Inuusuttut aperipput:

Qanoq ilillunga suliffeqalernissannut piareersarsinnaavunga?

„PISSANGANARLUNILU annilaanganaqaaq!“ Maureen 16-inik ukiulik ullut ilaanni nammineerluni inuussutissarsiulernissani qanoq isumaqarfiginerini aperineqarami taama akivoq. Suliffeqalernissaq eqqarsaatigalugu pissusissamisuuginnarpoq annikitsuinnarmilluunniit annilaangassalluni — nuannersumik tamaviaarnartutut isigigaluaraanniluunniit. René atuarunnaangajalerluni oqarpoq: „Ukiut aqqaneq-marluk atuartariaqareersimalluni sulilissalluni nuannissaqaaq.“

Qanorluunniit isumaqarfigigaluarukku, qularnanngitsumik ullut ilaanni suliffeqarfimmi atorfinitsitaajumaarputit. Qanoq ilillutit piareersarsinnaavit? Atuartuutillutit ileqqorissaarneq ilinniarsinnaavat, soorlu piffissamik eqqorluaaneq. Inuusuttut suli atuartuusut atuareernerup kingorna suliffeqarnermikkut suliffeqarfinni inuuneq misilittagaqalerfigisinnaavaat. Suliffeqalernissamulli piareersaataasinnaasut pingaarnersaannut atuarnermik aallussilluarneq ilaavoq.

Sulineq oqimaaqatigiissumik isumaqarfigiuk

Siullermik paaseqqaartariaqarpat sulineq sumik ilimasuutigisaqarfiginerlugu. Inuusuttut ilaasa akissarsiassat kisiisa eqqarsaatigisarpaat. Ilumoorpoq ’pisuussutit sernersortaasut’ inuunermilu pingaaruteqartut. (Nalunaajaasup oqaasii 7:12) Biibilili ilumoorpoq oqarami ’peqangaaraluarluni pigisani inuup inuussutigisarinngikkai’. (Lúkarse 12:15) Atuakkami Yes — I Can!-imi atuakkiortut Barkai, Barkai Yeo-lu ima siunnersuuteqarput: ’Akissarsiassaannarnik eqqarsaatiginninneq nakutitaassutiginaveersaruk.’ Nangippullu: „Suliamik nuannarinninneq siunissami pilluarnissannut pingaaruteqaqataasorujussuuvoq.“ Paulo 17-inik ukiulik aningaasat oqimaaqatigiissumik isumaqarfigai, oqarami: „Naleqquttumik inooriaaseqarnissannut naammaannartumik akissarsiornissara kissaatigaara sulinera nuannaarutigiitigalugu.“

Kristumiuuguit alla aamma eqqarsaatigisariaqarpat. Suliffiup pissangarnartup nuannersumilluunniit tamaviaarnartup anersaakkut pisariaqartitat matusinnaanngilai. Pissusissamisuussappat ’inuup ileqqussaraa Guuti mianerissallugu inatsisaalu maleruassallugit’. (Nalunaajaasup oqaasii 12:13) Guutip kristumiut ’ajoqersuganngortitsinissaat’ piumasarimmagu, Jehovap nalunaajaasui inuusuttorpassuit pioneerinngorniartarput, tassa allamik atorfeqaratik oqaluussisartut. (Matîuse 28:19, 20) Niviarsiaraq Shulamitemik atilik Afrika kujallermiu aamma taamaaliorsimavoq. Oqarpoq ’inunnik anersaakkut pisariaqartitaannik tunioraaneq assut nalerisimaassutigalugu’.

Immaqa aamma illit allamik atorfeqarnak kiffartuussinissat anguniagaraat. Soorunalimi  inuussutissaqatariaqarputit. Immaqalu ullut arlaanni ilaqutariinnik pilersugaqalissaatit. Imaassinnaavorlu pioneeriunissannut periarfissaqanngitsutit, ullorlu naallugu suliffissannik ujarlertariaqarlutit. Qanorluunniilli ittunik atugaqassagaluaruit qularnanngitsumik Guutip sapinngisamik annertuumik kiffartuunnissaa kissaatigaat. Taamaattumik atuarnerpit sapinngisamik annertuumik pissarsiaqarfiginissaa pingaaruteqarpoq.

