ماتاي 27:1—66
-
يسانىڭ پيلاتتىڭ قولىنا تابىستالۋى (1، 2)
-
ياھۋدانىڭ اسىلىپ ٶلۋى (3—10)
-
يسانىڭ پيلاتتىڭ الدىندا تۇرۋى (11—26)
-
يسانى كەلەكە-مازاق قىلۋ (27—31)
-
گولگوتا دەگەن جەردە يسانىڭ باعاناعا ٸلىنۋى (32—44)
-
يسانىڭ ٶلىمى (45—56)
-
يسانىڭ سۇيەگىن قابىرگە قويۋ (57—61)
-
قابىردى كۇزەتۋگە كۇزەتشىلەردىڭ قويىلۋى (62—66)
27 تاڭ اتقاندا بارلىق جوعارعى ٴدىني قىزمەتكەرلەر مەن ەل اقساقالدارى يسانى قالاي ٶلتىرۋدى اقىلداستى+.
2 بۇدان كەيىن ونى بايلاپ، ٵمىرشى پيلاتقا اپارىپ تابىس ەتتى+.
3 يساعا وپاسىزدىق جاساعان ياھۋدا ونىڭ ولىمگە كەسىلگەنىن كورگەندە، ٶزىن كىنالى سەزىنىپ، 30 كۇمىس اقشانى جوعارعى ٴدىني قىزمەتكەرلەر مەن اقساقالدارعا قايتارىپ+:
4 «مەن جازىقسىز ادامعا* وپاسىزدىق جاساپ، كۇناعا باتتىم»،— دەدى. ولار بولسا: «وندا ٴبىزدىڭ شارۋامىز قانشا؟ بۇل — ٶز ماسەلەڭ!»— دەدى.
5 سوندا ول كۇمىس اقشالاردى عيباداتحاناعا لاقتىرىپ تاستاپ، شىعىپ كەتتى دە، بارىپ، اسىلىپ ٶلدى+.
6 ال جوعارعى ٴدىني قىزمەتكەرلەر ولاردى جيناپ الىپ: «بۇل — قاننىڭ قۇنى، سوندىقتان قاسيەتتى قازىناعا سالۋعا بولمايدى»،— دەدى.
7 ولار اقىلداسىپ، سول اقشاعا قۇمىراشىنىڭ تانابىن ساتىپ الىپ، ونى جاتجەرلىكتەردىڭ زيراتى ەتۋدى شەشتى.
8 سوندىقتان بۇل جەر كۇنى بۇگىنگە دەيىن قاندى تاناپ دەپ اتالادى+.
9 وسىلاي ەرەميا* پايعامبار ارقىلى ايتىلعان كەلەسى سوزدەر ورىندالدى: «ولار 30 كۇمىس اقشانى — يسرايل ۇلدارىنىڭ كەيبىرى سول كىسى ٷشىن بەلگىلەگەن باعانى — الىپ،
10 قۇمىراشىنىڭ تانابىن ساتىپ الۋ ٷشىن تولەدى. ەحوبا ماعان وسىلاي بۇيىرعان ەدى+».
11 يسا ٵمىرشىنىڭ الدىندا تۇردى. ٵمىرشى ودان: «سەن ياھۋديلەردىڭ پاتشاسىسىڭ با؟»— دەپ سۇراعاندا، ول: «مۇنى ٶزىڭىز ايتىپ تۇرسىز»،— دەپ جاۋاپ بەردى+.
12 ٴبىراق جوعارعى ٴدىني قىزمەتكەرلەر مەن اقساقالدار ايىپتاعاندا، ولارعا ەش جاۋاپ قاتپادى+.
13 سوندا پيلات: «ساعان قارسى قانشاما كۋالىك كەلتىرىپ جاتقاندارىن ەستىپ تۇرسىڭ با؟»— دەدى.
14 الايدا يسا بىردە-ٴبىر ٴسوز ايتپادى. بۇعان ٵمىرشى قاتتى قايران قالدى.
15 ٵمىرشىنىڭ جىل سايىن وسى مەيرامدا حالىق سۇراعان ٴبىر تۇتقىندى بوساتىپ بەرەتىن ادەتى بار ەدى+.
