Guutip salliutinnissaanut sapiissuseqalerpugut

OQARASUAAT unnuakkut pingasunut tupannaqisumik sianerpoq. Tassaana ataatama niuernikkut attaveqarfiisa ilaat sakkutuuiarnerit peqatigiiffianni American Legionimi ataatsimeeqqammersimasoq. Annilaangarpalulluni ataata oqarasuaatikkut oqarfigerpallappaa: „Wally, Philadelphia Inquirer-imut sianipallanngikkuit, ullaakkut saqqummersussamut ilanngussinissaat angumerisinnaatillugu, oqarlutillu erfalasumik ilassinninniarlutit, niuertarfiit ilaquttatillu ullumi pinerliinianit saassunneqassapput. Qanorluunniillu pisoqassagaluarpat uanga akisussaassuseqarfigiumanngilluinnassavakka!“ Ataata anaanalu pinerliinianik siornatigut naammattuugaqartareersimapput. Maannalu eqeerluinnarput qinunialerlutillu.

Ullup qaalernerani uagut meeqqat itersarpaatigut. Ataatama qatanngutiga Bill peqquaa meeqqat minnerit anaanannik aataakkunnukaateqqullugit; taava Billilu pisarnitsitut illumi niuertarfimmilu ikiuuppugut. Ataata Minersvillemi politimesteriliarpoq sioorasaarullu nalunaarutigalugu. Kinguninngua politiit biiliat niuertarfitta silataanut pivoq ullorlu naallugu tassaniilluni. Niuertarfimmi suliassavut nakkutigaavut pisiniallu ikiorlugit, silammulli aqqusinermut qissimigaartuarluta. Inuit ataatsimoortut niuertarfitta silataanut unikkaangata tamatigut uummatiga kassulertarpoq; pinerliinianilli takkuttoqanngilaq. Immaqa qaammarmat — immaqalu politiit biiliat pissutigalugu — kamassimaneq sakkukillisimavoq!

Sallusuissut nassaaraarput

Qanorli ililluta quarsaanganartoq tamanna atorsimavarput? Upperisatsinnut attuumassuteqarpoq. 1931-imi arfineq-marlunnik ukioqartunga anaanannik aataga aanagalu uagutsinni sivisungaatsiartumik najugaqarput. Biibilimik atuaqqissaartartuupput, taamanikkut Jehovap nalunaajaasui taamatut taaneqartaramik.

Anaanannik aatama ataataga oqaluussiffigineq ajorpaa, angerlarsimanngikkaangatali ataataga aataap aanaallu inaannut isertarpoq atuartagaat sunik imaqarnersut takuniarlugit. Atuakkani iingajattarpaaluunniit! Nuannaarpaloqaluni nillertoq suli tusaqqoortarpara: „Takusiuk Biibilimi qanoq allassimasoqartoq!“ Sallusuissummi nuannaarutigisorujussuuaa. Aamma anaanama atuartarpaa, 1931-milu metodistit ilagiivinut ilaasortaajunnaarpoq. Uaguttaaq Biibilimik atuaqqissaaqatigineqartalerpugut, paratiisilu nuanningaartoq nunarsuarmi pilerseqqinneqartussaq tusarakku taakkunatulli nuannaarutigitigaara. Aallaqqaataaniilli sallusuissut nammineq pigiliuppara.

1932-mi kingusissukkut anaanama aperaanga illumiit illumut oqaluussisalernissannut piareersimanersunga.  Taamanikkut inuusuttut utoqqartulli kisimiillutik angalaartarput, allagartallu nalunaajaatit atortarpavut. Imatut oqaannartarpunga: „Aluu, pingaaruteqartumik tusarliussassaqarpunga. Una atualaarsinnaaviuk?“ Pulaakkama allagartaq atuareerlugu ilasseraanngilaaginnaraangat aallaqqaataani oqaannartarpunga: „Ajunngilaq, ajunnginniarna.“

Sivitsunngitsoq akerlilersorneqartalerpugut. 1935-mi upernaakkut illoqarfimmi New Philadelphiami oqaluussivugut. Eqqaamavara angut matuata silataani oqaloqatigitillugu politiit takkuttut oqaluussisartullu tamatta tigusaraluta. Angut oqaluussara tupappaseqaaq niviarsiaraq 11-nik ukiulik tigusarimmassuk. Qatserisartoqarfimmukaanneqarpugut. Silataani pinerliiniat tuusintilikkuutaat nilliasorsuullutik katersuussimapput. Qularnanngitsumik sapaat taanna naalagiat soraajaarsimapput kikkut tamarmik ilaanissaannik periarfissinniarlugit. Inuppassuit akulloqquallugit ingerlanneqaratta niviarsiaqqamit talikkut tillunneqarpunga; ajoqusernatali iserpugut, paarsisullu sakkullit pinerliiniat matumik aseruinissaat pinaveersaartippaat.

