’Unnunngitsoq toqoreersimassaatit’

Afrikami kujallermi Iteritsi!-p ilanngutassiortuanit

„TOQULERLUTIT nalunngiliuk, unnunngitsorlu toqoreersimassallutit?“ nakorsaq aperivoq.

Aanaarsimanerminik nukillaarsimalluni Wyndham Cook 15-inik ukiulik akivoq ’aammik nereqqusinani’ Biibilimi inatsisip inuunerminilluunniit akeqassagaluarpat naalannissaa aalajangiusimagini. — apustilit suliáinik agdlagkat 15:20.

„Illuinnarsuut niaqqunnut tutseriarlugu imminut aallaajumassagaluarpit?“ nakorsaq assersuusiorpoq.

„Naagga,“ Wyndham akivoq. „Aalersortikkumannginnerulli imminorneq assiginngilaa. Guutip inatsisaanut naalanneruinnarpoq.“ Wyndhamip iggissami taqai tinusoornikut nappaatigai, tamatumalu ilaannikkut iluagut aanaartoortittarpaa. Tamatuma saniatigut Wyndham partiel hæmofilimik (tamakkiinngitsumik aanaarnermik nappaat) nappaateqarpoq, tamatumalu ajornartorsiut ilungersunarnerulersippaa.

Navianartorsiornissaq aarlerinarsivoq

Ukiut arfineq marluk ajunngereerluni marlunngornermi 28. november 1989 aanaaqqilermat Wyndhamip angajoqqaavisa ernumanerat paasinarpoq. Ingerlaannaq Wyndham napparsimaviliaanneqarpoq. Iggiamigut endoskopi-rtereerluni (ilukkut misissortinneq), hæmoglobinia deciliterimut 6,6 gramimut apparpoq. (Nalinginnaasumik deciliterimut 14-ip 15-illu akornanniittarpoq.) Unnuaq tamanna tamarmik ernumapput Wyndhamilu sinnarluppoq.

Pingasunngornermi ullup qeqqata missaani hæmoglobinprocentia 4,3-mut apparsimavoq, sulilu aanaarluni. Maannakkullu Wyndhamip sooq aalersortissinnaannginnera pillugu napparsimavimmi sulisunik oqaloqateqaqattaarnerit aallartipput. Wyndhamip ataataa, Chris, oqaluttuarpoq: „Biibili tunngavigalugu sivisuumik oqaloqatigaavut. Erseqqissarparput nakorsatut ikiuinissaat ajattunngikkipput inuunerluunniit naaggaarnagu. Navianartorsiornermimi tamatumani nakorsatut piginnaassusiat atorfissaqarteqaarput. Naaggaagatuarput tassa aalersortinnertalimmik nakorsartinneq.“

Nalunaaqutaq marlunut slangimik pullattakkamik taqarsuanut tinusoorsimaqisunut naqisimannittussamik taamaalillunilu aanaarneranik millisitsisussamik Wyndhamip toqqusaavanut mangussisoqarpoq. Slangi naavinut ingerlateqqinneqarpoq aak aanaarnerani aqajaruanut katersuussimasoq milluarniarlugu. Tamatuma nalaani, Wyndhamip angajoqqaavi peqanngitsillugit, niviarsiap Wyndham oqarfigaa: „Annikitsuinnarmik aalersortittuuguvit inuunerit annaatissagaluarpat. Angajoqqaatit palasillu paasitinneqarnavianngillat.“

„Jesus apustilinilu aqqaneq-marluk aammik imernikuupput,“ nakorsaq ataaseq patsisissarsiorpoq. „Kristus oqarsimavoq: ’Tassa aaga . . . imersiuk.’ Imminut kristumiutut taavutit Kristusillu maligassiaa malikkumavat. Taava sooq aalersortikkumanngilatit?“

Wyndham nassuiaavoq ermuseq Jesusip sassaassaa apustiliisa imerfigisimasaat viinnimik imaqarsimasoq. Assersuutaasoq Jesusillu nammineq aaginngikkaa. Wyndham aalajangersimalluinnangaarmat allagartaanut allagartamik ilisisoqarpoq, tassani nassuiarneqarluni 15-iinnarnik ukioqaraluarluni, sianissuseqarluarluni misigissutsinilu tamaasa atorlugit, aalajaalluinnarluni aalersortikkumanngitsoq. Wyndhamip taamatut aalajangiusimannilluinnarnerata pingaaruteqassusia aqaguani malunnarsivoq.

