Римдіктерге 7:1—25
7 Бауырластар, заңды білетіндеріңе айтып отырмын, Заң адамға көзі тірісінде ғана билік ететінін білмеулерің мүмкін бе?
2 Мысалы, тұрмыстағы әйел күйеуінің тірісінде оған заңмен байлаулы, ал күйеуі өлсе, оның заңынан босайды+.
3 Сол себепті күйеуінің тірісінде басқа біреуге қосылса, әйелді неке адалдығын бұзушы дер еді+. Ал күйеуі өлсе, әйел оның заңынан босайды. Сондықтан басқа біреуге қосылса, неке адалдығын бұзушы болып есептелмейді+.
4 Бауырластарым, сендер де Мәсіхтің тәні арқылы Заң үшін өлдіңдер. Осылай Құдайды даңқтайтын жеміс әкелуіміз үшін+ басқа біреудікі, яғни өлімнен қайта тірілген+ Мәсіхтікі болдыңдар+.
5 Өйткені тән қалауы бойынша өмір сүрген кезімізде, бойымызда Заң арқылы айқын болған күнәкар құмарлықтар билік етіп, өлімге жетелейтін жеміс әкелдік+.
6 Ал енді кезінде бізді құрсауында ұстаған Заң үшін өліп, одан босадық+. Осылай бұрынғыша, яғни жазбаша заңға сай емес+, қайта, жаңаша, яғни киелі рухқа сай, Құдайдың құлы болып қызмет етеміз+.
7 Онда не демекпіз? Заңда кемшілік бар ма? Жоқ, мүлдем олай емес! Заң болмаса, мен күнәнің не екенін білмес едім+. Мысалы, онда “Сұқтанба!”+ делінбесе, сұқтанудың дұрыс емес екенін білмес едім.
8 Алайда күнә осы заң арқылы пайда болған мүмкіндікті пайдаланып, бойымда сұқтанудың небір түрін оятты. Өйткені заң жоқ болғанда, күнә өлі еді+.
9 Бір кездері, яғни заң жоқ кезде, мен тірі болдым, бірақ заң берілгенде, күнә қайта тірілді, ал мен өлдім+.
10 Осылайша мен өмірге жеткізуі тиіс заңның+ өлімге жетелейтінін түсіндім.
11 Өйткені күнә заң арқылы пайда болған мүмкіндікті пайдаланып, мені еліктіріп, өлімге ұшыратты.
12 Ендеше Заңның өзі қасиетті, ондағы бұйрықтар да қасиетті, әділ әрі ізгі+.
13 Сонда ізгі нәрсенің мені өлімге душар еткені ме? Әрине, жоқ! Мұны істеген — күнә. Осылайша ізгі нәрсе арқылы күнәнің мені өлімге ұшырататыны көрінді+, әрі заң арқылы күнәнің қаншалықты зұлым екені белгілі болды+.
14 Өйткені біз Заңның Құдайдан* екенін білеміз, ал мен күнәнің құлы болуға сатылған пендемін+.
15 Себебі мен не істеп жүргенімді түсінбеймін: өзім қалағанды істемеймін, керісінше, жек көретінді істеймін.
16 Егер өзім қаламағанды істеп жүрсем, онда Заңның ізгі екенін мойындағаным.
17 Олай болса, өзім қаламағанды істеп жатқан мен емес, бойымдағы күнә+.
18 Мен бойымда, яғни тәнімде, еш жақсылықтың жоқ екенін білемін. Өйткені жақсылық жасауды қалауын қалаймын, бірақ оны істей алмаймын+.
19 Осылайша өзім қалайтын жақсылықты емес, қайта, қаламайтын жамандықты жасаймын.
20 Ал өзім қаламағанды істеп жүрсем, онда оны мен емес, бойымдағы күнәнің істеп жүргені.
21 Сонымен, мен мынадай заңдылықты байқадым: дұрыс нәрсені жасағым келгенде, жанымнан жамандық табылады+.
22 Іштей Құдай заңына қуанамын+,
23 алайда бойымда басқа бір заңның бар екенін байқаймын+. Ол ой-санамдағы заңға қарсы күресіп, мені тәнімдегі күнә заңының тұтқыны етеді+.
24 Сорлы басым-ай! Өлімге жетелейтін осы тәнімнен мені кім құтқарады?
25 Иеміз Иса Мәсіх арқылы мені құтқарып алатын Құдайға рақмет! Сонымен, ой-санам — Құдай заңының, ал тәнім — күнә заңының құлы+.
Сілтемелер
^ Сөзбе-сөз “рухани”.
