Misigissutsit nuanniitsut — ilaasa akiorsinnaalersimavaat

TAMATTA sukkulluunniit misigissutsit nuanniitsut nuanniilliuutigisimavavut. Inuit ilaat ilungersornartunik soorlu nappaassuarmik, utoqqalilernermik imaluunniit qanigisaminnik ikinngutiminnilluunniit toqusoornermik eqqorneqarsimanertik pissutigalugu misigissutsinit nuanniitsunit nuanniilliuuteqartualersimapput inuunerminnik ajortup tungaanut sunniisumik.

Kisianni allaat toqusoorsimasut misigissutsiminnik aqutsisinnaanissartik ilinniarsimavaat pissusissamisoortumik inuusinnaalerlutik. Iteritsi!-mut misigisalikkersaartutigut tamanna erserpoq.

Janis nappaat misigissutsikkut eqqortissutigisimasani pissutigalugu nakorsamit nakkutigineqarpoq. Taamaakkaluartorli ima oqarpoq: „Paasisimavara ajornartorsiummut sakkoq pitsaanerpaaq tassaasoq eqqarsaatinik aqutsineq. Taamaaliortarpunga allanik ikiuisarnikkut, soorlu kaagiliuullugit mersuullugilluunniit. Aamma misigisimasakka nuannersut pisussallu qilanaarisakka sapinngisannik eqqarsaatiginiarsarisarpakka. Nappaatiga pissutaalluni tamanna oqitsuinnaaneq ajorpoq. Ilaannikkut nakkaannarnissaq nuanniilliulernissarlu ajornannginnerusutut isikkoqalertaraluarput. Kingunerili eqqarsaatigigaanni, ilungersulussinnarsimanngilanga.“

Ethel-ip uia ukiuni 45-ni aappareereerlutik toquvoq. Aliasunnini qaangivissimanngikkaluarpaa, misigissutsinili aqussinnaalersimavai. Ima oqaluttuarpoq: „Arlaannik imminut sammisaqartinniartarpunga, inuit allat ikiorlugit. Soorlu nuannaarutigisaqaara inuit allat Guutip siunertaanik Biibilimi allattorneqarsimasunik ilinniartillugit. Arnap inuusuttunnguup oqaluttuakka nuannaarutigingaarmagit allaat uanga nammineq isumagissillunga. Ajunngitsut Biibilimi eqqartorneqartut eqqarsaatigeqqissaarniartarpaakka allanut oqaluttuarisinnaajumallugit, tamannalu iluaqutigalugu eqqarsaatit nuanniitsut puiorniarsinnaasarpakka. Aammalu arnat inuusunnerusut ornittarpaannga assigiinngitsunik siunnersorneqarumallutik, inuunerannilu iliuusii ajunngitsut oqaluuserigaangatsigik misigissutsikka nuanniitsut akiorsinnaanerulersarpakka.“

Arthur ukiorpassuarni ulapaarluni suliniuteqarluarlunilu inuusimavoq. Nappaassuarmilli eqqorneqarami suliunnaartariaqarsimavoq angerlarsimaffimmilu avataani sammisassat tamaasa killilertariaqarsimallugit. Qaammarterpassuarni Arthur atorfissaqanngitsutut misigaaq nikallungaqalunilu. Taava qanoq iliorpa? „Iliuuserisinnaajunnaakkakka tamaasa eqqarsaatiginaveersaartalerpakka. Maannakkut sapinngisakka eqqarsaatiginerulerpakka,  soorlu inuit allat siumukarnissaannik ikiorlugit, nikallungasullu qiimmassartarlugit. Angerlarsimaffinnit allamut nikissinnaannginnama oqarasuaat atorluartorujussuusarpara. Inuit allat ikiorniarlugit qiimmassarniarlugillu ulapputeqaraangama imminut naakkiginissannut piffissaqarpallaarneq ajorpunga.“

Artornartunik atugaqareerluni, ilaatigut uiminik toqusooreerluni, Nita soorunami aliasoqalunilu nikallungasimaqaaq. Piffissalli ingerlanerani misigissutsit tamakku aqunnissaat ilikkarsimavaa: „Malugigaangama nikalloriartorlunga nikallunganeruleqqunanga arlaannik iliuuseqapallattarpunga. Imminut pinngitsaalillunga pisuttuartittarpunga, ikinngutigilluakkannut sianerlunga, nipilersukkamik tusarnaarlunga imaluunniit arlaannik nikallunganinnut annikillisitsisinnaasutut nalunngisannik iliuuseqarniapallattarlunga. Imminut ikinngutitut pitsaasutut iliorfiginiarsarisarpunga.“

Mary ukiuni 32-ni kingullerni sakkortuumik nappaateqarsimavoq. Issiavimmi assakaasulimmiittuaannarpoq aatsaallu nakorsamukassagaangami angerlarsimaffiminit anisarpoq. Maryp nikallunganissaraluani qanoq ililluni pinngitsoortittarpaa? Ima oqarpoq: „Uiga assorsuaq annertoqqutigisimavara. Aamma atuagassianik qiimmannartunik atuartarpunga. Ikinngutinnut akuttungitsunik sianertarpunga akuttunngitsunillu qaaqqusisarlunga. Pulaartarnerat nuannaarutigisaqaara, pulaarnerallu naammagittaalliornissamut imaluunniit imminut naakkiginissamut periarfissatut isigineq ajorlugu. Inuunerma nuanniitsortai eqqarsaatigineq ajorpakka, nuannersorpassuarnimmi eqqarsaatigisinnaasaqarpunga.“

Margaret piviussusersiortuuvoq. „Misigissutsit nuanniitsut qaffakaaleraangata,“ oqarpoq, „ajunngitsunik eqqarsaateqartartumik, eqqarsaatimigut inornartorsiortuunngitsumik, uannilli ilisarisimannilluartumik iliuuserisimasannillu ajunngitsunik eqqaasitsisinnaasumik ilassarsiupallattarpunga.“

Rose Marie ukiut ingerlaneranni tallimariarluni annertuunik pilattartittarsimavoq, ukiullu ataatsip affallu ingerlanerani uinilu ilaquttaminnik arfineq-marlunnik toqusoorsimapput. Soorunami tamakku misigissutsinik nuanniitsunik pilersitsisarput. Aappariilli taakku tamakku eqqarsaatiginiaannarneq ajorpaat. Jehovamut nalunaajaasuugamik Biibilip neriuutissarititaa nuannersoq tuppallernartorlu assut annertoqqutigisarpaat, tassa silarsuassaq nutaaq qanittukkut pilersussaq Guutip ’qulliminnik tamanik allarteriffissaa, toqusoqartarunnaarlunilu, aliasuttoqarunnaarlunilu, nilliasoqarunnaarlunilu anniarfiunngitsoq’. Allaat taamanikkussamut toqungasut makitinneqassapput, Jesusimi oqarsimavoq: ’Taava iliverniittut tamarmik [Guutip ernerata] nipaa tusarumaarpaat; anillutillu makissapput.’ — sarĸúmersitat 21:4; Juánase 5:28, 29. (gD 8/10 92)

[Qupp. 26-mi assiliartaq]

Janisip misigissutsini aqunniartarpai inunnut allanut iliuuseqartarnermigut, misigisimasaminik nuannersunik pisussanilluunniit qilanaarisaminik eqqarsaateqarniartarnermigut