مارقا 14:1—72
-
ٴدىني قىزمەتكەرلەردىڭ يسانى ٶلتىرۋدىڭ جولىن ىزدەۋى (1، 2)
-
يسانىڭ باسىنا ٴيىسماي قۇيۋ (3—9)
-
ياھۋدانىڭ يساعا وپاسىزدىق جاساۋى (10، 11)
-
سوڭعى قۇتقارىلۋ مەيرامى (12—21)
-
يەمىزدىڭ كەشكى اسىن ەنگىزۋ (22—26)
-
پەتىردىڭ يسادان تاناتىنى تۋرالى الدىن الا ايتۋ (27—31)
-
يسانىڭ گەتسيمانيدە دۇعا ەتۋى (32—42)
-
يسانىڭ تۇتقىندالۋى (43—52)
-
جوعارعى كەڭەس الدىندا سوتتالۋى (53—65)
-
پەتىردىڭ يسادان تانۋى (66—72)
14 قۇتقارىلۋ مەيرامى* مەن اشىماعان نان مەيرامىنا*+ ەكى كۇن قالعان ەدى+. جوعارعى ٴدىني قىزمەتكەرلەر مەن ٴدىن مۇعالىمدەرى يسانى ايلامەن ۇستاپ الىپ، ٶلتىرۋدىڭ جولىن ىزدەستىردى+.
2 ٴبىراق ولار: «مۇنى مەيرامدا ىستەمەيىك، ايتپەسە حالىق كوتەرىلىپ كەتۋى مۇمكىن»،— دەستى.
3 بەتانيادا بولعانىندا يسا بۇرىن الاپەسپەن اۋىرعان شيموننىڭ ۇيىندە داستارقان باسىندا جانتايىپ جاتتى. سوندا وتە قىمبات تازا نارد ٴيىسمايى قۇيىلعان تاس قۇتى* ۇستاعان ٴبىر ايەل كەلىپ، قۇتىنىڭ اۋزىن سىندىردى دا، ٴيىسمايدى ونىڭ باسىنا قۇيا باستادى+.
4 بۇعان كەيبىرەۋلەر نارازىلىق ٴبىلدىرىپ، ٶزارا: «ٴيىسمايدى بۇلاي ىسىراپ ەتۋدىڭ قاجەتى قانشا؟
5 ونى 300 دەن اسا دينارعا* ساتىپ، تۇسكەن اقشانى كەدەيلەرگە ۇلەستىرۋگە بولار ەدى عوي!»— دەستى. وسىلاي ولار ايەلگە اشۋلاندى.
6 ٴبىراق يسا بىلاي دەدى: «بۇل ايەلدى جايىنا قالدىرىڭدار. نەگە ونى مازالايسىڭدار؟ ول ماعان جاقسىلىق جاسادى+.
7 كەدەيلەر ارقاشان قاستارىڭدا عوي+، ولارعا قالاعان كەزدەرىڭدە جاقسىلىق جاساي الاسىڭدار، ال مەن قاستارىڭدا ارقاشان بولمايمىن+.
8 ول قولىنان كەلگەنىن ىستەپ، دەنەمە ٴيىسماي جاعىپ، الدىن الا جەرلەۋگە دايىندادى+.
9 سەندەرگە شىندىعىن ايتامىن، ىزگى حابار دۇنيەنىڭ قاي جەرىندە ۋاعىزدالماسىن+، بۇل ايەل دە ەسكە الىنىپ، وسى ىستەگەنى جايلى ايتىلاتىن بولادى+».
10 ال 12 ەلشىنىڭ ٴبىرى ياھۋدا يسقاريوت يسانى ۇستاپ بەرۋ ٷشىن جوعارعى ٴدىني قىزمەتكەرلەرگە باردى+.
11 ولار بۇنى ەستىگەندە قۋانىپ كەتىپ، وعان كۇمىس اقشا بەرۋدى ۋادە ەتتى+. ٴسۇيتىپ، ياھۋدا ونى ۇستاپ بەرۋدىڭ قولايلى ٴساتىن ىزدەي باستادى.
