Aliikkutassiat sorliit qinerumassavigit?

ALIIKKUTASSIANUT oqimaaqatigiissumik isumaqarfiginninneq allaavoq. Aliikkutassianillu oqimaaqatigiissumik qinersineq allarluinnaavoq. Ajornanngitsuararsuuvoq paasissallugu aliikkutassiat inissavimminniittariaqartut, ilarpassui ipertuujusut piffissamillu atuilussinnaataallutik. Ulluinnarnili eqqumajuarnissaq ajornakusoornerusinnaaqaaq.

Soorlu takoreeripput aliikkutassianik sanaartornerup qinersinissaq oqinnerulersinngilaa. Qinigassaqarpallaarpoq, ukiunili tuusintilikkuutaani inuit ilumoorusuttut Biibilip najoqqutassaqartissimavai. Teknikkikkut atortorissaarnerup Biibilip najoqqutassiai atortuujunnaarsissimanngilai. Akerlianilli ullutsinni ajornakusoornartuni aatsaat taama iluaqutaallutillu pisariaqartigilersimapput. Aliikkutassiat ulorianaataannut marlunnut — imarisaannut piffissaajaataanerannullu — atatillugu najoqqutassiat qanoq ilillugit atorsinnaanerivut atagu sammeriartigu.

Biibili qanoq oqarpa?

Angut inuusuttoq imminorsimavoq. Sunaaffa nipilersukkanik heavy metalinik imminornissamut kajumissaarisunik assut tusarnaartarsimasoq. Niviarsiaqqap 14-inik ukiullip anaanani unataammik toqussimavaa. Aamma taanna heavy metalimit tiguartissimagunarpoq. Nukappiaqqap 15-inik ukiullip arnaq toqussimavaa, eqqartuussissuserisua oqarpoq filmimit nakuusernermik imalimmit sunnertissimasoq. Filmip pinerlunniaqatigiit pinerlunnerannut tunngasup takuteqqaarneqarnerani filmertarfimmi billeteerniarfimmilu inuusuttut immikkooqatigiit akersuussimapput.

Ersarippoq aliikkutatsinnit sunnerneqartartugut. Ilisimasakkaat ilaat immaqa oqarumassapput qulaani taaneqartut qaqutigoortuusut. Biibililli najoqqutassiaasa ajornartorsiutit sammivai. Assersuutigalugu oqaatsit uku eqqarsaatigeriakkit: „Sianisuunik peqateqartoq ilisimassuseqalersarpoq, silaatsulli ikinngutaa ajortumeertussaasarpoq.“ (Ussatit 13:20) Ilumuunnginnerpa oqassalluni nalitsinni aliikkutassiatigut silaatsut — inuit ileqqorissaarnissakkut sianigisaqanngitsut — peqatigineqarsinnaasartut? Taamatuttaaq Korintumiunut agdlagkat sujugdlît 15:33-mi allassimavoq: ’Tammarnaveeritsi: ajortut ikinngutigalugit ileqqut ajunngitsut aserortarput.’ Najoqqutassiaq tamanna ersarissorujussuuvoq, ilisimasakkaat isumaqatigiinngitsut oqaasiinut assingunngilaq. Inuup pissusivianut inatsisaavoq ersarissoq. Inuit ileqqussatigut aseruussimasut ilagisarutsigik ileqqutsigut sunnissavaatigut.

Timersortartunik, filmiliaritittartunik, tv-mi isiginnaartitsisartunik nipilersortartunillu ingasattumik pingaartitsinermut atatillugu najoqqutassiat tamakku aamma ikiuutaalluarsinnaapput. Naak tusaamasat tamakku avammut takutinnerminni inuttullu inuunerminni nakuusernermik kanngunartuliornermillu amerlasuutigut akaarinnittuusaraluartut nuannaartorinnitsiminnit — ingammik inuusuttunit — pingaartinneqartuaannartarput. Aviisi The European qanittukkut allassimavoq: „Sociologit tikkuartorpaat immaqa nipilersortartut nuannaartorisaasut inuiaqatigiinni silamiorpalunnerujartuinnartuni inuusuttut inuuneranni upperisarsiornerup siornatigut inigisimasaraluanut pisimasut.“ Malugiulli Tussiaat 146:3: „Tunaareqinasigit naalagaanertat, inuit annaassisinnaanngitsut.“ Aamma Ussatit 3:31-mi allassimavoq: „Nakuusersoq sinngageqinagu iluatsitsisarnera pillugu, tumai atuallanniaqinagit.“

