Biibilimi qanoq oqaatigineqarpa?

Guutip imigassartorneq ajoraa?

’CRACK, heroini, lsd marihuanalu puiuinnakkit — imigassaq suli tassaavoq innuttaaqatigiinni ajornartorsiutit annerpartaat. Ikiaroornartunit allanit tamanit imigassaq toqunermut innuttaaqatigiinnilu atugarliornermut pissutaanerpaavoq.’ Ukiut pingasut matuma siorna Canadami isuma tamanna saqqummersinneqarpoq Silarsuarmi Arnat Kristumiut Iminngernaveersaarniaqatigiit ataatsimeersuarnerisa 31-issaanni, ukuit pingasut allortarlugit ingerlanneqartartumi.

Ataatsimeersuaqataasut silarsuaq tamakkerlugu imigassartornerup alliartuinnarnera inuit inuunerannut peqqissusiannullu navianartutut siooranartutut isigaat, soorunamilu nunat tamarmik immikkut naalagaaffiisa imerajunneq akiorniarlugu aningaasarpassuarnik atuisariaqartarnerat aarlerissutigalugu. Inuppassuit ajunngitsumik isumallit qularinngilaat Guutip imigassat assuarigai, taamaattumillu aalakoornartut tamaasa inerteqqutigineqarnissaat anguniartarlugu. Kisianni taama isummerneq Biibilimut naapertuuppa?

Biibili viinnisornerlu

Itsaq Guutip innuttani naalattut ima neriorsorsimavai: „Taava quitit imaqalerumaarput naammattorsuarnik, tunguiaaffitillu utsersorumaarput paarnat [viinnissat] isserannik.“ (Ussatit 3:10) Aap, Guutip viinnissamik inerititaqartartumik tunisimavaatigut allaallu qapuup cellii viinniliorfissaq nalleraangat viinnissamik qalliisartut pinngortissimallugit.

Guutip pruffiitiata Esajasip qanoq ililluni pitsaasumik viinniliortoqarsinnaasoq ilaatigut eqqartorsimavaa. Silarsuassami nutaami naapertuilluarfiusumi pilluaqqussutissat takorloorlugit ima allassimavoq: „Katersaarsuit Naalagaat [Jehova] . . . inuiannik tamanik neriartortitsissaaq sassarlugu . . . viinni kimittooq, . . . viinni kimittooq pitsaalluinnartoq.“ (Jesaja 25:6) Viinniliortut pikkorissut nalunngilluarpaat viinni kimittuunngorsarlugu sivisuumik uninngatitaasoq qalippersimasorlu arriitsumik sukuluissiartuaartartoq, tipiginnerujartortarluni mamarnerujartortarlunilu.

Inuulluarniut peqqinnartoq?

Guutip paasitippaatigut viinni tassaannaanngitsoq inuulluarniut, aammali paasitippaatigut peqqinnartuusoq. Pruffiitip Jotamip ’viinnissaatip tungua guutinik inunnillu nuannaalersitsisartoq’ eqqartorsimavaa. (Eqqartuussisut 9:13) Kunngi Salomon allassimavoq ’qiimmassarluni viinnisorniarluni’. (Nalunaajaasup oqaasii 2:3) Aamma Kanami  katittorsiorneq pillugu oqaluttuami tusaamasaasumi oqaluttuarineqarpoq Jesus siullermeerluni tupinnartuliorluni katittorsiortut nuannaarutigisaannik imeq annertooq viinninngortissimagaa ’pitsaasoq’. — Juánase 2:6, 7, 10.

Jesusip samariamiumik tullermut asannittumik assersuusiaanit paasineqarsinnaavoq Jesusip viinnip katsorsaataasinnaanera nalunngikkaa. Samariamiup tullermut asannittup angutip ikilersimasup ikii mattusersimavai ’uuliamillu viinnimillu kuillugit’. (Lúkarse 10:30-34) Apustili Paulusip Timoteus inuusuttoq kajumissaarsimavaa ’viinnimik pitsiartaqqullugu nasserissarmat ajukuluttarmallu’, ullumikkullu paasineqarsimavoq viinni inuussutissartaqarnermigut nakorsaataasinnaassutsimigullu naleqarluartoq. — 1 Timûtiuse 5:23.

