Inuusuttut aperipput:

Qanoq ilillunga imerunnaarsinnaavunga?

„Aqaguani nuanniilliortuaannarpunga, misigissutsikkut anersaakkullu.“ — Bob.

„Angerlarsimaffinni, atuarfimmi ikinngutimalu tungaatigut ajornartorsiortuaannarpunga, inatsisaatsuliortuaannarpungalu!“ — Jerome.

BOB Jeromelu imerpallaartarsimapput akulikippallartumillu, marluullutillu atuivallaarsimanitik akilertariaqarsimavaat. Marluullutik imigassaq pinngitsoorsinnaajunnaarsimavaat. Kiisamili Bob imerajukkunnaarsimavoq, Jeromelli atornerluinini suli anigorniarsaraa.

Silarsuup ilarujussuani inuusuttuaqat akornanni imigassamik atornerluineq ajornartorsiutaagaluttuinnarpoq. Missiliuunneqarsimavoq USA-ginnarmi inuusuttuaqat 5 millionit missaat annertuumik imigassamik ajornartorsiuteqartut. Inuusuttutut kristumiutut qularnanngitsumik imigassaq mianersuuppat. Sulilu 18-iliisimanngikkuit, soorunami qallunaat inatsisaat atortuusut maleruassavatit imigassamillu kimittunerusunik (2,5 procent sinnerlugu aalakoornartortalimmik) neriniartarfinni sassaallerfiusunilu allani imissanngilatit. Ilanngutassiaq una aqqutigalugu kissaatigaarput pinngitsoorsinnaannginnissannik — immaqalu inersimanerulernissannut imigassanillu aqussinnaanerulernissannut saperunnaarnissannullu utaqqiniarninnut — aalajangersimanerpit tapersernissaa. Aalakoornartunilli pinngitsoorsinnaajunnaarsimaguit, neriuutigaarput qaammarsaatit uku ikiussagaatsit ajornartorsiutinnik akiuiniarninni. Sulissutigineratigut, Jehovallu ikiuineratigut, atornerluineq anigorneqarsinnaavoq.

Ajornartorsiut miserratigeqinagu

Alloriarneq siulleq ajornarnerpaarlu allortariaqakkat tassaavoq ajornartorsiummik miserratiginninnginneq. Inuit imerajuttut aalakoornartumik ajornartorsiuteqarnertik miserratigigajuttarpaat. ’Aqussinnaavara,’ imerajuttup naakkinartumik usorsisimaartumittaarli akissutigisarpaa. 15-inik ukiulik ima oqarsimasoq assersuutigeriartigu: „Imigassamik ajornartorsiuteqanngilanga. Unnukkut arfiniliinnarnik immiaarartortarpunga.“ Oqaatsit taakkua angummut Biibilimi allaatigineqartumut eqqaanarput „ajortuliassap pitsaaniarfigalugu  nakutinniartarpaa unioqqutitsisinniarlugu uumissuileqqullugulu“. — Tussiaat 36:3.

Aap, miserratiginninnerup siumukarsinnaaneq akornusertarpaa. Taamaattumik imigassamut uerisimaguit miserratiginnginnissaa pisariaqarluinnarpoq. Ikinngutivit, qatanngutivit angajoqqaavilluunniit imerpallaarnerarlutit oqarfigippatit tusaanngitsuusaqinagit. Akerarinngilaatsit; eqqortumik oqarfigiinnarpaatsit. (Naleqqiuguk Galâsiamiut 4:16.) Bob siuliani taaneqartoq weekendit tamaasa imerujussuartarsimavoq. Imertarnini pillugu ikinngutimi oqaloqatiginiaraluarmani, imigassap tungaatigut ajornartorsiuteqarnini tusaajumasimanngivippaa, tamatumalu tungaatigut oqaloqatigiinneq kipitillugu. Bobili atornerluinerminik qanoq sunnerneqarpa? „Imersimanngikkaangama sianiutiluttarpunga, imersimagaangamalu aqunneqarsinnaasarnanga,“ Bob nassuerpoq. „Ilaqutariinni inuuninnut Guutimullu attaveqarninnut ajoqutaasimavoq.“

Kingusinnerusukkulli Bob imerusuttarnini ikinngummut nassuerutigaa. Miserratiginninneq qimareerlugu, Bobip atornerluinini qaangeriartulersinnaanngorsimavaa.