Oqaluussisartut 44-usugut qatserisartoqarfimmi tattorliuuteqaagut, uagullu allatut ajornartumik majuartarfinnut ingippugut. Nikallunganngeqaagulli. Qatanngutivut ilagiinnit Shenandoahmeersut, illoqarfimmi oqaluussinitsinni ikiuisut, ilaginerat nuannaarutigeqaarput. Tassani naapippara Eleanor Walaitis, ikinngutigiillualerpugullu. Nalunaaquttap-akunnialui qaangiummata politiit iperarpaatigut.

Erfalasumik ilassinnittarneq oqallisaalerpoq

1935-mi Jehovap Nalunaajaasuisa Washington, D.C.-mi, ataatsimeersuarneranni allanngorneqarfiusumi qatanngut Rutherford, Napasuliaq Alapernaarsuiffiup Peqatigiiffiata præsidentia, aperineqarpoq meeqqat atuartut erfalasumik ilassinnittussaanersut. Akilluni oqarpoq nunami ilisarnaammik ilassineratigut annassutissatut tunaartarinninneq Guutimut ilumuunngitsuliornerussasoq, namminerlu taamaaliorusunnani. Tamanna Billilu maluginiartorujussuuarput. Angajoqqaavullu tamanna oqaloqatigiissutigaarput Biibilimilu qupperlugit Mosesimik allakkat aappaat 20:4-6, Juánasip agdlagai sujugdlît 5:21 aamma Matîuse 22:21. Ataatap anaanallu tatiniarnataluunniit pisuusutut misigitinnianngilaatigut. Septembarimi atualeqqikkatta qanoq iliorumaarnissarput qularutiginngilluinnarparput. Ilinniartitsisulli isigileraangatigut tamatigut sapiissuseeruttarpugut, talivut qullarlugit ileqqulersoqataallutalu. Ilaatigut annilaanngatigigakku ilassinneqataanngitsooraluaruma atuaqatima tunoqinammannga.

Pionerilli ilaannit pulaarneqaratta qanoq iliortarnitsinnik oqaluttuuppara. Qatanngutip arnap oqaasia puiunngisaannarpara: „Lillian, ilumoortuusaarniartut Jehovap maajugai.“ Oktobarillu arfernanni qatanngut Rutherford nuna tamakkerlugu tusarneqarsinnaasumik radiokkut oqalugiarpoq qulequtalimmik: „Erfalasumik ilassinninneq.“ Nassuiaavoq erfalasoq ataqqigipput, assilissalli ilisarnaatilluunniit saavani ileqqulersorneq tassarpiaasoq guutipilussiorneq. Jehovamut attaveqarnitta taamaaliornissarput inerteqqutigaa.

Oktobarip 22-ani Bill, qulileeqqammersoq, qungujulaqaluni atuarfimmit angerlamut apuuppoq ajugaasimaarpalullunilu oqarluni: „Erfalasumik ilassinninngilanga! Ilinniartitsisup talera nappartinniarsarigaluarpaa, uangali kaasarfinnit amujumanngilara.“

Aqaguani ullaakkut atuarnerup aallartinnginnerani uummatinnik kassuttooqalunga ilinniartitsisunnukarpunga sapiissuseeruttuunnginniassagama. „Miss Shofstal,“ ittoqiisaannaq aallartippunga, „erfalasumik ilassinnissinnaajunnaarpunga. Biibilimi, Mosesimik allakkat aappaanni, kapitali 20-mi, allassimavoq allamik Jehova Guutiunngitsumik guuteqassanngitsugut.“ Tupaallaatigeqisannik eqitaaginnarpaanga oqarlunilu niviarsiaraasunga asanartoq. Erfalasumik ilassinninneqalermat peqataanngilanga. * Erniinnaq tamarmik nakkuserpaannga, uangali nuannaartutut misigaanga. Tassaana Jehovap erfalasumik ilassinninngitsoornissannut sapiissuseqalersikkaanga!

