Inuusuttut aperipput:

Sooq angajoqqaama soqutiginngilaannga?

„Qaqugukkulluunniit anaanaga aperigaluaraangakku piffissaqalaarnersoq tamatigut piffissaqanngisaannarpoq,“ niviarsiaraq inuusuttuaraq anersaaruluppoq.

CHRISTINA 16-inik ukioqarpoq — katissimanani naartullunilu. Imminut ajornartorsiortilersimanini peqqissimissutigeqaa, aammali narrutsassimasorujussuuvoq. „Anaanama tamakkuninnga nassuiaatissallunga eqiagaa,“ qiasunngorpalulluni oqarpoq. „Sulerisarninnik malinnaanissaminut piffissaqanngilluinnarpoq.“

Pissutsit taama ittut ilisaraagit? Aamma illit ilaannikkut misigisarpit angajoqqaavit soqutiginngikkaatsit? Neriuppugut narrujuummeqqanerit Christinatut iliorlutit ersersissanngikkit. Qularnanngitsumillu nalunngilat sumiginnaasunik angajoqqaaqarneq eqqunngitsumik iliornissamut patsisiginiagassaanngitsoq. Angajoqqaavilli sumiginnarpatsit soorunami assut aliasuutigissagunarpat. Naak inersimasunnguleraluarlutit angajoqqaannit asaneqarnissat tapersersorneqarnissallu immaqa suli assut pisariaqartippat. Angajoqqaanit sumiginnagaaneq qimagaasutut misiginarsinnaasarpoq. „Qaqugukkulluunniit anaanaga aperigaluaraangakku piffissaqalaarnersoq tamatigut piffissaqanngisaannarpoq,“ niviarsiaraq inuusuttuaraq anersaaruluppoq.

Taamaattumik tupaallannanngilaq apersuinermi ataatsimi inuusuttut aperineqartut 25 procentii ’isumaqarmata angajoqqaatik ilaginngippallaarlugit’. Ataaseq oqarsimavoq: „Angajoqqaakka qaninnerorusukkaluaqaakka ammanerusumillu oqaloqatigisinnaarusukkaluarlugit.“ Inuusuttut angajoqqaatillu timikkut qanissinnaasaraluarput, misigissutsikkulli ungasissorujussuullutik. Immaqalu oqaloqatigiippiartanngillat.

Sooq sumiginnaasorinartut

Takorlooriaruk ulloq naavillugu anaanat utaqqisimagit ajornartorsiutinnik oqaloqatiginiarlugu. Angerlamulli apuutiinnavilluni nalaasaarfinnaaminut imminut igiusaannaq innarpoq tv-milu nutaarsiassanik isiginnaalerluni. Ilinnulli saasariaraluarakku uumitsappasilluni akiinnarpaatit: „Takusinnaanngiliuk eqqissisimaalaarniartunga?“

’Anaana soqutigittaak,’ immaqa eqqarsarputit. Angajoqqaalli piaaralutik meeqqaminnik sumiginnaaniartanngillat. Eqqaamasariaqarpat ’ulluni ajornartunik’ atugaqarnartuni inuusugut. (2 Timûtiuse 3:1-3) Immaqalu angajoqqaatit aatsaat taama ulapitsigisutut  misigipput. Immaqa ima nammakkersorneqarsimatigisutut imaluunniit qasoqqasutut misigitigipput ilagileraangamitsit samminissannut nukissaqartaratik. Ingammik taamaassaaq ataatat anaanalluunniit kisimi ilinnik qatanngutinnillu pilersuisuuppat. Taamaattumik angajoqqaatit illit anersaarulunninnik tusagaqanngikkunik immaqa isumaqassapput suut tamarmik ajunngitsumik ingerlasut.

Illit isumakuluutivit saniatigut aamma angajoqqaat isumakuluutissaqartarput piffissaajaatigisaminnik. Ataatat kristumiuuguni suliniartoq immaqa ilagiinni annertuumik akisussaaffeqarpoq. (Naleqqiuguk Korintumiunut agdlagkat áipait 11:28, 29.) Immaqalu anaanat eqqaakulanngisaminik amerliartuinnartunik peqqiilliuuteqarsimasinnaavoq. Qatannguteqarpit? Taamaappallu angajoqqaatit aamma taakkuninnga isumassuillutik ulapputeqassapput.

