Imerajuttut meeraannut inersimasunut ikiuut

„Ilaqutariinni imigassamik ajornartorsiuteqarfiusuni alliartorsimagaanni, sumiginnagaalluni peroriartorsimaneq misigissutsikkullu paatsiveqanngitsumik sunniutigisimasai iluarsiniartariaqartarput. Allatut ajornartumik taamaaliortariaqartarpoq.“ — Dr. George W. Vroom.

SAKKUTOOQ ikilerujussuarneqarsimasoq aaginnaalluni sorsuffimmi nalavoq. Ikiuiartortut takkukkasuarput ikilikkallu passunneqaqqaartarfiannukaallugu. Sakkutooq annappoq, ajornartorsiutaali aaqqinneqaqqajanngillat. Ikia suliarineqartariaqarpoq, misigisaminillu qaangiiniarnera ukiorpassuarnik sivisussuseqarsinnaavoq.

Meeqqanut imertuartunik angajoqqaalinnut angerlarsimaffik sorsuffittut, inuttut pisariaqartitat tunngaviusut saassunneqartuarfiattut, issinnaasarpoq. Meeqqat ilaat kinguaassiuutitigut atornerlunneqartarput; ilaat timikkut persuttarneqartarput; ilarpassui misigissutsikkut sumiginnagaasarput. „Tamatuma assigaa meeqqap angerlarsimaffimmi eqqaani qaartartumeerisoqaqattaarpaluttunik imaluunniit eqqarasuartaatinik eqqarpaluttunik tusaalluni ersisorujussuunera,“ angut inuusuttoq meeraanerminut kingumut qiviarluni taama oqarpoq. Tupinnanngilaq meeqqat imerajuttunik angajoqqaallit ilarpassui timikkut isumakkullu innarligaanermik kingunerisaanik paatsiveerusimaarnermik, sakkutuut sorsoqataasimasut misigisartagaattut ittumik, ersersitsisarmata!

Meeqqat ilarpassui peroriartorsimanertik nuanniitsoq anigorlugu nammineq ineqalerlutik inuulertaraluarput, inersimasutulli inuulertarput takussaanngitsunik maminneqanngitsunillu ikeqarlutik sakkutuup ikilerneqaatigisaatulli piviusuutigalutillu ataavartigisunik. „Maanna 60-inik ukioqarpunga,“ Gloria oqarpoq, „sulili inuunera ilaqutariinni angajoqqaat aappaata imerajuttuuffigisaani alliartorsimanerma kingunerisaanik timikkut tarnikkullu innarlerneqaatigisannit sunnerneqaqqavoq.“

Inuit taamaattut ikiorniarlugit qanoq iliortoqarsinnaava? ’Qiasut qiaqatigisigik,’ Biibilimi siunnersuuteqarpoq. (Rûmamiut 12:15) Taamaaliorsinnaassagaanni aalakoornartumik ajornartorsiuteqarfiusumik avatangiiseqarluni inuuneq qanoq inummut sunniuteqartartoq ilisimasariaqarpoq.

„Meeraanera misigisimanngilara“

Meeqqap isumassorneqarnissani, paaqqineqarnissani inuttullu pingaartinneqarnissani atorfissaqartippai. Ilaqutariinni imigassamik ajornartorsiuteqarfiusuni tamakku pinngitsoortarpaat. Ilaannikkut ilaqutariit inissisimaffii paarlaanneqartarput, naatsorsuutigineqartarlunilu meeqqat angajoqqaaminnik isumassuinissaat. Assersuutigalugu, Albert 14-inik ukioqarluni ilaqutariinnik pilersuisunngoreersimavoq! Niviarsissap Janimik atillip angerlarsimaffimmi suliassat amerlanerit suliarisariaqartarsimavai, arfinillillu missaannili ukioqarluni qatanngutini mikinerusut isumagisalereersimallugit.

Meeqqat inersimasuunngillat, inersimasullu akisussaaffiat naammassisinnaanagu. Angajoqqaat  meeqqallu inissisimaffii paarlaanneqaraangata meeqqat akisussaaffeqartitaavallaartut inersimasunngortarput isumakkut aalajasut. (Naleqqiuguk Evfisumiunut agdlagkat 6:4.) Ilaqutariinnut siunnersorti John Bradshaw ima allassimavoq: „Inersimasutut timeqaleriartortarput. Inersimasutut oqaluttarput inersimasutullu isikkoqarlutik, [inuilli] taakkua iluanniippoq meeraarannguaq naammatsinneq ajuleqqasoq pisariaqartitaminik tunineqanngisaannarsimasoq.“ Ilaat immaqa kristumiutut ima oqartutut misigisimapput: „Meeraagallarama pisariaqartitama tunngaviunerusortaannik tunineqarsimannginnera suli assorsuaq anniaatigaara.“

