Assavut tupinnartut

ANGUTIP inuusuttup nillerujussuaatigaluni kaataq iperarpaa anniarninilu anisinniarlugulusooq kulluni tigulluartiterlugu. Aasiit kikiak uniorlugu kulluni kaassimava!

Taamatut pisoqartillugu sanasup immaqa kulluni akornutaaginnartutut isigeqqajaasinnaasarpaa. Kullorli akornutaasutut isigisaa taanna atortumut naleqaqisumut ilaavoq. Atortoq tamatta pigisarpoq — assak.

Assavut — inussat eqaatsut, naggussat peqittarfiusut, sianiutit misikkarissut ilaallu ilanngullugit — ima sungiusimatigaavut qanoq naleqartigissusii puiortoortarlugit. Assavummi atornagit suliaqarsinnaanngingajappugut. ’Assavit suliassarsiaat tamaasa sapinngisannik suliarikkit,’ kunngi ilisimasoq Salomon taama oqarsimavoq. (akugdlîssup oĸausê 9:10) Inuup sulineranut naleqqulluartumik assersuutitut assak atorpaa. Aap, assak tassaavoq atortorissaarut eqqorluartoq akimorneqarsinnaanngitsoq.

Tupinnaqisumik sanaaq

Maskiinamik allallaqqissorsuup naqinnerit 500-nit amerlanerusut minuttimut allassinnaavai. Assaat atorlugit pattagissami pattaffiit 88-init amerlanerusut nipilersukkamik tusarnerluinnartumik pilersitsisinneqarsinnaapput. Kullorlu tamatigut akornutaaqqajanngilaq. Atagu assanni inussatit siaariassagitit. Taava eqeqqunnit aallartillutit inussatit peqiteriakkit. Malugeriaruk ataasiinnaap peqinniarnerani tamarmik malinnaaqqajaanerat. Maanna kullut peqeriaruk, ammalortuliorlutit peqittaqattaarlugu.  Taamaaliorsinnaavutit inussatit allat aalatinngikkaluarlugit. Passimmi nagguaq eqaatsoq pissutaalluni immikkullu namminerisaminik nukeqarnini pissutigalugu kulloq aalanissamut inussanit allanit kiffaanngissuseqarneruvoq. Tamannaana pissutaalluni kullorput sorpassuarnut atorsinnaagipput.

Ilaatigut kullup inussat sinneri attorsinnaavai imaluunniit angusinnaavai assak tigusissutaasinnaalersillugu. Tamanna soqutaarpianngila? Atagu kullut atornagu koruuni tiguniaraluariassagit, imaluunniit puiaasaq ammarniaraluariassagit, imaluuniit matup tigummivia ulamertoq kaajallatsinniaraluariassagit. Allaat sanasortatta kulluni akornutaasutut isigeqqajaasani kikiak tigummisinnaassaguniuk imaluunniit kaattarsinnaassuguni pinngitsoorsinnaanngilaa. Ilami inuiaat ilaasa itsaq akeqqatik tigusatik naakkittaaqalutik kulluertarsimavaat sorsunnissamut atorsinnaajunnaarniassammata. — Eqqartuussisut 1:6, 7.

Assaat suliarisinnaasarpassuaminnut naleqqiullutik tupinnaannartumik ikittunik nukeqarput. Isumaqartoqarsinnaagaluarpoq tamanna ajoqutaasoq, tassami nukiit amerlanerit nukittunarnerummata. Nukiilli atorneqaraangamik alligajupput. Qanormita pisoqassagaluarpa inussavut silittorsuarnik nukilersugaagaluarpata? Taama suliaqartartigalutik nerinnakullassuanngussagaluarput toorlattut, pussukumiarnartunik sulisinnaassuseqanngitsut. Assorsuaq qujamasuutigisassaraarput Pinngortitsisitta silatuup assatta nukii passitta ikusittalu akornannut inississimammagit, ujallut nukittuut assatsinnut nukigitillugit.

Soorlu aaqqat naammaqqissaartoq

Assanni ameq ’qalipaannaanngilaq’. Assappit qaavani ameq tigoriassagit. Malugissavat nipunnganngitsutut illuni tasisuaartoq. Taamaammat assat tamaat peqissinnaavat. Itummammi? Ameq itummanniittoq assappit qaavanisulli qitutsiginngilaq. Takorlooriassagit itummavit amia qituttuugaluarpat tasisuaartuullunilu, qanormita tigummisaqarnissaq ajornakusoortigissagaluarpa. Tigummisaqarluarsinnaaqqulluta itumapput orsumik poortaasanik kiffiarneqarsimavoq. Puujusat taakku, ingammik inussat ataanniittut passiullu ataaniittut, pullaarissuupput, tigusigaangattami imaluunniit naqitsigaangatta taakku naqinneqarnerpaasarput.

Itummat qimerloorukku takusinnaassavat amia manissuiunngitsoq. Itummanni titarniusat ersarissut saniatigut sanileriiaanik titarneeraasarpassuaqarpoq qattuniusanik. Kamippavit aluatut iluaqutaallutik nusussisinnaanerit tigusisinnaanerillu taakkua pitsaanerulersittarpaat.

Qattuniusat taakku isuini qinersinut aalarfiusunut ammaneqarpoq itummamik isugutatsitsisunik. Qularnanngitsumik takusimavat sulisartoq assoroornartumik sulilinnginnermini assamminik tagiussersuataartoq. Tamanna asuliinnaanngilaq. Assaat imminnut tagiukkaanni qinersit aalarfiit itersarneqartutut ilisarput. Isugutaap tagiunnissamut akiuussinnaaneq allisittarpaa, tigummisinnaanerlu pitsaanerulersarpoq. Atuagaq saattuararsuarnik quppernilik qupperuminaatsikkaangakku qanoq iliortarpit? Immaqa inussavit nuui, tassa pussutit, kullunnut tagiuttarpatit qupperuminartinnerujumallugit — assigerluinnarpaa.