16 ٴدال سول كەزدە باراببا ەسىمدى اتى شۋلى ٴبىر قىلمىسكەر قاماۋدا بولاتىن.
17 سوندىقتان جۇرت جينالعاندا، پيلات: «كىمدى بوساتقانىمدى قالايسىڭدار: باراببانى ما، الدە ٴماسىح دەپ اتالاتىن يسانى ما؟»— دەپ سۇرادى.
18 ويتكەنى پيلات ولاردىڭ يسانى قىزعانىشتان ۇستاپ بەرگەنىن بىلەتىن.
19 ونىڭ ۇستىنە، تورەلىك ورنىندا وتىرعاندا، وعان ايەلىنەن «سول ٵدىل ادامعا ەشتەڭە ىستەي كورمە، ويتكەنى بۇگىن تۇسىمدە سول ٷشىن ازاپ شەگىپ، قاتتى قينالدىم» دەگەن حابار جەتتى.
20 ٴبىراق جوعارعى ٴدىني قىزمەتكەرلەر مەن اقساقالدار حالىقتى باراببانى+ بوساتىپ، ال يسانى ٶلتىرۋدى سۇراۋعا كوندىرىپ قويعان ەدى+.
21 ٵمىرشى قايتادان: «ەكەۋىنىڭ قايسىسىن بوساتقانىمدى قالايسىڭدار؟»— دەپ سۇراعاندا، ولار: «باراببانى!»— دەدى.
22 پيلات: «ەندەشە، ٴماسىح دەپ اتالاتىن يساعا نە ىستەيىن؟»— دەگەندە، ولاردىڭ ٴبارى: «ول باعاناعا ٸلىنسىن!»— دەپ شۋلادى+.
23 سوندا ول: «نە ٷشىن؟ ول قانداي جاماندىق ىستەدى؟»— دەپ ەدى، حالىق: «ول باعاناعا ٸلىنسىن!»— دەپ، ودان بەتەر ايعايلاي ٴتۇستى+.
24 ارەكەتىنەن ەشتەڭە شىقپاي، قايتا، شۋدىڭ كۇشەيە تۇسكەنىن كورگەن پيلات سۋ الىپ، جۇرت الدىندا قولىن جۋىپ تۇرىپ: «مىنا كىسىنىڭ قانىنا مەن جاۋاپتى ەمەسپىن. ەندى وزدەرىڭ بىلىڭدەر»،— دەدى.
25 بۇعان بۇكىل حالىق: «ونىڭ قانى ٴبىزدىڭ جانە بالالارىمىزدىڭ موينىندا بولسىن!»+— دەدى.
26 سوندا ول باراببانى بوساتىپ بەردى. ال يساعا دۇرە سوقتىرىپ+، سوسىن باعاناعا ٸلۋ ٷشىن ساربازداردىڭ قولىنا تاپسىردى+.
27 ساربازدار ونى ٵمىرشى سارايىنا اپارىپ، سول جەرگە بۇكىل جاساقتى جينادى+.
28 ولار يسانىڭ كيىمىن شەشىپ، ۇستىنە ال قىزىل جامىلعى جاپتى+،
29 باسىنا تىكەننەن ورىلگەن ٴتاج كيگىزىپ، وڭ قولىنا قامىس تاياق ۇستاتىپ قويدى. سوسىن تىزە بۇگىپ: «امانسىڭ با، ياھۋديلەردىڭ پاتشاسى!»— دەپ مازاقتادى.
30 سونداي-اق بەتىنە تۇكىرىپ+، قولىنداعى تاياعىن الىپ، باسىنان ۇرا باستادى.
31 ال مازاق ەتىپ بولعاننان كەيىن، ۇستىندەگى جامىلعىنى شەشىپ، ٶز كيىمىن كيگىزدى دە، باعاناعا ىلۋگە الىپ كەتتى+.
32 شىعىپ بارا جاتىپ، ولار كۇرەنەلىك شيمون دەيتىن بىرەۋدى كەزدەستىردى. وعان يسانىڭ ازاپ باعاناسىن* كوتەرتىپ قويدى+.