„Uanga pisuussutigisimassavara“

Robert 13-inik ukioqaannartoq ataataa ajunaarnikkut toqusimavoq. „Naalattuuniarsarisimavunga,“ Robert nikallungarpasilluni oqarpoq. „Nalunngilara ilaannikkut iluarinngisaanik iliortarlunga, kisianni meerapalaajusimanngilanga.“ Robert ataatami imigassamik ajornartorsiuteqarneranut ukiorpassuarni imminut artornartumik pisuutittuarsimavoq. Qulaani allassimasutut oqarami 74-inik ukioqarpoq!

Meeqqat angajoqqaamik imerajuttuunerannut pisuutittarnerat nalinginnaasorujussuuvoq. Imminut assuarinerata isumaqalersittarpaa pissutsit eqqortumik isigalugit. Soorlu Janice oqartoq: „Eqqarsartarsimavunga meeqqatut pitsaanerusuguuma ataataga imeqqinnavianngikkaluartoq.“

Ilumoortoq tassa meeraq kinaluunniit — aamma inersimasoq kinaluunniit — allat imigassamik atuinerannut aalajangiisuusinnaanngillat. Ataatat anaanalluunniit imerajuttuuppat illit pisuussutiginngilluinnarpat, inuit allat qanorluunnit oqaraluarpata. Immaqa imminut misissortariaqarputit paasiniarlugu massakkut inersimasuullutit allat iliuusiinut ileqquinullu akisussaasutut suli misiginerlutit. — Naleqqiuguk Rûmamiunut agdlagkat 14:12; Filípimiunut agdlagkat 2:12.

„Tatigisassaqanngilanga“

Tatiginninnerup ammaneq unneqqarissuserlu tunngavigai. Imerajuttuuneq isertugaqartalernermik  miserratiginninnermillu kinguneqartarpoq.

Sarap meeraagallarami nalunngilaa ataatani imerajuttuusoq. Ima oqaluttuarpoq: „Oqaaseq eqqarsaatigiinnarlugu allaat imminut pisuutittarsimavunga, ilaqutariimmi iluanni ilama oqaaseq taajumanngimmassulluunniit.“ Aamma Susan assingusumik oqaluttuarpoq: „Ilaqutariinni eqqartorneqanngisaannarpoq susoqarnersoq, qanoq pilluaatsigalutik, imaluunniit [ataatassama imerajuttuunera] qanoq kamaatigitigalugu. Isumaqarpunga tamakku tamaasa eqqarsaatiginaveersaaginnartarsimallugit.“ Taamaalilluni amerlasuutigut ataataasup anaanaasulluunniit imerajuttuunera miserratigineqartarpoq. „Isiginninngitsuusaaginnarnissara ilikkarsimavara, takusakkami naammareeqimmata,“ Susan oqarpoq.

Tatiginninneq imerajuttup naatsorsuutigisassaangissusiatigut suli millinerusarpoq. Ullut ilaanni qiimasaqaaq, ullulli ilaanni isumaluttaqaluni. „Naatsorsorsinnaanngisaannarsimavara ’anorersuaq’ qaqugu pitoraatissanersoq,“ Martin, imerajuttumik anaanaqarluni alliartorsimasoq, oqarpoq. Imerajuttup neriorsuutini eqquutitinngitsoortarpai — ilatsiinnarneq pissutiginagu, imigassamilli atornerluinini pissutigalugu. Dr. Claudia Black ima nassuiaavoq: „Imerajuttup imernissani kisiat eqqarsaatigisarpaa. Sinneri tamaasa tunulliutippai.“

„Misigissutsikka toqqortortarpakka“

Meeqqat misigissutsiminnik ersersitseqatigiiffissaqanngikkaangamik misigissutsimik toqqortornissaat ilikkartarpaat. Atuarfimmiikkaangamik „kiinnamikkut qungujulasarput ilumikkulli isumakuluuteqaqalutik,“ atuakkami Adult Children — The Secrets of Dysfunctional Families-imi taama allassimasoqarpoq, eqqarsaatimillu misigissutsimillu aninnissaat sapertarpaat, ilaqutariit isertugaataata paasisoortinnissaa siooragigamikku. Qaamikkut ingerlalluarpalupput, ilumikkulli misigissutsinik nunusanik ulikkaavipput.

