Елдегі жағдай тұрақталғанда бауырластар қаңырап бос қалған үйлеріне оралды. Соғыстың кесірінен бытырап кеткен қауымдар бұрынғыдай кездесулер өткізе бастады. Әсіресе Сьерра-Леоненің соғыстан қатты зардап шеккен шығыс аймағында қауымдар көптеп құрылды. Бір аймақта қызмет еткен арнайы ізашар былай дейді: “Бірінші кездесуге 16 адам келді, келесісіне 36, одан кейінгісіне 56, ал Еске алу кешіне 77 адам қатысты! Біздің қуанышымыз қойнымызға сыймады!” Елде жаңадан 9 қауым құрылып, ақырында олардың саны 24-ке жетті. Ғалақад мектебін бітірген он миссионер келіп, уағыз ісіне жаңаша леп берді. 2004 жылы Еске алу кешіне 7594 адам келді, бұл жариялаушылардың санынан бес есе көп еді! Осындай өсім Гвинеяда да орын алып жатты.

Қайтып келген босқындарға орналасып алуға көмектесу үшін Басқарушы кеңес жапа шеккендерге көмектесу қорынан бірден қаржы бөлді (Жақ. 2:15, 16). Құлшынысты ерікті қызметшілер 12 Патшалық сарайын соқты және қалпына келтірді, сондай-ақ Коиндудағы Конгресс сарайына жөндеу жұмыстарын жасады. Олар сонымен қатар үйлері қирап қалған отбасыларға сазбалшық кірпіштен 42 үй тұрғызды. Төбесі темір шатырмен жабылған үйінің жанында тұрған 70 жасар әйел бауырластың көзінен қуаныш жасы төгіліп былай деді: “Ехоба, рақмет! Ехоба, рақмет! Бауырластар, рақмет!”

Филиал сондай-ақ ресурстары шектеулі елдерге арналған бағдарлама бойынша қаржы бөліп,  Патшалық сарайларын соға бастады. Бо Батыс қауымында ақсақал әрі ізашар болып қызмет ететін Сайду Джуана былай дейді: “Бір әйел бауырлас маған: “Егер біздің жаңа Патшалық сарайымыз болатынын естісем, қолыммен де, аяғыммен де шапалақ ұрар едім”,— деді. Бізде жаңа Патшалық сарайы болатынын хабарлағанымда, сол бауырлас орнынан атып тұрып, шапалақтап, билей бастады, аяғымен де, қолымен де “шапалақтады” деуге болады!”

2010 жылы Ватерлоо қауымы жаңа Патшалық сарайын бағыштады, оны 800 орынды Конгресс сарайы ретінде де қолдануға болатын. Бауырластар осы жер телімін сатып алатын күні басқа бір сатып алушы жер иесіне көбірек ақша ұсынған екен. Бірақ жер иесі: “Мен бұл жерде сауда-саттық жүргізілгеннен гөрі, діни жиналыстар өткізілгенін қалаймын”,— депті.

Ресурстары шектеулі елдерге арналған бағдарлама бойынша Сьерра-Леонеде 17, ал Гвинеяда 6 Патшалық сарайы соғылды. Қарапайым болса да, бұл ғибадат етуге лайықты орындар көптеген адамды қауым кездесулеріне келуге талпындырды.

Бауырластар уағыз ісіне белсене атсалыса бастағандықтан, филиал сирек уағыздалатын аймақтарда екі ай уағыздау науқанын ұйымдастырды. Жариялаушылар 15 000-ға жуық кітап таратты және көптеген қызықты оқиғаларды бастан кешірді. Кейбір адамдар Ехоба куәгерлерінен сол жерлерде қауым құруларын өтінді. Нәтижесінде жаңа екі қауым құрылды. Бауырластар бір шалғай ауылда уағыздап жүріп, соғыс кезінде ұйымнан қол үзіп қалған екі әйел бауырласты кездестірді. Сол ауылда бауырластар бірден жүйелі түрде өтетін қауым кездесулерін ұйымдастырып, бірнеше адаммен Киелі кітап зерттеу сабағын бастады.