Niviarsiaqqat ikinngutikka tupappaseqaat.  Ilaasa marlussuit ornippaannga aperalungalu sooq taamaaliornersunga, pissarsiaqarfiulluartumillu oqaloqatigiippugut. Atuarfimmili amerlanerit sumiginnarpaannga. Ullaakkut atuariartornerit tamaasa nukappiaqqat ilaasa ujaraaqqanik milluujutigalunga suaartartarput: „Aana Jehova tikiuppoq!“ Atuarfiup ataatsimiititai sapaatit-akunnerini marlunni utaqqimaartutut pissuseqariarlutik aalajangerput iliuuseqarnialerniarlutik. Novembarip arfernanni ataataga anaanagalu nukappiaqqallu allap uatsitut atugaqartup angajoqqaavi ataatsimiititanit ataatsimeeqatigineqarput. Inspektøri, professori Charles Roudabush, oqarpoq aalajangiusimanninnitta assigiinnaraa naalakkumannginneq, ataatsimiititallu ilaasortai allat tamarmik isumaqataapput. Atuarfimmit anisitaavugut.

Angerlarsimaffimmi ilinniartitaalerneq

Atuakkatsinnik arsaarneqanngilagut, taamaattumillu angerlarsimaffimmi atuarfik qaliatsinni pilersikkasuarparput, anaanama illumi ikiortaanik inuusuttumik nakkutilliisulerlugu. Sivitsunngitsorli allagarsivugut nalunaarfigineqarluta ilinniarsimasumik ilinniartitsisussarsinianngikkutta perorsaavimmut pisinneqassasugut.

Paul aamma Verna Jones, uagutsinnit 50 kilometerisut ungasitsigisumi nunaateqartut, ullualuit kingorna uagutsinnut sianerput. „Atuarparput meeqqasi atuarfimmit anisitaasimasut,“ Paul ataatamut oqarpoq. Iigaq nerisarfimmik isersimaartarfimmillu akornanniittoq peerlugu inimik atuarfiliorsimapput, tassanilu atualernissatsinnik neqeroorfigaatigut. Ilinniartitsisoq arnaq inuusuttoq Allentownimeersoq sallusuissummik soqutiginnittoq piumaqaluni tassani ilinniartitsisunngorumasimavoq, naak pisortat atuarfiutaanni ilinniartisisunit akissarsiakinnerugaluaqaluni. Maanna Jehovap nalunaajaasuisa meeraasa atuarfii sineriammi pilersiortorneqalerput.

Ilaqutariit Jonesikkut sisamanik meeraqarput, minnerpaamilli qulinik allanik inisimasoqarlutik. Siniffinni tamani pingasuulluta tutittarpugut; illuatungaanut saattoqarniarpat kisianni tamakasitta illuatungaanut saalluta. Ilaqutariit Jehovamut nalunaajaasuusut allat qanittumiittut aamma taamatungajak amerlatigisunik inisimasoqarput, erniinnarlu atuarfik 40-nik atuartoqalerpoq. Qiimanartoqaqalunilu tissinartoqartaqaaq, aammali pisussaaffeqarpugut. Arfinernut makittarpugut; nukappiaqqat silami ikiuuttarput, niviarsiaqqallu igaffimmi suleqataasarlutik. Tallimanngornikkut atuarneq ineraangat angajoqqaavut tikiuttarput weekendimi angerlaakkiartorluta. Ullut ilaanni ilaqutariit Walaitikkut meeraat ikinngutiga Eleanor ilagalugu takkupput.

Atuarfik ajornartorsiutissarsiuartarpoq. Qatanngut Jones toquvoq, taamaattumik ataatatta biili usisaatilik atuarfiup bussinngortippaa 50 kilometerisullu ungasitsigisumut atuarfiliaattalerluta. Taava ilavut inuusuttuaqqat atuarfiannut pinissaminnut utoqqaassuseqalerput klassinilu tamakkunani ilinniartitsisinnaassusilimmik ilinniartitsisoqartariaqalerlutik. Akornutissalli tamatigut Jehovap aaqqiissutissittarpai.