12 اشىماعان نان مەيرامىنىڭ ٴبىرىنشى كۇنى+ قۇتقارىلۋ مەيرامىنا ارنالعان قۇرباندىق شالىناتىن+. سول كەزدە شاكىرتتەرى يساعا: «قۇتقارىلۋ مەيرامىنىڭ اسىن قايدا بارىپ دايىنداعانىمىزدى قالايسىز؟»— دەپ سۇرادى+.
13 سوندا ول ەكى شاكىرتىن جۇمساپ، بىلاي دەدى: «قالاعا بارىڭدار. سول جەردە قۇمىرامەن سۋ الىپ بارا جاتقان ادامدى كەزدەستىرەسىڭدەر. سوڭىنان ەرىپ+،
14 ول كىرگەن ٷيدىڭ يەسىنە: —ۇستازىمىز سىزدەن شاكىرتتەرىمەن بىرگە قۇتقارىلۋ مەيرامىنىڭ اسىن ىشۋگە بولاتىن قوناق بولمەنىڭ قايدا ەكەنىن سۇراپ جاتىر،— دەڭدەر.
15 ول سەندەرگە جوعارى قاباتتاعى ازىرلەنىپ قويىلعان ۇلكەن بولمەنى كورسەتەدى. استى سول جەرگە دايىنداڭدار».
16 شاكىرتتەر جولعا شىعىپ، قالاعا بارعاندا، ٴبارى ٴدال يسا ايتقانداي بولىپ شىقتى. ٴسۇيتىپ، ولار مەيرامعا دايىندالدى.
17 كەش تۇسكەندە يسا 12 ەلشىسىمەن كەلدى+.
18 داستارقان باسىندا جانتايىپ تاماقتانىپ جاتقاندا، ول: «سەندەرگە شىندىعىن ايتامىن، مەنىمەن بىرگە تاماق جەپ وتىرعان ارالارىڭداعى بىرەۋ ماعان وپاسىزدىق جاسايدى»،— دەدى+.
19 بۇعان ولاردىڭ ەڭسەلەرى ٴتۇسىپ، بىرىنەن سوڭ ٴبىرى: «سول ادام مەن ەمەسپىن عوي؟»— دەپ سۇراي باستادى.
20 يسا بىلاي دەدى: «بۇل — ون ەكىڭنىڭ ٴبىرى، مەنىمەن ٴبىر تاباققا نان باتىرىپ جاتقان بىرەۋىڭ+.
21 راس، ادام ۇلى ٶزى تۋرالى جازىلعانعا ساي كەتىپ بارا جاتىر. ٴبىراق ادام ۇلىنا وپاسىزدىق جاساعان كىسى قاسىرەتكە قالادى+! بۇدان گورى ونىڭ دۇنيەگە كەلمەگەنى جاقسى ەدى+!»
22 ولار تاماقتانىپ جاتقاندا، يسا قولىنا نان الىپ، دۇعا ەتتى دە، شاكىرتتەرىنە سىندىرىپ بەرىپ جاتىپ: «الىڭدار، بۇل مەنىڭ دەنەمدى بىلدىرەدى»،— دەدى+.
23 سوسىن شاراپ قۇيىلعان توستاعاندى الىپ، قۇدايعا ريزاشىلىق ٴبىلدىردى دە، ولارعا بەردى. ودان ٴبارى ٸشتى+.
24 ول بىلاي دەدى: «بۇل مەنىڭ كوپتەگەن ادامدار ٷشىن توگىلەتىن قانىمدى+ — «كەلىسىم+ قانىن» — بىلدىرەدى+.
25 سەندەرگە شىندىعىن ايتامىن، قۇداي پاتشالىعىندا جاڭا شاراپ ىشەتىن كۇنگە دەيىن، ەندى قايتىپ شاراپ ىشپەيمىن».
26 سوڭىندا، ولار قۇدايدى ماداقتاپ اندەر ايتتى دا، ٴزايتۇن تاۋىنا قاراي ٴجۇردى+.
27 يسا ولارعا بىلاي دەدى: «ٴبارىڭ مەنى تاستاپ كەتەسىڭدەر، ويتكەنى كيەلى جازبالاردا «باعۋشىنى ۇرىپ ولتىرەمىن+، سوندا قويلارى بىتىراپ كەتەدى» دەلىنگەن+.