 2009 жылы филиалдағы бауырластар Гвинея орманында орналасқан шалғай бір ауылда өздерін Ехоба куәгерлеріміз деп атап жүрген адамдар туралы естіді. Олар жағдайдың анық-қанығын білу үшін сол жерге бауырластарды жіберді. Сөйтсе, бір қарт бауырлас зейнетке шыққаннан кейін өзінің туған ауылына қайтып келіп, уағыздаған екен. Ол қайтыс болғанға дейін бірнеше ер адаммен зерттеу сабағын өтіпті. Сол ер адамдардың бірі Ехобаға сенім артып, басқалармен Киелі кітаптан алған білімімен бөлісе бастапты. Сондай-ақ ол қарт бауырластың әдебиеттерін қолданып, кездесулер жүргізіпті. Бір жариялаушы бұл топты кездестіріп қалғанға дейін олар 20 жыл бойы Ехобаға осылай ғибадат етіп келген екен. Филиал оларға рухани көмек көрсету үшін тез арада бауырластарды жіберді. 2012 жылы сол ауылда өткен Еске алу кешіне 172 адам келді.

Соңғы кездері көптеген “жоғалған қойлар” қайта табылуда. Бұлар қауымнан алыстап кеткендер мен қауымнан шығарылғандар еді. Мұндай “адасқан қойлар” теріс жолдарынан қайтып, шындыққа қайта бет бұруда. Ал Ехобаның халқы оларды құшақ жая қарсы алып жатыр (Лұқа 15:11—24).

Ізгі хабармен бөлісіп жүрген кезінде елші Пауыл “әртүрлі адамдарды... құтқару үшін қолдан келгеннің бәрін істеген” (Қор. 1-х. 9:22, 23). Сьерра-Леоне мен Гвинеядағы Ехобаның қызметшілері де әртүрлі адамдарға шындықты жеткізу үшін бейімделуге тырысады. Мысалы, екі елде де ең үлкен діни топқа жататын мұсылмандармен кейбір жариялаушылардың қалай пікір алысатындарын қарастырайық.

Бұрын мұсылман болған Сайду Джуана былай дейді: “Мұсылмандар Адам атаның топырақтан жаратылғанына сенгенмен, ол көктегі жұмақта өмір сүрген деп ойлайды. Ойларын түзетуге көмектесу үшін мен олардан былай деп сұраймын:

 — Топырақ қайдан алынады?

— Жерден.

— Демек, Адам ата қайда жаратылған?

— Жерде.

Оларға дұрыс тұжырымға келуге көмектесу үшін Жаратылыс 1:27, 28-ді оқып, тағы былай деп сұраймын:

— Көктегі жаратылыстардың балалары болуы мүмкін бе?

— Жоқ. Періштелерде еркек, әйел деген болмайды ғой.

— Демек, Құдай Адам ата мен Хауа анаға балаларың болсын деп айтқан кезде, олар қайда болды?

— Жерде.

— Сонымен Құдай жұмақты қайта орнатқанда, жұмақ қайда болу керек?

— Осы жер бетінде.

Сайду мынадай тұжырымға келгенін айтады: “Жазбалардың көмегімен осылай пікір алысу көптеген ақжүрек мұсылмандарды әңгімені жалғастырып, Киелі кітапқа негізделген әдебиеттерді алуға талпындырады”.