Qallikkut malunnaarsaarluni misigissutsinik ipititsiniarneq inersimasunut amerlanertigut iluatsinngitsoortarpoq. Misigissutsit oqaatsikkut aninneqanngikkunik immaqa timikkut anialissapput — tassa aqajaqqumi putusoornikkut, niaqorluttuaannalernikkut assigisaasigulluunniit. „Iluamik oqaatigilluaannarlugu, misigissutsima ilunnit nungukkiartuleraluarpaannga,“ Shirley oqarpoq. „Atuakkani allassimasut naapertorlugit timikkut anniaatigilersinnaasat tamaasa anniaatigaakka.“ Dr. Timmen Cermak ima nassuiaavoq: „Meeqqap paatsiveerusimaarnini miserratigineratigut nunusarpaa, Pinngortitarli uukapaatinneqarsinnaanngilaq. . . . Timi ukiorpassuarni paatsiveerusimaarlunilu sukangasimaguni pinngitsoorani saperluinnalerfissani nallertarpaa.“

Aniguinissaannaq naammanngilaq

Inuit ilaqutariinni imerajuttortalinni alliartorsimasut sanngisuujupput; tamanna takuneqarsinnaavoq meeraanerminni timikkut isumakkullu innarligaasimanertik anigortarmassuk. Tamatumali anigornissaannaa naammanngilaq. Ilaqutariit nutaamik iginnittaaseqalertariaqarput. Immaqa imminut pisuutinneq, kamanneq imminullu ataqqinngippallaarneq iliuuseqarfigisariaqarput. Imerajuttut meeraasa nakuussusertik Biibilimi taaneqartup ’inuttaap’ atiniarneranut atortariaqarpaat. — Evfisumiut 4:23, 24; Kulorsamiut 3:9, 10.

Tamanna oqitsuunngilaq. LeRoy, angerlarsimaffimmi imigassamik ajornartorsiuteqarfiusumi alliartorsimasoq, ukiuni 20-ni Biibilip najoqqutassiai nammineq ilaqutaqalerami atortinniarlugit sukataarsimavoq. „’Ilaqutariinnut atuagaq’ aqqutigalugu Peqatigiiffimmit asannittumik unnersuussuterpassuit tigugakkit sumut iluaqutaassanersut paasisinnaanngilara. * Taamaattumik paasissutissartaasa atornissaat pikkoriffigivallaarsimanngilara. . . . Misigissutsikkami ilaatinngivillugit farisiiarisut  iliorlunga nammineq najoqqutassiorlungalu tamakku maleruartinniarsarisarsimagaluarpakka.“ — Takuuk Matîuse 23:23, 24.

Inummut LeRoyitut ittumut asanninnerunissamik, oqaloqatigiittarnissamik meeqqanillu perorsaanissamik kajumissaarutinik tusaaginnarnissaq immaqa naammanngilaq. Sooq? Aap, qanormi ililluni nammineq asanninnermik ersersitsivigineqarsimanngisaannarluni asanninnermik ersersitsisinnaassava? LeRoy siunnersorneqarfissarsiorpoq ataatami imerajuttuunerata kinguneri paasisinnaajumallugit. Taamaaliormat anersaakkut ineriartornissaanut akornutaasut piialerput. „Tamanna inuuninni assorsuaq artornarsimavoq, aammattaarli anersaakkut assut ineriartorfiulluni,“ oqarpoq. „Inuuninni aatsaat Guutip asanninnera paasiartulerpara.“ — 1 Juánase 5:3.

Arnaq kristumiu Cherylimik atilik inunnik isumaginninnikkut siunnersortimit, ilaqutariinni imigassamut attuumassuteqartunik ajornartorsiutilinnik misilittagaqarluartumit, ikiorneqarsimavoq. Aammalu utoqqaanertamik paasinnittumik oqaloqateqartarsimavoq. „Aatsaat ’isertugaatikka’ tamaasa anikkakkit Jehovamik imminullu eqqissineq anguara,“ oqarpoq. „Maanna Jehova Ataatattut isigilerpara (siornatigummi tamanna sapersimagaluarakku), asanninnerlu unnersuunneqarnerlu pisariaqartissimasaraluakka ataatannit nunamiusumit pinngitsoorsimasakka ugguaatigivallaarunnaarlugit.“

Amyp, imerajuttup paniata inersimasup, paasilersimavaa ’anersaap inerititaanik’ inerititaqarniarneq assorsuaq iluaqutaasoq. (Galâsiamiut 5:22, 23) Aammalu eqqarsaatini misigissutsinilu pillugit utoqaanertamut paasinnittumut oqaloqatiginninnissani sungiussimavaa. „Eqqaasippaanga pingaarnerpaamik kimit iluarisaalernissara kissaatigigiga,“ Amy oqaluttuarpoq, „tassa Jehova Guutimit Jesus Kristusimillu. Taakku asanninnerannik iluarinninnerannillu ujartuineq imminut aserorsaataanngisaannarpoq.“

