Исраилдің алғашқы патшасы Саул болды. Алайда Ехоба оны патша болуға жарамсыз деп тауып, оның орнына Дәуітті таңдайды. Біз Дәуіттің біраз істерімен танысамыз. Ол жас күнінде Ғолият алыппен жекпе-жекке шығады. Кейінірек күншіл Саул патшадан қашады. Бұдан кейін Әбигел сұлу оның жөнсіз іске баруына тоқтау салады.

Ал бұдан соң Исраилдің патша тағына Дәуіттен кейін отырған оның ұлы Сүлеймен жайлы көп нәрсе білеміз. Исраил патшаларының алғашқы үшеуі 40 жылдан билік еткен. Сүлеймен өлген соң, Исраил солтүстік және оңтүстік патшалық болып екіге бөлініп кетеді.

Он рудан тұратын солтүстік патшалық 257 жыл бойы патшалық етеді де, ақыр аяғында оны ассириялықтар күйретеді. Бұдан 133 жыл өткен соң, екі рудан тұратын оңтүстік патшалық та күйрейді. Ал исраилдіктерді Бабылға тұтқынға әкетеді. Сонымен ТӨРТІНШІ бөлімді оқи отырып, 510 жыл аралығында болған талай қызықты оқиғаларды көз алдымыздан өткіземіз.