33 وسىلاي گولگوتا+، ياعني باسسۇيەك، دەپ اتالاتىن جەرگە كەلگەندە،
34 ولار يساعا اشتى نارسە قوسىلعان شاراپ بەردى+، ٴبىراق ول ٴدامىن تاتقان سوڭ، ىشۋدەن باس تارتتى.
35 يسانى باعاناعا ىلگەننەن كەيىن، ساربازدار جەرەبە تاستاپ، ونىڭ كيىمدەرىن ٴبولىستى+.
36 ٴسۇيتىپ، سول جەردە وتىرىپ، ونى كۇزەتتى.
37 وعان قانداي ايىپ تاعىلعانىن كورسەتۋ ٷشىن باس جاعىنا «بۇل — ياھۋديلەردىڭ پاتشاسى يسا» دەپ جازىلعان تاقتاشا بەكىتىلدى+.
38 يسامەن بىرگە تاعى ەكى قاراقشى — ٴبىرى وڭ، ەكىنشىسى سول جاعىنا — باعاناعا ٸلىندى+.
39 سول جەردەن ٶتىپ بارا جاتقاندار باستارىن شايقاپ+، يسانى تىلدەپ+:
40 «ٵي، عيباداتحانانى قيراتىپ، ٷش كۇندە قايتا تۇرعىزۋشى+! ٶزىڭدى قۇتقارىپ ال! ەگەر قۇداي ۇلى بولساڭ، ازاپ باعاناسىنان ٴتۇس!»— دەدى+.
41 جوعارعى ٴدىني قىزمەتكەرلەر، ٴدىن مۇعالىمدەرى مەن اقساقالدار دا ونى مازاق ەتىپ+:
42 «وزگەلەردى قۇتقارسا دا، ٶزىن قۇتقارا الماي تۇر! ول يسرايلدىڭ پاتشاسى+ ەكەن، وندا تاپ قازىر باعانادان ٴتۇسسىن، سوندا ٴبىز وعان سەنەمىز.
43 قۇدايعا سەنىم ارتىپتى، ەندەشە، وعان ۇنامدى بولسا، ٴدال قازىر قۇتقارىپ السىن+! ويتكەنى ول: —مەن قۇداي ۇلىمىن+،— دەدى عوي»،— دەي باستادى.
44 ٴتىپتى قاسىنداعى باعانالارعا ىلىنگەن قاراقشىلار دا ونى وسىلاي تىلدەدى+.
45 التىنشى ساعاتتا* بۇكىل ايماقتى قاراڭعىلىق باسىپ، توعىزىنشى ساعاتقا* دەيىن سوزىلدى+.
46 توعىزىنشى ساعات شاماسىندا يسا قاتتى داۋىستاپ: «ەلي، ەلي، لاما ساباحتاني؟»— دەدى. بۇل «قۇدايىم، قۇدايىم، نەگە مەنى جالعىز قالدىردىڭ؟»+ دەگەندى بىلدىرەدى.
47 مۇنى ەستىگەندە، سوندا تۇرعانداردىڭ كەيبىرى: «ول ٸلياستى شاقىرىپ جاتىر»،— دەستى+.
48 بىرەۋى دەرەۋ جۇگىرىپ بارىپ، سورعىشتى قىشقىل شاراپقا باتىرىپ الدى دا، تاياققا قاداپ، يساعا ۇسىندى+.
49 باسقالارى: «كۇتە تۇرايىق! ٸلياس كەلىپ، ونى قۇتقارىپ الار ما ەكەن، كورەيىك»،— دەدى.
50 يسا تاعى دا قاتتى داۋىستاپ جىبەرىپ، سوڭعى دەمىن شىعاردى+.
51 سول كەزدە عيباداتحاناداعى شىمىلدىق+ جوعارىدان تومەن قاراي قاق ايىرىلدى+. جەر سىلكىنىپ، جارتاستار جارىلىپ كەتتى.
52 قابىرلەر اشىلىپ، ٶلىم ۇيقىسىندا جاتقان قاسيەتتىلەردىڭ سۇيەكتەرى سىرتقا شىعىپ قالدى.
