Kikkut kinguaassiuutinut tunngasunik ilinniartitsisussaappat?

NAALUNGIARSUK inoorlaaq angajoqqaanut nuannaarutaasaqaaq. Angajoqqaat meeraq pinnguaqatigisarpaat suninnguilu tamangajaasa ikinngutiminnut oqaluttuarisarlugit. Meerarli alliartortillugu angajoqqaat paasiartulersarpaat aamma akisussaaffimmik annertoorujussuarmik tigumiarlutik. Ilaatigut suliassaraat meerartik oqaluttuutissallugu silarsuarmi ileqqussatigut ajortunngorfiujartuinnartumi qanoq ililluni imminut illersorsinnaasoq.

Angajoqqaat qanoq ilillutik meeqqatik ikiorsinnaavaat ineriartornissaannut inersimasunngorlutillu ilaqutariittut inuunermik asaqatigiiffiusumik pilluarnartumillu nuannaarutiginnilernissaannut, immaqalu namminneq meeraqalerlutik meeqqaminnik Guutimik mianerinninnermik ilinniartitsilernissaannut? Angajoqqaat ilaasa tamanna suliassatut artornartorujussuartut isigaat, taamaattumillu siunnersorneqarnissartik qularnanngitsumik qujarutissaqalugu.

Immaqa meeqqatit illit perorsarneqarsimanittut perorsarpatit. Angajoqqaalli ilarpassui kinguaassiuutinut tunngasunik annikitsuinnarmik ilitsersorneqarsimapput imaluunniit ilitsersorneqanngilluinnarsimallutik. Naallu pitsaasumik ilinniartinneqarsimagaluartut taamaattoq silarsuarmi pissutsit allanngorsimapput, taamatuttaaq meeqqat pisariaqartitaat allanngorsimapput. Atuagassiallu matuma atuartartuisa ilarpassui inuunerminni pitsaanerusunik najoqqutassaqalersimapput inooriaaseqalersimallutillu. Taamaattumik imminut ima aperisinnaavutit: ’Meeqqannik ilinniartitseriaasera maannakkut pissutsinik isiginnittaatsinnut meeqqamalu pisariaqartitaannut annertusiartuinnartunut naapertuuppa?’

Angajoqqaat ilaasa meeqqatik kinguaassiuutinut tunngasunik paasissutissarsiniarnissaannik nammineertiinnartarpaat. Taamaalillunilu apeqqut annilaarnaqisoq pilertarpoq: Suut ilikkartarpaat? Kimit pissutsinilu qanoq ittuni ilikkartarpaat?

Suut atuarfimmi ilinniartitsissutigineqartut

Angajoqqaat ilarpassui oqartarput: „Atuarfiit tamanna isumagisarpaat.“ Ilumoorpoq atuarfiit ilarpassuini kinguaassiuutinut tunngasut ilinniartitsissutigineqartarput, ikittuinnarnili ileqqussanut tunngasut ilinniartitsissutigineqartarput. USA-mi ilinniartitaanermut ministeriusimasoq William J. Bennett 1987-imi oqarsimavoq atuarfiit „ileqqussatigut tunngasunik immikkoortiterinissaq piaaralutik akerlerigaat“.

Tomip, marlunnik panillip, ilinniartitsisoq ima aperisimavaa: „Sooq oqarfigiinnarneq ajorpisigik katissimanani atoqatigiinneq kukkusuusoq?“ Akivoq taamaaliorusuttaraluarluni, meeqqalli anaanaasa katissimanngitsut inooqataasalu ajuallattoortinnissaat atuarfiup kissaatiginngikkaa. Tassa atuartut atuarfimmi oqaluttuunneqartarput qinigassaqartut, kisianni oqaluttuunneqarneq ajungajapput qinigassaq suna eqqortuusoq.

