ماتاي 7:1—29
7 وزدەرىڭ ايىپتالماس ٷشىن، وزگەلەردى ايىپتاۋدى دوعارىڭدار+.
2 ويتكەنى وزگەلەردى قالاي ايىپتاساڭدار، وزدەرىڭ دە سولاي ايىپتالاسىڭدار+. قانداي ولشەممەن ولشەپ بەرسەڭدەر، سەندەرگە دە سونداي ولشەممەن بەرىلەدى+.
3 نەلىكتەن باۋىرلاسىڭنىڭ كوزىندەگى جاڭقانى كورەسىڭ دە، ال ٶز كوزىڭدەگى بورەنەنى بايقامايسىڭ+؟
4 ٶز كوزىڭدە بورەنە تۇرعاندا، قالايشا باۋىرلاسىڭا: «كانە، كوزىڭدەگى جاڭقانى الىپ تاستايىن»،— دەي الاسىڭ؟
5 ەكىجۇزدى! الدىمەن ٶز كوزىڭدەگى بورەنەنى الىپ تاستا، سوندا باۋىرلاسىڭنىڭ كوزىندەگى جاڭقانى قالاي الۋ كەرەكتىگىن انىق كورەسىڭ.
6 قاسيەتتىنى يتتەرگە تاستاماڭدار، ٸنجۋ-مارجاندارىڭدى شوشقالاردىڭ الدىنا لاقتىرماڭدار+. ايتپەسە ولار ونى اياقتارىمەن تاپتاپ، بۇرىلىپ كەلىپ، وزدەرىڭدى جارىپ تاستايدى.
7 سۇراي بەرىڭدەر، سوندا سەندەرگە بەرىلەدى+؛ ىزدەي بەرىڭدەر، سوندا تاباسىڭدار؛ ەسىكتى قاعا بەرىڭدەر، سوندا سەندەرگە اشىلادى+.
8 سەبەبى سۇراي بەرگەن اركىم الادى+، ىزدەي بەرگەن تابادى، قاعا بەرگەنگە ەسىك اشىلادى.
9 ارالارىڭداعى قانداي ادام نان سۇراعان بالاسىنا تاس بەرەر ەدى؟
10 ياكي بالىق سۇراسا، جىلان بەرەر ەدى؟
11 دەمەك، سەندەر كۇناكار بولا تۇرا، بالالارىڭا جاقسى سي بەرۋدى بىلسەڭدەر، كوكتەگى اكەلەرىڭنىڭ وزىنەن سۇراعاندارعا جاقسى نارسە+ بەرەتىنى ەش ٴشۇباسىز+!
12 ولاي بولسا، بارلىق ىستە باسقالار وزدەرىڭە قالاي ىستەسىن دەسەڭدەر، سەندەر دە ولارعا سولاي ىستەڭدەر+. مۇسا زاڭى مەن پايعامبارلار جازبالارىنىڭ ٴمانى — وسى+.
13 تار قاقپا ارقىلى كىرىڭدەر+، سەبەبى جويىلۋعا اپاراتىن قاقپا كەڭ، جول دا داڭعىل، ونىمەن جۇرەتىندەر كوپ.
14 ال ومىرگە اپاراتىن قاقپا دا، جول دا تار. ونى تاباتىندار از+.
15 جالعان پايعامبارلاردان ساقتانىپ جۇرىڭدەر+! ولار سەندەرگە قوي تەرىسىن جامىلىپ كەلەدى+، ٴبىراق شىن مانىندە ولار اش قاسقىرلار+.
16 ولاردى جەمىستەرىنەن تانيسىڭدار. تىكەننەن ٴجۇزىم، تۇيەتىكەننەن ٸنجىر جينامايدى، سولاي ەمەس پە+؟
17 سول سياقتى، ٵربىر جاقسى اعاش جاقسى جەمىس، ال ناشار اعاش ناشار جەمىس بەرەدى+.
18 ٴبىراق جاقسى اعاش ناشار جەمىس، ناشار اعاش جاقسى جەمىس بەرە المايدى+.
19 جاقسى جەمىس بەرمەيتىن ٵربىر اعاش شابىلىپ، وتقا تاستالادى+.
20 ولاي بولسا، سول ادامداردى جەمىستەرىنەن تانيسىڭدار+.
21 ماعان «يەم! يەم!» دەيتىندەر ەمەس، كوكتەگى اكەمنىڭ ەركىن ورىندايتىندار عانا كوك پاتشالىعىنا كىرەدى+.
22 سول كۇنى ماعان كوپ ادام: «يەم، يەم+، ٴبىز ٴسىزدىڭ اتىڭىزدان پايعامبارلىق ەتپەدىك پە؟ ٴسىزدىڭ اتىڭىزدان جىنداردى قۋىپ شىعارىپ، ٴسىزدىڭ اتىڭىزدان كوپتەگەن كەرەمەتتەر جاساماپ پا ەدىك+؟»— دەيتىن بولادى.
23 سوندا مەن ولارعا: «سەندەردى ەشقاشان تانىعان* ەمەسپىن! مەنەن اۋلاق كەتىڭدەر، زاڭسىزدىق جاساۋشىلار+!»— دەپ اشىق ايتامىن.
24 سوندىقتان وسى ايتقاندارىمدى ەستىپ، ولاردى ورىندايتىن اركىم ٶز ٷيىن جارتاسقا سالعان اقىلدى ادامعا ۇقسايدى+.
25 جاڭبىر قۇيىپ، سەل ٴجۇرىپ، ٷيدى داۋىل سوققىلاعاندا، ول قۇلاعان جوق. ويتكەنى ٷيدىڭ ىرگەتاسى جارتاسقا قالانعان بولاتىن.
26 ال وسى ايتقاندارىمدى ەستىسە دە، ورىندامايتىن اركىم ٷيىن قۇم ۇستىنە سالعان اقىلسىز ادامعا ۇقسايدى+.
27 جاڭبىر قۇيىپ، سەل ٴجۇرىپ، ٷيدى داۋىل سوققىلاعاندا+، ول قيراپ، جەرمەن-جەكسەن بولدى».
28 يسا ٴسوزىن اياقتاعاندا، جۇرت ونىڭ تالىمىنە قايران قالدى+.
29 ويتكەنى ول ٴدىن مۇعالىمدەرى سياقتى ەمەس، بيلىگى بار ادامداي ٴتالىم بەردى+.
سىلتەمەلەر
^ نەمەسە «مويىنداعان».