Eqqartuussisunut sassartitaavugut

Peqatigiiffik aalajangersimavoq erfalasumik ilassinninnermik apeqqummut atatillugu saassunneqartarsimanivut eqqartuussisunut suliassanngortinniarlugit. Meeqqat aalajangiussisimasut hundredelikkuutaat maanna tuusintilikkuutaanngorsimapput. Ilaqutariit tulleriaarlugit suliassanngortitsisinneqaqattaarput, eqqartuussivinnilli itigartinneqaqattaarlutik. Taava uagut ilaqutariit sammineqalerpugut, Peqatigiiffiullu eqqartuussissuserisuisa Amerikamilu innuttaasut pisinnaatitaaffii pillugit peqatigiiffiup eqqartuussissuserisuisa tamarmik Philadelphiap eqqartuussiviani maajimi 1937-mi suliassaq uagutsinnut tunngasoq eqqartuussissutissanngortippaat. Suliassaq 1938-mi februaarimi suliassanngortinneqarpoq.

Bill uangalu ilisimannittutut killisiorneqartussanngorpugut. Suli eqqaamavara taamanikkornissaanut annilaangaqalunga! Peqatigiiffiup eqqartuussissuserisuata uagutsinnut apeqqutigeriataarneqarsinnaasunik akinissatsinnut sungiusarteqattaarpaatigut. Eqqartuussivimmi Bill siulliulluni ilisimannittut killisiorneqartarfiannut qaqivoq. Aperineqarpoq sooq erfalasumik ilassinnikkumasimannginnersoq, Mosesillu allagaasa aappaanni 20:4-6 issuaatigalugu akivoq. Taava uanga tullinnguuppunga, taamatullu aamma aperineqarpunga. Akigama: „Juánasip agdlagai sujugdlît 5: 21,“ illuatungiliuttut eqqartuussissuserisuat akerliliivoq oqarluni allassimaffik ataasiinnaq naammattoq! Taava professori Roudabush ilisimannittut killisiorneqartarfiannukartinneqarpoq. Taanna oqarpoq sunnerneqarluta taamatut isummertinneqarsimasugut aammalu „erfalasumut nunamullu . . . asissuinermik“ siaruarterisimasugut. Eqqartuussisorli Albert Maris uagut iluaqutissatsinnut aalajangiivoq.

’Atuarfimmut uternissarsi eqqarsaatigissanngilarsiluunniit!’ atuarfiup ataatsimiititaanit nalunaarfigineqarpugut. ’Suliassanngorteqqissavarput.’ Taamaattumik Philadelphiamukaqqittariaqarpugut, tamatumuunakkut suliassanngortitseqqitanik eqqartuussivimmut. Novembarimi 1939-mi eqqartuussisoqatigiit pingasut suliassaq uagut iluaqutissatsinnut aalajangerpaat. Atuarfiup ataatsimiititaanut ilaasortat kamattupilussuupput. Maanna eqqartuussiviit pingaarnersaat saappaat!

Eqqartuussiviit pingaarnersaannut

Nuannaaqaagut tusaratsigu qatanngutip Rutherfordip nammineq uagutsinnik suliassaq ingerlanniaraa! Eqqartuussinissaq aqaguttoq unnukkut Washington, D.C.-mi qimuttuitsoqarfiit pingaarnersaanni arlaqarluta naapipparput. 1940-mi apriiliuvoq, sulilu sila nillasuppoq. Misigaagut soorlumi tassa oqaluttuarisaanermik allattoqartoq. Aqaguani eqqartuussivik Jehovap nalunaajaasuinik ulikkaavippoq. Kiisami uagut tullinnguuppugut, qatanngullu Rutherford nikuippoq oqalulerlunilu. Puiunngisaannarpara uagut Jehovap nalunaajaasuisa meerai pruffiitimut aalajaatsumut Danielimut, ikinngutaanut pingasunut hebriiariusunut inunnullu Biibilimeersunut allanut assersuummatigut. Tiguartinnaqisumik oqaluppoq, najuuttullu tamarmik nipatannguerullutik tusarnaaqqissaarput.

Eqqartuussinerni siullerni marlunni ajugaareersimagatta ajorsarnissarput eqqarsaatiginngilluinnarparput. Juunip 3-ani 1940-mi ullaakkut anaanagalu igaffimmi radio ikillugu sulivugut. Tassanngaannaq nutaarsiassat tutsiupput. Eqqartuussisut uagut ajorsassutitsinnik aalajangiisimapput — ajorsaqqalaaginnarsimanngilagut, eqqartuussisulli arfineq-pingasut ataaseq kisimi pinnani taamatut aalajangiisimapput! Anaanalu tupangaaratta qeqqiinnarpugut tusagarput upperisinnaanagu. Taava ammukapallappugut ataata Billilu oqaluttuukkiartorlugit.