Angajoqqaat ilaat annertuunik akiorniakkaminnik ajornartorsiuteqarput, soorlu imerajuttuunermik, taamaattumillu meeqqaminnik isumassuilluarnissaminnut nukissaqaratik. Ilaasalu nalulluinnartarpaat qanoq ililluni meeqqanik soqutiginninneq ersersinneqarsinnaasoq. Taamaakkaluartorli meeqqat asanninneq angajoqqaaminnit ilinniartarpaat. (Naleqqiuguk Juánasip agdlagai sujugdlît 4:19.) Immaqalu ataatat anaanallu soqutiginninnermik asanninnermillu ersersitsivallaartanngitsunik angajoqqaaqarlutik peroriartorsimapput.

Kiisalu kulturit ilaanni inuusuttut pisariaqartitaat eqqumaffigineqarneq ajorput. Afrikap ilaani ileqquuvoq ataata, anaana meeqqallu nereqatigiittaratik. Tamanna meeqqanut qanoq sunniuteqartarpa? Collin 14-inik ukiulik oqarpoq: „Misigissutsikkut angajoqqaannut atasutut misiginissara ajornakusoortippara. Misigisimavunga kisimiivillunga inuunermi satsillungalusooq ingerlasariaqarlunga.“

Nakkarfissat ingalassimasassat

Naak angajoqqaavit ilinnik sumiginnaasutut innerannut pissutaasoq nalunngikkaluarlugu taamaattoq suli anniaatigalugulu kamaatigisinnaavat. Tamanna inuusuttut ilaasa naalanngitsunnguutigalugulu piuminaatsunnguutigisinnaasarpaat. Ilaallu isumaqartarput qanoq misigisimaneq ersersinniarlugu pikitsitsisariaqarlutik. Inuusuttulli pikitsitsiniartut imminnut aseruutissiinnartarput, siuliani taaneqartutut Christinatorluinnaq. ’Ilisimangaanngitsut tunussinerata toquttarpai,’ ússatit 1:32-mi taama mianersoqquserpaluttumik allassimasoqarpoq.

Aappaatigullu aamma ajornartorsiuteqanngitsuusaaginnarneq angusaqarfiuneq ajorpoq — ingammik qamuuna itisuumik ikilertissimasutut misigitilluni. ússatit 24:10-mi ima allassimavoq: ’Ullormi annikilliorfimmi nukillaangasutut iligavit, nukisit annikillipput.’ Misigissutsikkut ikit timikkut ikinit piviusorpalaarnerusinnaapput, taamatullu annernartigisinnaallutik. (Ussatit 18:14) Ikit ilaginnaannarneqarunik aseruunneqalerlutillu inersimasunngoreeraluaraanniluunniit anniaataasinnaapput. Angut inuusuttoq Johanimik atilik ima oqarpoq: „Alliartorninni ataataga imertarpoq, taamaattumik atorfissaqartinnerpaaffiani naatsorsuutigisinnaaneq ajorpara.“ Oqaatsini ilavai: „Nammineq ajornartorsiutini ulapputigingaaramigit tusarnaarnissannut piffissaqartanngilaq.“ Johan inersimasunngorami nikallorujussuartarnermik imminullu pisuutinnermik naalliuuteqarpoq.

Qujanartumik ikinngutimi pitsaasut ikiuineratigut Johanip imminut ataqqinini pigileqqissinnaasimavaa. Taassumali misigisaatigut erseqqissarneqarpoq angerlarsimaffimmi pissutsit iliuuseqarfiginissaannut pitsaasunik periusissarsiornissap naleqassusia.

Soqutiginninnermik ersersitsisikkit

Angajoqqaatimmi qaqutiguinnaq ilinnut saaffiginnittarpata? Taava nipaanneq nuanniitsoq kipitissinnaavat illit nammineq taakkununnga soqutiginninnermik ersersitsinikkut. (Matîuse 7:12; Filípimiut 2:4) Arlaannukassagaangata ilagiumasakkit.  Arlaannik ikiorsinnaanerlugit aperisakkit, soorlu nerisassiorneranni ipertaajaaneranniluunniit. Taava piffissap ingerlanerani uummammiutit oqaluttuarisalersinnaavatit, soorlu atuarfimmi qanoq ingerlanerit arlaalluunniit.

