Aallartiaarnissaq pingaaruteqarpoq

MEEQQAT timimik qanoq ingerlaneranik inunnullu kanngunartuliorniartunut qanoq ilillutik illersorsinnaanerminnik isumatuumik nassuiaateqqissaarneqarnissaminnut pisinnaatitaapput. Qaquguli taamaaliulertariaqarpa? Amerlasuut isumaannit siusinnerusumik.

Inuusuttuaranngulernermi, pubertetimik taaneqartartup aallartinnerani, kinguaassiorsinnaanngulernermut takussutissat takkuttarput. Niviarsiaqqat ilaat immaqa qulinik ukioqarlutik siusinnerusukkulluunniit aaqalertarput, ilaalli aatsaat 16-inik ukioqarlutik kingusinnerusukkulluunniit. Nukappiaqqat 11-nik 12-inilluunniit ukioqarlutik unnuakkut sinimminni nammineersumik anisoortalertarput. Illit meeqqatit tamanna pitinnagu, soorlu qulingiluat missaanni ukioqarneranni, tamatuminnga ilisimatereerpigit? * Aamma taamatut utoqqaatigineranni paasitereerpigit atoqateqarsimannginnermik attassiinnarnissap pingaaruteqassusianik?

Timip allanngoriartorneranik oqaluttuuttarsigit

Paniit timimini Guutip pinngortitaani allanngulernernik paasisaqartinneqarnissaminut pisinnaatitaavoq. Immaqa anaanaasup aaqarnermini aaqarnini eqqartorsinnaavaa, atortorisartakkanilu takutillugit. Nassuiaassinnaavaa aaqartarneq pissusissamisoorluinnartuusoq, timaalu ukiualunnguit qaangiuppata katinnissaanut meeraqalernissaanullu piareersarnialersoq. Oqaluttuussinnaavat illissami qaammatit tamaasa ameraasaq maavaartoq taqaaqqanik aammik ulikkaartunik ulikkaartoq pinngortalersartoq. Naartulinngikkaannilu ameraasaq taanna kaanngartarpoq arnallu ammaneratigut anialersarluni, tamannalu aaqarnermik taaneqartarpoq.

Aamma ernerit unnuakkut sinitsilluni nammineersumik anisoortarneq pillugu siusissukkut oqaluttuutereertariaqarpat. (5 Moses 23:10, 11) Paasitittariaqarpat, ilaannikkut sinnattornermut atatillugu, nuaasaq nipeqqaaluttoq tassaaginnartoq anisooq katersuussimasoq pinngitsoorani timimit anisussaq. Timip allanngulissutaasa tamakkua pissusissamisoortuunerannik ernerit paniillu oqaluttuuttariaqarpatit. Imaaginnarpormi timaat siunissami katissimallutik aappaqalerumaarnissaannut meerartaarsinnaalernissaannullu piareersalersoq.

Ilissi angajoqqaatut tamakkununnga tunngasut ilumoorulluinnartariaqarpasi. Timitta taamatut ingerlaaseqarnera Guutip aaqqissuussaraa, Guutillu meeqqassinnik tamakkuninnga ilinniartitsisussatut toqqarsimavaasi.

Atoqatigiinneq isumannaatsoq sunaava?

Ukiut ingerlapallattaqaat meeqqasilu inuusuttuaranngussapput, taamaattumik qulakkeertariaqarparsi ilisimalluarneraat katissimanani atoqatigiittarneq ulorianarsinnaasoq, allat akerlianik oqartaraluarpataluunniit. Nappaatit kinguaassiuutitigut tunillaattartut, ilaatigut AIDS, nunarsuaq tamakkerlugu naalliuutaapput. Nappaatit tamakkua meerartaarsinnaajunnaarnermik, innarluutilimmik meerartaarnermik, kræfteqalernermik, aap, allaallu toqumik, kinguneqarsinnaapput. Aammalu tamakkuninnga nappaatillit nappaateqarnertik nalulluguluunniit tunillaassuisarput.