Eqqartuussinermi aalajangiineq tamanna peqqarniisaarnerpassuarnik paasisassaanngingajattunik malitseqarpoq. Nuna tamakkerlugu Jehovap nalunaajaasui eqqissiveerutitaapput. Inuit uagutsinnik saassussinitik nunaminnik asannissutsimikkut pisussaaffimminnik naammassinninnertut isigaat. Ullualuit qaangiuttut Kennebunkimi Mainemiittumi rigssali nungullugu ikuallatsinneqarpoq. Illinoisimi oqaluussisartut 60-it oqaluussitillutik pinerliinianit saassunneqarput, biilii uppikaatinneqarlutik atuagassiaataallu aserorterneqarlutik. Shenandoahmi Pennsylvaniamiittumi sumi tamaani aamarsuarnik piiaaffiit, atisaliorfiit atuarfiillu tulleriiaaginnarnik erfalasumik ilassinninnermik aaqqissuusseqattaalerput. Jehovap nalunaajaasuisa meeraat atuarfinnit anisitaajortorput, ullormilu ataasiinnarmi angajoqqaavi suliffimminnit soraarsitaajortorlutik.

Qinugisaanermi nikallujuinneq

Tassa piffissami tamatumani aallaqqaataani eqqartukkattut angajoqqaakka peqqarniisaarfigineqarnissamik sioorasaarneqarput. Sioorasaarinerit maangaannarnerata kingunitsianngua Minersvillemi ilagiit nalinginnaasut inunnik kajumissaaripput niuertarfitsinni pisiniartarunnaarnissamik. Tunisavut ikileriapiloorput. Niuertarfipput kisiat inuuniutigaarput, maannalu meeqqat arfiniliuvugut. Pilersorniarluta ataata aningaasanik atortariaqarpoq. Pisiniaqqusiunnaarnerli erniinnaq sunniutaarukkiartulerpoq, inuillu niuertarfitsinnut pisiniaqqittalerput. Allaat ilaat asissuerpalullutik oqalupput sumi pisiniarnissaminnik palasip aalajangiiniarsimanera „ingasappallaarujussuartoq“. Jehovalli nalunaajaasui amerlaqisut ukiuni tamakkunani angerlarsimaffeerullutillu niuertarfimminnik annaasaqarput.

Unnuit ilaanni Biibilimik atuaqqissaaqatiginnereerluta biilimik angerlarnialerpugut, uanga aquttuullunga. Ataata anaanalu biilimut isitsiaannartullu inuusuttuararpaaluit toqqorsimaffimminnit anillakaapput biilerpullu ungullugu assakaasut silaannaajorarnialerlugit. Siunerput  assersimaneqarunnaariataartoq takullugulu aallariataarama qangaammalli peeruteriikatappugut! Ataatamali oqaappaanga: „Lillian, taamaalioqqinngisaannaassaatit. Ajoqusiisimasinnaagaluarputimmi.“ Ajorata angerlamut apuuppugut.

Ingasattajaartumik peqqaarniisaarniarnerup nalaani tusagassiuutitigut inussiarnersumik eqqartorneqarpugut. Aviisit nuimanerusut ikinnerpaamik 171-it 1940-mi erfalasumik ilassinnittarnermut atatillugu eqqartuussisut aalajangiinerat tapersersunngilaat; ikittuinnannguit tapersersorpaat. Præsidentillu nuliata, Eleanor Rooseveltip, aviisimi ilanngussiffigisartakkamini „Ullora“-mik qulequtalimmi illersorluta allassimavoq. Pissutsilli pitsaanerulernissaannik suli neriunartoqanngilaq.

