Angerlarsimaffimmi nakuuserneq soraarsinneqassaaq

„Angerlarsimaffimmi nakuuserneq pinaveersaartinniarlugu annikillisarniarlugulu inuiaqatigiinni ilaqutariinnilu annertuumik allanngortitsisoqartariaqarpoq.“ — Behind Closed Doors (Matut matoqqasut tunuini)

OQALUTTUARISAANERMI toqutsineq siulleq qatanngummik toqutsineruvoq. (1 Moses 4:8) Taamanerniilli ukiut tusindillit ingerlaneranni inuit angerlarsimaffiini nakuuserneqartarsimavoq. Aaqqiissutissanik siunnersuuterpassuaqartarsimavoq, annertunersaalli naammaginartarsimanngillat.

Ileqqumilli allannguissagaanni pisariaqarpoq nakuusertartup ajornartorsiuteqarnerminik nassuerutiginninnissaa. Uiusoq nakuusertarsimasoq ’silattorsimasoq’ ajuusaarpasilluni oqarsimavoq: „Tamatsinnit [eqqortumik ingerlaleqqissimasut] pingasut nuliartik pillugu oqartarput: ’Silattorsarneqartariaqarmat.’“ Tassa angutip nakuusertartup paasisariaqarpaa ileqquni qanoq ajortigisoq. Sooq nakuusertalersimava? Kukkunermi  aaqqinnissaanut ikiortilluni immaqa ajunnginnerulersinnaavoq.

Inunnilli isumaginniffiit aningaasaaleqigajullutillu sulisussaaleqigajupput. Missiliuunneqarsimavoq USA-mi meeqqanik toqutsinerit 90 procentiini toqutsinerup siornatigut ilaqutariinni nakuuserneqartarsimasoq. Pisortat qanoq iliuuseqarsinnaanerat killeqarpoq. Alla pisariaqarpoq.

’Inuttaaq’

„Ilaqutariinni pissutsit allanngortinnissaat pisariaqarpoq,“ misissueqqissaaqatigiit oqarput. Assaat pinnatik isuma ajoquteqarpoq. Ilaqutariit ilaasortaasa tamarmik — aappariit, meeqqat, angajoqqaat qatanngutillu — imminnut eqqunngitsumik isumaqarfiginerat pisuuvoq. Tamanna allangortinniarlugu Biibilip ’inuttaamik’ taasaa atisariaqarpoq. — Evfisumiut 4:22-24; Kulorsamiut 3:8-10.

Biibilip ilaqutariittut inuunermut najoqqutassiai kristumiutut pissuseqalerniarnermut ilaqutariillu ilaasortaasa imminnut ataqatigiinnerata pitsanngorsarnissaanut ikiuutaasinnaasut takoriartigik. — Takuuk Matîuse 11:28-30.

Meeqqanik isiginninneq: Angajoqqaajuneq meerartaarnerinnaanngilaq. Ajoraluartumik ullumikkut amerlasuut meeqqatik oqimaaqutaannartut isigaat taamaattumillu angajoqqaatut pisussaaffitik soqutiginagit. Taamaattut meeqqanik pinerliisalernissaat ilimanaateqartarpoq.

Biibilip meeqqat ’Jehovamik tunissutitut’ ’akissarsiatullu’ taavai. (Tussiaat 127:3) Angajoqqaat ’tunissummik’ tamatuminnga qanoq nakkutiginninnertik Pinngortitsisumut akisussaaffigaat. Meeqqanik akornutaaginnartutut isiginnittut nutaamik inuttut pissuseqalernissaq pisariaqartippaat. *

Meeqqanut ilimasuffiginninnerit piviusorsiortut: Misissuinerup ataatsip takutissimavaa anaanat persuttaasartut amerlasuut meeqqamik ataatsimik ukioqaliinnarlutik ajunngitsumik ajortumillu immikkoortitsisinnaanissaat naatsorsuutigisaraat. Pingajorarterutaasalu affarmik ukioqaliinnarlutik taamaaliorsinnaanissaat naatsorsuutigisarpaat.