Imerunnaarumallutit aalajangerit

Professor George Vaillant allappoq „imerajunneq . . . katsorsarneqarsinnaavoq, katsorsagassalli akisussaaffimmik annertuumik misigisimanissaa pisariaqarpoq“. Tamatumunngalu aalakoornartortalinnik imerniannginnermik aalajangerneq ilaavoq. Aalajangersinnaanngikkaanni imerajuttutut inuusariaqarpoq — toqusariaqarlunilu. Suna iluaqutaasinnaava? Imerajunnerup ulorianartortaasa eqqarsaatiginerat iluaqutaasinnaavoq. ’Ajortumik uumiginninneq’ ajornannginnerussaaq, imernerullu unitsivinnissaanut aalajangiussisimanermut nukittorsaataassaaq. — Tussiaat 97:10.

Timikkut, misigissutsikkut ileqqussallu tungaatigut ajornartorsiutit imerajunnerup nassatarisartagai eqqarsaatigineqarsinnaapput.  Ilumooraluarpoq imernerup ilukkut anniarneq imminulluunniit nikanartutut misigineq millisikkallarsinnaagai, aalakoornartumulli sangunerup ajornartorsiutit aaqqinnagit amerlisiinnassavai — ajornartorsiutit ikinngutigiinnermik aseruinerit ilaqutariit iluanni nuanniilliornerit. Imigassartorneq ilutigalugu imminut noqissinnaajunnaartoqartarmat, malugerpiarnagu ’silaarussutigineqarsinnaavoq’ sualuttumillu ajortuliortitsisinnaalluni. — Hosea 4:11.

Annertuumillu imigassartornerup timimut ajoqutaasinnaanera eqqarsaatigiuk. Timip pisatai arriitsumik ajortikkiartussapput. Taamaattumik Biibili piviusorsiorpoq oqarami inuit imerpallaat ’aliasunnermik, eqqasunnermik, saqitsaassinermik, naammagittaalliornermik pinngitsoorsinnaasaraluaminnillu ikeqalernermik’ misigisaqartartut. (Ussatit 23:29, 30) Sivikitsuinnarmik nuannaarniut akiminut naleqquppa?

Aamma imminut eqqaasissalluni pilluarnissamut aalakoornartoq pisariaqanngitsoq pitsaassaaq. Imminut ataqqineq, peqqilluarneq, ikinngutigiilluarneq asannittunillu ilaqutaqarneq anguniarlugu qiimmassaatipalaat pisariaqanngillat. Tamakkua angussagaanni Guutip oqaasiani, Biibilimi, unnersuussutit maleruarnissaat apeqqutaavoq. (Tussiaat 1:1-3) Atuakkamilu tassani siunissami pilluarnissamik neriuut saqqummiunneqarpoq — inuuneq naassaanngitsoq misigissutsikkut timikkullu anniaatitaqanngitsoq! (sarĸúmersitat 21:3, 4) Neriuutillu tamatuma aalakoornartutornaveersaarnissamik pissutissaqarteqqippaatigut. — Naleqqiuguk 1 Korintumiut 6:9, 10.

Ikiortissarsiorit

Atornerluinerulli kipitikkusunnera kisimi naammanngilaq. Allat ikiuinerat tapersersuinerallu pisariaqarpoq. „Marluugaanni ataasiinnaanermit pitsaaneruvoq,“ kunngi Salomon silatooq oqarsimavoq, „arlaat orluppat aappaata nikuitittarpaa.“ (Nalunaajaasup oqaasii 4:9, 10) Allap ajornartorsiutinik ikiuutaanissaa tatigissallugu ajornanngitsuujuaannanngilaq. Katy, imerajuttuunerminik qaangiussilersoq, ima siunnersuivoq: „Inunnik tatiginninneq ilinniaruk, ingammik ilaquttatit.“ Aap, asanninnermik tapersersuinermillu pisariaqartumik ilaqutarisat tunisisinnaanerpaasarput.

Imaassinnaavoq ilaquttavit iluani pissutsit pissutigalugit imilersimasutit. Angajoqqaavilli qanoq atugaqarnerit paasigunikku, pissutsinik aaqqeerusussinnaanissaat ilimaginngiliuk? Soormi ajornartorsiut pillugu angajoqqaatit oqaloqatigigukkit? Annertuumik ajornartorsiuteqarlutit oqaluttuutikkit. Pisuutinniaannarnagit ikiuinissaannik tapersersuinissaannillu qinnuigikkit. Angajoqqaatit ammaffigigukkit ilumoorfigigukkillu, ilaquttassi ’katiterneqarnissaannut ataasinngortitaanissaannullu’, Guutip ilagiissortaasulli, taperseeqataassaaq. (Evfisumiut 4:16) Taamaallilluni atornerluinerpit qaangerniarnera ilaqutariit tamarmik sulissutigisinnaavaat.