Ajorunnaarluinnarnissaq

Biibilimi allassimavoq Jesus Kristus neriorsuisoq erloqisut nanertugaasullu nukissanik nutaanik tunissallugit. (Matîuse 11:28-30) Aammalu Jehova taaneqarsimavoq ’Guuti tamanik tuppallersaasoq, annikilliuutivut tamaasa pillugit tuppallersaasoq’-mik. (2 Korintumiut 1:3, 4) Maureena ima oqarpoq: „Jehova uannik timikkut, isumakkut misigissutsikkullu qimatsinngisaannartutut ilikkarpara.“

Piffissami Biibilip ullussanik kingullernik taasaani inuuvugut, piffissami inuppassuit — allaat ilaqutariit iluanni — ’asissuiumatuullutillu, asannissuseqanngivillutillu peqqarniilluinnarfigisaanni’. (2 Timûtiuse 3:2, 3, qallunaatut misiligutaasumik nutsigaq 1989) Guutili neriorsuivoq silarsuarmik nutaamik eqqissineqarfiusumik, aliasuttut qulliinik tamanik allarteriffigisassaminik aliasuutinillu tamanik peerutsitsiffissaminik, pilersitsiumaarluni. (sarĸúmersitat 21:4, 5) Kristumiu ilaqutariinni imigassamik ajornartorsiutilinni alliartorsimasoq ima oqarpoq: „Tamatta neriuppugut silarsuassamut nutaamut, Jehovap kisimi sapinngisaanik ajorunnaarsinneqarluinnarfissatsinnut, isersissinnaassalluta.“

ARNAQ OQALUTTUARPOQ

„Angerlarsimaffimmi imigassamik ajornartorsiorfiusumi alliartorsimavunga. Arfineq-pingasunik ukioqartunga ataataga imertalerpoq. Imersimagaangami nakuusertaqaaq. Ilaqutariit tamarmik ersiortarnerat eqqaamavara. Piffissami pilluarlunga meeraaffigisariaqaraluakkanni misigissutsinnik, kissaatinnik, pisariaqartitannik neriuutinnillu toqqortuinissara ilikkarpara. Anaanaga ataatagalu ataatama ajornartorsiutaa ulapputigingaaramikku uanga paaqqutarissallunga piffissaqanngillat. Samminissara pisariaqartuutinngilaat. Naleqanngitsutut misigilerpunga. Arfineq-pingasunik ukioqarlunga meeraajunnaarsitaavunga — ullormiit ullormut inersimasunngortitaallunga, ilaqutariinni pisussaaffinnik nammattussatut. Inuunera unitsikkallarneqarporlusooq.

 Ataataga kanngunarluinnartunik iliuuseqartarpoq, kanngusunnerullu ilaa uannut tuttarpoq. Tamatuma taartissaatullusooq kukkuneqanngilluinnartutut inniarsarisarpunga. Imminut tunniuttarpunga, asanninnermik pisiniarsarisarlunga, nammineq pilliuteqanngikkuma asanninnermik pinissannut qinngaqqunnartutut misigalunga. Inuunera isiginnaartitsinertut, misigissutsinik ilaqanngitsutut, ilersimavoq. Ukiut arlallit qaangiuttut uima meeqqamalu oqarfigaannga inuusaliatut aquttakkatut pissusilersortartunga. Ukiuni 30-ni taakkua inussiaataattut pissusilersorsimavunga, nammineq misigissutsikkut pisariaqartitakkalu tunullinngortillugit taakku misigissutsikkut pisariaqartitaannik isumassorsimallugit, angajoqqaannut imminut tunniuttarsimanittut taakkununnga tunniuttarlunga. Qujassummillu sumik pisimavunga? Tamanna inuuninni ajuallaatiginerpaasaraara!

Kamallunga, puullunga paatsiveerullungalu aalajangerpunga paasiniarniarlugu uanni suna ajornersoq. Imerajuffiusuni alliartorsimasut allat oqaloqatigigakkit misigissutsit toqqortorsimasakka qaffakaaleriataarput pisimasullu puiorsimasaraluakka nikallorujussuartarninnut nukillaarnartumut pissutaasartut eqqaajortulerlugit. Soorlumi tassa oqimaatsorujussuaq katakkiga, soorlumi tassa minguiartunga. Assorsuaq oqiliallannarpoq paasilerakku kisimaanngitsoq taama misigisimallunga, allanit paasineqarlunga angerlarsimaffimmilu imigassamik ajornartorsiuteqarfiusumi alliartorsimanerup kingunerisaanik inunnik allanik uattulli timikkut isumakkullu anniaateqartoqartoq!