Sumut piukkunnarpit?

Nunat ilaanni inuusuttut ilinniarfissuarni ilinniarneq, teknikkimut tunngasunik ilinniarneq imaluunniit niuernermut tunngasunik ilinniarneq qinersinnaavaat. Ilaasa assassorluni sulineq qinertarpaat. Silatusaarnerusarpoq sunik suliffissaqarnersoq eqqarsaatigissallugu. Aammalu periarfissarisinnaasat nalilissallugit isumatusaarneruvoq. Qanoq ililluni? Piginnaaffigisat soqutigisallu allattornerisigut. Kisitsillaqqippit? Imaluunniit edb-mut pikkorippit? Imaluunniit maskiinanut tunngasunut? Suna sunngiffinni soqutigisariviuk? Tamakkua suliamut sumut piukkunnarnersutit tikkuussisinnaapput, immaqalu sumut ilinniartunngussanersutit fagillu sorliit qinissaneritit. Angajoqqaatit inersimasulluunniit allat piginnaassutsinnik soqutigisannillu naliliinissannik ikiuisinnaasut oqaloqatigikkit. — Naleqqiuguk Ussatit 15:22.

Inuit akornanniikkusuttarpit? Taamaappat immaqa pisiniarfimmi allaniluunniit inuit amerlasuut akornanni suliffimmiinnissat eqqarsaatigisariaqarpat. Assassullaqqissuuguit immaqa assassornermut ilinniarnissat qinersinnaavat. Allamik atorfeqaratik kiffartuussisut amerlasuut piginnaassuseqarniarlutik atuarfimmi sungiusartarput taamaalillutik imminnut inuutissinnaalerlutik. Ilai maskiinanut tunngasunik suliaqartutut, sanasutut, assassortutut, allatassanik sulisutut allatsitullu ullup ilaannaa suliffissarsisarput.

Damarisip, arnap inuusuttup Amerika kujallermi Columbiameersup, naatsorsuuserineq maskinamillu allanneq ilinniaramiuk iluaqutigaa. Ullup affaa suliffittaarpoq taamaalillunilu oqaluussinissaminut piffissaqalerluni. Kristumiut ilaat viceværtitut, asaasutut allatulluunniit inuussutissarsiuteqarput.

Qinigassaasinnaasut killeqaraangata

Pitsaasumilli ilinniagaqarsinnaaneq suni tamaniunngitsoq pineqarsinnaavoq; sumiiffiillu ilaanni atuarneq allannerlu ilinnianngingajattarpaalluunniit. Atuaqqittariaqarsinnaavoq, ilinniarfissarsilluni niuernermulluunniit tunngasunik sivikitsumik ilinniaqqittariaqarluni. Soqutiginarpoq amerlasuut allamik atorfeqaratik oqaluussisartuutigalutik  taamaaliorsinnaasimammata.

Nunani ineriartortinniakkani inuusuttunit qinigassaasinnaasut killeqaqaat. Katitip, angutip inuusuttup Afrika kujallermi illoqarfeeqqameersup, latinerisut, matematik fysikilu kisiisa qinersinnaasimavai, naak nunagisaminni piginnaaffit taakku nalikikkaluartut. Taamaakkaluartoq Katiti suliffissarsivoq. Qanoq ililluni? Nunaqarfimmini pissutsinut naleqqussarnermigut. Katiti atuarunnaarami naatitanik nammineq naatitaminik tuniniaalluni, nasanik qungasequtinillu meqqulualinnik nuersakkaminik tuniniaalluni, nakorsaatinillu nunaannarni aatsisarluni imminut inuutippoq. Atuarfimmi oqaloqatigiissinnaaneq ilinniarsimagamiuk akissarsiutaasinnaasut tamakku soqutiginartut sapinngilai.