Ilaquttannilli ikiorsiisoqarsinnaanngippat, allat ikiuisinnaapput. * (Ussatit 17:17) Bobip utoqqaanertaq kristumiu  ikinngutigilersimavaa, taassumalu qaammatit arlalippassuit ingerlanerini sapaatip akunneri tamaasa pulaartarsimavaa. Utoqqaanertap taassuma Bob qanoq ingerlanersoq paasiniarsimavaa. „Soqutiginninnera isumassuineralu pisuullutik atornerluininnut ajoqutaasumut kipititsisinnaasoq imminut ataqqineq pisariaqartoq pisimavara,“ Bob oqarpoq. — Jâko 5:13, 14.

Pingaarnerpaavorli paasisallugu Jehova Guutip ikiuinera pisariaqartillugu. Tunaariuk nukissannillu tunitittarit. Aap, Jehovap ikiuinera pisuulluni ’sequmissimasumik uummatillit’ katsorsarneqassapput ’ikiilu mattuserneqarlutik’. — Tussiaat 147:3; aamma takuuk Tussiaat 145:14.

Nutaanik ikinngutitaarit

New Zealandimi apersuinerup takutippaa inuusuttut imigassamik atornerluisut ikinngutiminnit pinngitsaaliusarneqartartut. Taamaattumik inuusuttut allat imertartut ilagisarukkit imerunnaarnissat artornartissavat. Naleqqulluartumillu Biibilip kaammattorpaatigut „viinnisorpallaartut“ akornanniinnginnissarput. (Ussatit 23:20) Aap, nutaanik peqqinnartunillu ikinngutitaarnissaq sulissutigiuk. Soorlu ’ajortut ikinngutigalugit ileqqut ajunngitsut aserortartut’ taamatulli ikinngutaalluartut ajunngitsumik sunniisarput. — 1 Korintumiut 15:33.

Kimip tamatuma ilumoornera malugisimavaa. „Nuanneeqaaq,“ nassuerpoq, „ikinngutinilli nutaanik ujarlertariaqarsimavunga . . . Imigassap ikiaroornartulluunniit eqqaaniinnissara kissatigisimanngilara.“ Ilumooraluarpoq imigassamik atuineq ajortunik ikinngutissaaleqinartoq, malugissavalli Jehovap nalunaajaasuisa akornanni inuusuttoqartoq maligassaalluartunik tapersersuerusuttunillu. Imigassaq qimarnuittut atorneq ajorpaat nuannaarnitigisarnagulu taamaattumillu ’inutoqaq ileqqui tapullugit iperarniarnerinut’ ikiorsinaavaatsit. — Kulorsamiut 3:9.

Atornerluinerit qaangersinnaavat!

Imigassartaqanngitsumik inuuniarneq sorsuttuartariaqarnertut misiginarsinnaavoq, ilaatigullu iminnginniarneq ajornartorujussuusinnaalluni. „Suli imerusunnerujussuaq pigaara,“ Ana nassuerpoq, „ingammik nikallungagaangama, pakatsisimagaangama, isumatsassimagaangama eqqunngitsuliorfigineqarsimagaangamaluunniit.“ Qaqutigoortuunngilaq imigassamik atornerluisimasuugaluit imigassamut nakkaqqittoortarnerat taamaattumillu imminut pisuutingaarnermik misigisallit. Illit taamaalisssagaluaruit Jâko 3:2-mi allassimasoq eqqaamajuk: ’Tamatta qassiinik naakkiuttarpugut.’ Eqqaamajuttaaq Jehova Guutiummat naakkinnittoq sanngiissutinnik ilisimannittoq paasinnittorlu. — Tussiaat 103:14.

Taamaakkaluartoq Guutip inussiarnersuunerata atornerlunnissaa mianersuuttariaqarpat. Aap, kukkunitit ilinniarfigikkit, nakkaqqinnginnissallu aalajangiusimajuk. Taamatut aalajangiussisimalluni kiisami Bob imerunnaarsimavoq. Imerunnaaramili nuannaarutigisimavaa ilaquttamini Guutimullu attaveqarnermini eqqissinini. Ullumikkullumi piffissani tamaat kiffartuussisinnaanini nuannaarutigisinnaavaa. Illittaaq isumakkut pilluarneq eqqissinerlu misigisinnaavatit, imigassamut akiuunnerit ajugaaffigigukku. (gD 22/1 93)

[Quppernerup ataani ilanngussaq]

[Qupp. 16-mi assiliartaq]

Inuusuttut imigassamik atornerluisut ajornartorsiuteqarnertik miserratigigajuppaat