 ’Atuakkamik pitsisissavakka’

Immaqa angajoqqaat ilaat ima oqassapput: ’Atuakkamik pitsisissavakka.’ Immaqami atuagaq pitsaasoq ikiuutaalluarsinnaavoq, kisianni atuarluaqqaartariaqarpoq paasiniarlugu isummat imarisai isumaqatiginerlugit. Atuakkat kinguaassiuutinut tunngasut ilaminiinnannguisa ileqqussanut tunngasut iserfigisarpaat, immaqalu suut eqqortuusut suullu eqqunngitsuusut eqqartunngilluinnartarlugit. Atuakkat ilaanni kinguaassiuutitigut kanngunartuliornissaq toqqaannartumik siunnersuutigineqartarpoq. Atuakkamillu atoqatigiinnerup katissimalluni aappariinnerup iluinnaani pisarnissaanik eqqartuisumik nassaarnissaq ajornakusuussaaq.

Tassa meeqqanik ileqqussanut tunngasunik ilinniartitsisussat tassaapput Guutip aallaqqaammulli tamatuminnga akisussaaffimmik naammassinneqqusai, angajoqqaat. Biibilimi ataataasut ima oqarfigineqarput: „Qitornannut [Guutip inatsisai] nangeqqittuartassavatit eqqartortarlugillu angerlarsimatillutit issiasaraangavit, angalaartaraangavit, innartaraangavit makittaraangavillu.“ — 5 Moses 6:7.

Angajoqqaammi meeqqaminnut allanit ilinniartitsisuulluarnerpaasinnaapput. Isummatut angajoqqaat aalajangiusimasaattut imaluunniit ilaqutariinni maligassiuilluarnerattut kimittutigisumik atuagaq atuarfilluunniit qaqugumulluunniit meeqqanut tunniussaqarsinnaanngilaq. Soorlu William Bennett oqartoq: „Misissuinertigut ersersimavoq pingaarnerpaamik angajoqqaat kinguaassiuutinut tunngasunik meeqqaminnik ilinniartitsisuugaangata meeqqat atoqatigiinnermik aallusseqqajaannginnerusartut. . . . Angajoqqaat [tamatumunnga atatillugu] allanit sunniuteqarnerusarput.“

Angajoqqaalli ilaasa annilaangassutigisarpaat meeqqatik kinguaassiuutinut tunngasunik oqaluttuukkunikkik misileraanialernissaat. Soorunami tamatumani sunik qanorlu ilinniartinneqarnerat apeqqutaasorujussuuvoq. Piviusuusorli tassa meeqqat qaquguluunniit kinguaassiuutinut tunngasunik paasisaqarumaarput. Taamaattumik pitsaanerpaannginnerpa angajoqqaaminnit asannittunit ileqqussatigullu eqqortuliorusuttunit eqqortumik pissuserissumillu tamakkununnga tunngasut paasisaqarfigippatigik, sumi tamaani, atuarfiup eqqaani imaluunniit inersimasunit kusananngitsumik eqqarsartaasilinnit ilikkarnagit.

Sulili manna apeqqutaavoq: Tamakkununnga tunngasut Guutimik mianerinnippaluttumik ataqqinnippaluttumillu qanoq ililluni ilinniartitsissutigineqarsinnaappat? Inuusuttuaqqat tusartarmassuk ’kikkut tamarmik taamaaliortartut’, taava qanoq ililluni qularunnaarsinneqarsinnaappat taamaanngitsoq katinnissaminnullu utaqqigunik pilluarnerussasut? Qanoq ililluni ikiorneqarsinnaappat paasitillugit ’kanngunartuliornerup nigornissaanik’ Biibilimi unnersuussutip maleruarneratigut pilluarneq annerpaaq anguneqaannarani aammali inooriaasituaasoq Guutimit iluarisaasoq? Ilanngutassiani tulliuttuni apeqqutit tamakku akiniarsarissavavut. — 1 Tásalûníkamiut 4:3. (gD 22/2 92)

[Qupp. 21-mi issuagaq]

„Najoqqutassiat eriaginartut angajoqqaat meeqqaminnut ingerlateqqitaat sunniuteqarnerpaasarsorinarput.“ — U.S. News & World Report