مۇسانىڭ 2-جازباسى 23:1—33
23 لاقاپ ٴسوز تاراتپا+. بىرەۋگە قاستىق ويمەن جالعان كۋالىك بەرىپ، زۇلىم ادامعا قوسىلما+.
2 كوپشىلىككە ەرىپ، زۇلىمدىق جاساما. داۋدا كۋالىك بەرگەندە، جۇرتتىڭ ىقپالىنا بەرىلىپ، شىندىقتى بۇرمالاما.
3 كەدەيدىڭ داۋىن قاراستىرعاندا، الالاۋشىلىق تانىتپا+.
4 جاۋىڭنىڭ اداسىپ جۇرگەن بۇقاسىن نە ەسەگىن كورسەڭ، يەسىنە اپارىپ بەر+.
5 ٶزىڭدى جەك كورەتىن ادامنىڭ ەسەگى جۇك استىندا قالىپ، تۇرا الماي جاتقانىن كورسەڭ، ٴمان بەرمەستەن ٶتىپ كەتپە. ەسەگىنىڭ جۇگىن ٴتۇسىرىسىپ، الگى ادامعا كومەكتەس+.
6 كەدەيدىڭ ٸسىن قاراستىرعاندا، ادىلدىكتى بۇرمالاما+.
7 جالعان ايىپ تاعۋدان اۋلاق بول. جازىقسىز بەن ٵدىلدى ولىمگە بۇيىرما، مۇنداي زۇلىمدىققا بارعان ادامدى مەن اقتامايمىن+.
8 پارا الما. پارا سوتتىڭ كوزىن سوقىر ەتىپ، ٵدىلدىڭ ٴسوزىن بۇرمالايدى+.
9 جاتجەرلىك ادامعا ٴجابىر كورسەتپە. ويتكەنى ٶزىڭ دە مىسىردا جاتجەرلىك بولعاندىقتان، مۇنىڭ نە ەكەنىن جاقسى بىلەسىڭ+.
10 التى جىل بويى جەرىڭە ەگىن ەگىپ، ٶنىمىن جينا+.
11 ال جەتىنشى جىلى جەرىڭدى وڭدەمە، تىنىقسىن. حالقىڭنىڭ اراسىنداعى كەدەي ادامدار سودان ٶسىپ شىققاندى جەسىن، ال ولاردان قالعانىن دالاداعى اڭ-قۇستار قورەك ەتسىن. جۇزىمدىگىڭمەن دە، ٴزايتۇن باقتارىڭمەن دە وسىلاي ىستە.
12 التى كۇن بويى جۇمىسىڭدى ىستە، ٴبىراق جەتىنشى كۇنى بارلىق جۇمىسىڭنان دەمال. سوندا بۇقاڭ مەن ەسەگىڭ تىنىعىپ، قۇلدارىڭ مەن جاتجەرلىك ادامدارىڭ كۇش جيناپ الادى+.
13 وسى ايتقاندارىمنىڭ ٴبارىن مۇقيات ورىندا+. باسقا قۇدايلاردىڭ اتىن اتاما، اۋزىڭا دا الما+.
14 جىلىنا ٷش رەت ماعان ارناپ مەيرام وتكىز+.
15 اشىماعان نان مەيرامىن اتاپ ٶت+. وزىڭە بۇيىرعانىمداي، جەتى كۇن بويى اشىتقىسىز پىسىرىلگەن نان جە. مۇنى ابيب*+ ايىنىڭ بەلگىلەنگەن مەزگىلىندە وتكىز، ويتكەنى مىسىردان سول كەزدە كوشىپ شىققانسىڭ. ەشكىم مەنىڭ الدىما قۇرالاقان كەلمەسىن+.
16 سونداي-اق تاناپقا ەككەنىڭنىڭ العاشقى ٶنىمىن جيناعاندا، العاشقى ٶنىم مەيرامىن* تويلا+. ال جىل سوڭىندا تەر توگىپ وسىرگەن ٶنىمىڭدى جيناپ العاندا، سابانتوي مەيرامىن* وتكىز+.
17 جىلىنا ٷش رەت ەر ادامدار قۇداي يە ەحوبانىڭ الدىنا كەلسىن+.
18 مەن ٷشىن شالىنعان قۇرباندىقتىڭ قانىن اشىتىلعان ەش نارسەمەن قوسىپ ۇسىنبا. ماعان ارنالعان مەيرامدا شالىنعان قۇرباندىقتىڭ مايى تاڭ اتقانشا قالماسىن.
19 جەرىڭنەن جيناعان العاشقى ٶنىمىڭنىڭ ەڭ جاقسىسىن ەحوبا قۇدايىڭنىڭ ۇيىنە الىپ كەل+.