Sisamanngornermi seqernup nuilernerani ajorsiartorunnaartutut ileraluarpoq — sivikitsuinnarmilli.  Wyndham aanaaqqilerpoq. Nalunaaqutaq qulingiluanut hæmoglobinprocentia 3,0-imut apparsimavoq. Navianartorsiorpoq. Pilattaasarfimmi akisussaalluni nakorsaanerup Wyndhamip ilaqutai inimit aneqquvai. Kisimiilluni Wyndham oqaloqatigiumavaa.

„Kisiat qimannissaa oqinngeqaaq,“ anaanaa, Judy, oqaluttuarpoq. „Nukillaarsimanermini akuersiinnarnissaa annilaangassutigisimavarput. Qaammatilli arfinillit tamatuma siornatigut kuisissimavoq, taamaattumillu nammineq imminut illersorsinnaatitaalluni.“

„Iliuuserisinnaasatuarput tassa,“ ataataa oqarpoq, „Wyndham assuarnaassutsimi pigiinnarsinnaanissaanut ikioqqullugu Jehovap ilungersorluta qinnuiginissaa. Jehovap qinunikkut torlulaffiginissaa qanoq isumaqarnersoq ilikkarparput.“ Wyndham oqaluttuarpoq sarĸúmersitat 2:10 iluaqutigisimallugu. „Allassimaffik taanna imaattoq eqqarsaatigiuaannarpara: ’toqumut allaat ilumoorit, taava niaqorut inuussutaasoq ilinnut tunniukkumaarpara.’“

Eqqartuussisut aalajangernerat?

Naggataatigut nakorsaq oqarpoq Wyndham aalersortinniarlugu eqqartuussisut aalajangiinissaannik qinnuteqarniarluni. Wyndham ukiukimmat aalersortinnissaata aalajangiunneqarnissaa tamarmik ilimagaat. Wyndham qinnunneqaqaaq. „Ilagiinniittut tamarmik ilaqutariit Cookikkut misilinneqarnerannik atueqatigaat,“ Neville, ilagiit nakkutilliisuisa siulittaasuat oqaluttuarpoq. „Wyndham ajunnginneruleraangat ilagiinniittut tamarmik eqqissiallattarput. Ajorneruleraangallu sukaammisarput ajunngitsumillu inerneqarnissaanik qinusarlutik.“

„Eqqartuussisut aalajangernissaata utaqqinerani,“ Judyp eqqaamavaa, „utoqqaanertaqatigiit tamangajammik napparsimaviliarput napparsimasullu isersimaartarfianni utaqqillutik. Nuannaajallannaqaaq! Aanaaginnarpoq, hæmoglobinprocentialu 2,9-miippoq. Wyndhamip peqqisseqqinnissaa ilimanaateqarpasinngilaq.“

Nalunaaquttap akunnera ataaseq qaangiummat eqqartuussiviup aalajangiinera nalunaarutigineqarpoq. Wyndhamip pinngitsaalineqarluni aalersorneqarnissaa akueriumaneqanngilaq. Chris oqaluttuarpoq: „Paasivarput akuersinnginnerup pissutigigaa Wyndham ilisimmaarimmat misigissutsinilu tamaasa atormagit, aalajangiusimasamilu qanoq kinguneqarsinnaanera ilisimammagu, Biibilimillu upperisaqarnini tunngavigalugu aalajangernini eqqarsaatigeqqissaareersimammagu.“

Toqu ajaperlugu

Wyndhamili pitsaanerulinngilaq. Sisamanngornermi ullup qeqqani Chris Judylu ima ilisimatinneqarput: „Ernissi nalunaaquttat akunnialuinnanngui inuuffigisussanngorpai. Toqutinnani palasiminik qanigisaminillu oqaloqateqarnissaa kissaatigigussiuk, maannakkut aggeqquniarsigik.“ Wyndhamip nukaa, Jonathan qulingiluanik ukiulik, angajuni ilaginiassammagu aaneqarpoq.

Nalunaaqutaq marlup qeqqa slangi Wyndhamip toqqusaavinit nakorsat peerpaat ataqqinartumik toquniassammat. Nalunaaquttap akunnerini tulliuttuni Wyndhamip inuunera navianartorsioqaaq. Navianartorsiorpoq ajorneruleriartornanili; kissarneqaqaaq. Unnuaq naallugu toqoqqajaavoq.