28 ٴبىراق مەن قايتا تىرىلگەننەن كەيىن، سەندەردەن بۇرىن عاليلەياعا بارامىن+».
29 ال پەتىر: «ٴسىزدى ٴتىپتى ٴبارى تاستاپ كەتسە دە، مەن تاستامايمىن»،— دەدى+.
30 بۇعان يسا: «ساعان شىندىعىن ايتامىن، بۇگىن، وسى ٴتۇنى-اق، اتەش ەكى رەت شاقىرعانشا، سەن مەنەن ٷش رەت تاناسىڭ»،— دەپ جاۋاپ بەردى+.
31 الايدا پەتىر ودان بەتەر قۇلشىنا: «سىزبەن بىرگە ولۋگە تۋرا كەلسە دە، سىزدەن ەش تانبايمىن!»— دەدى. بارلىعى دا وسىلاي دەي باستادى+.
32 ولار گەتسيماني دەگەن جەرگە كەلگەندە، يسا شاكىرتتەرىنە: «مەن دۇعا ايتىپ كەلگەنشە، وسىندا وتىرا تۇرىڭدار»،— دەدى+.
33 بۇنى ايتقاننان كەيىن، پەتىردى، جاقىپ پەن جوحاندى وزىمەن بىرگە ەرتىپ كەتتى+. ول قاتتى قينالىپ، كۇيزەلە باستادى.
34 يسا ولارعا: «جانىم ولەردەي قايعىرىپ تۇر+. سەندەر وسىندا قالىپ، ۇيىقتاماي سەرگەك بولىڭدار»،— دەدى+.
35 ٴسويتتى دە، ارىرەك بارىپ، جەرگە جىعىلا كەتىپ، مۇمكىن بولسا، وسى سىناقتىڭ باسىنا تۇسپەۋىن سۇراپ دۇعا ەتە باستادى.
36 ول: «اببا*، اكە+، سەنىڭ قولىڭنان ٴبارى كەلەدى، بۇل توستاعاننان* ماعان ىشكىزە كورمە. ٴبىراق مەنىڭ ەمەس، سەنىڭ قالاۋىڭ بولسىن»،— دەدى+.
37 قايتىپ كەلگەندە، شاكىرتتەرىنىڭ ۇيىقتاپ جاتقاندارىن كورىپ، پەتىرگە بىلاي دەدى: «شيمون، ۇيىقتاپ جاتىرسىڭ با؟ ەڭ بولماعاندا، ٴبىر ساعات سەرگەك بولا المادىڭ با+؟
38 ازعىرىلماۋ ٷشىن سەرگەك بولىپ، ۇدايى دۇعا ەتىڭدەر+. رۋح دايىن، ٴبىراق ٴتان ٵلسىز+».
39 كەيىن قايتادان شەتكەرى بارىپ، الدىندا ايتقان سوزدەرىن قايتالاپ دۇعا ەتتى+.
40 بۇدان سوڭ قايتىپ كەلىپ، تاعى دا ولاردىڭ ۇيىقتاپ جاتقانىن كوردى، ويتكەنى كوزدەرىن ۇيقى باسقان ەدى. ولار وعان نە دەرىن بىلمەدى.
41 ٷشىنشى رەت دۇعا ەتىپ كەلگەن سوڭ، يسا ولارعا بىلاي دەدى: «وسىنداي ۋاقىتتا ۇيىقتاپ، دەمالىپ جاتىرسىڭدار ما؟! جەتەر! ۋاقىت كەلدى+! مىنە، ادام ۇلى كۇناكارلاردىڭ قولىنا ۇستاپ بەرىلمەك.
42 تۇرىڭدار، كەتتىك! مىنەكي، ماعان وپاسىزدىق جاسايتىن ادام تاياپ قالدى+».
43 ول ٵلى سويلەپ تۇرعاندا، 12 ەلشىنىڭ ٴبىرى ياھۋدا قولدارىنا سەمسەر، سويىل ۇستاعان توبىرمەن كەلىپ تە قالدى. ولاردى جوعارعى ٴدىني قىزمەتكەرلەر، ٴدىن مۇعالىمدەرى مەن اقساقالدار جىبەرگەن ەدى+.