لاقتىڭ ەتىن ەنەسىنىڭ سۇتىنە پىسىرمە+.
20 سەنى جولدا قورعاپ، مەن دايىنداعان جەرگە اپارسىن دەپ+، الدىڭنان پەرىشتە جىبەرىپ وتىرمىن+.
21 ونىڭ الدىندا قالاي ٴجۇرىپ-تۇراتىنىڭا دەن قوي جانە ايتقاندارىن تىڭدا. وعان قارسىلاسۋشى بولما، ويتكەنى ول سەنىڭ قىلمىسىڭدى كەشىرمەيدى+. ول مەنىڭ اتىمنان ارەكەت ەتەدى.
22 ال ەگەر وعان تولىقتاي قۇلاق اسىپ، مەنىڭ ايتقاندارىمدى تۇگەل ورىنداساڭ، جاۋلارىڭا جاۋ بولىپ، ساعان قارسى شىققاندارعا قارسى شىعامىن.
23 پەرىشتەم الدىڭدا ٴجۇرىپ وتىرىپ، سەنى امورلىقتار، حەتتىكتەر، پەرەزدىكتەر، قاناحاندىقتار، حەۆتىكتەر مەن ەبۋستىكتەردىڭ جەرىنە الىپ بارادى. مەن سولاردى قۇرتامىن+.
24 ولاردىڭ تاڭىرلەرىنە باس ٴيىپ، قۇلشىلىق ەتپە، ىستەگەندەرىنە ەلىكتەمە+. قايتا، ٴتاڭىر مۇسىندەرىن تالقانداپ، قاسيەتتى تاس باعانالارىن* قيراتىپ تاستا+.
25 ەحوبا قۇدايىڭا قىزمەت ەت+، سوندا ول سەنى نان-سۋمەن جارىلقايدى+. مەن ارالارىڭنان اۋرۋ اتاۋلىنى الاستاتامىن+.
26 ەلىڭدە تۇسىك تاستايتىن نە قۇرساق كوتەرمەيتىن ايەل بولمايدى+. مەن ساعان ۇزاق عۇمىر سيلايمىن.
27 جول-جونەكەي كەزىگەتىن بارلىق حالىق سەنى كورمەي تۇرىپ-اق، مەن تۋرالى ەستىپ زارە-قۇتى قالمايدى+. مەن ولاردى ابىگەرگە ٴتۇسىرىپ، جاۋلارىڭنىڭ ٴبارىن كەرى قاشۋعا ماجبۇرلەيمىن+.
28 سەن كەلمەس بۇرىن حەۆتىكتەر، قاناحاندىقتار مەن حەتتىكتەردىڭ جىگەرىن جاسىتامىن*+. سوندىقتان ولار سەنەن قاشاتىن بولادى+.
29 مەن وسى حالىقتاردى ٴبىر جىلدىڭ ىشىندە قۋىپ شىقپايمىن، ايتپەسە جەر قاڭىراپ بوس قالىپ، قاۋىپتى جابايى اڭدار كوبەيىپ كەتەدى+.
30 ٶسىپ-ٶنىپ، سول ەلدى يەمدەنىپ العانىڭشا، ولاردى بىرتىندەپ قۋىپ شىعامىن+.
31 سەنىڭ شەگاراڭ قىزىل تەڭىزدەن باستاپ فىلىستىرلەردىڭ تەڭىزىنە دەيىن، ٴشول دالادان باستاپ ەۆفرات وزەنىنە دەيىن بولادى+. سول ەلدىڭ تۇرعىندارىن قولىڭا بەرەمىن، سەن ولاردى قۋىپ شىعاسىڭ+.
32 ولاردىڭ وزدەرىمەن دە، قۇدايلارىمەن دە كەلىسىم جاساما+.
33 ماعان قارسى كۇنا جاساۋىڭا تۇرتكى بولماۋ ٷشىن، سول حالىقتاردى ەلىڭدە تۇرعىزبا. ەگەر ولاردىڭ قۇدايلارىنا قۇلشىلىق ەتسەڭ، بۇل سەن ٷشىن تۇزاق بولادى+».
سىلتەمەلەر
^ B15 قوسىمشاسىن قاراڭىز.
^ «اپتالار مەيرامى»، «ەلۋىنشى كۇن مەيرامى» دەپ تە اتالادى.
^ «كۇركەلەر مەيرامى» (ۋاقىتشا باسپانا) دەپ تە اتالادى.
^ تۇسىندىرمەنى قاراڭىز.
^ مۇمكىن: «ابىرجىتامىن؛ جان ۇشىرا قورقىتامىن».
