يشايا 58:1—14
58 «بار داۋسىڭمەن ايعايلا، ٶزىڭدى تەجەمە!
داۋسىڭ كەرنەي ۇنىندەي شىقسىن.
حالقىما بۇلىك شىعارعانىن+،جاقىپ ۇيىنە كۇناعا باتقانىن جاريالا.
2 ولار ادىلدىكتەرىنەن تايماعان،قۇدايلارىنىڭ ٵدىل جولىنان اۋىتقىماعان حالىقتاي،مەنى كۇن سايىن ىزدەگەنسيدى،جولدارىمدى ٴبىلۋدى قالاعانسيدى+.
قۇدايلارىنان ٵدىل ۇكىم شىعارۋدى ٶتىنىپ،وعان جاقىنداۋدى قالاعانسىپ+:
3 —ٴبىزدىڭ ورازا ۇستاعانىمىزدى نەگە كورمەيسىڭ+؟
جانىمىزدى قيناعانىمىزدى نەگە بايقامايسىڭ+؟— دەيدى.
ويتكەنى ورازا ۇستاعاندارىڭدا دا ٶز مۇددەلەرىڭدى ويلادىڭدار،جۇمىسشىلارىڭدى قانادىڭدار+.
4 ورازالارىڭنىڭ اياعىندا جانجالداسىپ، توبەلەسەسىڭدەر،قاتىگەزدىكپەن جۇدىرىق سىلتەيسىڭدەر.
مۇنداي ورازالارىڭمەن داۋىستارىڭ كوككە جەتەدى دەپ ويلاماڭدار.
5 ماعان ۇنامدى ورازا وسىنداي بولۋ كەرەك پە ەدى؟
بۇل ادام ٶز جانىن قيناپ،باسىن قۇراقتاي ٴيىپ،قارا ماتا مەن كۇلدى توسەك قىلاتىن كۇن بولۋ كەرەك پە؟
وسىنى سەندەر ورازا، ەحوباعا ۇنايتىن كۇن دەيسىڭدەر مە؟
6 جوق، مەن تاڭداعان ورازا مىناداي بولۋ كەرەك:
زۇلىمدىق بۇعاۋلارى ٷزىلسىن،مويىنتۇرىق جىپتەرى شەشىلسىن+،قانالعاندار بوساتىلسىن+،مويىنتۇرىق اتاۋلى تالقاندالسىن.
7 اشىققانعا نانىڭنان ٴبولىپ بەر+،ٷيسىز جۇرگەن كەدەيدى ۇيىڭە كىرگىز،جالاڭاش جۇرگەن ادامدى كورسەڭ، كيىندىر+،جاقىنىڭنان تەرىس اينالما.
8 سوندا سەنىڭ جارىعىڭ تاڭ شاپاعىنداي جارقىرايدى+،ساۋىعاتىن كەزىڭ لەزدە كەلەدى.
ادىلدىگىڭ الدىڭدا باستاپ جۇرەدى،ەحوبانىڭ ۇلىلىعى ارت جاعىڭنان قورعايدى+.
9 سوندا سەن شاقىرساڭ، ەحوبا جاۋاپ بەرەدى.
كومەك سۇراپ جالبارىنساڭ، ول «مەن مۇندامىن!» دەيدى.
اراڭنان مويىنتۇرىقتى قۇرتساڭ،ساۋساعىڭدى شوشايتىپ وزگەنى تىلدەۋدى قويساڭ+،
10 ٶزىڭ قالاپ تۇرعاندى اش ادامعا بەرسەڭ+،بەيشارا جاندى تويىندىرساڭ،جارىعىڭ تۇنەكتە دە جارقىراپ تۇرادى،ٴتۇنىڭ تال تۇستەي جارىق بولادى+.
11 ەحوبا سەنى ٵردايىم جەتەلەپ جۇرەدى،ٴتىپتى قۋاڭ جەردىڭ وزىندە قاجەتتەرىڭدى قامتاماسىز ەتەدى+،سۇيەكتەرىڭە قۋات سيلايدى.
سەن مولىنان سۋارىلاتىن باققا+،ەشقاشان سارقىلمايتىن بۇلاققا ۇقسايتىن بولاسىڭ.
12 ولار سەن ٷشىن ەجەلگى ۇيىندىلەردى قايتا سالادى+،سەن ۇرپاقتان ۇرپاققا قيراپ جاتقان نەگىزدەردى قايتا تۇرعىزاسىڭ+.
سەن دۋالداردىڭ جارىقتارىن جوندەۋشى+،بويىندا جۇرت مەكەندەيتىن جولداردى جوندەۋشى رەتىندە تانىمال بولاسىڭ.
13 مەنىڭ كيەلى كۇنىمدە ٶز مۇددەڭنەن باس تارتىپ، دەمالىس كۇنىمدى بەرىك ۇستانساڭ+،دەمالىس كۇنىن زور قۋانىش كۇنى، ەحوبانىڭ كيەلى كۇنى، داڭقتالاتىن كۇن دەپ اتاپ+،ٶز مۇددەڭدى ويلاماي ٵرى بوس سوزدەن اۋلاق بولىپ، سول كۇندى داڭقتاساڭ،
14 زور قۋانىشتى مەنەن، ەحوبادان، تاباسىڭ،ساعان جەردىڭ بيىك قورعاندارىن باعىندىرامىن+.
باباڭ جاقىپتىڭ مۇراسىنان ٴدام تاتقىزامىن+.
مۇنى ايتىپ وتىرعان — ەحوبا».
