتى دە، ارىرەك بارىپ، ەتپەتىنەن جىعىلا كەتىپ: «اكە، مۇمكىن بولسا، وسى توستاعاندى*+ مەنەن اكەتە كور. ٴبىراق مەنىڭ ەمەس، سەنىڭ ەركىڭ بولسىن+»،— دەپ دۇعا ەتتى+.
40 قايتىپ كەلگەندە، شاكىرتتەرىنىڭ ۇيىقتاپ جاتقانىن كورىپ، پەتىرگە: «ەڭ بولماعاندا، ٴبىر ساعات مەنىمەن بىرگە سەرگەك بولا الماعاندارىڭ قالاي+؟
41 ازعىرىلماۋ ٷشىن+ سەرگەك بولىپ+، ۇدايى دۇعا ەتىڭدەر+. رۋح دايىن، ٴبىراق ٴتان ٵلسىز+»،— دەدى.
42 ول ەكىنشى رەت ارىرەك بارىپ: «اكە، بۇل توستاعاندى مەنەن اكەتۋ مۇمكىن بولماي، ونى ٸشۋىم كەرەك بولسا، وندا سەنىڭ ەركىڭ ورىندالسىن+»،— دەپ دۇعا ەتتى.
43 قايتىپ كەلگەندە، ولاردىڭ تاعى ۇيىقتاپ جاتقاندارىن كوردى، ويتكەنى كوزدەرىن ۇيقى باسقان ەدى.
44 سوندا يسا شاكىرتتەرىن قالدىرىپ، تاعى دا بارىپ، ٷشىنشى رەت ٴدال سول سوزدەرىن ايتىپ دۇعا ەتتى.
45 سوسىن ولارعا كەلىپ، بىلاي دەدى: «وسىنداي ۋاقىتتا ۇيىقتاپ، دەمالىپ جاتىرسىڭدار ما؟! مىنە، ادام ۇلى كۇناكارلاردىڭ قولىنا ۇستاپ بەرىلەتىن ۋاقىت جاقىنداپ قالدى.
46 تۇرىڭدار، كەتتىك! مىنە، ماعان وپاسىزدىق جاسايتىن ادام تاياپ قالدى».
47 ول ٵلى سويلەپ تۇرعاندا، 12 ەلشىنىڭ ٴبىرى ياھۋدا قولدارىنا سەمسەر، سويىل ۇستاعان ۇلكەن توبىرمەن كەلدى. ولاردى جوعارعى ٴدىني قىزمەتكەرلەر مەن ەل اقساقالدارى جىبەرگەن ەدى+.
48 وپاسىزدىق جاسايتىن ادام قانداي بەلگى بەرەتىنىن ايتىپ: «مەن كىمنىڭ بەتىنەن سۇيسەم، ول — سول كىسى. سونى تۇتقىنداڭدار»،— دەگەن بولاتىن.
49 ول تىكە يساعا كەلىپ: «امانسىز با، ۇستاز!»— دەدى دە، اقىرىن عانا بەتىنەن ٴسۇيدى.
50 ٴبىراق يسا وعان: «دوستىم، مۇندا نە ٷشىن كەلدىڭ؟»+— دەدى. سول كەزدە ولار يساعا جاقىنداپ كەلدى دە، ونى تۇتقىنعا الدى.
51 كەنەت يسانىڭ قاسىنداعىلاردىڭ ٴبىرى سەمسەرىن سۋىرىپ الىپ، باس ٴدىني قىزمەتكەردىڭ قۇلىنىڭ قۇلاعىن شاۋىپ ٴتۇسىردى+.
52 ٴبىراق يسا وعان بىلاي دەدى: «سەمسەرىڭدى قىنابىنا سال+! قولىنا سەمسەر العانداردىڭ ٴبارى سەمسەردەن ولەدى+.
53 جوق الدە اكەمنەن ٴدال قازىر پەرىشتەلەردىڭ قالىڭ قولىن*+ جىبەرۋىن سۇراپ وتىنە المايدى دەپ ويلايسىڭ با؟
54 وندا وسىلاي بولۋ كەرەكتىگى ايتىلعان جازبالار قالاي ورىندالماق؟»
55 سوسىن يسا توبىرعا قاراپ: «قاراقشىنى ۇستاۋعا كەلگەندەي، سەمسەر، سويىلمەن كەلگەندەرىڭ قالاي؟ كۇن سايىن عيباداتحانادا ٴتالىم بەرىپ+، قاستارىڭدا بولعانىمدا تۇتقىنداماپ ەدىڭدەر+.
56 ٴبىراق مۇنىڭ بارلىعى پايعامبارلار جازبالارى جۇزەگە اسۋ ٷشىن بولدى+»،— دەدى. سوندا شاكىرتتەرىنىڭ ٴبارى ونى تاستاپ، قاشا جونەلدى+.
57 يسانى تۇتقىنعا العاندار ونى باس ٴدىني قىزمەتكەر قاياپاعا+ اپاردى. سول جەرگە ٴدىن مۇعالىمدەرى مەن اقساقالدار جينالعان ەدى+.
58 پەتىر وعان الىستان ىلەسە وتىرىپ، باس ٴدىني قىزمەتكەردىڭ ىشكى اۋلاسىنا دەيىن باردى. وندا كىرگەن سوڭ، ٸستىڭ نەمەن بىتەتىنىن كورۋ ٷشىن ٷي قىزمەتشىلەرىنىڭ قاسىنا بارىپ وتىردى+.