Titarniusaararpassuit inussavit nuuiniittut aamma allatut iluaqutaapput: naqinneqarunik asseqanngitsumik nuunneqassapput. Immaqa upperiuminaakkaluarpoq, inussalli nuuani taama annikitsigigaluartumi titarniusaqarpoq silarsuarmi inussat kullullu 50 milliardinit amerlanerusut titarniusartaannit allanit tamanit assigineqanngilluinnartunik. Allaat marlulissat mannimmit ataatsimeersut tamarmik assigiinngitsunik inussamik nuuisigut titarniusaqarput. Soqutiginarpoq allaat itsarsuaq ukiut hundredellit pingajussaanni u.n.s. Kinami niuertut pisiniartutik inuaasa nuuini titarniusartaasigut kinaassusersisarsimammatigik, sunaaffami tassa atsiornertulli tatigisassaatigimmata. Allaat inussavit nuuatigut kimillakkaluaruit titarniusartai allanngornavianngillat. Kilerneq itivallaanngippat ameq pissusissamisut ileqqilluni mamissaaq.

 Sianiutit tuusintilikkuutaat

Naak assavut takunnissinnaanngikkaluarlutik, tusaasinnaanngikkaluarlutik imaluunniit naamasaqarsinnaanngikkaluarlutik taamaattoq tassaapput silarsuarmik avatangiisitsinnik maluginiutitut atortakkavut. Soorlu, taggariinnavimmut pigaangavit qanoq iliortarpit? Talitit assatillu siaarlugit silaannarmut satsittarputit. Aap, assavut tassaannaanngillat pussukumiarnartunik sannatit, aammali tassaapput maluginiutit malussarissut. Paasissutissittuartarpaatigut: Kissarsuut uunarpoq, allarut masappoq, kiuuli siilikimik sanaajuvoq, qitsuup meqqui qitupput, ilaallu ilanngullugit. Misigissutitta tallimaat, malugissut, ingammik assatsinnut atavoq.

Inussat nuui malussareqaat malugissuteerarpassuaqaramik. Kvadratmeterimi ataatsimi malugissuteeqqat 1400-uupput. Meqqutit marluk 5 millimeterinik imminnit ungasissuseqartillugit kiinnakkut kapilaariassasutit; kapinertut ataatsitut malugissavatit. Inussavilli nuuatigut taamaalioriassasutit, sianiuteerarpassuit tassaniittut pisuullutik kapinertut marluttut malugissavatit. Taamaammanuna aamma tappiitsoq tappiitsunut naqinnernik atuarsinnaasoq. Kina oqarpa assaat takunnissinnaanngitsut?

Assanni kukiit sianiutitaqanngitsutuaapput. Imaanngilarli atorsinaanngitsut. Naaggaluunniit. Kukiit inussat nuuinik misikkarissunik qajannartunilli illersuisuupput. Aammami iluaqutaaqaat, soorlu appelsiina qalipaajassagaanni, simerniminermik piiaassagaanni imaluunniit sapangaaqqamik tigusissagaanni. Eqqarsaatigisimaviuk kukiit qanoq sukkatigisumik naajartortarnersut? Tamatumani assigiinngitsualuit apeqqutaapput. Aasakkut ukiukkuminngarnit sukkanerusumik naajartortarput. Kullormiittut sukkanerusumik eqeqqumiittullu arriinnerusumik naajartortarput. Assammi atornerpaasanni sukkanerusumik naajartortarput. Oqaatigineqartarpoq ullormut 0,1 millimeterimik tallisartut.

Assavut uagutsinnut tunngasumik oqaluttuartuupput

Assaat inuk pillugu oqaluttuassaqarsinnaaqaat. Sallaatsumik assammiineq, silugussineq, tikermik nappartitsineq — tamakku tamarmik inuttut qanoq ittuunitsinnik takutitsisarput. Amerlanersatta ussersornani oqalunneq pikkunaagissannguatsiarpaat. Ussersorneq tusilartunit pinngitsoorneqarsinnaanngilluinnarpoq. Oqaasiinnaat naammanngikkaangata assak akuliuttarpoq. Eqqillit Amerikamiut, Hawaiimiut Afrikamilu orpigartoormiut tamarmik immikkut tamakkiisumik kusanartunillu ussersornikkut attaveqatigeeriaaseqarput.

„Inuup assai asseqanngilluinnartuupput oqaatsiniinnaanngitsoq ersersitsisaramik aammali misigissutsinik eqqarsaatinillu,“ John Napier atuakkiamini Hands-imi (Assaat) taama allassimavoq. Aap, uumasorpassuit assatsinnut assingusunik „assaqarput“, inuulli assaa sananeqaatsimigut atorsinnaassutsimigullu assigineqanngilluinnarpoq — ima tupinnartigaluni oqartoqaannarsinnaanani nammineq pinngoriartuaarsimasoq. Assaap isumatulluinnartumik sananeqariaasia Nassaartumi, suut tamarmik Ilusilersuisuata Pinngortitsisaatalu, Jehova Guutip, ilisimatussusianut takussutissaalluinnarpoq. — sarĸúmersitat 4:11. (gD 8/8 92)

[Qupp. 14-mi assiliartaq]

Inussat nuuisa nuutsinnerini 50 milliardinit amerlanerusuni marlunnik assigiinnik nassaassaqanngilaq