53 ولاردى كوپ ادام كوردى. (يسا قايتا تىرىلگەن سوڭ، سول قابىرلەردىڭ قاسىندا بولعاندار قاسيەتتى قالاعا كەلدى.)*
54 ٴجۇزباسى مەن يسانى كۇزەتىپ تۇرعان جاساقشىلار جەر سىلكىنىسىن جانە بولعان جايتتىڭ ٴبارىن كورگەندە، ۇرەيلەرى ۇشىپ: «مىنا كىسى، راسىندا دا، قۇداي ۇلى بولعان ەكەن!»— دەدى+.
55 سول جەردە الىستان قاراپ تۇرعان كوپتەگەن ايەلدەر دە بولدى. ولار يساعا قىزمەت ەتۋ ٷشىن عاليلەيادان ەرىپ كەلگەن ەدى+.
56 ارالارىندا ماعدالالىق ٴماريام، جاقىپ پەن جوسەنىڭ اناسى ٴماريام، سونداي-اق زەبەدەي ۇلدارىنىڭ اناسى بار بولاتىن+.
57 كەشقۇرىم ٴجۇسىپ ەسىمدى اريماتەيالىق ٴبىر باي كىسى كەلدى. ول دا يسانىڭ شاكىرتى ەدى+.
58 ٴجۇسىپ پيلاتقا بارىپ، يسانىڭ دەنەسىن سۇرادى+. پيلات ٴمايىتتى وعان بەرۋدى بۇيىردى+.
59 ول ٴمايىتتى الىپ، تازا ٵرى ساپالى زىعىر ماتاعا وراپ+،
60 جارتاستان ۇڭگىپ جاسالعان ٶزىنىڭ جاڭا قابىرىنە اپارىپ قويدى+. سوسىن ٴبىر ۇلكەن تاستى دومالاتىپ اكەلىپ، قابىردىڭ اۋزىن بەكىتتى دە، كەتىپ قالدى.
61 ال ماعدالالىق ٴماريام مەن وزگە ٴماريام سول جەردە قالىپ، قابىر الدىندا وتىردى+.
62 ەرتەڭىنە، ياعني دايارلىق كۇنىنەن*+ كەيىن، جوعارعى ٴدىني قىزمەتكەرلەر مەن پارىزشىلدار پيلاتتىڭ الدىنا جينالىپ،
63 بىلاي دەدى: «مىرزا، الگى الاياقتىڭ ٴتىرى كەزىندە «ٷش كۇننەن سوڭ قايتا تىرىلەمىن»+ دەگەنى ەسىمىزگە ٴتۇستى.
64 سوندىقتان قابىردى ٷش كۇنگە دەيىن كۇزەتۋدى بۇيىرا كورىڭىز. ايتپەسە شاكىرتتەرى كەلىپ، سۇيەگىن ۇرلاپ اكەتىپ+، جۇرتقا «ول ولىمنەن قايتا ٴتىرىلدى!» دەپ جۇرەر. سوندا سوڭعى وتىرىك العاشقىسىنان دا بەتەر بولادى».
65 بۇعان پيلات: «ساقشىلاردى الىپ، ٶز بىلگەندەرىڭشە كۇزەتە بەرىڭدەر»،— دەدى.
66 ولار بارىپ، قابىردىڭ اۋزىنداعى تاستى مورمەن بەكىتتى دە، كۇزەت قويدى.
سىلتەمەلەر
^ سوزبە-ٴسوز «قانعا».
^ شىندىعىنا كەلگەندە، بۇل ٷزىندى زاك 11:12، 13 كە نەگىزدەلگەن. ماتايدىڭ زامانىندا ەرەميا كىتابى پايعامبارلار جازبالارىندا ٴبىرىنشى تۇرعان. سوندىقتان «ەرەميا» دەگەن اتاۋ، زاكاريا جازباسىن قوسا العاندا، بارلىق پايعامبارلىق جازبالارعا قولدانىلعان بولۋى مۇمكىن (لق 24:44 سالىستىرىڭىز).
^ تۇسىندىرمەنى قاراڭىز.
^ شامامەن كۇندىزگى 00:12. تۇسىندىرمەنى قاراڭىز.
^ شامامەن تۇسكى 00:15.
^ جاقشانىڭ ىشىندە جازىلعاندار كەيىنىرەك بولعان وقيعا.
^ تۇسىندىرمەنى قاراڭىز.