44 وپاسىزدىق جاسايتىن ادام قانداي بەلگى بەرەتىنىن ايتىپ: «مەن كىمنىڭ بەتىنەن سۇيسەم، ول — سول كىسى. سونى تۇتقىنداپ، قاشىپ كەتپەۋىن قاداعالاڭدار»،— دەگەن بولاتىن.
45 ياھۋدا تىكە يسانىڭ قاسىنا بارىپ: «ۇستاز!»— دەدى دە، اقىرىن عانا بەتىنەن ٴسۇيدى.
46 سول كەزدە ولار تاپ بەرىپ، ونى تۇتقىنعا الدى.
47 سوندا سول جەردە تۇرعانداردىڭ ٴبىرى سەمسەرىن سۋىرىپ الىپ، باس ٴدىني قىزمەتكەردىڭ قۇلىنىڭ قۇلاعىن شاۋىپ ٴتۇسىردى+.
48 يسا كەلگەندەرگە بىلاي دەدى: «قاراقشىنى ۇستاۋعا كەلگەندەي، سەمسەر، سويىلمەن كەلگەندەرىڭ قالاي+؟
49 كۇن سايىن عيباداتحانادا ٴتالىم بەرىپ+، قاستارىڭدا بولعانىمدا تۇتقىنداماپ ەدىڭدەر. ٴبىراق بۇل جازبالاردا ايتىلعاندار جۇزەگە اسۋ ٷشىن وسىلاي بولۋعا ٴتيىس+».
50 سوندا شاكىرتتەرىنىڭ ٴبارى ونى تاستاپ، قاشا جونەلدى+.
51 ٴبىراق دەنەسىنە ساپالى زىعىر جامىلعى وراي سالعان ٴبىر جاس جىگىت وعان ەرىپ وتىردى. ولار ونى ۇستاپ الماقشى بولعاندا،
52 جىگىت جامىلعىسىن تاستاي سالا، جالاڭاش* قاشىپ كەتتى.
53 ولار يسانى باس ٴدىني قىزمەتكەرگە اپاردى+، سول جەرگە بارلىق جوعارعى ٴدىني قىزمەتكەرلەر، اقساقالدار مەن ٴدىن مۇعالىمدەرى جينالدى+.
54 پەتىر وعان الىستان ىلەسە وتىرىپ، باس ٴدىني قىزمەتكەردىڭ ىشكى اۋلاسىنا دەيىن باردى دا، سول جەردە ٷي قىزمەتشىلەرىمەن بىرگە وتقا جىلىنىپ وتىردى+.
55 وسى كەزدە جوعارعى ٴدىني قىزمەتكەرلەر مەن بۇكىل جوعارعى كەڭەس* يسانى ولىمگە كەسپەك بولىپ، وعان قارسى ايعاقتار ىزدەستىرىپ، ٴبىراق ەشتەڭە تابا الماي جاتتى+.
56 كوپتەگەن ادام وعان قارسى جالعان كۋالىك بەرگەنىمەن+، ولارى ٴبىر-بىرىمەن ۇيلەسپەي جاتتى.
57 سونداي-اق ورىندارىنان تۇرىپ، وعان قارسى مىناداي جالعان كۋالىك ايتۋشىلار دا بولدى:
58 «ٴبىز ونىڭ «قولدان جاسالعان مىنا عيباداتحانانى قيراتىپ، ٷش كۇننىڭ ىشىندە ادام قولىمەن جاسالماعان باسقاسىن تۇرعىزامىن» دەگەنىن ەستىدىك»+.
59 ٴبىراق بۇل كۋالىكتەرى دە ٶزارا سايكەس كەلمەدى.
60 اقىرىندا، باس ٴدىني قىزمەتكەر ورتاعا شىعىپ، يسادان: «ايتار جاۋابىڭ جوق پا؟ مىنالار ساعان قارسى كۋالىك بەرىپ جاتىر عوي!»— دەپ سۇرادى+.