Atuakkami Choosing Your Career and Your Higher Education-imi allassimavoq „oqaloqateqarluarsinnaanermut, paasinnissinnaanermut paasineqarsinnaanermullu“ piginnaassutsit suliffeqarfinni „pingaaruteqartorujussuusut“. Suliffeqarfiit amerlanerit iluanni, teknikkip, niuernerup ilinniarnertuutut ilinniaqarsimanerup iluaniugaluarpalluunniit, oqaloqateqarluarsinnaaneq pisariaqartinneqarpoq. Naak atuarfimmi atuartitaanerup suliffeqarfiit immikkut samminngikkaluarai, allannerup, oqalunnerup tusarnaarnerullu ilinniarnissaat pimooruttariaqarpatit. Suliffissarsiorninni oqaloqateqarninni oqaloqateqarluarsinnaassutsit qanoq isummerfigineqarnissannut aalajangiisuusorujussuuvoq, aap, kissaatigisannik suliffittaarnissannut aalajangiisuusinnaavoq. Jehovap nalunaajaasui inuusuttut amerlasuut oqaloqateqarsinnaaneq kristumiut ilagiivini teokratiimik ilinniarffimmi sungiusartarpaat.

Pilliuteqarit

Atuakkami Your Child At School-imi allassimavoq: „Tamatta immikkut piginnaasavut assigiinngillat.“ Inuusuttut ilaat teknikkimut tunngasunik piginnaaffeqarput, ilaasali atuagarsorneq pikkoriffigaat. Ammalu allat nipilersornermut, eqqumiitsuliornermut timersornermulluunniit pikkoriffeqarput. Qalipaanermik nipilersornermilluunniit ilinniartitsinermik aningaasarsiorneq, eqqumiitsuliortutut nipilersortartutulluunniit tusaamasanngorniarnermit pisuunngorniarnermillu allaaneruvoq, kingullerlu tamanna kristumiunut anersaakkut ulorianarsinnaavoq. Suliassatigulli tamakkunatigut qaffakkiartorneq kristumiutut sammisassanut, soorlu ataatsimmiittarnernut oqaluussisarnermullu, piffissamik killilersuisarmat aperisoqarsinnaavoq nipilersornermut eqqumiitsuuliornermulluunniit ilinniarnissamut ukiorpaaluit pilliutigissallugit imminut akilersinnaanersoq.— 1 Korintumiut 7:29.

Oqaluussisartoq inuusuttoq Philip tennisertartutut neriunartumik qaffakkiartulersimagaluarpoq. Philip nassuerpoq: „Naggataatigut tennisertarnerup kristumiussutsilluunniit akornanni qinersisariaqalersimavunga. Arlaannaalluunniit tamakkiisumik piffissaqarfiginngilanga. Tennisertarneq soraaruppara, taamanikkullu artornarsimagaluartoq peqqissimisimanngisaannarpunga.“

Apustili Paulus assingusumik qinersisariaqarsimavoq. Inatsisinik ilinniarnikuugaluarluni kristumiutut kiffartuussineq qinerpaa tupiliortutullu inuutissarsiuteqalerluni. (apustilit suliáinik agdlagkat 18:3; 22:3) Paulusilli qinikkani peqqissimissutigisimanngilaa. Oqarpoq: ’Iluanaaqqutigigaluakka Kristus pillugu ajunaaqqutaatippakka. . . . tamatigut ajunaartoorama tamaasalu igitassaannaatillugit Kristus iluanaaqqutigiumallugu.’ — Filípimiut 3:7,8.

Immaqa assingusumik qinersissaatit. Ilinniagaqqortuutut, nipilersortartutut eqqumiitsuliortutulluunniit piginnaanitit ineriartortinnagit, immaqa anersaakkut piginnaanivit ineriartortinnissaat qinissavat. Tamatuma kingunerisinnaavaa suliamik inuit suunngitsutut isigisaannik suliaqalernissavit naammagiinnartariaqalernissaa. Ilaannikkut inuusuttut angajoqqaatik suleqatigisinnaasarpaat, immaqalu sanasutut, ruujorilerisutut allatulluunniit ilinniarsinnaapput.

Sunaluunniit qineraluarukku, siunissat eqqarsaatigisariaqarpat. Atuartuunerit sapinngisamik annertuumik pissarsiffiginiaruk. Suliffeqalernissannut piareersaataalluassaaq! (gD 22/12 91)

[Qupp. 16-mi assiliartaq]

Amerlasuut atuarfimmi piginnaaffinnik sungiusarsimapput taamaalillutik imminut inuutissinnaanngorlutik