Angajoqqaajuisi asannittut?

MEEQQASI asavisigik? Usorsisimaarutigisarpisigik? Meeqqat tamarmik immikkut pingaarutilittut, asseqanngitsutut taarserneqarsinnaanngitsutullu isigaasigit? Angajoqqaat amerlanersaat taama isumaqarput. Taamatulli misigissuseqarnersi meeqqassinnut oqaluttuarisarpisiuk? Ajunngitsulioraangata nersualaartarpisigik? Asanninnersi nittartarpisiuk soorlu pinnguaqatiginerisigut, eqinnerisigut asannittumilluunniit pakkunnerisigut?

„Kisianni uanga taamaattuunnginnama,“ immaqa ilaat akerliliisinnaapput. „Misigissutsinnik nittaanissara pikkoriffigivallaannginnakku.“ Ilumoorpoq taamaattoqarmat. Meeqqanulli asanninnermik nittaaneq amerlanerit isumaannit pingaarneruvoq.

1951-imi meeqqat meeqqerivinniittut 400-t misissuinermi ilaasimapput, tamannalu qanittukkut paasiniaasartut misissoqqissimavaat. Angutini arnanilu 94-ini misissuinermut ilaasimasuni paasiniaasartut nassaarisinnaasaanni pissutsinik immikkut ittunik nassaarsimapput. The New York Times naapertorlugu meeqqat asanittunik pitsaasunillu angajoqqaaqartut, inersimasutut ingerlalluarnerupput. Aappariinnerat ingerlalluarnerupput, perorsarluakkanik meeraqarput, suliffitsik nuannaraat qanimullu ikinnguteqarlutik. Dr. Carol Franz, misussuinermi ittuusimasoq, allappoq „isumamikkut ilorrisimaarnermik takutitaqarput, inuuneq isumalluarfigaat imminnullu inooriaasertillu naammagisimaarlutik“.

Akerlianilli Dr. Carol Franzip paasisimavaa „nillertunik tunuarsimaartunillu angajoqqaaqarsimasut inuuniarnermi tamani ajornartorsiornerusut, suliffiup tungaatigut, inuiatigiinni inuuniarnermut sungiussiniarnerminni isumakkullu ilorrisimaarniarnermi“. Misissuinerup takutitsiarpaa angajoqqaanit asanninermik amigaateqarneq sivisunerusoq eqqarsaatigalugu meeqqanut avinnermit, imerajunnermit piitsuunermilluunniit ajoqutaanerusinnaasoq.

Taamaannera inunnut ilumoortunut Biibilimik atuaqqissaartartunut tupaallaataasariaqanngilaq. Nalunngilaat Jesusip meeqqat qanoq iliorfigisarai. Pingaartippai, soqutigai nuannarinninninilu takutittarpaa. (Mákorse 10:13-16; Lúkarse 9:46-48; 18:15-17) Tamatumuna soorunami Ataatani qilammisoq maliinnarpaa — taanna iliarsunnut Ataataavoq. (Tussiaat 68:6) Jehova Ataataavoq naammalluinnartoq. Asasiminut nuannaarutaasumik angajoqqaat naammalluinnangitsut amigaatigisinnaasat tamaasa tunniussinnaavai. — 2 Korintumiut 6:18. (gD 22/10 92)