 Najoqqutassaq tunngaviusoq alla: Kristumiut aalajangiinialeraangamik imminnuinnaanngitsoq aammali ilagiinni kristumiunut allanut, ilaatigut misikkarissumik nalunngeqatiginnissutilinnut, kingunissai eqqarsaatigeqqaartariaqarpaat. (1 Korintumiut 10:23-33) Tassa Biibilimi najoqqutassiat aliikkutassianik ajoqutaanngitsunik qinersiniarnitsinni iluaqutigisarpavut. Apustili Paulus ima siunnersuisimavoq: ’Aammattaaq, qatanngutikka, ilumoortut suulluunniit, assuarnaatsut suulluunniit, iluartut suulluunniit, minguitsut suulluunniit, asanartut suulluunniit, nersornartut suulluunniit, suut ileqquulluartuunersut, suut ataqqinartuunersut, tamakku eqqarsaatiginiarsigik.’ — Filípimiut 4:8.

Guutip innuttai ukiuni hundredelikkuutaani najoqqutassianit tamakkunannga siulersortissimapput. Romatoqqami kristumiut inatsisivimmik allassimasumik pisariaqarsimanngillat paasissallugu sakkuaallutik peqqarneeqisumik akiuuttunik aattaqaqisunillu isiginnaarneq tassaasoq aliikkutaq pitsaanngitsoq. Najoqqutassiat qulaani taaneqartut maleruaannarsimavaat taamaalillutillu imminnut, ilaquttatillu ilagiitillu illersorlugit.

Qanoq qinersisoqarsinnaasoq

Kristumiut ilumoortut ullumikkut aamma taamaaliorput. Qinersitinnatik ileqqussatigut qanoq issusiat misissoqqaartarpaat. Qanoq ilillutik? Assersuutigalugu nipilersukkamik immiussamik pisitinnatik puua misissoqqaartarpaat. Sunik imaqarpa? Ileqqunik pitsaanngitsunik pilersitsisinnaappat? Uumissuinermik? Pikitsitsiniarnermik? Kamannermik? Atoqatigiinnermik kanngunartuliorfiginninnermillu? Ilaannikkut taallai allattorsimasaramik atuarneqarsinnaasarput. Aamma atuakkat qaliini suut imarineraat allassimasarpoq, ilaannikkullu atuakkap avataanit allaatigineqarnera ilanngunneqarsimasarpoq. Aamma filmigassat eqqarsaatigissagaanni aviisini allaatigineqarneri saqqummiunneqartarput. Qallunaat filminut inatsisaat malillugu filmimik naliliisartut aalajangersinnaavaat filmi meeqqanut 12-it inorlugit ukiulinnut imaluunniit 16-it inorlugit ukiulinnut tamanut ammasumik takutinnissaa inerteqqutaavoq. Filmillu ilaat  meeqqanut 7-it inorlugit ukiulinnut inerteqqutaapput. Taamaattumik ullumikkut silarsuarmi ajortunngorsimasumi aliikkutassiat ilaat ileqqorluttutut nakuusernertaqarpallaartutullu isigineqarpata takorloorneqarsinnaagunanngilaq kristumiu akuersiinnarnerussasoq tamakkuninngalu isumakkut uummatikkullu immertilluni.

Illuatungaatigut kunngi silatooq Salomon ima mianersoqqusisimavoq: „Taamaattumik iluassuseqarneq ilisimassuseqarnerlu ingasaanniassanngilatit. Soormi imminut aserorniinnassavit?“ (Nalunaajaasup oqaasii 7:16) Aliikkutassaqarnermut atatillugu allanit eqqortuliornerusutut misigilersooqqajaasinnaavugut. Immaqa misigisarpugut Biibilip najoqqutassiai peqqissaartumik qinunikkullu misissoreerlugit eqqortumik qinersisimalluta. Immaqali paasilerparput allat najoqqutassianik tamakkuninngarpiaq maleruaasut allatut isummertut. Tamanna nikalluutigissanngilat. Tamatta immikkut qinikkatsinnut akisussaavugut. — Galâsiamiut 6:4.

Qaqugukkut ingasappallaalissava?