Biibilip takutippaa tamatta naammalluinnanngitsuulluta inunngortugut. (Tussiaat 51:7; Rûmamiut 5:12) Oqanngilaq immikkoortitsisinnaaneq inunnguuserigipput, ’misigisaqartarnikkulli’ paasinnissinnaanitta ’sungiusarneratigut ajunngitsoq ajortorlu immikkoorsusiisigut ilisarisinnaalissagivut’. (Eprîarit 5:14) Aammattaarlu Biibilip ’meeqqatut pissulilersorneq’ meeraanerullu ’sianiissusia’ inuusuttuunerullu ’suiallannerinnartut innera’ eqqartorpaa. (1 Korintumiut 13:11; Ussatit 22:15; Nalunaajaasup oqaasii 11:10) Angajoqqaat paasisariaqarpaat meeqqat pisinnaasaat killeqartut, ukiuinullu piginnaassusiinullu naleqquttumik piumaffigisariaqarlugit.

Meeqqanik perorsaatissiisarneq: Griikerit oqaasiat Biibilimi „unataat“-mik (perorsaatissiineq) nutserneqarsimasoq isumaqavippoq „ilinniartitsineq“. Taamaattumik perorsaatissiinikkut annersitsinissaq pinnagu, ilinniartitsinissarli pingaarnertut siunertarineqartarpoq. Tamanna amerlanertigut patissinngikkaluarluni pisinnaavoq. (Ussatit 13:24) Biibili oqarpoq: „Oqaaqqissaarutikka tusaaniarsigit asiginnarnagillu, taava ilisimassuseqalissaasi.“ (Ussatit 8:33) Paulus aamma allappoq ’tamatigut kamajuilluni’ ilitsersuisariaqartoq. (2 Timûtiuse 4:2) Tassa kamannermik sianigisaarunneq ingasaassivallaarnerlu atorsinnaanngillat.

Biibilip najoqqutassiai eqqarsaatigalugit imminut aperigit: ’Perorsaatissiisarnera ilinniarnarpa, imaluunniit annernarami qunulersitsiinnartarpa? Perorsaatissiisarnikkut najoqqutassat eqqortut meeqqannut puiuikkiutitittarpakka, qunusiariinnarpakkaluunniit?’

Inersimasunut ileqqussat: Angut nassuiaasimavoq nuliaminut nakuusertarnerminut „imminut aqussinnaajunnaartarnini“ pisuusartoq. Siunnersuisartup angut aperaa nuliani savimmik kapinikuunera. „Taamaaliornissara sinnattorisimanngisaannarparaluunniit!“ angut akivoq. Ikiorneqarluni paasilersimavaa killilimmik iliuuseqartaraluarluni,  ajornartorsiutaasorli killissat eqqunngitsut atortaramigit.

Illit killissatit sumut killippat? Aaqqiagiinnginneq nakuusernermut sangutinnagu unittarpit? Imaluunniit kamarajussuartarpit nilliasarlutillu oqaasipilullutit, ajattaallutit eqqaalluutit anaalerillutilluunniit?

Nutaamik inuttut pissuseqalersimasumut erseqqarissunik killissaqarpoq, tarnikkut timikkulluunniit pinerliineq akuerinngisaannarpaa. ’Oqaatsinik mikiaasunik qanissinnit anisitseqinasi,’ Evfisumiut 4:29-mi allassimavoq. Versi 31-mi nangippoq:: ’Ajuallatitsinerit narrannerillu kamannerillu nillianerillu mitallernerillu tamarmik ilissinnit peerlik iluaatsuliornerillu tamaasa ilanngullugit.’ ’Kamannermut’ griikerit oqaasiat ’tassanngaannariataartumik misigissuseq’-mik isumaqavippoq. Soqutiginartumik atuakkap Toxic Parents-ip (Angajoqqaat toqunartut) allaatigaa meeqqanik persuttaasartut nalinginnaasumik „isumassarsiareriataakkanik aqutsisinnaaneq tupinnaannartumik amigaatigisaraat“. Nutaamik inuttut pissuseqalersimasup isumassarsiareriataakkat timikkut oqaatsikkullu nakuusernermik kinguneqarnissaat akuerisinnaanngilaa.