Kiisami isummamik allannguisoqarpoq

1942-mili eqqartuussiviit pingaarnersaanni eqqartuussisut ilaasa isumartik allanngortippaat paasillugulu uagutsinnik suliassaq kukkusumik aalajangiiffigisimallugu. Taamaattumik peqatigiiffiup Barnettikkut, Stullikkut McClurekkullu meeraannik suliassat eqqartuussiviit pingaarnersaannut suliassanngortippai. Meeqqat taakku West Virginiami atuarfimmit anisitaasimapput. West Virginiami eqqartuussisut Jehovap Nalunaajaasuisa iluaqutissaannut isumaqatigiillutik aalajangiipput! Naalagaaffiulli atuarfimmut ataatsimiititaata suliassaq eqqartuussiviit pingaarnersaannut suliassanngorteqqippaa. Peqatigiiffiup eqqartuussissuserisua, Hayden C. Covington, qularunnaarnartumik eqqartuussisut pingaarnersaannut saqqummiimmat uagut ilaqutariit Washington, D.C-miippugut. Erfalasumut ullorititami, juunip 14-ani 1943-mi, eqqartuussisut pingaarnersaasa eqqartuussut nalunaarutigaat. Eqqartuussisut arfinillit pingasunit akerlerineqarlutik Jehovap Nalunaajaasuisa iluaqutissaannut aalajangiipput!

Tamatuma kingorna nuna tamakkerlugu pissutsit noqqillakkiartulerput. Soorunami qatanngutivut minnerusut atuarfimmut utermata suli perulluliorajooqarpoq taakkuninnga nuanniilliortitsisartunik, uagulli Billilu meeqqat atuarfianniikkunnaariikatassimavugut. Aalajangiussilluinnarnitsinnit ukiut arfineq-pingasut qaangiussimapput.

Jehovamut kiffartorluni inuuneq

Tamannali Jehovamut kiffartorluta inuunitsinnut aallarniutaannaavoq. Bill 16-inik ukioqarluni pionerinngorpoq. Uanga Eleanor Walaitisilu (maannakkut Miller) New York Citymi illoqarfiup immikkoortortaani Bronximi pionerioqatigiippugut. Nuannaarutigeqisannik ukioq ataaseq qaangiummat Betelimi, Brooklynimi Napasuliaq Alapernaarsuiffiup Peqatigiiffiata qullersaqarfiani, kiffartulerpunga. Aamma tassani ataavartunik ikinngutitaartorpunga.

1951-imi aasakkut Europamut ataatsimeersuariarama Erwin Klose naapippara. Tysklandimi katerisimaarnermi taanna qatanngutillu tyskit allat tusarneqisumik erinarsorlutik aliikkusersuipput. Nuannaaqalunga erinaginnerarpara. Inussiarnersumik sikisarpoq, uangalu oqaluuttorujussuuara. Sunaaffa sunnguamilluunniit paasisimanngikkaanga! Qaammatialuit qaangiummata Erwin naapeqqippara, tamatumuunakkut Betelimi Brooklynimiittumi. Napasuliaq Alapernaarsuiffiup Biibilimik atuarfiani Gileadimi ajoqersuiartortitassatut atualersimavoq. Aamma tassani oqaluuttorujussuuara Brooklynimut tikilluaqqullugu, inussiarnersumillu qungujulaffigiinnarpaanga. Sunaaffa suli paaserpiarsinnaanngikkaanga! Pitsanngoriartorporli, sivitsunngitsorlu aappassiariilerpugut.

Ajoqersuiartortitanngorpunga Østrigimilu Erwin kiffartoqatigilerlugu. Erwinili peqqiilliartuinnarpoq Jehovamut nalunaajaasuunini pillugu nazistinit peqqarniitsuliorfigineqartarsimanermik. Uanga atuarfimmit anisitaaqqanerma nalaani taanna parnaarussivimmiillunilu tigusanut katersuutsitsivimmiissimavoq. * 1954-ip naajartulernerani USA-mut uterpugut.

Tamatuma kingorna pisariaqartitsiffiunerusuni kiffartorsimanerput meeqqanillu asanartunik marlunnik Jehovap najoqqutassiai malillugit perorsaasimanerput nuannaarutigeqaarput. Meeqqat atualermata paasivara uanga atuartuunerma nalaaniilli suut tamarmik allanngorsimanngitsut. Judith Stephenilu tamarmik aalajangiusimasartik pillugu saassunneqartarput, uagullu Erwinilu  nuannaartorujussuuvugut meeqqat eqqortumik aalajangiusimanninnissaminnut sapiissusermik ersersitsimmata. Atuarnerullu naanerini tamani paasisarpara ilinniartitsisut nalunngilluinnaraat Jehovap Nalunaajaasui ingasattajaarniartuunngitsut. Qanimut suleqatigilluarsimavavut.