Sulinngiffimmi sukisaarsaatit silarsuarmi ingasattumik pingaartinneqarput. Assersuutigalugu, qanittukkut atuagassiami niuernermut tunngasumi Parks & Recreation-imi pingaarnerutitami sukisaarsarneq ’inuunerup pingaarnersaanik’ taaneqarsimavoq. Taamatuttaaq The New York Times Magazine-imi arfininngorneq nuannaarniarfiusaqisoq pillugu ima allassimasoqarpoq: „Ataatsimut katikkaanni inuunermi ulluinnaat arfininngornerit unnukkuinit amerlaneroqaat, arfininngornerulli unnukkuata inuuneq nuannersuutippaa.“ Innuttaasut inooqatigiinnerannik ilisimatuut ilaasa oqaatiginiartarpaat nunani pisuuni inuiaqatigiit sulinngiffeqarnermik tunngaveqartuusut upperisarsiornerlu inuppassuit akornanni sulinngiffimmi soqutigisaannaasoq.

Suut tamarmik killormuulersimanerat kristumiut tupaallaatiginngilaat. Qangarsuarli Biibilimi siulittuutigineqarsimavoq inuit ’ullussani kingullerni imminnik asasuujumaartut Guuti kajumiginagu nuannaarutinut kajumittuullutik’. (2 Timûtiuse 3:1-4) Biibililli najoqqutassiaasa eqqortumik tulleriiaarinissatsinnik ikiortarpaatigut. Soorlu Jesus oqarsimasoq: ’Asassavat Jehova Guutit uummatikkut iluunngarlutit tarnikkullu iluunngarlutit isumakkullu iluunngarlutit nukisillu tamakkerlugit.’ (Mákorse 12:30) Taamaattumik Guutip innuttaanut inuunermi pingaarnerpaaq tassa taassuminnga asanninneq. Kristumiutut kiffartorneq sunngiffimmi sammisassanit inangersimaneqanngilaq, sallerpaatinneqarlunili. Allaat kristumiut suliffii inuunerminni kiffartornerannik pingaarnerpaamik tapersersuutaaginnartussaapput. — Matîuse 6:33.

Tassa aliikkutassat eqqarsaatigalugit kristumiup pilliutissaasut naatsorsortariaqarpai sukisaarsaatit qanoq piffissaajaataatigissanersut naatsorsorlugu, pilliuteqarfigissallugit naleqquttuunersut paasiniarlugu. (Lúkarse 14:28) Nuannaarnerniutit pissutigalugit pingaarnerusut, soorlu nammineq ilaqutariittulluunniit atuaqqissaarneq, sumiginnaraanni pilliut naleqarsimassanngilaq.

Qinikkatit ilinnik oqaluttuartuupput

Piffissaq aliikkutassanut atugarput qanoq tulleriiaarinitsinnik oqaluttuassaqaqaaq, aliikkutarisattalu imarisaat qanoq ileqqoqarnitsinnik tunniulluinnarsimanittalu qanoq ilumoortigissusianik ersersitsisuullutik. Qinikkavut inuttut qanoq ittuunitsinnik, sunik najoqqutaqarnitsinnik, ersersitsipput. Aliikkutarisartakkavullu ikinngutitsinnik, ilaquttatsinnik ilagiinniittoqatitsinnik paasititsipput oqimaaqatigiissumik pissuseqarnersugut imaluunniit ingasattajaartumik pingaartitsiniartuunersugut, aalajangersimalluinnartuunersugut imaluunniit ilumoortuusaarniartuunersugut, naapertuilluarniartuunersugut imaluunniit imminut naapertuilluartuutinniartuunersugut.

Aalajangernitit imminni takutitsisuulit, Pinngortitsisummi, uummatinik pissutiginiakkanillu paasiniaaqqissaartartup, saavaniipputit. Eprîarinut agdlagkat 4:13-imi ima allassimavoq: ’Pinngortitamillu taassumunnga ersinngitsoqanngilaq, suulli tamarmik taassuma isaanut saqqumillutillu uleersimapput, tassa naatsorsuiffigisassatta.’ Akissut apeqqutip matuma ilorpiaaniittoq Guutip kisimi takusinnaavaa: Inuunitsinni sutigut tamatigut Guutip najoqqutassiaanit siulersorneqarusuppugut? (gD 8/11 92)

[Qupp. 23-mi assiliartaq]

Suut isiginnaartarnerlugit, atuartarnerlugit tusarnaartarnerlugillu sianigaajuk?