Soorunami uiusoq nuliaasorlu tamarmik nutaamik inuttut pissuseqalertariaqarput. Nuliaasup uini kamassaarnaveersaartariaqarpaa. Takutittariaqarpaa ilaqutariinnut pilersuiniarnera pingaartikkini suleqatigalugulu. Aappariillu arlaannaataluunniit aappani anguneqarsinnaanngitsumik — tassa naammalluinassusermik — piumaffigissanngilaa. Aap, marluullutik Pîtrusip agdlagai sujugdlît 4:8 maleruartariaqarpaat: ’Tamanilli annerusumik asaqatigiigitsi ilungersorlusi asanninnerup ajorterpassuit matoortarmagit.’

Utoqqarnik ataqqinninneq: „Qeersuut nikuiffigissavasi utoqqaallu ataqqillugit,“ Mosesimik allakkat pingajui 19:32-mi allassimavoq. Taamaaliornissaq angajoqqaat utoqqalisimasut napparsimappata immaqalu piumasaqarpallaarpata ilungersunarsinnaavoq. Timûtiusimut agdlagkat sujugdlît 5:3, 4-mi eqqartorneqarpoq angajoqqaanut ’ataqqinninneq’ naleqquttumillu ’akiniaaneq’. Tamanna ataqqinninnermik aningaasallu tungaatigut ikiuinermik ilaqarsinnaavoq. Naalungiarsuttut susinnaanngikkallaratta angajoqqaatta iliuuserisarsimasaat eqqarsaatigalugit, pisariaqartitsigaangata assingusumik isumassortariaqarpavut.

Qatanngutigiinni isumaqatigiinnginnerit ajugaaffigikkit: Kain qatanngunni Abel akeqqiussisimaneq pissutigalugu suli toqunngikkaa Guutimit imatut unnersuunneqarpoq: „Ajorti matup killingani qamasarpoq. Ajortip naalagaaffigiumagaluarpaatit, illilli taassumunnga naalagaassaatit.“ (1 Moses 4:7) Misigissutsit nununeqarsinnaapput. Immissinnut naammagittarfigeqatigiinneq ilinniarsiuk ’asaqatigiittutut kamageqatigiillusi’. — Evfisumiut 4:2.

Uummatinnit oqaluttuarit

Angerlarsimaffinni nakuusernermik eqqugaasut amerlasuut nipaatsumik anniartarput. Dr. John Wrightili imatut kajumissaarivoq: „Arnat persuttarneqarsimasut allamut immikkut paasisimasalimmut misigissutsikkut timikkullu illersuisinnaasumukartariaqarput.“ Tamanna ilaqutariit ilaasortaanut persuttarneqarsimasunut aamma atorpoq.

Ilaannikkulli eqqugaasup allamut oqaluttuarnissani sapertarpaa, inoqatinut qaninnerusunut — ilaquttaminut — tatiginninnermik nittaanini alianartumik kinguneqarsimammat. Ussatit 18:24-mili allassimavoq ’ikinngutaasoqartartoq qatanngummit tatiginarnerusumik’. Ikinngummik taamaattumik nassaarneq ammarnissallu ilikkarnissaa ikiorneqarnissamut annertoqquserneqarnissamullu alloriarneruvoq pingaartoq. Soorunalumi aapparisaq nakuusertartoq aamma ikiorneqarnissaminik pisariaqartitsivoq.

