ماتاي 8:1—34
8 يسا تاۋدان تۇسكەندە، سوڭىنان قالىڭ جۇرت ەردى.
2 سوندا الاپەسپەن اۋىراتىن ٴبىر كىسى وعان كەلدى دە، تاعزىم ەتىپ: «يەم، قالاساڭىز بولعانى، مەنى ايىقتىرىپ تازارتا الاسىز»،— دەدى+.
3 يسا قولىن سوزىپ، ونىڭ دەنەسىنە تيگىزىپ: «قالايمىن، تازار!»— دەدى+. سول ساتتە ول الاپەسىنەن تازاردى+.
4 يسا وعان: «بايقا، بۇل تۋرالى ەشكىمگە ٴتىس جارما+! ٴبىراق بارىپ، ٴدىني قىزمەتكەرگە قارال+ دا، مۇسا بۇيىرعان سي-تارتۋدى ۇسىن+. بۇل ولارعا كۋالىك بولسىن»،— دەدى.
5 يسا قاپارناۋمعا كىرگەندە، وعان ٴبىر ٴجۇزباسى كەلىپ، جالىنىپ+:
6 «مىرزا، ۇيدە سال بولىپ جاتقان قىزمەتشىم بار، ول قاتتى قينالۋدا»،— دەدى.
7 يسا: «سول جەرگە بارعاندا ساۋىقتىرامىن»،— دەپ جاۋاپ بەردى.
8 سوندا ٴجۇزباسى بىلاي دەدى: «مىرزا، ٴسىزدى ۇيىمە كىرگىزۋگە لايىقسىزبىن. تەك ٴبىراۋىز ٴسوز ايتساڭىز بولعانى، قىزمەتشىم ايىعىپ كەتەدى.
9 ويتكەنى مەن دە بىرەۋگە باعىنىشتى اداممىن جانە ٶزىمنىڭ دە قول استىمدا ساربازدارىم بار. ولاردىڭ بىرەۋىنە «بار!» دەسەم، بارادى، باسقاسىنا «كەل!» دەسەم، كەلەدى. ال قۇلىما «مىنانى ىستە!» دەسەم، سونى ىستەيدى».
10 مۇنى ەستىگەندە، يسا قاتتى تاڭعالىپ، وزىنە ەرىپ كەلە جاتقاندارعا: «سەندەرگە شىندىعىن ايتامىن، يسرايلدە ەشكىمنەن مۇنداي زور سەنىم كورگەن ەمەسپىن+.
11 سەندەرگە بىلاي دەيمىن: كوك پاتشالىعىندا ىبىرايىم، ىسقاق جانە جاقىپپەن بىرگە شىعىس پەن باتىستان كەلگەن كوپ ادام داستارقان باسىنا جانتاياتىن بولادى+.
12 ال پاتشالىقتىڭ ۇلدارى سىرتتاعى قارا تۇنەككە تاستالادى. سول جەردە ولار زار ەڭىرەپ، قينالا تىستەنەتىن بولادى+».
13 سودان سوڭ يسا ٴجۇزباسىنا: «بارا بەر. سەنىمىڭە ساي تىلەگەنىڭ بولسىن+!»— دەدى. سول ساتتە-اق ونىڭ قىزمەتشىسى ايىعىپ كەتتى+.
14 پەتىردىڭ ۇيىنە كەلگەندە، يسا ونىڭ قايىن ەنەسىنىڭ+ ىستىعى كوتەرىلىپ، اۋىرىپ جاتقانىن كوردى+.
15 يسا ونىڭ قولىنا قولىن تيگىزدى+. سوندا ايەلدىڭ ىستىعى باسىلىپ، ورنىنان تۇرىپ، وعان اس ازىرلەي باستادى.
16 كەش تۇسكەندە جۇرت وعان بويىن جىن بيلەگەن كوپ ادامدى الىپ كەلدى. ول بۇيرىق بەرىپ، جىنداردى قۋىپ شىعاردى جانە بارلىق ناۋقاستاردى ساۋىقتىردى.
17 وسىلايشا يشايا پايعامبار ارقىلى ايتىلعان مىنا سوزدەر ورىندالدى: «ول ٴبىزدىڭ قاسىرەتىمىز بەن اۋرۋلارىمىزدى وزىنە الدى+».