Peqatigiit imminnut Imerajuttut Meeraat Inersimasut-nik taasimasut saaffigaakka katsorsaaniutaasalu ilaat malerualerlugit. Atuakkat assigiinngitsut ikiortigalugit eqqarsariaasera innarlerneqarsimasoq qimappara. Misigissutsit suli amerlanerusut, misigissutsit ukiorpassuarni toqqortarisimasakka, aniatinniarlugit ullorsiummik allattalerpunga. Immiussaq imminnut ikiorniartunut naatsorsuussaq tusarnaartalerpara. TV-kkut seminareqartitsineq, angummit uattulli atugaqarsimasumit aaqqissuunneqartoq, najuuffigaara. Atuagaq Feeling Good University of Pennsylvania School of Medicine-meersoq ikiortigalugu imminut ataqqineq uanni ineriartortippara eqqarsartaaseralu ajunngitsup tungaanut aallartillugu.

Eqqarsariaatsit nutaat ilikkakka iluaqutigalugit inuuninni imminut napatissinnaalerlungalu ajunngitsumik inunnut allanut attaveqarsinnaalerpunga. Ilikkakkama ilaat aana: Atoreersimasat apeqqutaanngillat, apeqqutaasorli tassa atoreersimasanik qanoq isiginnineq imaluunniit paasinnittaaseqarneq. Misigissutsit kisimiilluni pigineqassanngillat, misissorneqassapput oqaasinngorlugillu aninneqassapput, imaluunniit tunuartinneqassapput. Najoqqutassaq alla pitsaasoq tassa: ’Iliuutsitit aqqutigalugit eqqortumik eqqarsartaaseqaleriartorit.’ Iliuutsit pitsaasut uteqattaarnerisigut eqqarsariaatsinik nutaanik qaratsami pilersitsisoqarsinnaavoq.

Ikiuulli pingaarnerpaaq Guutip oqaasiani, Biibilimi, pissarsiarineqarsinnaavoq. Taanna, Jehovap Nalunaajaasuisa ilagiivi, utoqqaanertat oqaluussisartullu inersimasut allat ikiortigalugit naleqaqisumik anersaakkut ajorunnaarsinneqarpunga, imminullu naleqquttumik asanissara ilikkarlugu. Aammattaaq ilikkarpara kinaassusiliullunga immikkut ilisarnaatilik, silarsuarmi tamarmi asseqanngilluinnartoq. Pingaarnerusumillu, nalunngilara Jehovap asagaanga Jesusilu uanga allallu pillugit toqusimasoq.

Maannalu, ukioq ataaseq affarlu qaangiuttut, isumaqarpunga 70 procentimik iluarseriarsimallunga. Ajorunnaarsinneqarluinnassaangali aatsaat Jehovap silarsuassaata nutaap naapertuilluartup silarsuatoqaq ajortoq manna tamatumalu guutia, Satan Diaavulu, taarserpagit.“

 ISUMA INERNILIUSSAQ

Biibilimi ima allassimavoq: „Inuup eqqarsaatai imertut itisuutut ipput; silassorissoq taakkuninnga qalooraasinnaasarpoq.“ (Ussatit 20:5) Inuup nikallungasup isumakuluutai uummatip ernganit itisuumit qaloorarsinnaajumallugit immikkoortitsisinnaassuseqartariaqarpoq. ’Siunnersuisut amerlasuut’ paasisimasaqarluartut naleqartorujussuusinnaapput. (Ussatit 11:14) Aamma ussatip matuma ersersippaa allanik siunersiuineq naleqartorujussuusoq: „Savimineq saviminermik ipissarneqartarpoq, inuillu imminnut ipissaqatigiittarpullusooq.“ (Ussatit 27:17) Inuit nikallungasut oqaloqatigiikkaangamik ’sapiissutsimik nutaamik nassaarfigeqatigiittarput’. (Rûmamiut 1:12, Seidelin) ’Nikallortullu tuppallersartarnissaannik’ Biibilimi oqaassutigineqartoq maleruarsinnaajumallugu tuppallersaasup nikallunganermut pissutaasut tamatumalu kinguneri ilisimasariaqarpai. — 1 Tásalûníkamiut 5:14. (gD 22/5 92)

[Quppernerup ataani ilanngussaq]

[Qupp. 10-mi issuagaq]

„Iluamik oqaatigilluaannarlugu, misigissutsima ilunnit nungukkiartuleraluarpaannga“