Ilaannikkut immaqa ajornartorsiuteqartassaatit angajoqqaannut oqaloqatigiissutigerusutannik. Soorunami angusaqarpallaarnaviarunanngilatit ataatat ullormut suleruloorsimareerluni nalaasaarfimmi qasuersernerani saaffigigaluarukku. Pitsaanerussaaq ’piffissaasukkut’ oqaloqatiginiarukku — qasukkarsimaarnerani isumagissaarneranilu. (Ussatit 15:23) Taava ajornartorsiutinnut tusarnaarnissaa ilimanaateqarnerujussuussaaq.

Taavami ilungersorlutit iliuuseqarniarnerigaluannut angajoqqaatit qisuarianngippata? * „Siunnersuisoqarsimanngikkaangat pilersaarutit asuliinnartarput,“ Ussatit 15:22-mi allassimavoq. Aap, taamaappat immaqa pisariaqassaaq angajoqqaatit (soorunami inussiarnersumik periaaserissumillu) oqarfigissallugit ilinnik soqutiginninngippallaartut, tamannalu aliasuutigigit. Immaqa ilaannikkut nersualaarneqalaartarnissat kissaatigaat imaluunniit ilinniagassannik ikiorneqarnissat nuannaarutigissallugu.

Immaqa qanoq misiginerit tusarunikku angajoqqaatit tupaallassapput. Immaqa oqarfigipallassavaatsit ilumut asallutit utoqqatserlutillu allatut misigitissimagamitsit. Aatsaat ajornartorsiut ersarissumik oqaatigineqarpat angajoqqaat pissutsinik aaqqiniarlutik sapinngisaminnik iliuuseqarnialissapput.

Aammali imaassinnaavoq oqaloqatigiinnissigut paasinarsisoq illit paatsuugaqarsimasutit. Immaqa arlaatigut soqutiginninnermik ersersitsineri arajutsisimavatit. Qanorluunniilli ikkaluarpat pissutsit pitsaaneruleqqullugit pingaaruteqarpoq oqaloqatigiilluarnissarsi.

Kiserliorfiit matussutissarsiuk

Qanormi iliussavit iliuuseqareeraluaqalutit angajoqqaatit suli pitsaasumik qisuarianngippata? Soorunami tamanna isumatsannarsinnaavoq. Neriuutissaqanngilluinnanngilarli.

Assersuutigalugu, angajoqqaatit soqutigisaqanngitsut pissutigalugit kiserliortutut misiginerit qaangerniarlugu ilinnik ikiuisinnaasumik ujaarlerit — pitsaanerussaaq ilinnit utoqqaanerusumik. Soorlu Ussatit-ni eqqorluartumik oqaatigineqartoq ikinngummik annikilliornermi ikiortissaalluni ’erniusimasumik’ nassaassaqarpoq. (Ussatit 17:17) Taama ittumik ikinngutissarsiorniarit. Ilinnulli siunnersuutigineqartut pitsaanersiukkit; qulakkeerluinnartariaqarpat siunnersuutit ilinnut iluaqutaanerpaassanersut Guutillu oqaasianut naapertuunnersut.

Aamma Jehovap nalunaajaasuisa ilagiivini najukkanniittuni ikiortissarsiorsinnaavutit tapersersortissarsiorsinnaallutillu. Tassaniippummi anersaakkut qatanngutit, anersaakkut ataatat anaanallu ilinnik soqutiginnittut aammalu anersaakkut misigissutsikkullu ajunngitsumik ingerlalernissannik ikiuisinnaasut. (Mákorse 10:30) Nukappiaraq Afrikamiu siuliani taaneqareersoq, Collin, taama ittunik ikinngutissarsisimavoq. Siunnersorneqarfissarsiorsimavoq Jehovallu Nalunaajaasuisa ataatsimiinnerinut najuuttalerluni. Tassani imminik asannittunik ikinngutitaartorpoq. Kingornalu angajoqqaavi qatanngutaalu aamma kristumiut ataatsiminnerinut najuuttalerput.

Qularnanngilluinnarpoq angajoqqaavit qanoq ingerlanersutit paasissallugu soqutigisorujussuugaat. Pisariaqartitatilli eqqumaffiginerulaartariaqarpaat. Utaqqiinnarnak siulliullutit iliuuseqarit, qanorlu misigininnik paasitikkit. Nalunaqaarmi, immaqa paasilissavat takorluukkannit annertuneroqisumik soqutigigaatsit. (gD 8/11 92)

[Quppernerup ataani ilanngussaq]