Ukiut tamaasa hundrede tusindilikkuutaat Jehovamut nalunaajaasunngortarput. Tamarmik nutaamik inuttut pissuseqalerniarlutik ilungersortarput. Ilaat angerlarsimaffinni nakuusertartuusimagaluarput. Pissusitoqqaminnut utinnginniassagamik Biibili ’atortuartariaqarpaat ajoqersuutaatillugu, inerteqqutaatillugu iluarsiartuutaatillugulu’. — 2 Timûtiuse 3:16.

Jehovap nalunaajaasuinut nutaanut taakkununnga nutaamik inuttut pissuseqalerneq sulissutigiuartariaqarpoq,  Kulorsamiut 3:10-mimi allassimavoq ’nutaanngortuartariaqartoq’. Sulissutigiuartariaqarpoq. Qujanartumik Jehovap nalunaajaasui anersaakkut ’qatanngutiminnit, arnassaminnit meerassaminnillu’ ikiorneqarsinnaapput. — Mákorse 10:29, 30; aamma takuuk Eprîarit 10:24, 25.

Jehovap Nalunaajaasuisa silarsuarmi tamarmi ilagiivini 70.000-it missaanniittuni aamma asannittunik nakkutilliisoqarpoq ’anorersuarmut oqquiffiusunik sialussuarmullu oqquiffiusunik’. Taakkualu „isaat isigissutit tappiitsuussanngillat, siutaallu tusaassutit tutsarissapput“. (Jesaja 32:2, 3) Jehovamut nalunaajaasut nutaat misilittagaqarnerusullu nutaamik inuttut pissuseqalerniarnerminni kristumiut ilagiivinit nalissaqanngitsumik ikiorneqarsinnaapput.

Nakkutilliisut misiginneqataasut

Jehovap Nalunaajaasusa ilagiivini nakkutilliisut kristumiunut orniguttunut siunnersortikkusuttunullu tamanut nakerisassarsiornatik tusarnaarnissaminnut ilinniartitaapput. Kajumissaarneqarput tamanut, ingammik annertuumik pinerlineqarsimasunut, misiginneqataassasut paasinnittuussasullu. — Kulorsamiut 3:12; 1 Tásalûníkamiut 5:14.

Assersuutigalugu nuliaasoq ima unatarneqarsimatigisinnaavoq aqqunartiterujussuarsimalluni. Ilaqutariit avataaniittumit unartartissimappat, amerlanertigut unataasoq parnaarunneqartarpoq. Taamaattumik pinerluffigineqarsimasoq inussiarnisaarfigineqarluartariaqarpoq, allatut pinerluffineqarsimasutulli, soorlu kinguaassiuutitigut atornerluffigineqarsimasutut.

Guutip inatsisaanik unioqqutitsisut akisussaatitassaapput. Taamaallilluni ilagiit minguitsinneqassapput, pisuussuteqanngitsullu asattuunneqarlutik. Aammattaaq Guutip anersaava akornuteqarnani sulisinnaassaaq, tamannalu pingaaruteqaqaaq. — 1 Korintumiut 5:1-7; Galâsiamiut 5:9.

Aappariinnermut Guutip isiginninnera

Jehovamut nalunaajaasunngortut kristumiutut inuunissamut najoqqutassiat Guutip oqaasianiittut maleruarumallugit akuersisimapput. Angut ilaqutariinni qullersatut pinngortitaasoq pallorfiginninnermilu ilumoortumi siulersuisussaasoq ilinniartarpaat. (Evfisumiut 5:22) Qullersaaninili atornerlunngisaannassavaa nuliaminut pinerlunnermigut inuttullu pisuusiinik aseruinermigut kissaatigisaanilluunniit sumiginnaanermigut.