18 يسا اينالاسىنداعى قالىڭ جۇرتتى كورىپ، شاكىرتتەرىنە قايىقپەن ارعى جاعاعا ٶتۋدى بۇيىردى+.
19 سوندا وعان ٴبىر ٴدىن ٴمۇعالىمى كەلىپ: «ۇستاز، قايدا بارساڭىز دا، مەن سىزگە ەرەمىن+»،— دەدى.
20 ٴبىراق يسا: «تۇلكىلەردىڭ ٸنى، قۇستاردىڭ ۇياسى بار، ال ادام ۇلىنىڭ* باس تىرەيتىن تۇراعى دا جوق»+،— دەدى.
21 وزگە ٴبىر شاكىرتى: «يەم، الدىمەن اكەمە بارايىن، ونى جەرلەگەن سوڭ كەلۋگە رۇقسات ەتىڭىز»+،— دەپ ەدى،
22 يسا: «سوڭىمنان ەرىپ ٴجۇر! ال ولگەندەرىن جەرلەۋدى ولىلەرگە قالدىر»+،— دەپ جاۋاپ بەردى.
23 سودان كەيىن يسا مەن شاكىرتتەرى قايىققا وتىردى+.
24 كەنەت تەڭىزدە سۇراپىل داۋىل كوتەرىلىپ، دولى تولقىن قايىقتى سوققىلاپ، ٸشى سۋعا تولا باستادى. يسا بۇل كەزدە ۇيىقتاپ جاتتى+.
25 شاكىرتتەرى قاسىنا كەلىپ: «يەم، ٴبىزدى قۇتقارا كورىڭىز، قۇريتىن بولدىق!»— دەپ، ونى وياتتى.
26 يسا ولارعا: «نەگە سونشا قورقاسىڭدار، سەنىمى ازدار-اۋ!»+— دەدى دە، ورنىنان تۇرىپ، جەل مەن تەڭىزگە تيىم سالدى. سوندا جىم-جىرت تىنىشتىق ورنادى+.
27 بۇعان تاڭعالعان شاكىرتتەرى: «جەل دە، تەڭىز دە باعىناتىن بۇل كىم ٶزى؟»— دەستى.
28 يسا تەڭىزدىڭ ارعى بەتىندەگى عادارالىقتاردىڭ جەرىنە* كەلگەندە، وعان بويىن جىن بيلەگەن ەكى كىسى كەزدەسە كەتتى+. قابىرلەر اراسىنان شىعا كەلگەن ولار قۇتىرعان ٵرى اسا قاۋىپتى ەدى، سوندىقتان ەشكىمنىڭ بۇل جولمەن جۇرۋگە جۇرەگى داۋالامايتىن.
29 ولار: «قۇداي ۇلى، مۇندا نەگە كەلدىڭ+؟ ٴبىزدى بەلگىلەنگەن ۋاقىتتان بۇرىن جازالاۋعا+ كەلدىڭ بە؟»— دەپ ايقاي سالدى+.
30 الىسىراقتا كوپ شوشقا جايىلىپ جۇرگەن بولاتىن+.
31 جىندار يسادان: «ٴبىزدى قۋماق بولساڭ، انا شوشقالارعا جىبەرە كور»،— دەپ ٶتىندى+.
32 ول: «بارىڭدار!»— دەدى. سوندا جىندار الگى ەكى كىسىنىڭ بويىنان شىعىپ، شوشقالارعا كىردى. سول كەزدە شوشقالاردىڭ ٴبارى جاردان تەڭىزگە قارعىپ، سۋعا باتىپ ٶلدى.
33 ال باقتاشىلارى قاشىپ كەتىپ، قالاعا بارىپ، جۇرتقا بولعان جايتتىڭ ٴبارىن، بويىن جىن بيلەگەن ادامدارمەن نە بولعانىن دا ايتىپ بەردى.
34 سوندا بۇكىل قالا يسانىڭ الدىنان شىقتى. ونى كورگەندە، ايماقتارىنان كەتۋىن جالىنىپ سۇرادى+.