59 وسى كەزدە جوعارعى ٴدىني قىزمەتكەرلەر مەن بۇكىل جوعارعى كەڭەس* يسانى ولىمگە كەسپەك بولىپ، وعان قارسى جالعان ايعاقتار ىزدەستىرىپ جاتتى+.
60 ٴبىراق كوپتەگەن جالعان كۋالار كەلگەنمەن، بىردە-ٴبىر ايعاق تابىلمادى+. اقىرىندا، ەكى كۋا كەلىپ،
61 بىلاي دەدى: «مىنا كىسى: —قۇدايدىڭ عيباداتحاناسىن قيراتىپ، ٷش كۇندە قايتا تۇرعىزا الامىن+،— دەگەن بولاتىن».
62 سوندا باس ٴدىني قىزمەتكەر ورنىنان تۇرىپ: «ايتار جاۋابىڭ جوق پا؟ مىنالار ساعان قارسى كۋالىك بەرىپ جاتىر عوي+!»— دەدى.
63 ٴبىراق يسا ٷنسىز تۇرا بەردى+. سوندا باس ٴدىني قىزمەتكەر: «ٴتىرى قۇدايدىڭ الدىندا انت ەتىپ، بىزگە مىنانى ايت: سەن قۇداي ۇلى ٴماسىحسىڭ بە+؟»— دەدى.
64 يسا وعان: «مۇنى ٶزىڭىز ايتىپ تۇرسىز. مەن سىزدەرگە مىنانى ايتامىن: بۇدان بىلاي ادام ۇلىنىڭ+ قۇدىرەتى كۇشتىنىڭ وڭ جاعىندا وتىرعانىن+ جانە اسپانداعى بۇلتتاردا كەلە جاتقانىن كورەتىن بولاسىزدار+»،— دەپ جاۋاپ قاتتى.
65 سول كەزدە باس ٴدىني قىزمەتكەر كيىمىنىڭ ٶڭىرىن جىرتىپ: «مىناۋ قۇدايدى قورلاپ تۇر عوي! بىزگە بۇدان باسقا قانداي كۋا قاجەت؟ قۇدايدى قورلاعانىن وزدەرىڭ ەستىدىڭدەر.
66 بۇعان نە دەيسىڭدەر؟»— دەپ سۇراعاندا، ولار: «ول ولىمگە لايىق+!»— دەپ جاۋاپ قاتتى.
67 ولار يسانىڭ بەتىنە تۇكىرىپ+، جۇدىرىقتادى+. باسقالارى بولسا جاعىنان سالىپ-سالىپ جىبەرىپ+:
68 «ٵي، ٴماسىح! پايعامبار بولساڭ، ايتشى، سەنى كىم ۇردى؟»— دەدى.
69 وسى ۋاقىتتا پەتىر سىرتتا، ىشكى اۋلادا، وتىرعان ەدى. وعان ٴبىر قىزمەتشى قىز كەلىپ: «سەن دە عاليلەيالىق يسامەن جۇرەتىن ەدىڭ عوي!»— دەدى+.
70 ٴبىراق ول ٴبارىنىڭ الدىندا: «سەنىڭ نە ايتىپ تۇرعانىڭدى بىلمەيمىن»،— دەپ مويىندامادى.
71 پەتىر قاقپا الدىنا كەلگەندە، باسقا ٴبىر قىز ونى بايقاپ قالىپ، سونداعىلارعا: «مىناۋ نازارەتتىك يسامەن بىرگە جۇرەتىن»،— دەدى+.
72 ول تاعى دا تانىپ: «مەن ول كىسىنى تانىمايمىن»،— دەپ انت ٸشتى.
73 سالدەن كەيىن سوندا تۇرعاندار كەلىپ: «سەن شىنىمەن سولاردىڭ ٴبىرىسىڭ! قالاي سويلەگەنىڭنەن-اق كورىنىپ تۇر!»— دەدى.
74 ٴبىراق پەتىر: «مەن ول كىسىنى تانىمايمىن!»— دەپ، قارعانىپ، انت ىشە باستادى. سول ساتتە اتەش شاقىردى.
75 سوندا پەتىردىڭ ەسىنە يسانىڭ «اتەش شاقىرعانشا، سەن مەنەن ٷش رەت تاناسىڭ»+ دەگەن سوزدەرى ٴتۇستى، ول سىرتقا شىعىپ، وكىرىپ جىلادى.
سىلتەمەلەر
^ تۇسىندىرمەنى قاراڭىز.
^ نەمەسە «الەباستر». تۇسىندىرمەدەگى «الەباستر» ٴسوزىن قاراڭىز.
^ تۇسىندىرمەنى قاراڭىز.
^ سوزبە-ٴسوز «راۆۆي».
^ «توستاعان» يساعا جالعان ايىپ تاعىلىپ، ولتىرىلەتىنىنە قاتىستى قۇدايدىڭ ەركىن بىلدىرەدى.
^ سوزبە-ٴسوز «12 لەگيوننان استام». لەگيون — ەجەلگى ٴريمنىڭ اسكەري جاساعى.
^ تۇسىندىرمەنى قاراڭىز.