Akerlianilli Guutip oqaasiata erseqqissarpaa uiusut ’nuliatik asasariaqaraat, soorluttaaq Kristusip ilagiit asagai imminillu tunniulluni taakku pissutigalugit’. Nangipporlu: ’Taama angutit nuliatik asasariaqarpaat soorlu timitik. Nuliaminik asannittoq imminik asasaraaq. Inummi uinimminik qinngarsuinngisaannarpoq, nerisittarluguli paaqqisarpaa.’ (Evfisumiut 5:25, 28, 29) Aap, Guutip oqaasia toqqaannartumik oqarpoq nuliaasut ’ataqqineqassasut’. — 1 Pîtruse 3:7; aamma takuuk Rûmamiut 12:3, 10; Filípimiut 2:3, 4.

Kinaluunniit uiusoq kristumiu nuliaminik asannittutut ataqqinnittutulluunniit oqaatigineqarsinnaanngilaq nuliani oqaatsikkut timikkulluunniit iluanngitsuliorfigisaruniuk. Tamanna ilumoortuusaarnerussaaq, Guutimmi oqaasiani allassimavoq: ’Angutit ukorsii, nuliasi asaniarsigik, ajuallaffigeqinasigillu.’ (Kulorsamiut 3:19) Guutip eqqartuussissutaata aaqqissuussineq ajortoq manna Harmagedonimi eqqorpagu, ilumoortuusaartut Guutip aqutsineranut akerliusutut pineqassapput. — Matîuse 24:51.

Uiusup Guutimut mianerinnittup nuliani timimisut asassavaa. Kiinnamigut timimigulluunniit imminut anaalersinnaava, imminulluunniit nujaartoruloorluni? Allat tusaatillugit nikanarsaasunik mitallertunillu oqalunnermigut imminut nikanarsassava? Taamaaliortoq, isumakkut ajoquteqartutut naatsorsuunneqassagaluarpoq.

Angutip kristumiup nuliani unatarpagu Guutip isaani kristumiutut suliai allat tamarmik naleerutissapput. Eqqaamasariaqarpoq ’paannikkajuttoq’ kristumiut ilagiivini immikkut pisinnaatitaaffeqarsinnaangimmat. (1 Timûtiuse 3:3; 1 Korintumiut 13:1-3) Nuliap uiminut nakuuserniartup soorunami aamma Guutip inatsisai unioqqutippai.

 Galâsiamiut 5:19-21-mi allassimavoq ’qinngarsuinerit, saqitsaannerit . . . kamannerlu’ suliaasut Guutimit assuarineqartut nangipporlu ’taamaaliortut Guutip naalagaaffia kingornussarissanngikkaat’. Tassa aapparisamut meeqqaminulluunniit nakuusissalluni utoqqatissutissaqanngilaq. Taamaaliorneq nunap inatsisaanut akerliugajuppoq Guutillu inatsisaanut akerliujuaannarluni.

Atuagassiap Napasuliaq Alapernaarsuiffik-up Jehovap Nalunaajaasuinit naqiterneqartartup Biibilip nakuusernermut isiginninnera siornatigut erseqqissaatigereersimavaa. Kristumiuuneraraluarlutik nakuuserajuttuusut ima allaatigineqarsimapput: „Taamaattumik kristumiuunerartut taamaattorli kamariataarujussuaqattaartuaannartut peqqissiminerminnillu ersersitsinatik anisitaasinnaapput.“ — 15. oktoberi 1975, qupperneq 479; naleqqiuguk Juánasip agdlagaisa áipait 9, 10.

Guutip inatsisai qanoq oqartut

Guutip inatsisiminik unioqqutitsisut pillassavai. Tamannali pisinnagu guutip oqaasii kristumiunut unatarneqartartunut, tamatumalu uninnissaa ilimanaateqanngikkallarpat, sunik periarfissaqartitsippat? Pisuussuteqanngitsut pinngitsaalisaallutik napparsimmavimmut unitsitaasimappat, timikkut, isumakkut anersaakkullu peqqissutsimikkut, aap allaat inuunermikkut, suli ulorianartorsiortitaajuarsinnarlutik?