Kingumut qiviaraangama qularnanga oqarsinnaasarpunga ilaqutariit uagut Jehovap pilluaqqusimagaatigut. Maanna 52-iulluta Jehovamut kiffartorpugut. Ilavut arfineq-pingasut qilammi akissarsiassaminnik pereersimanngikkunik toqusimapput nunami maani makititaanissaminnik neriugisaqarlutik, ilaatigut uanga angajoqqaakka, Jehovap inuunitsinni salliutinnissaanik ilinniartinnermisigut uagutsinnik nuanningaartumik kingornussaqartitsisimasut. Ukiuni kingulliunerusuni taakkua maligassiaat assut eqqarsaatigisarsimavarput. Suliniarluareersimalluni naammassisaqarluareersimallunilu maanna Erwin qaratsamigut ajoquserneqarsimanini pissutigalugu nukilluummik anniaateqarpoq sanngiilliartuutigeqisaminik.

Misilinneqaatit tamakku atoraluarlugit piviusumik nuannaarluta isumalluarlutalu siunissaq ornipparput. Jehova tunniusimalluinnarfigalugu pallorfigissallugu aalajangersimanerput aarlaannattaluunniit peqqissimissutigisimanngilaa. — Oqaluttuartoq: Lillian Gobitas Klose. (gD 22/7 93)

[Quppernerup ataani ilanngussat]

[Qupp. 23-mi ungalusaq]

Sooq Jehovap Nalunaajaasui erfalasumik ilassinninneq ajorpat?

JEHOVAP NALUNAAJAASUI upperisarsioqatigiiupput ilumoortumik tunngaviusumik, Guutip kisimi pallorfigineqartussaaneranik, pingaarnerpaatitsisut. Jesusip najoqqutassaq tamanna Lúkarse 4:8-mi saqqummiussimavaa: ’Jehova Guutit pallorfigissavat kiffartuullugulu taanna kisiat.’ Taamaattumik Jehovap nalunaajaasui kimilluunniit imaluunniit sumilluunniit allamik qilammiittumi nunamiittumilluunniit Jehovaanngitsumik pallorfiginnikkumanngillat. Inuiaat kikkulluunniit erfalasuannik ilassinnissagalurunik pallorfiginninnertut, Guutimut pallorfiginninnerminnut tamakkiisumut innarliillunilu akerliusutut, isigissavaat.

Israelikkut kingornalu kristumiut inuit piliaannik sunilluunniit pallorfiginninnissamut mianersoqquneqartuartarsimapput. Taamaaliorneq guutipilussiornertut assuarineqarpoq. (2 Moses 20:4-6; Matîuse 22:21; 1 Juánase 5:21) Oqartoqarsinnaavali erfalasoq guutipiluusoq? Ikittuinnaat ilumoorullugu oqarumassapput annoraaminiinnaasoq. Ataqqineqartorujussuuvoq illernarluinnartutut isigineqarluni. Oqaluttuarisaanermik allattartup katuuliusup Carlton Hayesip ima oqaatigisimavaa: „Inuiaassutsimik pingaartitsinerup ilumoornissamik uppernarsaataa pingaarneq pallorfigisaasorlu qitiusoq tassa erfalasoq.“

Imaanngilarli Jehovap nalunaajaasuisa erfalasoq erfalasumilluunniit ilassinnittartut nikagigaat. Erfalasumik ilassinnittoqartillugu ataqqinnillutik nikorfaannartarput, ileqqulersuuteqarnermulli peqataajumanatik. Qularutiginngilaat nunap inatsisaanut naalannikkut erfalasumut ataqqinninnermik piviusumik ersersitsisoqartartoq.

Amerlasuut isumaqataassapput oqarutta erfalasumik ilassinninneq tamatuminnga ataqqinninnermut qulakkeerutaanngitsoq. Canadami pisimasumik tamanna nassuiaaserneqarsinnaavoq. Ilinniartitsisup atuarfiullu inspektøriata niviarsiaraq erfalasumik ilassinnissimasoq peqqusimavaat erfalasoq qiseqqullugu, niviarsiararlu naalassimavoq. Taava aamma taassuma atuaqataa niviarsiaraq ilaqutariinnit Jehovamut nalunaajaasuneersoq taama peqqusimavaat, taassumali erfalasoq qiserumanngilluinnarsimavaa. Jehovap nalunaajaasuisa erfalasoq ataqqineqartussatut isigaat. Jehovali kisiat pallorfigisaraat.

[Qupp. 23-mi assiliartaq]

Lillian ullumikkut

[Suminngaanneernera]

Dennis Marsico