Dr. Salvatore P. Lucia, Californiap Universitetiani nakorsaanermik ilisimatusarfimmi professoriusimasoq, atuakkiamini Wine and Your Well-Being-imi ima allassimavoq: „Viinni tassaannaanngilaq imigassaq inuussutissartalik pisoqaanerpaaq, aammali tassaavoq nakorsaat pingaarnerpaaq inuiaat oqaluttuarisaaneranni atorneqartuarsimavoq.“ Janet McDonald, inuussutissanik ilisimatooq, oqarsimavoq ingassaassinaveersaarluni viinnisorneq eqqissisaatitut kimikitsutut aqajaqqullu uutsisinnaassusianik siuarsaataasutut, illigisaqalersitsisartutut nerisassallu mineralertaannik timip tigooraaneranik siuarsaasutut issorinartoq.

Ingasaassinaveersaarneq imminullu naalakkersinnaaneq pisariaqarput

Tassa Biibilip nakorsaanermillu ilisimatuut viinni imigassallu aalakoornartortallit ajunngitsumik eqqartorpaat. Imigassamilli atornerluineq inuppassuarnut naalliunnartorpassuarnik kinguneqarsimavoq. Guutili pisimasunut alianartunut imigassamik atornerluinerup kingunerisaanut pisuutissinnaanerparput? Naamik, oqaatsiminimi Biibilimi sukumiisunik nassuiaasimavoq viinnimik atuineq atornerluinerlu suunersut.

Assersuutigalugu maluginiaruk tunissummik tamatuminnga atornerluineq Biibilimi qanoq sakkortuumik mianersoqqussutigineqartoq: „Ilaginiaqinagit viinnisorpallaartut, imaluunniit taakku ingasattumik neqitortut.“ Soorunami ima paasisariaqanngilaq Guutip naatitaannartortut imernaveersaartullu kisiisa iluarigai imaluunniit ingasaannagu viinnisortartut neqitortartullu assuarigai. Aap, Biibilip mianersoqqussutigisai tassaapput imerpallaarneq nerivallaarnerlu. Tamanna ussammit allamit takuneqarsinnaavoq: „Kikkut suaartartarpat ’alianaq’, kikkullu suaartartarpat ’eqqanaq’? Kikkut saqitsaattarpat, kikkullu naammagittaalliortarpat? Kikkut pinngitsoorsinnaasaraluaminnik ikeqalersarpat, kikkullu eqiannisunik iseqartarpat? Taamaattarput unnuarsuarmut ernguttut.“ — Ussatit 23:20, 29, 30.

Biibilimik allaqataasut Peterip Paulusillu kristumiut ingasaassinaveersaarnissaannik siunnersorsimavaat, ajoqersorlugit ’viinnisorpallaarneq’ ’viinnimillu putumaneq’ pinngitsooqqullugit. Oqaaqqissaarut tamanna ilungersuuttariaqarpaat, Paulusimi ima mianersoqqusivoq: ’Imerajuttut Guutip naalagaaffia kingornussarissanngilaat.’ Tassa Guutip ileqquliutiinnarlugu imerajuttut iluarinngilai, taakkulu allanngunngikkunik inuuneq naassaanngitsoq annaassavaat. — 1 Pîtruse 4:3; Evfisumiut 5:18 (NV); 1 Korintumiut 6:9, 10.

Taamaattumik imigassanut tungatillugu imminut naalakkersinnaanngitsoq imernaveersaartuuguni pitsaanerussaaq. (Naleqqiuguk Matîuse 5:29, 30.) Imigassamik annertunerujartuinnartumik pinngitsoorsinnaannginneq timikkut sanngiilliartuutaaginnarani aamma anersaakkut ajoqutaaqaaq. Taamaattumik tupinnanngilaq Guutip ilisimatuulluni ingasattumik imigassartornissamut mianersoqqummatigut.

Imigassap inerteqqutigineqarnissaanik tapersersuisut isumaannut akerliusumik Biibilimi imernaveersaarluinnarnissaq piumasarineqanngilaq eqqaallatsiaannarneqaraniluunniit. (5 Moses 14:26) Tussiaasiortoq Jehova pillugu ima allassimavoq: „Naatippatit ivikkat nersutaatit nerisassaat naasullu inuit naatissinnaasaat; pilersippatit iffialiassat nunamit viinnilu inunnik nuannaalersitsisartoq.“ Aap, Guutip viinni pinngortissimavaa ataqqinartumik ajunngitsumillu siunertaqarluni, tassa ingasaannagu atorneqartussatut. — Tussiaat 104:14, 15. (gD 8/11 91)

[Qupp. 8-mi assiliartaq]

L’Absinthe Edgar Degas-imit, 1877 — E.R.L./Sipa Icono