Sapaatilli akunnerata naanerani pitsaaneruleriartorpoq. Ataasinngornermi angerlartinniarlugu aalajangertoqarpoq, napparsimavimmi qanoq iliuuseqarfigineqarsinnaajunnaarmat. Angerlarami ajornerulerpoq. Chris oqaluttuarpoq: „Wyndham kissumiarlugu illumut eqqupparput siniffianullu innartillugu. Minuttilluunniit 45-t qaangiutinngitsut iterpoq aanaartorujussuanngoqqillunilu. Artorsaqaagut! Guuti qinnuigaarput atukkatta eqqortumik anigornissaanik ikioqqulluta.“

Nalunaaquttap akunnerata affaa suli qaangiutinngitsoq Wyndham napparsimavimmut tassunga, inimut tassunga, nakorsamut tassunga uterpoq. Hæmoglobinprocentia 2,5-imut apparsimavoq. Unnuk taanna iltilersorneqalerpoq, anersaartorniarnini ajornakusoortimmagu. Aqaguani suli inuunera navianartorsiortoq nuannaajallannartumik pulaartoqarpoq. „Angalalluni nakkutilliisutta, Sarelip, nuliatalu, Maryannip, Wyndham pulaarpaat,“ Judy oqaluttuarpoq. „Sarel Wyndhamip siniffiata saani nikorfalluni,  Wyndhamip assaa tigummillugu qamannga pisumik Jehovamut qinuvoq. Pulaareernerata kingorna nukittuallatsinneqangaarluta misigaagut.“

Annikilliornerat tamaat ilagiit kristumiut pisariaqartunik ikiuipput. Nerisassiortussanik tulleriiaarisimapput, Cookikkut ilaqutaanuinnaanngitsoq aammattaarli oqaluussisartunut paarlakaallutik najuisartunut. Inuusuttut illumi ipertaajaasarput, qimmeq nerisittarlugu, qulliillu ikinnissaat qaminnissaallu isumagisarlugit ilaallu ilanngullugit. Annikitsualuit tamaasa eqqarsaatigissallugit ilaqutariit piffissaqarfiginngisaat isumagisarpaat. Taamatut atugaqartilluni kristumioqatit ikiuinerat qiimmassaanerallu suusupagineqanngisaannartariaqarput.

Nakorsat isummeqqipput Wyndham aalersortinnerunngitsumik allamik ikioriarfissaqartinnagu. Suli iltilersortillugu hæmoglobinprocentialu 2-mit appasinnerusoq, angerlartinneqarpoq.

Pitsanngoriarpoq

Wyndhamip hæmoglobinprocentia qullartinniarlugu nakorsaammik erytropoietinimik, hormoniliamik saarngup patiata aap aappaluttortaliorneranik sukkanerulersitsisartumik, nakorsartinnissa inassutigineqarpoq. Afrikamili kujallermi nakorsaatitut nalunaarsukkatut taanna akuerisaanngilaq. Immikkulli ittumik akuersisoqarpoq, ilaqutariillu nakorsaata nakorsaat pitippaa. Sapaatit-akunnerisa pingasut ingerlaneranni Wyndhamip hæmoglobinprocentia 6,2-mut qullarpoq, sapaatillu akunnerisa arfinillit kingorna 11,5-inngorpoq. Qaammatit marluk qaangiummata Wyndham ilaquttani ilagalugit tamanut oqaluussinissaminut ikiorti-pioneeritut ilaanissani nukissaqarfigilerpaa.

Wyndhamip toqungajannerata sunniutaasa ajunngitsut ilagaat ilagiit inuusuttaannut sunniuteqarnera. Judy oqaluttuarpoq: „Isumaqarpunga paasileraat upperisamik tassanngaannartumik illersuisariaqalernissaq imminnut aamma periaannaasoq. Napparsimavimmut pulaartarpaatigut tamaallu malittaralugu, isumaqarpunga amerlasuut imminut aperisut: ’Sallusuissut ilumooruppara?“

Tamatuma kingorna Wyndham marloriarluni aanaartooqqippoq. Nalunngilaa nappaatini qanoq innikkulluunniit utersaaqqissinnaasoq. Qanorluunniilli siunissami pisoqassagaluarpat, Wyndham Cook isumalluarluni nunami paratiisissami peqqilluinnassutsimik Jehova Guutimit akilerneqarnissani qilanaara. Tamanna pitinnagu Biibilip najoqqutassiaasa maleruartuaannarnissaat aalajangiusimavaa. — 2 Pîtruse 3:13, 14; sarĸúmersitat 21:3, 4. (gD 22/8 91)

[Qupp. 20-mi assiliartaq]

Wyndham angajoqqaanilu