پەتىردىڭ 2-حاتى 1:1—21
1 مەن، يسا ٴماسىحتىڭ قۇلى ٵرى ەلشىسى شيمون پەتىر، قۇدايىمىزدىڭ جانە قۇتقارۋشى يسا ٴماسىحتىڭ ادىلدىگىنىڭ ارقاسىندا بىزدىكىندەي اسا قۇندى سەنىمگە يە بولۋ مارتەبەسىن العاندارعا جازىپ وتىرمىن.
2 قۇداي جانە يەمىز يسا جايلى تۋرا ٴبىلىم+ ارقىلى مول راقىم مەن تىنىشتىققا بولەنە بەرىڭدەر.
3 ويتكەنى قۇدايدىڭ قۇدىرەتتى كۇشىنىڭ ارقاسىندا وزىنە شىن بەرىلىپ ٶمىر سۇرۋىمىزگە قاجەتتىنىڭ بارلىعى ٴبىزدى ٶز داڭقىمەن ٵرى ىزگىلىگىمەن شاقىرعاننىڭ تۋرا ٴبىلىمى ارقىلى رياسىز بەرىلدى+.
4 وسى دۇنيەدەگى ارام قۇمارلىقتىڭ سالدارىنان بولاتىن ازعىندالۋدان قۇتىلعاندىقتان، قۇدايلىق بولمىسقا ورتاقتاسۋلارىڭ+ ٷشىن سول داڭق پەن ىزگىلىك ارقىلى سەندەرگە اسا باعالى ٵرى تاماشا ۋادەلەر رياسىز بەرىلدى+.
5 مىنە، سول سەبەپتى ٶز تاراپتارىڭنان بارىنشا كۇش سالىپ+، سەنىمدەرىڭدى ىزگىلىكپەن+، ىزگىلىكتەرىڭدى بىلىممەن+،
6 بىلىمدەرىڭدى ۇستامدىلىقپەن، ۇستامدىلىقتارىڭدى+ تاباندىلىقپەن، تاباندىلىقتارىڭدى قۇدايعا شىن بەرىلگەندىكپەن+،
7 قۇدايعا شىن بەرىلگەندىكتەرىڭدى باۋىرلاستىق سۇيىسپەنشىلىكپەن، باۋىرلاستىق سۇيىسپەنشىلىكتەرىڭدى بارىنە دەگەن سۇيىسپەنشىلىكپەن تولىقتىرىڭدار+.
8 ەگەر وسى قاسيەتتەر بويلارىڭدا بار بولسا، ٵرى مولىنان بولسا، يەمىز يسا ٴماسىح جايلى تۋرا بىلىمدەرىڭ ارەكەتسىز، جەمىسسىز بولمايدى+.
9 ال كىمدە بۇلار جوق بولسا، ول سوقىر، ٵرى جارىقتى كورمەۋ ٷشىن كوزىن جۇمادى*+. مۇنداي ادام بۇرىنعى كەزدە جاساعان كۇنالارىنان تازارعانىن+ ۇمىتىپ كەتكەن.
10 سوندىقتان، باۋىرلاستار، شاقىرىلعاندارىڭا+ جانە تاڭداپ الىنعاندارىڭا لايىق بولىپ قالا بەرۋگە بارىنشا ۇمتىلىڭدار. ويتكەنى وسى قاسيەتتەردى تولىقتىرا بەرسەڭدەر، ەشقاشان سۇرىنبەيسىڭدەر+.
11 سونداي-اق زور باتاعا يە بولىپ، يەمىز ٵرى قۇتقارۋشىمىز يسا ٴماسىحتىڭ ماڭگىلىك پاتشالىعىنا+ كىرەسىڭدەر+.
12 سول سەبەپتى سەندەرگە جازىپ وتىرعانىمنىڭ ٴبارىن بىلسەڭدەر دە، وزدەرىڭ تانىپ-بىلگەن شىندىقتا بەرىك تۇرساڭدار دا، ٴبارىبىر بۇلاردى ۇدايى ەستەرىڭە سالىپ وتىرماقپىن.
13 ٴبىراق مەن وسى تانىمدە*+ ٶمىر ٴسۇرىپ جاتقانىمدا بۇلاردى ۇنەمى ەستەرىڭە سالۋ+ ارقىلى سەندەردى وياتۋدى دۇرىس دەپ سانايمىن.
14 سەبەبى ماعان يەمىز يسا ٴماسىح بىلدىرگەندەي+، جاقىندا بۇل ٴتانىمدى شەشىپ تاستايتىنىمدى بىلەمىن.
15 مەن كەتكەننەن كەيىن، وسىلاردىڭ ٴبارىن ٵردايىم ەستەرىڭە الىپ تۇرا الۋلارىڭ ٷشىن قازىر قولدان كەلگەننىڭ ٴبارىن ىستەيمىن.
16 سەندەرگە يەمىز يسا ٴماسىحتىڭ قۇدىرەتى مەن وسىندا بولۋى* جايىندا ايتقاندا، ٴبىز شەبەر قيۋلاستىرىلعان اڭىز اڭگىمەلەرگە سۇيەنگەن جوقپىز. قايتا، ونىڭ ۇلىلىعىن ٶز كوزىمىزبەن كوردىك+.
17 ويتكەنى سالتاناتتى ۇلىلىق ارقىلى: «بۇل — مەنىڭ سۇيىكتى ۇلىم. مەن وعان ريزامىن!»+— دەگەن سوزدەر ايتىلعاندا، قۇداي اكە ونى قۇرمەت پەن ۇلىلىققا بولەدى.
18 ٴيا، ٴبىز ونىمەن بىرگە كيەلى تاۋدا بولعاندا، كوكتەن ايتىلعان وسى سوزدەردى ەستىدىك.
19 سوندىقتان پايعامبارلىق سوزگە دەگەن سەنىمىمىز بۇرىنعىدان دا ارتا ٴتۇستى. تاڭ اتىپ، تاڭعى جۇلدىز+ شىققانعا دەيىن، قاراڭعى جەردە، ياعني جۇرەكتەرىڭدە، جارقىراپ تۇرعان شام+ ىسپەتتى سول سوزگە دەن قويىپ دۇرىس ىستەپ جۇرسىڭدەر.
20 ەڭ الدىمەن، سەندەر مىنانى بىلەسىڭدەر: جازبالارداعى ەشبىر پايعامبارلىق الدەبىرەۋدىڭ جەكە تۇسىنىگىنە نەگىزدەلمەگەن.
21 ويتكەنى پايعامبارلىق ەشقاشان ادام بالاسىنىڭ قالاۋىمەن ايتىلعان ەمەس+، قايتا، ونى ادامدار قۇدايدىڭ كيەلى رۋحىنىڭ قوزعاۋ سالۋىمەن ايتقان+.
سىلتەمەلەر
^ مۇمكىن: «سوقىر، الىستان كورمەيدى».
^ سوزبە-ٴسوز «شاتىردا».
^ تۇسىندىرمەدەگى «يسانىڭ وسىندا بولۋىن» قاراڭىز.