Meeqqavillu paasisariaqarpaat naartulersoornissamut nappaammilluunniit tunillatsinnissamut illersuummik 100 procentimik isumannaalluinnaqqissaartumik nassaassaqanngitsoq. Tupaallannarpormi inuusuttuararpassuit amerlaqisut naak assigiinngitsunik naartunaveersaateqaraluarlutik naartulertarmata. Naallu oqartoqartaraluartoq AIDS-imik tunillatsinnissamut usuup puui illersuutaasartut, atuagassiami The New England Journal of Medicine-imi allassimavoq  usuup puuinik atuinerit 17 procentiini AIDS-imik tunillatsinnissaq akornuserneqarsinnaasimanngitsoq.

Ray Kerrisonip, aviisimi New York Times-imi aaqqissuisup, usuup puui ’AIDS-imik tunillatsinnissap ilimanaataanik annikitsuararsuanngortitsinerarlugit’ oqartarneq akerlilerpaa ima allalluni: „Annikitsuararsuanngortitsisartut? Illuinnarsuut arfinilinnik patronilertagaq ataatsimik immerlugu patronilertarfia kaavitillugu imminut saatillugu igikkaanni toqunissamut ataatsimiit arfinilinnut periarfissaqarpoq. Usuup pooqarluni atoqateqaraanni AIDS-imik tunillatsinnissaq ataatsimiit tallimanut ilimanaateqarpoq. Usuup puuata AIDS-imut illersuutaaneranik upperisapalaaq eqqortumik taaguusertariaqarparput. Kinguaassiuutitigut ’illuinnarsuummik’ pinnguarneq.“

Meeqqavit paasisariaqarpaat kinguaassiuutitigut tunillatsinnissamut ataasiinnavimmik illersuutissaqarmat. Tassa kinguaassiuutit atorneqarnissaannik Guutip aaqqissuussaanik akuerinninneq. Katissimalluni aappariinnerup iluinnaani, inuuneq tamaat aappamik immisut inooriaaseqartumik ataasiinnarmik, atoqateqartarneq tamanit isumannaannerpaavoq.

Guutip unnersuussutai illersuutaapput

Biibilimi ima allassimavoq: „Angutip . . . nuliani attavigissavaa.“ ’Arnaaneqassanngilatit (allasiussanngilatit).’ ’Uersaasoq kingornussassaqanngilaq Kristusip Guutillu naalagaaffianni.’ — 1 Moses 2:24; Matîuse 5:27; Evfisumiut 5:3, 5.

Unnersuussut tamanna naqisimanninniarnerunngilaq, ilaqutariinnilli pilluartunik ataqatigiilluartunillu pilersitsisarpoq. Taamaalillunimi naartoq pisinnaatitaaffimminik pisarpoq, tassa angajoqqaat marluk, ataata anaanalu. Taakku tamarmik immikkut assigiinngitsunik piginnaaneqarput meeqqamut ingerlateqqissinnaasaminnik.

Ilissi angajoqqaat ilinniartitsinissigut maligassiuinissigullu Biibilimi najoqqutassiat meeqqamut uummammiuliutsinniartariaqarpasi puiuikkiutsinniartariaqarlugillu. Qajannaatsunik innermillu ikikkarneqarsinnaanngitsunik atortoqarlusi sanasariaqarpusi. Soorlu Biibilimi oqaatigineqartoq: ’Taava kialuunniit immikkut suliaa ersissavoq, ullussap nalunaalliumaarmagu; innermimi saqqummerumaarpoq, kinaagaluartullu suliaa qanoq innersoq innerup misilissavaa.’ Atortussanik pitsaasunik sanagussi sanaassilu misilinneqarnini anigorpagu pilluaqqusaangaassaasi. — 1 Korintumiut 3:13.

Pingaaruteqartorli alla suli samminngilarput: Meeqqat inuusuttuaraaneranni inersimasunngulernerannilu qanoq ililluni ilinniartinneqarnerusinnaappat? (gD 22/2 92)

[Quppernerup ataani ilanngussaq]

[Qupp. 26-mi assiliartaq]

Meeqqap timimi allanngoriartulernissaanut piareersimatinnissaa pingaaruteqarpoq