Angerlarsimaffimmi nakuusernermut atatillugu qanoq iliuuseqarnissamut Guutip oqaasiata periarfissarititai pillugit Napasuliaq Alapernaarsuiffik-mi ima oqaaseqaatigineqarput: „Apustili Paulus ima kajumissaarisimavoq: ’Uillip uini avissanngilaa (avikkaluaruniulli ueqanngissinnarli, uiniluunniit saammarsaqqikkiliuk;) aamma nuliallup nulii qimassanngilaa.’ Paulusip aamma eqqaavaa aappariinneq atatiinnarneqarpat meeraqarpata meeqqanut anersaakkut iluaqutaassasoq. Aammami aappaasumut uppertumut meeqqanullu atortussatigut iluaqutaasinnaavoq. Uppertulli ajortumik iliorfigineqartarnini sapilivikkuniuk inuuninilu navianartorsiorpat ’qimanniarlugu’ aalajangersinnaavoq, kissaatigiuartariaqarluguli ajornarunnaarpat aappami ’saammarsarsinnaanissaa’. (1 Korintumiut 7:10-16) Taamatut aappaata aapparminik qimatsinera Biibilip tungaanit isigalugu avinnissamut aappartaaqqinnissamullu pissutissatut naammanngilaq. Inatsisilli nalinginnaasut naapertorlugit avinneq averuserneerluunniit uppertup naalliutsitaanerunissaraluanut illersuutaasinnaavoq.“ — 15. Juni 1983 qupperneq 18, 19; aamma takujuk Vagttårnet 1. novemberi 1988 qupperneq 22, 23.

Angerlarsimaffimmi peqqarniitsumik nakuuserfigineqartaraanni qanoq iliuuseqarnissaq inuup nammineq aalajangigassaraa. ’Kialuunniit nammineq nammagassi nammassammagu.’ (Galâsiamiut 6:5) Allanut aalajangiissutsittoqarsinnaanngilaq. Nuliaasorlu uianut peqqissitsumigut, inuunermigut anersaakkullu atukkamigut ulorianartorsiortitsisumut pinngitsaalillugu utertinniarneqartussaanngilaq. Tamanna nuliaasup nammineq aalajangigassaraa. Allat piumasartik qallinngortinniarsarisussaanngilaat. — Takuuk Fîlimût 14.

Angerlarsimaffimmi nakuuserneq soraarsinneqassaaq

Jehovap nalunaajaasuisa paasisimavaat angerlarsimaffimmi nakuuserneq ullussanut kingullernut Biibilip eqqartugaanut ilisarnaataasoq, inuppassuit ’soqqusaatsuullutik’, ’ajunngitsunik uumissuillutik’ ’qiningasuusut’. (2 Timûtiuse 3:2, 3) Guuti neriorsuisimavoq ullussat tamakkua naappata silarsuarmik nutaamik eqqissineqarfiusumik pilersitsiumaarluni, inuit ’eqqissisimallutik nunamiissasut annilaarsarneqassanngitsullu’. — Hesekiel 34:28.

Silarsuassami nutaami tassani angerlarsimaffimmi nakuuserneq atuutissanngilaq. „Qanilaartut nuna kingornutissavaat, pilluangaarlutillu inuussapput.“ — Tussiaat 37:11.

Kajumissaarumavatsigit Biibilip siunissamik neriorsuutai ilinniarneroqqullugit. Aap, Biibilip najoqqutassiai ilaquttanni atorukkit maannangaaq iluaqutigisinnaavatit. (gD 8/2 93)

[Quppernerup ataani ilanngussaq]

[Qupp. 10-mi assiliartat]

Biibilip najoqqutassiaasa atornerisigut ilaqutariinni aaqqiagiinngissutit aaqqinneqarsinnaapput