61 ٴبىراق يسا ەش جاۋاپ قايىرماي، ٷنسىز تۇرا بەردى+. باس ٴدىني قىزمەتكەر تاعى دا سۇراق قويىپ: «سەن كيەلى قۇدايدىڭ ۇلى ٴماسىحسىڭ بە؟»— دەدى.
62 سوندا يسا: «ٴيا، مەن سولمىن. سىزدەر ادام ۇلىنىڭ+ قۇدىرەتى كۇشتىنىڭ وڭ جاعىندا وتىرعانىن+ جانە اسپانداعى بۇلتتارمەن كەلە جاتقانىن كورەتىن بولاسىزدار»+،— دەدى.
63 بۇنى ەستىگەندە، باس ٴدىني قىزمەتكەر كيىمىنىڭ ٶڭىرىن جىرتىپ، بىلاي دەدى: «بىزگە بۇدان باسقا قانداي كۋا قاجەت+؟
64 قۇدايدى قورلاعانىن وزدەرىڭ ەستىدىڭدەر عوي. بۇعان نە دەيسىڭدەر؟» ٴبارى ونى ولىمگە لايىق دەگەن ۇكىم شىعاردى+.
65 بىرەۋلەر وعان تۇكىرىپ+، بەتىن جاۋىپ تۇرىپ، جۇدىرىقتاپ: «پايعامبار بولساڭ، كىم ۇرعانىن ايتشى»،— دەدى. ال سوت ورىنداۋشىلارى ونىڭ جاعىنان تارتىپ-تارتىپ جىبەرىپ، الىپ كەتتى+.
66 وسى ۋاقىتتا پەتىر تومەندە، ىشكى اۋلادا ەدى. سوندا باس ٴدىني قىزمەتكەردىڭ ٴبىر قىزمەتشى قىزى كەلىپ+،
67 وتقا جىلىنىپ تۇرعان پەتىردى كورىپ، وعان تەسىلە قاراپ: «سەن دە نازارەتتىك يسامەن جۇرەتىن ەدىڭ عوي»،— دەدى.
68 ٴبىراق ول: «مەن ونى تانىمايمىن، سەنىڭ نە ايتىپ تۇرعانىڭدى دا تۇسىنبەيمىن»،— دەپ مويىندامادى. سوسىن سىرت جاققا، قاقپاعا قاراي ٴجۇردى.
69 سول جەردە ونى قىزمەتشى قىز تاعى كورىپ، جانىنداعىلارعا: «بۇل — سولاردىڭ ٴبىرى»،— دەي باستادى.
70 پەتىر قايتادان مويىندامادى. ٴبىرازدان سوڭ سول جەردەگىلەر تاعى دا وعان: «سەن شىنىمەن سولاردىڭ ٴبىرىسىڭ، ويتكەنى سەن عاليلەيالىقسىڭ عوي»،— دەستى.
71 ٴبىراق ول: «سەندەر ايتىپ تۇرعان ادامدى تانىمايمىن»،— دەپ، قارعانىپ، انت ىشە باستادى.
72 سول ساتتە اتەش ەكىنشى رەت شاقىردى+. سوندا پەتىردىڭ ەسىنە يسانىڭ «اتەش ەكى رەت شاقىرعانشا، سەن مەنەن ٷش رەت تاناسىڭ» دەگەن سوزدەرى ٴتۇسىپ+، ٶز-ٶزىن ۇستاي الماي، جىلاپ جىبەردى.
سىلتەمەلەر
^ تۇسىندىرمەنى قاراڭىز.
^ تۇسىندىرمەنى قاراڭىز.
^ نەمەسە «الەباستر». تۇسىندىرمەدەگى «الەباستر» ٴسوزىن قاراڭىز.
^ B14 قوسىمشاسىن قاراڭىز.
^ بۇل ەۆرەي نە ارامەي ٴسوزىنىڭ ماعىناسى «ۋا، اكە!»
^ «توستاعان» يساعا جالعان ايىپ تاعىلىپ، ولتىرىلەتىنىنە قاتىستى قۇدايدىڭ ەركىن بىلدىرەدى.
^ نەمەسە «ىشكيىممەن».
^ تۇسىندىرمەنى قاراڭىز.
