Ехоба куәгерлері “Киелі жазбалардың бәрі Құдай рухының жетелеуімен жазылған, әрі тәлім беруге... тиімді” екеніне сенеді (Тімөтеге 2-хат 3:16). Біз Киелі кітаптың көмегімен Жаратушымызды танып-білеміз және мән-мағыналы өмір сүреміз.

Киелі кітапта былай делінген: “Адамдар сенің есімің Ехоба екенін, бүкіл жер бетін билейтін жалғыз Құдай Тағала екеніңді білсін” (Зәбүр 83:18). Сондықтан да біз тек Ехоба Құдайға ғибадат етеміз және Куәгерлері ретінде оның есімін өзгелерге жариялаймыз (Ишая 43:10—12).

Мәсіхтің ізбасарлары болғандықтан, біз “Құдай Ұлы” * Исаның Мәсіх ретінде жерге келгеніне сенеміз (Жохан 1:34, 41; 4:25, 26). Ол өлген соң көкке көтерілді (Қорынттықтарға 1-хат 15:3, 4). Кейінірек Иса Құдай Патшалығының Патшасы болды (Аян 11:15). Бұл Патшалық — жер бетіне жұмақ орнататын көктегі шынайы үкімет (Даниял 2:44). Киелі жазбаларда: “Момындар жерді мұра етеді, керемет тыныштық орнағанын көріп, шаттыққа кенеледі”,— делінген (Зәбүр 37:11, 29).

Біз Киелі кітаптағы ақыл-кеңестер қазіргі таңда да өте пайдалы деп білеміз (Ишая 48:17, 18). Сондықтан біз ондағы ақыл-кеңестерге құлақ асамыз. Мысалы, Киелі кітап біздің санамыз бен тәнімізді улайтын нәрселерден аулақ болуға шақыратындықтан, біз темекі мен есірткі қолданбаймыз (Қорынттықтарға 2-хат 7:1). Сондай-ақ Киелі кітапта қатаң айыпталған істерден, атап айтқанда маскүнемдіктен, азғындықтан және ұрлық жасаудан аулақпыз (Қорынттықтарға 1-хат 6:9—11).