Бұрын имам болғысы келген Момо есімді дүкен иесінің мысалын қарастырып көрейік. Куәгер миссионерлер онымен Жазбалардың көмегімен пікір алысқанда, білгендері Момоға қызық болады. Ол тіпті аудандық конгресс бағдарламасының жартысына қатысады және естігендері оған қатты ұнайды. Төрт күннен кейін ол әйелі Раматумен және бес баласымен Еске алу кешіне қатысады. Сөйтіп Момо Киелі кітапты тыңғылықты зерттеуді шешеді. Бірнеше сабақтан кейін ол дүкенінде темекі сатуды тоқтатады. Ол өзінің сатып алушыларына темекінің адамдарға зиян екенін әрі Құдайға ұнамайтынын айтады. Сондай-ақ Момо дүкенде отырып, әйелімен және балаларымен зерттеу сабағын өткізеді. Момо отбасымен зерттеу өткізіп жатқан кезде сатып алушылар  келіп қалса, ол зерттеудің отбасы үшін қаншалықты маңызды екенін түсіндіріп, олардан күте тұруды өтінеді. Рамату екеуі некелерін заңдастырғанда, туысқандары оларға қатты қарсылық көрсетеді. Бірақ шешімдеріне берік болған Момо мен Рамату оларға батыл түрде куәлік береді, ақырында туыстары олардың көзқарастарын құрметтей бастайды. Момо 2008 жылы, ал Рамату 2011 жылы шомылдыру рәсімінен өтеді.

Ехобаның халқы Құдай Сөзіндегі өнегелікке қатысты нормаларды, сондай-ақ қанға қатысты нұсқауды берік ұстанады (Ел. іс. 15:29). Осының арқасында Сьерра-Леоне мен Гвинеядағы дәрігерлер Куәгерлердің қанға қатысты көзқарасын құрметтей бастады.

 1978 жылы бауырластар Сьерра-Леонедегі дәрігерлерге, медбикелерге, аурухана басшыларына, заңгерлерге және судьяларға “Ехоба куәгерлері және қанға қатысты сұрақ” деген кітапшаны таратты. Кейін аяғы ауыр бір әйел бауырлас ішінен қан кетіп ауырғанда, дәрігерлер оны қансыз емдеуден бас тартты. Алайда “Қанға қатысты сұрақ” кітапшасымен танысып, ондағы мәліметтің қисынды екенін түсінген бір дәрігер көмектесуге келісті. Сөйтіп, бауырласымыз дүниеге сап-сау бала әкелді және өзі де оңалып кетті.

Шамамен 1991 жылы Кенема ауруханасында оташы болып істейтін Баширу Курума есімді дәрігер “Қан өміріңді қалай сақтап қала алады?” деген кітапшаны оқыды. Ондағы мәлімет дәрігерге қатты ұнады, сөйтіп ол Киелі кітапты зерттеп, қауым кездесулеріне келе бастады. Оқыс жағдайдың кесірінен көк бауырына қатты зақым келген тоғыз жасар Куәгер балаға ота жасау керек болды. Бірақ дәрігерлер оған қансыз ота жасаудан бас тартып, ата-анасына: “Балаңызды алып кетіңіз, ол бәрібір өледі!”— деп айтты. Сонда баланың ата-анасы дәрігер Куруманың көмегіне жүгінді, ал ол балаға ота жасап, оны аман алып қалды.

Көп ұзамай Курума дәрігер қансыз ем түрін батылдықпен қолдайтын Курума бауырласқа айналды. Куруманың емделушілерінің бәрі жазылып, ауруларынан айығып жатса да, басқа дәрігерлер оны осы көзқарасы үшін шеттететін. Әйтсе де кейінірек әріптестерінің кейбірі күрделі ота жасайтын кезде оны көмекке шақыратын болды.

1994 жылдан бастап Фритаундағы филиалдың Ауруханалармен байланыс бөлімі Сьерра-Леоне мен Гвинеяда Ауруханалармен байланыс комитеттерін ұйымдастырды. Бұл комитеттер науқастанған көптеген Куәгерлерге сүйіспеншілікпен қолдау көрсетіп, оларға қан құймай емдеуге келісетін дәрігерлерді табуға көмектеседі.